Tɔɔɓɛlaa veelɛ 18 - Yálá laawoo hɛɓɛ (dc)Israɛlə tɔɔlaa kpɛɛi lɔwai, Ɉuda tɔɔlaa kɛɛi lɔwai Ezekiasə Ɉuda tɔɔmun 1 Ela lon Ose yai kɛ a Israɛlə tɔɔmun nwɔ tɔɔlaa gwɛlan ɉaaɓa lɔwai, Ɉuda tɔɔmun Akazə lon Ezekiasə ə dɔɔlaa hɔlɔɓo. 2 Gaa kwɛlan ə kɛ pow kɔ́w lɔɔli, ɓɛlɔwai ə dɔɔlaa hɔlɔɓo la, ə dɔɔlaa kɛ kwɛlan bow hveelɛ kɔ́w mɛ̨inąąn ɲee mu Ɉerusalɛmə. Nee laa ɓa kɛ a Avi, Ɉekaria lon. 3 Ezekiasə ə hiɛ a ɉaŋąą Yai-Laa ɲɛ̨i ɓa kpɔlɔɔ yɛ nąn Davidə. 4 Ezekiasə ɓə ɉali kɔ́iɠaa taɠa nɔi, ə gwɛni kalanŋaa taɠa, nwuluɠaai di kɛi gɔ, ə di pɔn, mala kwɛli kaaləi Moisə ə bɛli, ə ɉuyal-yali; mąąhɔlɔɓo, Israɛlə nuą di lɛɛ haláá kulɔi mą, ə lɛɛ la ɉu nwɔ yələi ə həli. Di kɛi kɛ gaaləi tii laa ɓa a: Nehustan. 5 Ezekiasə ə gilitɔɔ Israɛlə nwɔ Yálái Yai-Laa ɓa, ɉəɠɛɛ dɔɔlaa hu, nu ta hvo hɔlɔɓo yɛ pɛli túwɔ́ yɛ yaa Ɉuda tɔɔɓɛlaa lɔwai; nuąi nwɔ̨nɔ̨ kɛ daa tɛɛ laa dɔɔlaa hu dɔ̨nɔ̨ kpɛli hvo gɛ yɛ yaa. 6 Ɛlɛɛ, ə ɲee ganąn Yai-Laa ɓa, hvo həɠə bulu. Dɔ́n nwooɠaai Yai-Laa ə di tɛɛ Moisə pɔ, ə ɲee kanąn gəlee diɛ. 7 Yai-Laa ə kɛ bɔ, mɛ̨nįi lɔpee kɛ a ɲee lɔ ɉu, ɉu a nɛ̨ɛ̨ ɲəi. Ə nwun gulɔ Asiri tɔɔmun nwɔ heeɓolaa mu, hvo kɛa pənə hvo lɛɛ ɲee mu. 8 Yaa kpinįi ɲee ə tɛɛ Filisti nuą diɛ; ə həli kpɔ Gaza lɔi daa pɛlɛɛɠaa da daa leeɠaa kəlee hu. Samari hon mɛ̨nį 9 Ezekiasə nwɔ tɔɔlaa gwɛlan nąąn nɔwai, Israɛlə tɔɔmun Ela lon Ose nwɔ tɔɔlaa gwɛlan mɛ̨ihveelɛ lɔwai, Asiri tɔɔmun Salmanasarə ə pa ə kɔlaɠa pɛlɛ Samari ɓa, ə mąą tinɛ̨n. 10 Asiri nuą di nąą hon kwɛlan ɉaaɓa yee mu. Ezekiasə nwɔ tɔɔlaa gwɛlan mɛ̨ida lɔwai li kɛ, yɛ ɓo a Israɛlə tɔɔmun Ose ŋɔ tɔɔlaa gwɛlan mɛ̨inąąn nɔwai, di Samari taa hon. 11 Asiri tɔɔmun ə li a Israɛlə nuą Asiri lɔi hu. Ə li a diɛ Hala, ə mą kɛ Habɔrə, Gozan ya kwɛlɛ, ɛlɛɛ da Medi taaɠaa hu. 12 Yili ə kɛ tii, mąąhɔlɔɓo, di hvo di wəli tɔɔ Yai-Laa di wɔ Yálái woo ɓa. Di Yai-Laa nwɔ mįnɛ̨i hu woo lɛɛ, mɛ̨nįi kpɔ Yai-Laa nwɔ tímun Moisə ə mo diɛ, di hvo di wəli tɔɔ mą. Senakeribə ə pili Ɉuda lɔi hu a kɔ́ 13 Ezekiasə nwɔ tɔɔlaa gwɛlan bow nąąn nɔwai, Asiri tɔɔmun Senakeribə ə pa ə kɔ́ pɛlɛ Ɉuda nwɔ kɔ́ taaɠaa kəlee ɓa, ə di hon. 14 Ɉuda tɔɔmun Ezekiasə ə nuą tɔɔ Asiri tɔɔmun bɔɔli Lakisə, yɛ mą: «Ŋą́ą́ ɉɔ́n gɛ, hvó kɛ ə́ kaa pɛlɛi mą́ą́ a kɔ́; kɛlaa, tiɛ̨i yá naa nwúɔ̨, ŋą́ ɉəɠə.» Asiri tɔɔmun ə kɔ́ nįįhɔ̨nwɔ̨ laa Ɉuda tɔɔmun nwuɔ̨ a wali kwələ kilə waa mɛ̨inąąn da hɛni kilə nwun mɛ̨inąąn. 