Tɔɔɓɛlaa veelɛ 22 - Yálá laawoo hɛɓɛ (dc)

Ɉosiasə Ɉuda tɔɔmun

¹ Ɉosiasə kaa kwɛlan ə kɛ mɛ̨ihaaɓa, yɛ dɔɔlaa hɔlɔɓo. Ə tɔɔlaa kɛ Ɉerusalɛmə daai a kwɛlan bow haaɓa kɔ́w tɔ̨nɔ̨. Nee laa ɓa kɛ a: Yedida, yai kɛ a Bɔskatə mun Adaya lon nɛ̨ɛ̨nu.

² Ɉosiasə ə hiɛ a ɉaŋąą Yai-Laa ɲɛ̨i ɓa, ə hvilɛn gbɔlɔɔ gala Davidə nwɔ pələi mɛ̨i, hvə li ŋɛ̨i hvo li ŋɛ̨i.

Dɔ́n ɉɛɓɛ́ kaa mɛ̨nį

³ Ɉosiasə nwɔ tɔɔlaa gwɛlan bow gɔw mɛ̨ihaaɓa lɔwai, ə ɉɛɓɛ́ kɛ mun Asaliahu lon Safan tɔɔ, yai kɛ a Mesulamə mąnįn, ə dɔɔ Yai-Laa yəi bɛlɛ́n, yɛ mą:

⁴ «Lí yɛ́ ɉaláá laa həli mun gɛnɛ̨ Hilkiyahu ɓa, ə ɉɛngɔwɠaa Yai-Laa yəi bɛlɛ́n, ɉeekpəlin na kɛ, da yii bɛlɛ́ laaləi mąąkpɛ nuą da ɉon nɔi nuą yəi.

⁵ Di dɛɛ góló kɛ nuą pɔ, diɛi Yai-Laa yəi bɛlɛ́n, ə gɛ, di Yai-Laa nwɔ pɛ́lɛ́i pɛli nuą hala la.

⁶ Bɛlɛ tɔɔ nuą, bɛlɛ mɛ̨i kɛ nuą, ə lɛɛ, di bɛlɛ mɛ̨i kɛ wuluɠaa ya a da, da gwɛni haɠaaɠaa, di bɛlɛ pɛlila.

⁷ Di hvo di mąąni kɛ wali hon bələ ɓa, mąąhɔlɔɓo, di kaa góló kɛi a kili lɛlɛɛ.»

⁸ Ɉaláá laa həli mun gɛnɛ̨ Hilkiyahu yɛ ɉɛɓɛ́ kɛmun Safan ɓa: «Ŋą́ą́ dɔ́n ɉɛɓɛ́ kaa Yai-Laa yəi bɛlɛn.» Hilkiyahu ə ɉɛɓɛ́ tɛɛ Safan pɔ, yili ə mo.

⁹ Ɉɛɓɛ́ kɛ mun Safan ə pa tɔɔmun bɔɔli, ə ɉukulɔ mą, yɛ mą: «Ɉaláá laa həli nuą daa nwali kəlee həɠə Yai-Laa yəi bɛlɛ́n daa dɛɛ góló kɛ nuą pɔ, da Yai-Laa nwɔ pɛ́lɛ́i nwun nąmįną.»

¹⁰ Yili pulu, Safan yɛ tɔɔmun mą: «Ɉaláá laa həli mun Hilkiyahu ə hɛɓɛ́ tɛɛ bɔ́.» Safan ə ɉɛɓɛ́ hu woo ɓo kɛa tɔɔmun nííla.

Ɉosiasə ə Yálá kwəi mɛ̨nį hukulɔ nɛ̨ɛ̨nu Hulda mąąni kɛ

¹¹ Yii lɔ tɔɔmun ə dɔ́n ɉɛɓɛ́i tii hu woo mɛ̨n, ə mąą hɛɠɛ huɓɛla.

