Tɔɔɓɛlaa veelɛ 19 - Yálá laawoo hɛɓɛ (dc)Ezekiasə ə Yálá kwəi mɛ̨nį hukulɔ mun Esai mąąni kɛ 1 Ɓɛlɔwai tɔɔmun Ezekiasə ə nwooɠaa tii mɛ̨n na, ə mąą həɠəɠaa huɓɛla, ə mąąwɛli həɠə too gwaną; ə li Yai-Laa yəi bɛlɛ́n. 2 Yili pulu, ə dɔɔ pɛlɛ́ nwun nąmu Ɛliakimə da ɉɛɓɛ́ kɛ mun Sɛvna, da ɉaláá laa həli nuą bɔlɔpɔlɔɠaa, di kəlee daa mąąwɛli həɠə too di kwaną, ə di tɔɔ Yálá kwəi mɛ̨nį hukulɔ mun Esai pɔɔli, yai kɛ a Amɔsə lon. 3 Di mo mą, diɛ mą: «Nwooi Ezekiasə ə mo, ya ka: ‹Háákələi kaa a mąąwɛli hvóló, da liihɛlɛn voló, ə lɛɛ, da nwumɛ̨ hvóló. Yɛ bələ da mo la diɛ mą: «Nokoloi ŋɛ̨i kaai lɔwai aa həli, kɛlaa, hvaŋą hvo nee yəi, hvo gaa.» 4 Asiri tɔɔmun nwɔ kɔ́ kɔ́ kwɛli hɛn ɉəɠə mun ŋɛ̨i ə dɔɔ, yɛ pa Yálá hvulú lalan ɉii, Yai-Laa kaa kiɛ pai nwoo mɛ̨n ɉii. Nwooɠaa tii mąą mɛ̨nį ɓa, Yai-Laa ə́ wɔ Yálá kaa pai nwąną kulɔi mą, nwaa wooɠaa tii mąą mɛ̨nį ɓa. Esai! Ə́ woo tɛ Yai-Laa ɓa, nu kpəli woloi aa lɛɛ mąą mɛ̨nį ɓa.›» 5 Tɔɔmun Ezekiasə nwɔ tínuą də li di həli Esai ɓa. 6 Yili yɛ diɛ: «Mɛ̨nįi ka lii moi ka Nąmu ɓa, ya ka, Yai-Laa woo li, yɛ diɛ: Nwooɠaai ə́ kaa mɛ̨n ɉii, da nalan ŋɛ̨i Asiri tɔɔmun nwɔ nui ə mo, hvo ɲɔw yili ɓa. 7 Gáá hvaai mą, dɔɔmun tii ə pənə ə li nwɔ lɔi hu, ɓɛlɔwai gaa pai wɛlɛɛ hɔlɔɓoi la, gaa pai haai gbɔ-kpɔɔ lɔi tii hu ɓɔwa laa pɔɔ.» 8 Yii kɛa gwɛli hɛn ɉəɠə mun ə bələ mɛ̨n, diɛ kɛ Asiri tɔɔmun aa kɛ həɠə Lakisə, ə pa ə gaa Livna, diɛ kɔ́ kɔ́. 9 Asiri tɔɔmun aa kɛ bələ mɛ̨n, diɛ mą: «Nubi tɔɔmun Tikaka aa muhəɠə, yɛ pa kɔ́ pɛ́lɛ́i mą.» Asiri tɔɔmun ə pənə nwɔ̨nɔ̨ ə nuą tɔɔ Ezekiasə pɔɔli, yɛ mą: Asiri tɔɔmun ə pənə ə Ɉerusalɛmə nuą mąą ɲɔw 10 Ka li kaa Ɉuda tɔɔmun Ezekiasə ɓa: «Ə́ wɔ Yálái ə́ kilitɔɔ mąi, hvo kɛ gaa ə́ ɓowoi, yɛ kɛ diɛ, Ɉerusalɛmə taa hvo pai lɔi Asiri tɔɔmun ɲee ŋą. 11 Yɛ́ kpinįi, mɛ̨nįɠaai Asiri tɔɔmun aa nąą lɔiɠaa diɛ, ə́ gɔlɔn. Aa di kəlee di nwun napili, akɛti, yɛ́i ŋɛ̨i, yá pɛli mɔ̨ɔ̨ kulɔi ɲə́i? 12 Nɔiɠaa ŋɛ̨i ku nannii di ɉon, di wɔ haliɠaai di pɛli mɔ̨ɔ̨ di nwun mąąɓoi? Mį ɓə, Gozan, Haran, Rɛsɛfə, da Edɛn lonnii di kaa laa, diɛi kɛ Telasarə? 