15 Walii kpɔ kɛ Yai-Laa yəi bɛlɛ́n, da nwalii kpɔ kɛ tɔɔmun ɲəi gəhii, Ezekiasə ə gəlee həɠə ə dɛɛ. 16 Nąąlɔwai ɓə Ezekiasə ə ɉɛnii kɛ Yai-Laa nwɔ pɛ́lɛ́i gbonŋaa ɓa ə di kulɔ la, ə hɛni pɛlɛ mą, ə dɛɛ Asiri tɔɔmun bɔ. Senakeribə nwɔ kɔ́kuláá ta ə pələ ɓo Ɉuda nuą diɛ 17 Asiri tɔɔmun ə lɛɛ Lakisə daai, ə nwɔ kɔ́kulááɠaa kəlee ɲɛ̨itɔwɔmun, da gɔ́laɠa nwun nąmu, ə mą kɛ, nwɔ kɔ́ kɔ́ hɛnŋąą həɠə mu, ə di tɔɔ Ɉerusalɛmə tɔɔmun Ezekiasə pɔɔli, da kɔ́kuláá kpulu kɛnɛ̨. Di pa, di həli Ɉerusalɛmə. Di pa di tɔɔ ɓɛi a ɲá heei kɛnɛ̨ ɓa ɲələi pələ nąą kwɛlɛ, bələi tii a li ɉəɠə waa mun bɔ yɛa pələ, mɛ̨i. 18 Di tɔɔmun mąą kɛɛ mąąni kɛ, Hilkiyahu lon Ɛliakimə, yai kɛi dɔɔ pɛlɛ́ ɲąąwooɓo, da ɉɛɓɛ́ kɛmun Sɛvna, ə lɛɛ, Asafə lon Yoa yai dɔɔ pɛlɛ́ mu mɛ̨nįɠaa kəlee di kɛ ɲee ɲą, gɔ́kulááɠaa tii di pa di tɔɔ di lííla. 19 Gɔ kɔ́ kwɛli hɛn ɉəɠəmun yɛ diɛ: «Ka mo Ezekiasə ɓa, kaa mą: Asiri tɔɔmun gɛnɛ̨ yɛ: Lə ɓə ə́ kilitɔɔi mą! 20 Yaai ə́ kɛ la diɛ: ‹Woo tɔ̨nɔ̨ a pɛli ə kɔ́ kɔ́ pələ lɛ mą́ą́, ə ɉú walawala!› Gbɛɛ ɓə ə́ kilitɔɔi mą yɛ́ ə́ kwɛlitee ɲə́i? 21 Yáá ə́ kilitɔɔ hveen gbaɠa ɓa. Nui lɔpee a gilitɔɔ Eziptə lɔi ɓa, ə gɛ a dɔɔ bulu, a mąą nu haɠa ɲee ŋą, ə lɔ ɲee hu. Bələ ɓə Eziptə tɔɔmun a gɛ la a nuąi da di kilitɔɔ mą, di kəlee. 22 «Ka pɛli nwɔ̨nɔ̨ kɛi diɛ: kwaa ku kilitɔɔ Yai-Laa ku wɔ Yálái ɓa. Yɛ́ Ezekiasə, kɛlɛi yɛ́ ɓə ɉaláá kulɔiɠaa kəlee wolo, yɛ́ kɛ Ɉuda lɔi hu nuą da Ɉerusalɛmə nuą diɛ: Gɛɛnąąɠaai ŋɛ̨i ɓə ka kɛ pɛlɛi laa ka kwɛli hvilɛn haliɠaa diɛ. 23 Yiihu kɛa, ku wɔ mɛ̨nį nąmu Asiri tɔɔmun paapɔlɔn dɔɔ kani; ŋą́ pɛli ŋą́ hoo waa hveelɛ tɛɛ ə́ pɔ, akɛ yá nuą hɔlɔɓo diɛ pɛli di gilɛ həɠəi! 24 Eziptə hooɠaa ŋɛ̨i ə́ kilitɔɔi diɛ, yili hva pɛli mą, hvo ku wɔ yalanąmu logolo ta mąą ɲɔw yɛ pu ə́ tɔwɔ! Ya ka tii yáá ə́ kilitɔɔ Eziptə wotoloɠaa diɛ, da ɉooɠaa. 25 Ɛlɛɛ, ka gɔlɔn kaa diɛ, Yai-Laa ɓə hvaa mą, ə gɛ, ŋą́ pa ŋą́ daa ŋɛ̨i wolo. Yai-Laa ɓə kɛ mą́ą́: ‹Lí, ə́ nɔi hukala.