Tɔɔɓɛlaa veelɛ 14 - Yálá laawoo hɛɓɛ (dc)Amasiasə Ɉuda tɔɔmun 1 Israɛlə tɔɔmun Yoakazə lon Ɉoasə nwɔ tɔɔlaa gwɛlan veelɛ lɔwai ɓə Ɉuda tɔɔmun Ɉoasə lon Amasiasə ə kɛ la a tɔɔmun a nąn mąąhvalin. 2 Gaa kwɛlan ə kɛ pow hveelɛ kɔ́w lɔɔli, yɛ dɔɔlaa hɔlɔɓo. Ə tɔɔlaa kɛ kwɛlan pow hveelɛ kɔ́w mɛ̨inąąn ɲee mu Ɉerusalɛmə. Nee laa ɓa kɛ a: Yehoadin, yai həɠə Ɉerusalɛmə daai. 3 Amasiasə ə túwɔ́ a ɉaŋąą Yai-Laa ɲɛ̨i ɓa, kɛlaa ə mą kɛ tii, hvo həli galaɓɔlɔ Davidə pɔ. Ə túwɔ́ kpɔlɔɔ yɛ nąn Ɉoasə. 4 Kɛlaa, haláá kulɔiɠaa di hvo kpɛɛ nɔi; nɔi lonnii di kɛi lɔ li diɛ halááɠaa kulɔ, diɛ lansan kələn gɛɛnąąɠaa tii ɓa. 5 Yii kɛa Amasiasə ə hee kpɔ tin-tin dɔɔlaa hu, nuąi wɔlɔ nąn Ɉoasə paa, ə di paa yaa kpɛli. 6 Kɛlaa, hvo nu paa nuąi tii lonnii paa yɛ bələi bɛ̨ɛ̨i la Moisə nwɔ tɔ́n ɉɛɓɛ́i hu, yai Yai-Laa ə kɛ la diɛ: «Maa hvo nɛ̨ɛ̨li, di hvo lon gaa nuą paa di lonnii laa hɔn ɉu, di hvo lon baa nąn naa hɔn ɉu; mąąnɛ̨ɛ̨, nu kəlee ə haa gbɔwɔ laa hɔn ɉu.» 7 Amasiasə yee ə tɛɛ Edɔmə ɓa gboloyá ɓoloon bɔ, nu waa pow ɓə lɛɛ gɔi tii hu. Ə Sela taa hon, ə nąą laa hee a Yokteɛlə, naai tii lɔ ɓə ni mą háá ɓa a háá. 8 Nąąlɔwai, Amasiasə ə wɛlɛɛ tɔɔ Israɛlə tɔɔmun Ɉoasə pɔɔli, yai a Ɉehu lon Yoakazə nwɔ lon, yɛ mą: «'Pa gu pɛlɛ gu kee ɓa a kɔ́!» 9 Israɛlə tɔɔmun Ɉoasə ə nwɛlɛɛ pulu pənə, Ɉuda tɔɔmun Amasiasə ɓa, yɛ mą: «Liban ɲąąlən gbɔlɔ ə kɛ Liban kpitili ɓa, ‹Ə lon nɛ̨ɛ̨ɛnu tɛɛ nón bɔ a nɛ̨ą›, kɛlaa, Liban huwɔ ə pa ə ɲąąlən gbɔlɔi tii wolo wolo di kɔ́wɔ mu. 10 A tɛ̨ą, Amasiasə! Ə́ yee tii aa tɛɛ Edɔmə lɔi ɓa kɔ́ hu, ya ka tii gɛi yɛ́ ə́ nwun dɛ la. Ə́ nwun dɛ-o! Kɛlaa, lɛɛ la ə́ pɔɔli. Lə mɛ̨nį ɓa, ə́ kaa tɔɔi ə́ nwun nɛɛ ɉu mɛ̨nį tɔwɔ, yɛ́ kɛ ə́ Ɉuda lɔi lɛɛ ə́ pɔ nwun na ə pili?.» 11 Kɛlaa, Amasiasə hvo nwəli tɔɔ yili ɓa. Yili pulu ɓə kɛa, Israɛlə tɔɔmun Ɉoasə ə pa, da Ɉuda tɔɔmun Amasiasə di pɛlɛ di kee ɓa a kɔ́, Bɛtə-Sɛmɛsə, Ɉuda lɔi hu. 12 Israɛlə lɔi yee ə tɛɛ Ɉuda lɔi ɓa, nuą kəlee di pu, nu kəlee ə li bɔ taai. 13 Israɛlə tɔɔmun ə Ɉuda tɔɔmun Amasiasə hon a kɔluwɔ Bɛtə-Sɛmɛsə daai, Amasiasə yai kɛ a Ɉoasə lon, ə ɓo a Akaziasə mąnįn. Yili pulu, Ɉoasə ə pənə ə pa Ɉerusalɛmə daa, ə Ɉerusalɛmə mąąkpɛ hį́i wolo, ɓɛi ə nąą wolo ə kɛ a yee laa mą nwun nąąn; ə həɠə Ɛfraimə kpon mą, ə həli ɓɛi ɉį́i nwąną a hee laa gee ɓa