Tɔɔɓɛlaa veelɛ 2 - Yálá laawoo hɛɓɛ (dc)Eli tɛ mɛ̨nį yələkɔlɔn ɉu, da Elise ə mąąhvalin 1 Ɓɛlɔwai Yai-Laa ə Eli tɛ la yələkɔlɔn ɉu ɉigilin ɉu, mɛ̨nįi kɛ ya ka. Eli da Elise di həɠə Gilgalə daai, 2 Di lɛɛ lɔ lii, Eli yɛ Elise ɓa: «'Lɛɛ ɓɛ, mąąhɔlɔɓo, Yai-Laa aa dɔ́ɔ́ kpɔ Betɛlə.» Kɛlaa Elise yɛ mą: «Yii kpɔ Yai-Laa kaa a vulú, ɛlɛɛ yɛ́ ɓo a ə́ hvulú, ŋą́ą́ gwɛla gɛ́ vá həɠə ə́ pulu.» Di lɛɛ di kee pɔ de li Betɛlə. 3 Yálá kwəi mɛ̨nį hukulɔ nuą di wɔ kalan nəai kɛ Betɛlə, di di mąą lɛɠɛ Elise ɓa, diɛ mą: «Ə kili kaa ɉu yɛ́ kələi ɓə Yai-Laa kaa ə́ kalamɔ̨ɔ̨ həɠəi la ə́ mɛ̨i?» Yɛ diɛ: «Gíli kaa tii ɉu; ka ka laa pilɛ.» 4 Eli yɛ Elise ɓa: «Elise, nɛ̨ɛ̨mąą ɓə gáá vəi yɛ́, 'lɛɛ ɓɛ. Mąąhɔlɔɓo, Yai-Laa aa dɔ́ɔ́ Ɉeriko.» Elise yɛ mą: «Yii kpɔ Yai-Laa kaa a vulú, ɛlɛɛ, yɛ́ ɓo a ə́ hvulú, ŋą́ą́ gwɛla gɛ́, vá həɠə ə́ pulu.» Di lɛɛ di kee pɔ, di li Ɉeriko. 5 Yálá kwəi mɛ̨nį hukulɔ nuą di wɔ kalan nɛa di kɛ Ɉeriko, diɛ Elise ɓa: «Ə́ kili kaa ɉu yɛ́ kɛ háákələi ɓə Yai-Laa kaa ə́ wɔ kalamɔ̨ɔ̨ həɠəi la ə́ nwun mɛ̨i?» Elise yɛ diɛ: «Gíli kaa kpɔ tii ɉu, ka ka laa pilɛ.» 6 Eli yɛ Elise ɓa: «Elise, nɛ̨ɛ̨mąą ɓə gáá vəi yɛ́, lɛɛ ɓɛ, mąąhɔlɔɓo, Yai-Laa aa dɔ́ɔ́ Ɉurdɛn kwɛlɛ.» Elise yɛ mą: «Yii kpɔ Yai-Laa kaa vulú, yɛ́ ɓo a ə́ hvulú, ŋą́ą́ gwɛ́la gɛ́, vá həɠə ə́ pulu.» Da lɛɛ di kee pɔ də li Ɉurdɛn kwɛlɛ. 7 Yálá kwəi mɛ̨nį hukulɔ nuą nu pow lɔɔli di li di hee Ɉurdɛn kwɛlɛ, di mąą ta wolo kwɛaa Eli da Elise diɛ. 8 Nąąlɔwai, Eli ə nwɔ biliɉui kulɔ gbaŋəi, ə gbinįn gɛ, ə ɲá kɛlɛ la; ɲá ə tee di tɔwɔ, di tɛɛ di nu hveelɛi di kɔ́wɔ mąą kpalaa. 9 Yii kɛa di ɲá teen, Eli yɛ Elise ɓa: «Yii ə́ kaa bɔ ŋį́ gɛ yɛ́, vɛli mą́ą́, ŋį́ dɛɛ ə́ pɔ, gɛɛ və́ kɛ pai tɛi yələi, mąą yɛ kwɛa yɛ́?» Elise yɛ Eli ɓa: «Gilii tii ə́ yəi, yɛ́ Yálá mąą mɛ̨nį kɛ la, ɉeei hveelɛ ɓə gáá bɔ ə́ dɛɛ bɔ́.» 10 Eli yɛ Elise ɓa: «Mɛ̨nį walawala ka tii yáá ɉu hvɛli. Kɛlaa, ə mą kɛ tii, ɓɛlɔwai gáá pai kɛi həɠəi ə́ kwɛlɛ, yá gáá, yii ŋɛ̨i ə́ vɛli, yá ɉɔlɔɓo; kɛlaa, yá wala gáá, hva pɛli.» 11 Di kɛɛ líi, diɛ mɛ̨nįi tii ɓo, wotolo tɔ̨nɔ̨, da hooɠaa di ɓo a nwɔ̨n, di kulɔ, di Eli da Elise di ɓɛlaɓo, ɉigilin ə Eli həɠə yɛ tɛ la yələkɔlɔn ɉu. 12 Elise ə kɛli gaa, yɛ tomą, yɛ kɛ mą: «Ną́n! Ną́n! Yɛ́i Israɛlə nwɔ kɔlaɠa da nwɔ wotolo!» Yii pulu Eli ə kpɛɛ Elise ɲɛ̨i, Elise ə gwaną həɠə huɓɛla ɉu hveelɛ. 