13 Mį ɓə Hamatə tɔɔmun gaa laa, da Lairə tɔɔmun Arpadə, da Sefarwaimə nwɛi, da Hena nwɛi, ə lɛɛ, da Iwa?» Ezekiasə ə Yálá hvɛli 14 Nuą ŋɛ̨i pa ɉɛɓɛ́, Ezekiasə ə ɉon di yəi, ə mo, ə lɛɛ, ə li la Yai-Laa yəi bɛlɛ́n. Ezekiasə ə ɉɛɓɛ́ hu hvólóon Yai-Laa lííla. 15 Ə nwoo tɛ Yai-Laa ɓa, yɛ mą: «Yai-Laa, Israɛlə nwɔ Yálá, yɛ́i ə́ kaa heeni mąąkpɛ malakaɠaa nwun mɛ̨i, yɛ́ ɓə a lɔi kəlee nwɔ Yálá tɔ̨nɔ̨, yɛ́ ɓə yələkɔlɔn da lɔi di pɛli. 16 Ə́ wəli tɔɔ, Yai-Laa ə́ nwóó mɛ̨n, ə́ ɲəlaaɓo ə́ gáá, Senakeribə nwɔ nuą ə di tɔɔ, diɛ Yálá hvulú lalan, gaa. 17 Yai-Laa tɛ̨ą li, Asiri tɔɔɓɛlaa daa lɔi tamąą hu nuą mąą mɛ̨nį pili ɉu; 18 Daa yiliɠaa di wɔ haliɠaai kəlee kələn, kɛlaa, kɛ ɓə di mo a nu kanŋaa di wɔ yɛlɛ kóló kɛɛ, di ɓo a wuluɠaa, da kwɛni haɠaaɠaa, ya ɓə gɛ, Asiri tɔɔɓɛlaa diɛ di hukala. 19 Kɛlaa, Yai-Laa kuɔ Yálá, ku nwun gulɔ Senakeribə yəi. Yá yili kɛ tii, yɛnɛ̨ɛ̨ nąą kəlee, da yɛnɛ̨ɛ̨ tɔɔɓɛlaa kəlee, da gɔlɔn diɛ: Oo Yai-Laa! Yɛ́ ɓə ə́ kaa a Yálá.» Esai ə Yai-Laa woo laa həli tɔɔmun Ezekiasə ɓa 20 Amɔsə lon Esai ə kɛla tɔɔ Ezekiasə pɔɔli, ə Yai-Laa Israɛlə nwɔ Yálá woo laa həli mą, yɛ mą: «Yai-Laa yɛ, vɛlii ŋɛ̨i ə́ mo, aa ə́ woo mɛ̨n; yɛ hvilɛn na Senakeribə ɓa, yii gaa a Asiri tɔɔmun. 21 Nwooi Yai-Laa ə mo yɛ hvilɛn na mą, ya ka: «Siɔn nɛ̨ɛ̨gbɛla kaa yɛlɛ kulɔi ə́ hu, yɛ ə́ hviiɓo Ɉerusalɛmə nɛ̨ɛ̨gbɛla ɲɛ̨i heɛi ə́ kpowola, yɛ nwun gbɛŋɛn. 22 Gbɛɛ ɓə ə́ nalan? Yɛ mɛlɛkpɛɛ mą? Gbɛɛ ɓə ə́ ə́ woo həɠəi mą? Yɛ́ gaa a ə́ ɲɛ̨i kpon bələ? Israɛlə nwɔ Yálá Mąąhəɠɛɛ ɓə! 23 Ə́i wɔ kɛlaɠaa tɔɔ, diɛ ɲą́ą́ Yai-Laa nálan. Yɛ́ kɛ diɛ: Ə́ wɔ kɔ́ wotoloɠaai hvaŋą kɛnɛ̨ pələ, Yáá tɛ yee kəlee tona, Yɛ́ həli Liban ɓɛi nu hva pɛli həlii laa, nwɔ kpitiliɠaa tee mɛ̨nį ɓa, da siprə lɛlɛɛɠaa. Yáá həli kpɔ nwɔ wəlaɠaa kpon ɉu. 24 Yɛ́ nwɔ̨nɔ̨ diɛ: Ŋą́ą́ yálɔwa ninɛ̨ɠaa tee, gɛ́ ya ninɛ̨ kpələ, ŋą́ą́ hiɛ Eziptə lɔi nąą kəlee. 25 Gbaɠala hvo yɛ́, yɛ́ ŋą́ą́ mɛ̨nįɠaa tii mąą kiliŋąhiɛ kɛ a ɉukwɛa? Hvo gɔlɔn ŋą́ą́ wɔlɔ ɉeekpəlin na kɛ a ɉukwɛa? Yii hu kɛa, mɛ̨nįɠaa tii, gáá bɔ mɛ̨nį kɛi. Mąą laa kaa ə́ yəi, ə́ pɛli taa kpɛa kpɛaa hu ɓuwɔi yɛ kwɛni. 