¹² Yili pulu, ə mo ɉaláá laa həli mun Hilkiyahu, Safan lon Ahikamə, Mikaya lon Akbɔrə, ɉɛɓɛ́ kɛ mun Safan da tɔɔmun nwɔ tímun Asaya, yɛ diɛ:

¹³ «Ka li ka Yai-Laa mąąni kɛ kwa nɔi nuą ku mąą mɛ̨nį ɓa, da Ɉuda mąą mɛ̨nį ɓa; yɛ hvilɛ na ɉɛɓɛ́i ŋɛ̨i hu woo kəlee ɓa. Mąąhɔlɔɓo, Yai-Laa lii aa holi kɛnɛ̨. Yai-Laa lii aa holi mąąhɔlɔɓo, ku nąnii di hvo wəli tɔɔ ɉɛɓɛ́i ŋɛ̨i hu woo ɓa, di hvo hiɛ yɛ bələi mąąnɛ̨ɛ̨ la.»

¹⁴ Ɉaláá laa həli mun Hilkiyahu, da Ahikamə, Akbɔrə, Safan, ə lɛɛ, Asaya, də li Yálá kwəi mɛ̨nį hukulɔ nɛ̨ɛ̨nu Hulda pɔɔli, nui kɛ a ɉəɠəɠaa mɛ̨i kaa mun Salumə, yai kɛ a Tikwa lon, yɛ ɓo a Harhasə mąnįn, nɛ̨ą li kɛ. Nɛ̨ɛ̨nui tii ə kɛ Ɉerusalɛmə daa nįnɛ̨i. Yii lɔ di kpɛɛ a di woo hukulaa mą,

¹⁵ yɛ diɛ: «Ka li, kaa nui ka tɔɔ mą:

¹⁶ Mɛ̨nii Yai-Laa ə mo ya ka, yɛ: Gáá pai mąąwɛli mɛ̨nį laai gɛɛnąą ŋɛ̨i ɓa, da nąą nuą, kpɔlɔɔ yɛ bələi ŋɛ̨i ɉɛɓɛ́i ŋɛ̨i Ɉuda tɔɔmun ə gaa ɉu woo kaa la.

¹⁷ Mąąhɔlɔɓo, daa həɠə búlú, diɛ wulɔ kun nɛ̨ɛ̨ kələn haliɠaa diɛ a mɛ́lɛ too pələ di túwɔ́ pələ hu. Níí aa kələn gwə́i kɛnɛ̨ gɛɛnąą ŋɛ̨i pɔ, ə lɛɛ, níí hvo pai laai.

¹⁸ Kɛlaa, Ɉuda tɔɔmun ŋɛ̨i ka tɔɔ mą́ą́ləngɛ mɛ̨nį ɓai, ka li kaa mą: Nwooi Yai-Laa Israɛlə nwɔ Yálá ə mo ya ka, yɛ diɛ: Nwooɠaa tii mɛ̨n ə́ mo, yii kpɔ aa ə́ lii kulɔ yɛ́, yɛ́ ə́ kpɔɔ mąą yɛɛ Yai-Laa ɲɛ̨i ɓa; nwoo ŋɛ̨i ŋą́ mo yɛ hvilɛn na nɔi ŋɛ̨i da ɉu nuą diɛ, gɛ́ kɛ diɛ: Gɛɛnaa ŋɛ̨i kaa pai lɛɛi a kɛɛnąą nɛ̨ŋɛ̨n nąą, da kɛɛnąą mąąwɛliɛ,

¹⁹ yii kpɔ ə́ lii ə too pulu, ə́ ə́ mąą həɠə huɓɛla, yɛ́ wɔlɔ nííla, yili ɓa, ɲą́ą́ gbɛli mąn, ŋą́ą́ mɛ̨n, Yai-Laa nwóó li.

²⁰ Yili mąą mɛ̨nį ɓa, gáá ə́ lɛɛi laa ə́ haa liilaa hu, ə́ lɛɠɛ ə́ nąnii diɛ. Ə lɛɛ, ə́ ɲɛ̨i hvo pai tɔɔi mąąwɛli mɛ̨nįi pai laa nɔi ŋɛ̨i da ɉu hee ɓo nuą diɛ, ɉu.» Nuą də li di nwɛlɛɛ ɲali bulu ɓo tɔɔmun mą.