13 Yili pulu, Eli nwɔ biliɉui ŋɛ̨i kulɔ gbaŋəi ə pu, Elise ə ɉəɠə, ə pənə ə pa Ɉurdɛn kwɛlɛ, ə tɔɔ laa. 14 Biliɉui ŋɛ̨i kulɔ Eli kpaŋəi ə pu Elise yɛ ɉəɠə, gɛɛ ɲa kɛlɛi la, yɛ mą: «Yai-Laa Eli nwɔ Yálái kaa mį?» Elise yaa kpɛli ə ɲá kɛlɛ la. Ɲá ə tee dɔwɔ, ə tɛɛ. 15 Yálá kwəi mɛ̨nį hukulɔ nuą di wɔ kalan nɛa ŋɛ̨i kɛ Ɉeriko, yii kɛa di gaa tii, diɛ di kee ɓa: «Yálá nwɔ Kilii ŋɛ̨i kɛ Eli yəi, yɛ Yálá kwəi mɛ̨nį ɓo la, aa lɔ Elise hu.» Di nɛɛ mą, di pa, di Elise laakwiɛn, di pɛlɛ nɔi ɓa di kwɛli hvilɛn mą; 16 diɛ mą: «Ə́ ɲɛ̨i hee, hinąą liikpəlɛɛ pow lɔɔli kaa ɓɛ yɛ́ tínuą yəi, ku kaa di tɔɔi, di li di ə́ kalamɔ̨ɔ̨ kwɛli; mąąhɔlɔɓo, Yai-Laa nwɔ Kilii, ɉəɠəi ɲɛ̨i ə mo, a pɛli lííla ə doo yee ta tona, a wala kɛ tii, ɓoloon da hu. 'Hvaa mą, də li di gwɛli.» Elise yɛ diɛ: «Və́ kɛ li ka nu ta tɔɔ kɛɛnąą ta.» 17 Kɛlaa, di kpala pələi tii na, ə lɛɛ ɉu yɛ diɛ: «Ee! Ka di tɔɔ kani.» Di nɛɛ mą di nu pow lɔɔlii tii tɔɔ, di li di Eli kwɛli hvóló haaɓa yee mu, di hvo gaa. 18 Nuą tii di pənə di pa Elise pɔ, yɛ ɓo ni Ɉeriko. Yili yɛ diɛ: «Kɛlɛi ŋą́ mo kaa! Və́ ləi kɛ kaa: Ka hvo kɛ ka káá nu ta tɔɔi!» Elise ə Ɉeriko yá nwun gulɔiɠaa mąąhəɠə 19 Ɉeriko nuą di pa diɛ Elise ɓa: «Yɛ bələi ə́ kaa gaai la, ku wɔ mɛ̨nį nąmu, ku wɔ taai heei lɛlɛɛi, kɛlaa, ɲáɠaa di hvo lɛlɛ li, hɛn da hva lɛlɛ nɔi ɓa.» 20 Elise yɛ diɛ: «Ka gbamą nįnɛ̨ kwɛli ka kpolo pu ɉu, ka paa la.» Daa nuą di pa a ɉɛnŋąą di bɔ. 21 Elise ə kulɔ ə li ɲá nwun gulɔi pələ, ə gboloi tii taɠa laa yɛ mą: «Yai-Laa yɛ diɛ: ‹Ŋą́ą́ ɲái ŋɛ̨i mąąhəɠə, hvo kɛa pai nu ta paai, gaa pai nɔi lɛlɛi hihɛnŋąą diɛ.›» 22 Ɲá mąą ə həɠə, háá ɓa háá gaa tii, yɛ bələi Elise ə mo la. Nuą di yɛlɛ kulɔ Elise hu 23 Elise ə həɠə Ɉeriko yɛ li Betɛlə pələ. Ɉəliɛ daa kpala, lɛapɛlɛɛ di həɠə taai, diɛ yɛlɛ Elise ɓa, diɛ kɛ mą: «Nwuɔ̨ kɔ́mɔ̨, 'li! Nwuɔ̨ kɔ́mɔ̨, 'li!» 24 Elise ə tinɛ̨n, ə ɲɛ̨i hee diɛ, ə di nɛ̨ŋɛ̨n nąą Yai-Laa laa hu. Nąąlɔwai ursə hveelɛ di kulɔ nɔwɔi, di pa, di nɛapɛlɛ tii bow nąąn kɔ́w hveelɛ paa ɉu. 25 Elise ə həɠə laa ə li, Karmɛlə yee ɓa. Ɉəɠɛɛ laa ɓə ə pənə ə paa la Samari. |