Tɔɔɓɛlaa veelɛ 16 - Yálá laawoo hɛɓɛ (dc)

Akazə Ɉuda tɔɔmun

¹ Remaliahu lon Peka nwɔ tɔɔlaa gwɛlan bow gɔw mɛ̨ihveelɛ lɔwai, Yotamə lon Akazə ə tɔɔlaa hɔlɔɓo Ɉuda lɔi hu.

² Akazə kaa kwɛlan ə kɛ pow hveelɛ, ɓɛlɔwai ə dɔɔlaa hɔlɔɓo la. Ə tɔɔlaa kɛ a kwɛlan bow kɔ́w mɛ̨ida Ɉerusalɛmə. Hvo kɛ túwɔ́ li a ɉaŋąą Yai-Laa ɲɛ̨i ɓa, yɛ nąn Davidə.

³ Kɛlaa yaamun, ə li kpɔ ə hvilɛn Israɛlə tɔɔɓɛlaa túwɔ́ pələ hu, ə non ɉəɠə ə li la ə gulɔ a haláá, di gələn. Dúwɔ́ ɲɔ̨n tii ɓə nuąi Yai-Laa ə di kpɛ di pɔ lɔi yɛ Israɛlə nuą hee laa, di kɛi gɛ.

⁴ Ə haláá kulɔ, ə lansan kələn nuą di wɔ hali kɔ́iɠaa tii ɓa, da ɲee kpukpuɠaa tona, ə mą kɛ, da wulu kpɛa kpɛaa mu, yiiɠaai kɛ di laa ŋąąnɛ̨ɛ̨ diɛ.

⁵ Nąąlɔwai, Aramə tɔɔmun Resin, da Israɛlə tɔɔmun Remaliahu lon Peka, di pa kɔ́ pɛ́lɛ́i Ɉerusalɛmə taa ɓa, di Akazə mąą tinɛ̨n, kɛlaa, di yee hvo lɔ mą.

⁶ Nąąlɔwai, Aramə tɔɔmun Resin ə pənə ə Eilatə həɠə la, ə gɛ a Aramə nwɔɔ; ə Ɉuda nuą kpɛ laa. Yili pulu, Edɔmə nuą di pa di hee Eilatə daai, háá ɓa háá, di kaa ni laa heeni.

⁷ Akazə ə nuą tɔɔ Asiri tɔɔmun Tiglatə-Pilesɛrə pɔɔli, yɛ mą: «Gáá a ə́ lon, da ə́ wɔɔ tímun, pa ə́ gúlɔ Aramə tɔɔmun da Israɛlə tɔɔmun di yəi, daa yili mą́ą́ a kɔ́.»

⁸ Ɉɛni da nwalii kɛ Yai-Laa yəi bɛlɛ́n, yii kɛ dɔɔ pɛlɛ́ mu, Akazə ə ɉəɠə, ə dɛɛ Asiri tɔɔmun bɔ a ɉamą.

⁹ Asiri tɔɔmun ə ɲee hee Akazə woo mu. Ə pa yaa kpinįi ə kɔ́ pɛlɛ Damasə taa ɓa, ə ɉon; ə ɉu nuą tɛɛ Kirə, ə Resin paa.

¹⁰ Tɔɔmun Akazə da Asiri tɔɔmun di li Damasə, di kee kaa mɛ̨nį ɓa. Ɉaláá kulɔi tii kɛ Damasə ə gaa, tɔɔmun Akazə ə mąąnįnįn ɉəɠə, ə dɛɛ ɉaláá laa həli mun Uriya ɓa Ɉerusalɛmə. Ə yili kɛ tii, ə gɛ di ɉaláá kulɔi tii ta pɛli kpɔlɔɔ tii.

¹¹ Ɉaláá laa həli mun Uriya ə ɉaláá kulɔi pɛli yɛ bələi kpɔlɔɔ tɔɔmun Akazə ə dɔɔ pələ kpaɠala lɛ la mą. Ə gɛ kpɔlɔɔ gɛɛ tɔɔmun Akazə hvo həɠə Damasə yɛ pa.

¹² Tɔɔmun Akazə həɠɛɛ Damasə ə pa, ə ɉaláá kulɔi kaa, ə lɛɠɛ mą ə tɔɔ,

¹³ Haláái da gəlee kələn, ə gələn mɛ̨i, da haláá takpɛli. Ə nɔɔ pu ɉaláá kulɔi, ə ɲąmą taɠa taɠa mɛ̨i, yai kɛ a liilaa haláá.

¹⁴ Ɉaláá kulɔi tii kɛ a mala kwɛli, Yai-Laa lííla, ə ɉəɠə bɛlɛ́ laaləi, ə kɛ laa ɉaláá kulɔi nįnɛ̨ da bɛlɛ́ di lɔwai; ə yili tɔɔ bɛlɛ́ hɛŋɛ̨lɛn mą, ɉaláá kulɔi nįnɛ̨ pulu pələ.

¹⁵ Yili pulu, tɔɔmun Akazə yɛ ɉaláá laa həli mun Uriya ɓa: «Ɉaláái da gəlee kələn yələwala da yələwulii, gulɔ; ə tɔɔmun nwɔ haláái da gəlee kələn, da Yálá kɔ́ haláá, ə pɛlɛ la nɔi lonnii kəlee di wɔ haláái da gəlee kələn diɛ, da, Yálá kɔ́ haláá, ə́ nɔɔ pu haláá kulɔi kɛnɛ̨ mɛ̨i. Ə́ həɠə laa, ɉaláá taatɛlɛɛi da gəlee kələn ɲąmą, Yálá haláá taatɛlɛɛ ɲąmą, ə́ gəlee pu ɉaláá kulɔi kɛnɛ̨ mɛ̨i. Mala kwɛli haláá kulɔi nwɛi, ɲą́ą́ gbínii gáá pai gɛ pələ kwɛlii mą.»

¹⁶ Mɛ̨nįɠaa kpɔ tɔɔmun Akazə ə mo, ɉaláá laa həli mun Uriya ə gəlee kɛ.

¹⁷ Ɓɛi ɉaláá kulɔ nuą mąą waa kəgən gɛnɛ̨ ə kɛ laa, tɔɔmun Akazə ə nąą wolo ə gulɔ laa, gəgən gɛnɛ̨i tii kɛ heeni nįŋɛ̨ɠaa mɛ̨i, ə ɉəɠə laa, ə ɉeei pɛli a kwɛni.

¹⁸ Asiri tɔɔmun mąą mɛ̨nį ɓa, ɲįmąn ŋɛ̨i di bɛli Yai-Laa yəi bɛlɛ́n diɛ kɛ naa ɓaa: túwɔ́ yələ; Akazə ə nąą kɛ pələ mąąhvalin, ə mą kɛ ɓɛi tɔɔmun a lɔ laa ɲɛnɛ̨ɛ̨ pələ.

¹⁹ Akazə kɛ mɛ̨nį gbəliɠaa, yii kpɔ ə gɛ, kɛlɛi gəlee pɛ̨ɛ̨i Ɉuda tɔɔɓɛlaa kɛ mɛ̨nį hɛɓɛ́ hu-ee?

²⁰ Akazə ə laa nąnni kwɛlɛ, di bowa loo nąnni kámą hu Davidə taa. Non Ezekiasə ə hee a nąn mąąhvalin.