Tɔɔɓɛlaa veelɛ 20 - Yálá laawoo hɛɓɛ (dc)Ezekiasə ə ɲɔ̨n ɉəɠə Yálá ə gulɔ ɉu 1 Nąąlɔwai tii, ɲɔ̨n ə pɛlɛ Ezekiasə ɓa, a ɉaa ɲɔ̨n. Yálá kwəi mɛ̨nį hukulɔ mun Amɔsə lon Esai ə pa, yɛ mą, mɛ̨nįi Yai-Laa ə mo ya ka: «Yɛ, ə́ ə́ yəi bɛlɛ́n bɛli, mąąhɔlɔɓo, ə́ kaa pai haai, hvó pai kulɔ ɲɔ̨n ŋɛ̨i hu.» 2 Ezekiasə ə tinɛ̨n, ə ɲɛ̨i hee bɛlɛ pɔ pələ, yɛ Yai-Laa hvɛli, yɛ kɛ mą: 3 «Ee kə Yai-Laa! Bələi ŋą́ hiɛ la ə́ ɲɛ̨i ɓa a ɉaŋąą, yili kaa, níí lɛlɛɛ kɛ gwə́i, gɛ́ hiɛ, ə lɛɛ, mɛ̨nįi nɛlɛɛ yɛ́ ə́ ɲɛ̨i ɓa, ya ɓə ŋą́ gɛ!» Ezekiasə ɲɛ̨iya ə yɛɛ kpɔ mą kɛnɛ̨. 4 Esai hvo kpɛli nii kɛ gwəli hąmą kɛnɛ̨ kpɛɛ li mą, Yai-Laa ə pənə ə hvaa bɔ, 5 yɛ mą: «Pənə ə́ li yɛ́ nwɔ́ lɔi Israɛlə nwun nąmu Ezekiasə ɓa: mɛ̨nįi Yai-Laa ə mo ya ka, yaai gaa a ə́ nąn Davidə nwɔ Yálá: ‹Ŋáá ə́ wɔ hvɛli ɓo woo mɛ̨n, ŋą́ą́ ə́ ɲɛ̨iya kaa, yili ɓa, gáá ə́ kulɔi ɲɔ̨n ŋɛ̨i hu. Hvóló haaɓa tɛɛ pulu, ə́ kaa pai lii Yai-Laa yəi bɛlɛ́n. 6 Gáá kwɛlan bow gɔw lɔɔli pɛ́lɛ́i ə́ wɔ yɛnɛ̨ɛ̨ ɓa, gáá pai yɛ́ ka daa ŋɛ̨i hu nuą ka kulɔi Asiri tɔɔmun ɲəi, gáá pai nínín bɛlɛi daa ŋɛ̨i mɛ̨i, ɲą́ą́ gbinįi mą́ą́ mɛ̨nį ɓa, da nwɔ́ tímun Davidə mą mɛ̨nį ɓa›.» 7 Esai yɛ diɛ, di ɓɔɔla nwɔ̨mį kɛ, di dɔ̨nɔ̨ həɠə, di ɉiɛ tɔɔmun nwɔ palaɠaai ŋą, balaɠaa di kpɛɛ. 8 Ezekiasə yɛ Esai ɓa: «Ŋą́ pɛli gbaɠala kaai ləi, gɛ́ kɛ diɛ, Yai-Laa kaa pai máloi, ə lɛɛ, hvóló haaɓa tɛɛ pulu, gɛ́ pɛli lii Yai-Laa yəi bɛlɛ́n?» 9 Esai ə nwoo ŋąąpənə, yɛ mą: «Bələi ə́ kaa pai gɔlɔn ɉii la, bələ ka: Ə́ kaa bɔ bɛlɛ kɔ́n nįnįn ə kwɛa awala kɛ tii, ə kpuɔ?» 10 Ezekiasə ə Esai woo ŋąąpənə, yɛ mą: «Pɛlɛ kɔ́n nįnįn gwɛa laa nɛɛi, kɛlaa, kpuɔ la hvo nɛɛ li.» 11 Yai-Laa nwɔ tímun ə mo Yai-Laa ɓa ə bɛlɛ kɔ́n