Tɔɔɓɛlaa veelɛ 21 - Yálá laawoo hɛɓɛ (dc)Manase Ɉuda tɔɔmun 1 Manase kaa kwɛlan ə kɛ pow kɔ́w hveelɛ, yɛ dɔɔla hɔlɔɓo. Ə tɔɔlaa kɛ Ɉerusalɛmə daai kwɛlan bow lɔɔli kɔ́w lɔɔli yee mu. Nee laa ɓa kɛ a: Hɛfsi-Ba. 2 Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ya ɓə ə gɛ, nɔiɠaa ŋɛ̨i Yai-Laa ə di kpɛ Israɛlə nuą ɲɛ̨i tɔwɔ, di túwɔ́ pələ ɲɔ̨n tii ɓə Manase ə kɛi gɛ. 3 Ɉaláá kulɔiɠaai nąn Ezekiasə ə nąą kala, ya ɓə Manase ə pənə ə di tɔɔ. Ə Baalə nwɔ haláá kulɔ kwɛniɠaa tɔɔ, ə pənə ə wuluɠaa tɔɔ diɛ haláá kulɔ mą, yɛ bələi Akabə Israɛlə tɔɔmun ə gɛ la, yɛ haláá kulɔ yələ kwəi hɛnŋąą diɛ, yɛ tí diɛ. 4 Ə pənə ə haláá kulɔiɠaa pɛli Yai-Laa nwɔ pɛ́lɛ́i mu, ɓɛi Yai-Laa ə kɛ diɛ: «Ɓɛ Ɉerusalɛmə ɓə gáá náá heei ma.» 5 Manase ə haláá kulɔi pɛli yələ kwəi huwalawalaɠaa kəlee laa ɓa Yai-Laa nwɔ pɛ́lɛ́i gwəli hąąi. 6 Ə non gulɔ a haláá nwɔ̨n ɉu, ə kulɔ mąą hɛn damąą həɠə, yɛ nwun dɔɔ a ɲąmuątaa tɔlikpɛ nuą. Manase ə Yai-Laa líiholi a mɛ̨nį ɲɔ̨nwɔ̨ɔ̨ɠaai ə gɛ. 7 Manase ə Asera nwɔ halii mąąnįnįn dɔɔ Yai-Laa yəi bɛlɛ́n; ɓɛi Yai-Laa ə kɛ Davidə da non Salomɔn diɛ: «Bɛlɛi ŋɛ̨i, da Ɉerusalɛmə taai ŋɛ̨i, ŋą́ą́ di həɠə Israɛlə lɔi nąą kəlee, gɛ́ náá hee mą a yələ kəlee. 8 Yili ɓa, və́ kɛa pai Israɛlə lonnii mąą kwɛai nɔi ŋɛ̨i ŋą́ dɛɛ di kalaɓɔlɔni pɔ, mą, akɛ mɛ̨nįɠaai ŋą́ mo diɛ, da gɛ. Diɛ hiɛ a kpaaləi ŋą́ dɛɛ nwɔ́ tímun Moisə pɔ, yɛ nɛ diɛ.» 9 Kɛlaa, Ɉuda nuą di hvo di wəli tɔɔ mą. Manase ə mɛ̨nįɠaa tii kəlee kala, ə tɛɛ la nɔiɠaa kpɔ Yai-Laa ə di kpɛ Israɛlə lonnii tɔwɔ di wɛi ɓa. 10 Yili ɓə gɛ, Yai-Laa ə bələi ŋɛ̨i ɓo nwɔ loloɓo nuą diɛ, yɛ diɛ: 11 «Yii kpɔ Ɉuda tɔɔmun Manase aa ɲee lɔ mɛ̨nį ɲɔ̨n daaləi ŋɛ̨i hu aa tɛɛ Amɔrə nuąi kɛ ɓɛ dɔwɔ di wɛi ɓa, aa gɛ Ɉuda nuą daa nɛ̨ŋɛ̨n ɉəɠə, a kwɛli hvilɛn di mo hali ɓa, 12 Yili mąą mɛ̨nį ɓa, mɛ̨nįi Yai-Laa Israɛlə nwɔ Yálá ə mo ya ka, yɛ diɛ: ‹Gáá