›» 26 Hilkiyahu lon Ɛliakimə, da Sɛvna, ɛlɛɛ, Yoa, di mo nui tii ɓa, diɛ mą: «Nąn! Mɛ̨nįi yɛ́ ə́ mo, mɔ yɛ́ tínuą diɛ Aramə woo hu, mąąhɔlɔɓo, nwoo yili ɓə kwa pɛli mąn ɉii; kɛlaa, hvó pələ ɓɔ kuɔ Ɉude woo hu, ə gɛ, hvo pa too nuąi ŋɛ̨i ɉįi la di wəlii.» 27 Gwɛli hɛn ɉəɠə mun yɛ diɛ: «Gaa ə́ kwəi, yɛ́ ka ə́ kalamɔ̨ɔ̨ ɓə nwɔ́ mɛ̨nį nąmu ə dɔ́ɔ́ nwooɠaa ŋɛ̨i ɓo mɛ̨nį ɓa kaa? Yiiɠaa ŋɛ̨i ɉįi mɛ̨i, di laa kaa ɉu; kaa, ka diɛni kəlee ɓə pai kɛi di kpo kɛi a kɔ̨nɔ̨n, diɛ di kpələ a di wɛlaayá.» 28 Gwɛli hɛn ɉəɠəmun ə haŋą ə tɔɔ, ə tomą kpɔ a nwoo kɛnɛ̨ Ɉude woo hu, yɛ diɛ: «Ka ka wəli tɔɔ Asiri tɔɔmun, a tɔɔmun gɛnɛ̨ nwoo ɓa! 29 Nwooi tɔɔmun ə mo ya ka: Ezekiasə hvo ka ɓowo, mąąhɔlɔɓo, hva pɛli ka kulɔi ɲéé ŋą. 30 Ka hvo ka kilitɔɔ Ezekiasə woo ɓa, yai ə kɛ la kaa: ‹Ka ka kilitɔɔ Yai-Laa ɓa; yɛ kɛ kaa, Yai-Laa kaa pai gu nwun mąąkɔ̨nwɔ̨i, daai ŋɛ̨i hvo pai tooi Asiri tɔɔmun ɲee ŋą.› 31 Ka hvo kɛa ka wəli tɔɔ Ezekiasə woo ɓa, mąąhɔlɔɓo, yii Asiri tɔɔmun ə mo ya ka: Ka hvaa mą gwa kaani gu nɛ̨ɛ̨. Ka ka kpɔɔ tɛɛ bɔ́, akɛtii, ka káá pai ka wɔ viɲə yɛɛɠaa dɔ̨nɔ̨ kulɔi da ka wɔ Ɓolaa wuluɠaai, ɛlɛɛ, ka káá ka ka kpələ a ka wɔ yálɔwa hu yá. 32 Ə lɛɛ la ɉu, ŋą́ búlu pənə, gɛ́ pa ka həɠəi, gɛ́ li a kaa lɔi takpɛli hu, yii gaa yɛ ka wɔ lɔi, ɓɛi mɔ̨nun da lɔɔ nįnɛ̨ di kaa laa. Nɔi kɔ̨nɔ̨n da lɔɔ di kaa laa, nɔi olivə wulɔ nįnɛ̨ a hɔlɔɓo ɉu, da kwɛin nwulɔ; ka pa kɛ laa, ka ka wɔ yɛnɛ̨ɛ̨ kɛ, ka hva haa. Ka hvo ka wəli tɔɔ Ezekiasə woo ɓa. Gaa ka ɓowoi, yɛ kɛ kaa: Yai-Laa kaa pai gu kulɔi mɛ̨nįi ŋɛ̨i hu. 33 Lɔi takpɛliɠaa di wɔ haliɠaa di pɛli di kulɔi mɔ̨ɔ̨ Asiri tɔɔmun ɲee ŋą? 34 Hamatə da Arpadə haliɠaa, di kaa mį? Sefarwaimə da Hena, ɛlɛɛ, Iwa di wɔ haliɠaai di kaa mį? Ɉaliɠaa tii, di pɛli mɔ̨ɔ̨ Samari lɔi kulɔi ɲéé ŋą? 35 Ɉaliɠaa tii, nɛlɛ kpɔ ɓə pɛli nwɔ lɔi kulɔi ɲə́i, yai, ka kɛ diɛ: Yai-Laa a pɛli Ɉerusalɛmə taa kulɔi ɲə́i!» 36 Nuą kəlee di di laa pilɛ, di hvo nwoo pulu pənə kpɛli tɔ̨nɔ̨. Mąąhɔlɔɓo, tɔɔmun ə kɛ diɛ: Ka hvo nwoo ŋąąpənə. 37 Dɔɔ pɛlɛ́ nwun nąmu Ɛliakimə, yai a Hilkiyahu lon, ɉɛɓɛ́ kɛmun Sɛvna da Asafə lon Yoa, yii a noloɓomun, di pənə di li Ezekiasə pɔ, daa di mąą həɠəɠaa hu ɓɛla. Di gwɛli hɛn ɉəɠəmun tii wooɠaa hukulɔ mą. |