nįnįn gbuɔ ɓɛi Akazə ə kɛi yɛɛ laai. Merodakə-Baladan nwɔ kɛlai ə dɔɔ da Esai hvaa woo 12 Nąąlɔwai, Merodakə-Baladan, yai kɛ a Baladan lon, ə kɛ a Babilonə tɔɔmun. Ə kɛla tɔɔ da kɔ́ɓo hɛnŋąą Ezekiasə ɓa. Mąąhɔlɔɓo, Ezekiasə nwɔ ɲɔ̨n mɛ̨nį bələ aa kɛ həli mą. 13 Ezekiasə kwəi ə nɛɛ nuą tii pa mɛ̨nį ɓa. Ə ɲəi hɛn gɔwɠaa nąą lɛ diɛ: wali hɛni, wulu malaan gun nɛɛ, da wulɔ kun nɛ̨ɛ̨ɠaa, ə mą kɛ yii kpɔ kɛ nwɔ hɛn gɔw pɛlɛ mu. Hɛn da hvo lɛɛ laa, yii Ezekiasə hvo nąą lɛ diɛ ɲɛ̨i bɛlɛ́n mąn, da dɔɔ kwəlii nąą kəlee. 14 Yálá kwəi mɛ̨nį hukulɔ mun Esai ə pa, yɛ tɔɔmun Ezekiasə ɓa: «Lə mɛ̨nį ɓə nuąi ŋɛ̨i di mo yɛ́, ə lɛɛ, di həɠə mį?» Ezekiasə ə nwoo ŋąąpənə, yɛ mą: «Di həɠə kpɔ kwɛaa la Babilonə lɔi hu.» 15 Esai yɛ mą: «Lə ɓə di gaa ɓɛ ə́ yəi bɛlɛ́n?» Ezekiasə yɛ mą: «Ɉɛnŋąą kpɔ ɲə́i bɛlɛ́n, ŋą́ gəlee lɛ diɛ, və́ da lɛɛ pulu.» 16 Esai yɛ Ezekiasə ɓa: «Ə́ wəli tɔɔ Yai-Laa woo ɓa, yɛ diɛ: 17 Yələ ta kaa pai ɉəlii, ɉɛnŋąą kpɔ ə́ yəi bɛlɛ́n da yiiɠaa kpɔ ə́ nąnii di diɲɛ gee ɓa, di kaa pai gəlee həɠəi də li la Babilonə lɔi hu, da lɔpee hva lɛɛ ɓɛ. Ɲą́ą́ Yai-Laa nwóó li. 18 Di kaa pai lii a ə́ lonnii tamąą da ə́ yəi bɛlɛ́n nuą tamąą. Nuąi ə́ di kaa, damąą kaa pai kɛi a Babilonə tɔɔmun nwɔ gbɛtɛgbuwuluɠaa ɲəi gwəlii.» 19 Ezekiasə yɛ Esai ɓa: «Yálá lawoo ŋɛ̨i ə́ mo mą́ą́, nɛlɛɛi.» Ezekiasə ə kɛi mo gwəi pələ, yɛ kɛ diɛ: «Nwɔ́ yɛ́nɛ́ɛ́ kaa pai kɛi a liilaa yɛnɛ̨ɛ̨.» 20 Ezekiasə kɛ mɛ̨nįɠaa gbəli, nwɔ mɛ̨nį hee kpəlin na kɛ pələ, nwɔ mɛ̨nįɠaa kɛ pələ, nwɔ ya kpaaləi ə nąą, ɲa pɛlɛ́ tɔɔ mɛ̨nį daai, gəlee di hvo mɔ̨ɔ̨ pɛɛ li Ɉuda tɔɔɓɛlaa kɛ mɛ̨nį hɛɓɛ́ hu? 21 Ezekiasə ə laa nąni kwɛlɛ, non Manase ə hee dɔɔlaa hu a nąn mahvalən. |