26 Daaɠaa tii hu nuą yee kpuai, di hu aa pu diɛ, diɛ gɛ ɉuwu ɉuwu. Di kaa yɛ looɛi kalaɠaa, di ɓo yɛ gbənə wulu muhəɠɛɛ nįnɛ̨, di ɓo yɛ kalai a ɓɔn pɛlɛ kɔ́ma, di ɓo yɛ mɔ̨nun a hvelee. 27 Ə́ kɛɛ heeni, ə́ kɛɛ kulɔi yɛ́ lɔ, gəlee kpaɠala kaa mą́ą́, ə mą kɛ ɓɛi ə́ wɔ liiholi a muhəɠə laa bɔ́. 28 Yɛ bələi yáá ə́ liiholi la bɔ́, ə lɛɛ, ə́ wɔ lii ɲɔ̨n gwəi woo yɛ too nwə́lii; Yələ ta kaa pai ɉəlii, gáá pai kwɛli tooi ə́ hunwɛi. Gɛ́ hoo laa kwɛli too ə́ la, gɛ́ pənə gɛ́ li a yɛ́ ɓɛi ə́ həɠə laai. 29 «Yii pai kɛi a gɔlɔn ɉɛn, ya ka: Gwɛlan ŋɛ̨i ɓa, nuą kaa pai nɔi kɔ̨nɔ̨n mįi, gwɛlan yii tii bulu, hihɛn yii a kulɔ gbɔwɔ ɓa, diɛ mįi. Kɛlaa, gwɛlan ɉaaɓa nąą nwɛi, nuą da kɛɛ hin, di ka dɔ̨nɔ̨ kulɔ, ka viɲəɠaa hin, kaa di ɓa kɛ a ka kɔ̨nɔ̨n. 30 Ɉuda huwuhu nu kpəli woloi nwun a kulɔ ɉu, di mąą a poo kpɔ kɛnɛ̨, diɛ ɓa yɛ wulu. 31 Mąąhɔlɔɓo, nu kpəli wolo kaa pai lɛɛi Ɉerusalɛmə daai, nu kpəli ə lɛɛ yiiɠaa da kulɔ gɔ́ hu Siɔn yee ɓa. «Yai-Laa nwɔ tələnmolaa ɓə pai yili kɛi tii. 32 Yili mąą mɛ̨nį ɓa, mɛ̨nįi Yai-Laa ə mo yɛ hvilɛn na Asiri tɔɔmun mą, ya ka: Asiri tɔɔmun hvo pai lɔi daa ŋɛ̨i hu, hvo pai mɛ̨ɛ̨kɔw pilii laa, nwɔ kulaaɠaai di hvo pai pɛlii mą. Di hvo pai goto pɛ́lɛ́i ɉįi ɓa. 33 Bələ a tɛɛ la yɛ pa, bələi tii ɓə a bulu pənə la, hvo pai lɔi daa ŋɛ̨i hu, Yai-Laa woo li. 34 Gáá pai daai ŋɛ̨i mąą kpɛi, ŋą́ nínín bɛlɛ mɛ̨i, ɲą́ą́ mą́ą́ mɛ̨nį ɓa, da nwɔ́ tímun Davidə mąą mɛ̨nį ɓa.» Asiri nuą pənə mɛ̨nį da Senakeribə haa mɛ̨nį 35 Gbinii tii hu, Yai-Laa nwɔ malaka ta ə pa, ə Asiri nuą nu waa nwun dɔ̨nɔ̨ ɲee mɛ̨ihaaɓa kɔ́w lɔɔli paa di lɔwai. Yələ ɓɔɔ, nuą di di muhəɠə, nu powaɠaa lɔ ɓə kɛ gɔ́ ɓuwuɠaa mu. 36 Asiri tɔɔmun Senakeribə ə pənə ə li Ninivə daai, ə lɛɛ laa. 37 Ɓɛlɔwai ə kɛi kwɛli hvilɛn na nwɔ halii Nisrokə ɓa, Senakeribə lonnii hveelɛ: Adramelɛkə da Sarɛsɛrə, di di nąn baa a ɓɔwa, di pu, də li Araratə lɔi hu. Senakeribə lon Asaradɔn ə hee dɔɔ kpəlin ɉu a nąn mąąhvalin. |