mawɛli mɛ̨nį ta laai Ɉuda da Ɉerusalɛmə diɛ, nui lɔpee a bələ mɛ̨n, hvo kɛ li nwəli hveelɛi a hvaa nwun mą wéé! 13 Bələi ŋą́ Samari lɔi kala la da Akabə nwɔ pɛ́lɛ́i, bələ ɓə gáá pai Ɉerusalɛmə taa kalai la. Gáá pai Ɉerusalɛmə hu waai, yɛ da kɛi hɛnɲąŋą hu waa. 14 Gwɛ́lin aa lɛɛ laa a nwɔ́ nu huwu kpəli, gáá pai di tooi di yowoɠaa yee ŋą, di kaa pai kɛi a di yowoɠaa di wɔ kɔ́ hon. 15 Mąąhɔlɔɓo, mɛ̨nįi ɲɔ̨nwɔ̨ɔ̨ ɲɛ̨i ɓa, daa gɛ, daa mɛ́lɛ kpɛɛ mą́ą́ da di nąnii; ə həɠə kpɔ volói ŋą́ di kulɔ la Eziptə lɔi hu mą, ə həli la háákələi ɓa, di hvo ta túwɔ́ li a nɛlɛɛ›.» 16 Manase aa Ɉerusalɛmə taa laahvɛɛ a tələnmo nuą ɲąmą kpɔ tɛki-tɛki. Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa ə gɛ, nɛ̨ŋɛ̨n ə Ɉuda yee lɔ ɉu, nu hva pɛli bələ ɓoi. 17 Manase kɛ mɛ̨nįɠaa, nɛ̨ŋɛ̨n ə ɉəɠə, yiliɠaa di hvo mɔ̨ɔ̨ pɛ̨ɛ̨ li Ɉuda tɔɔɓɛlaa kɛ mɛ̨nį hɛɓɛ́ hu? 18 Manase ə laa nąnii kwɛlɛ, di bowa loo ɲəi gwəli nɔw yɛa, «Uza ɲea», non Amɔn ə hee a nąn mąąhvalin. Amɔn Ɉuda tɔɔmun 19 Amɔn kaa kwɛlan ə kɛ pow hveelɛ kɔ́w hveelɛ yɛ dɔɔlaa hɔlɔɓo. Ə dɔɔlaa kɛ kwɛlan veelɛ yee mu Ɉerusalɛmə daai. Nee laa ɓa kɛ a: Mesulɛmɛtə yai kɛ a Yotva mun Harusə lon nɛ̨ɛ̨nu. 20 Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ya ɓə kpɔlɔɔ Amɔn ə gɛ, yɛ bələi nąn Manase ə gɛ la. 21 Túwɔ́ pələ ɲɔ̨n kpɔ nąn ə gɛ, ya lɔ ɓə ə hvilɛn ɉu. Ɉaliɠaai nąn ə bɛli yɛ diɛ haláá kulɔ mą, yaa kpɛli ə kwɛli hvilɛn diɛ, yɛ kóló kɛ diɛ. 22 Amɔn ə həɠə Yai-Laa pulu, yaai gaa a nąnii di wɔ Yálá. Hvo hvilɛn Yai-Laa nwɔ pələi mɛ̨i. 23 Tɔɔmun Amɔn yee mu nuą di lɔ gilii, di baa ɲəi bɛlɛ́n. 24 Kɛlaa, nɔi nuą di nɔgilii kɛ nuą tii paa. Di Amɔn lon Ɉosiasə kɛ a dɔɔmun, a nąn mąąhvalin. 25 Amɔn kɛ mɛ̨nįɠaa, mɛ̨nįɠaai ə gɛ, gəlee di hvo mɔ̨ɔ̨ pɛ̨ɛ̨ li Ɉuda tɔɔɓɛlaa kɛ mɛ̨nį hɛɓɛ́ hu? 26 Di bowa loo gbɔ-kpɔɔ kámą hu «Uza ɲea» non Ɉosiasə ə hee dɔɔlaa hu. |