Tɔɔɓɛlaa veelɛ 11 - Yálá laawoo hɛɓɛ (dc)

Atali ə kɛ a tɔɔmun Ɉerusalɛmə daa

¹ Yii kɛa Akaziasə nee Atali ə gɔlɔn yɛ non aa haa, ə gɔwɔ tɔɔ yɛ dɔɔ kwəlii lɛapɛlɛɛ kəlee paa.

² Kɛlaa Yohoseva yai kɛ a tɔɔmun Yoramə lon nɛ̨ɛ̨nu, ə mąąhulɔnu Akaziasə lon gbɛla mąą Ɉoasə həɠə tɔɔmun lonnii takpɛliɠaa lɔwai, ɓɛlɔwai di kɛi di paa la, ə Ɉoasə da ɲąąkɔn nɛ̨ɛ̨golo di loo pɛlɛ́ ta mu, diɛ noo Atali ɓa. Bələ ɓə Ɉoasə ə kulɔ la haa yəi.

³ Kwɛlan mɛ̨ida yee mu, di kɛi noo Yai-Laa hee pɛlɛ́ mu da dɛlɛn Yehoseva, ɓɛlɔwai Atali ə kɛ la dɔɔlaa hu.

⁴ Gwɛlan mɛ̨ihveelɛ lɔwai, Yehoyada, ə nwun nąmįną həɠə a Kari nuą, da gilɛ həɠə nuą, ɛlɛɛ kilɛn nąŋąlonŋaa təli, di pa Yai-Laa yəi bɛlɛ́n, di di kwɛla mą Yai-Laa ɲɛ̨i ɓa, yili pulu ə tɔɔmun non nɛ kɛa diɛ.

Di Ɉoasə hee a tɔɔmun Ɉerusalɛmə

⁵ Yehoyada ə di tɔɔ pələ kpaɠala lɛ diɛ, yɛ diɛ: «Yii ka káá gɛi, ya ka: ka gbulu hee haaɓa, gbulu tɔ̨nɔ̨ a nwɔ kólói kɔ́wɔ tɔɔ a túwɔ́ yələ yɛ ɲɛ̨i kɛ tɔɔmun mą.

⁶ Gbulu veelɛnąą a kɛ tɔɔni Surə kpon mą. Gbulu ɉaaɓa nąą ə ɓo tɔɔni gbon tii dɔɔmun mąąkpɛ nuą pulu mą; di kaa pai di ɲɛ̨i kɛi bɛlɛ́ ɓa.

⁷ Nu kpulu hveelɛi ŋɛ̨i da həɠə góló ɓa a túwɔ́ yələ, da di ɲɛ̨i kɛ Yai-Laa nwɔ pɛlɛ́i ɓa, ɓɛi tɔɔmun gaa laa.

⁸ Ka ka pai tɔɔi ka tɔɔmun mąątínɛ̨n ka doo gee hu, nu kəlee nwɔ kɔ́ kɔ́ kwɛli hɛn ə ɓo ɲee ŋą, nui lɔpee pai kɛi ə tɛɛ kaa a huwalawalalaa, ka baa. Ka kɛ tɔɔmun bulu, ɓɛi lɔpee a kɛi li laa.»

⁹ Gulááɠaa tii di lɛɛ ɉaláá laa həli mun Yehoyada woo mu mɛ̨nį kəlee hu. Di ɲɛ̨itɔwɔ nuą di di wɔ nuą kəlee ŋąąkpɔn, yiiɠaai di wɔ hvólói a kɛi kpɛɛ a túwɔ́ yələ, yiiɠaa diɛ di wɛi kɔ́wɔ tɔɔ.

¹⁰ Yohoyada ə tɔɔmun Davidə nwɔ kpalaɠaai da gɔ́ kɔ́ kwɛli hɛnŋaai kɛ Yai-Laa yəi bɛlɛ́n, ŋąąkwɛlɛ gulááɠaa diɛ.

¹¹ Gulááɠaa tii kəlee di wɔ kɔ́ kɔ́ hɛnŋąą ə kɛ di yəi, di ɓo tɔɔni ɉaláá kulɔi kwɛlɛ, di bɛlɛ́ mąątínɛ̨n, tɔɔmun ə lɛɛ di hąąi.

¹² Nąąlɔwai Yehoyada ə pa a tɔɔmun, ə dɔɔ ɓɔlɔ lɔ nwuɔ̨, di dɔɔmun mąąyili hɛnŋąą kɛ mą, di ɉee a tɔɔmun, diɛ di yee lɔwa mą, diɛ kɛ diɛ: «Tɔɔmun ɲíi ə kwɛa!»

¹³ Atali ə nu kpului tii woo mɛ̨n, ə muhəɠə, yɛ pa Yai-Laa yəi bɛlɛ́n gaai.

¹⁴ Ə ɲɛ̨i hee bɛlɛ́n, ə tɔɔmun nįnɛ̨ kaa tɔɔni daɓali mɛ̨i. Yɛ bələi da gɛ la di yíi pələ hu, kalanɉonŋąą di ɓo tɔɔni gwɛlɛ da tulu hvɛɛ nuą, nɔi nuą kəlee diɛ mąną dulu woo ɓa. Atali ə nwɔ həɠəɠaai huɓɛla, yɛ diɛ: «Lɔgili ɓə! Lɔgili ɓə!»

¹⁵ Kɛlaa, ɉaláá laa həli mun Yohoyada ə mo guláá nwun nąmu ɓa, yɛ mą: «Ka ɉon ka gulɔ Yai-Laa yəi bɛlɛ́n, ɛlɛɛ, nui a hvilɛ bulu, ka mąą nu paa. Mąą hvo nɛ̨ɛ̨li di hvo baa, yai-Laa yəi bɛlɛ́n.»

¹⁶ Di ɉon di ɉaŋą la a gilɛ ɉoo kwɛnąn naaləi pələ, di həli la tɔɔmun ɲəi bɛlɛ́ laaləi, nąą ɓə di baa laa.

¹⁷ Yohoyada da tɔɔmun, ɛlɛɛ, da nɔi nuą di mįnɛ̨ həɠə Yai-Laa ɲɛ̨i ɓa, ə gɛ, nɔi ə kɛ a Yai-Laa nwɔɔ.

¹⁸ Nu kpului tii kəlee di lɔ Baalə nwɔ pɛlɛ́i mu, di bu, di nwɔ haláá kulɔi taɠa, di mąąnįnįnŋaa kala, di Baalə nwɔ haláá laa həli mun Matan paa ɉaláá kulɔiɠaa lííla. Ɉaláá laa həli mun Yohoyada ə gulááɠaa tɔɔ Yai-Laa yəi bɛlɛ́ laaləi.

¹⁹ Yili pulu, ə guláá nwun nąmįną həɠə, da Kari nuą, da gilɛ həɠə nuą, da nɔi lonnii kəlee, di tɔɔmun gulɔ Yai-Laa hee pɛlɛ́ mu, di tɛɛ la a gilɛ həɠə nuą di wɔ pələi, də li la dɔɔ pɛlɛ́ mu. Ɉoasə ə hee dɔɔ kpəlin ɉu.

²⁰ Nɔi lonnii kəlee di kɛi kwəinɛ̨ɛ̨ kulɔ. Ɛlɛɛ, nɔi ə kɛ liilaa hu. Yii ɓaa Atali, di baa a ɓɔwa kwɛa tɔɔmun ɲəi bɛlɛ́ laaləi.