gbon na. 14 Ɉɛnii kpɔ kɛ Yai-Laa yəi bɛlɛ́n, da nwali, da bɛlɛ́n ɉɛnŋąą kəlee, tɔɔmun yəi bɛlɛ́n ɉɛnŋąą, nuąi kɛ laa tolaa laa hu, Israɛlə tɔɔmun ə gəlee həɠə, ə li la Samari daai. 15 Ɉoasə kɛ mɛ̨nįɠaa gbəli, mɛ̨nįɠaai ə gɛ, nwɔ kuláá laaɠaa, nwɔ kɔ́ɠaai da Ɉuda tɔɔmun Amasiasə di gɔ́, kɛlɛi gəlee pɛ̨ɛ̨ Israɛlə tɔɔɓɛlaa kɛ mɛ̨nį hɛɓɛ́ hu-ee? 16 Ɉoasə ə laa nąnni kwɛlɛ, di bowa loo Samari daa da Israɛlə tɔɔɓɛlaa kámą hu, non Ɉeroboamə ə hee dɔɔlaa hu a nąn mąąhvalin. 17 Ɉuda tɔɔmun Amasiasə yai a Ɉoasə lon, ə kwɛlan bow kɔ́w lɔɔli kɛ yɛnɛ̨ɛ̨, Israɛlə tɔɔmun Ɉoasə Yoakazə haa pulu. 18 Amasiasə kɛ mɛ̨nį gbəliɠaa, kɛlɛi gəlee pɛ̨ɛ̨ Ɉuda tɔɔɓɛlaa kɛ mɛ̨nį hɛɓɛ́ hu-ee? 19 Di nɔgilii kɛ mą Ɉerusalɛmə daa, ə pu ə li Lakisə, di nuą laŋąn mą Lakisə, di baa laa. 20 Di bowa laa wotolo hu, hooɠaa diɛ ɲala, di paa la Ɉerusalɛmə di noo nąnni kámą hu Davidə taa. 21 Ɉuda lɔi hu nuą kəlee di Azariasə həɠə di ɉee a tɔɔmun a nąn Amasiasə mąąhvalin. Azariasə kaa kwɛlan ə kɛ a kwɛlan bow gɔw mɛ̨ida. 22 Azariasə ɓə pənə ə Eilatə tɔɔ, ə dɛɛ Ɉuda lɔi pɔ, tɔɔmun Amasiasə haa pulu. Ɉeroboamə veelɛnąą ə kɛ a Israɛlə tɔɔmun 23 Ɉoasə lon Amasiasə yai kɛ a Ɉuda tɔɔmun, nwɔ tɔɔlaa gwɛlan bow kɔ́w lɔɔli lɔwai ɓə Ɉoasə lon Ɉeroboamə ə kɛ la a tɔɔmun Samari daai, ə tɔɔlaa kɛ a kwɛlan bow nąąn kɔ́w tɔ̨nɔ̨. 24 Ə túwɔ́ kpɔ a ɲɔ̨nwɔ̨ɔ̨ Yai-Laa ɲɛ̨i ɓa; nɛ̨ŋɛ̨n kpɔ Nevatə lon Ɉeroboamə ə Israɛlə nuą yee lɔ ɉu, hvo dɔ̨nɔ̨ kpɛli mąąlaa. 25 Ya ɓə pənə ə Israɛlə lɔi kəlee hɔlɔɓo, ə həɠə Lebo-Hamatə, ə həli la Ɉurdɛn ɲa-ɓoloon bɔ gboloyá ɓa; Yai-Laa ə gbɛa wɔlɔ mɛ̨nįi tii pu nwɔ tímun Amitai lon Ɉonasə a Yai-Laa kwəi mɛ̨nį hukulɔ mun na, yai a Gatə-Hefɛrə mun. 26 Nwumɛ̨ mɛ̨nį ɲąąnwąnąąi Israɛlə ə kɛ ɉu, Yai-Laa ə nąą kaa, nu ta lɔpee hvo hɔlɔɓo, yɛ pɛli kpɔnmąą tɛɛi Israɛlə nuą pɔ, yɛ ə kɛ a luwɔ-oo, yɛ kɛ a kaa lon, nu ta hvo hɔlɔɓo a Israɛlə kulɔ ɉu mun. 27 Yai-Laa hvo kɛ kɛ li diɛ gaa Israɛlə laa kpɛɛi yələkɔlɔn mu. Ə di nwun mąąɓo a Ɉoasə lon Ɉeroboamə ɲee hu. 28 Ɉeroboamə kɛ mɛ̨nį gbəliɠaa, mɛ̨nįɠaa kpɔ ə gɛ, nwɔ kuláá laaɠaai, nwɔ kɔ́ɠaai ə gɔ, Damasə da Hamatə di hon a Israɛlə nwɔɔ, yɛ di kulɔ Ɉuda lɔi yəi, kɛlɛi gəlee pɛ̨ɛ̨ Israɛlə tɔɔɓɛlaa kɛ mɛ̨nį hɛɓɛ́ hu-ee? 29 Ɉeroboamə ə laa nąnni kwɛlɛ, non Zakari ə hee tɔɔmun a nąn mąąhvalin. |