Tɔɔɓɛlaa veelɛ 10 - Yálá laawoo hɛɓɛ (dc)

Akabə yəi ɓɛlɛn nuą paa mɛ̨nį

¹ Akabə gwəi lonnii da ɉuwuhu hinąą di kɛ a nu pow mɛ̨ihveelɛ, diɛ ɓo Samari daai. Ɉehu ə hɛɓɛ́ɠaa pɛ̨ɛ̨, ə dɛɛ galanɉonŋąą diɛ, da nuąi kɛ Akabə lonnii mąąkwɛli Samari, yɛ diɛ:

² «Ka ɉɛɓɛ́i ŋɛ̨i hɔlɔɓo kpɔlɔɔ, yɛ bələi ka nwun nąmu lonnii kaa la ka pɔ, da nwɔ kɔ́ wotoloɠaa, ɉooɠaa, gɔ́taaɠaa, da gɔ́ kɔ́ kwɛli hɛnŋaa;

³ ka ka ɲɛ̨i laa, ka nwun nąmu lonnii lɔwai, yii viɛlaɓoɔ, tɔɔlaa yɛ mąą hon, ka ɉee nąn nwɔ tɔɔkpəlin hu, ɛlɛɛ, ka ka nwun nąmu nwɔ pɛ́lɛ́i mąąkɔ̨nwɔ̨.»

⁴ Nuą tii di ɲɔw kpɔ kɛnɛ̨, diɛ di kee ɓa: «Tɔɔɓɛlaa hveelɛ ɓə di yee hvo lɔ Ɉehu ɓa, gu hvómun kɛ guɔ! Gu yee a pɛli lɔi ləi mą?.»

⁵ Dɔɔ pɛlɛ́ ɲąąwooɓonuą, daa ɲąąwooɓonuą, nu kpɛa kpɛaa da dɔɔ lonnii mąąkwɛli nuą, di nuą tɔɔ, diɛ kɛ Ɉehu ɓa: «Ku kaa a ə́ wɔɔ luwɔɠaa, yii kpɔ a nɛ̨ɛ̨ yɛ́, ya ɓə kwa gɛ. Ku hvo nui lɔpee ta heei a tɔɔmun!.»

⁶ Ɉehu ə ɉɛɓɛ́ veelɛnąą kɛ ə dɛɛ diɛ, yɛ diɛ: «Akɛ ka káá a nwɔ́ɔ́ɠaa, ka ka wəli tɔɔ nwóó: ka ka nwun nąmu lonnii kəlee nwun dee di ŋą, ka pa tínąą, ka həli la mą́ą́ a ɓɛlɔwai Izreɛlə daai.» Yaan, Akabə lonnii tii ɲąąkwɛlɛi kɛ daa nu kpɛa kpɛaa lɔwai, diɛ di ɲąąkɔn.

⁷ Yii lɔ ɉɛɓɛ́ ə həli diɛ, di nɛɛ mą di tɔɔmun lon ɉinąą pow mɛ̨ihveelɛ tii hon, di di nwun dee di ŋą, di di nwun ganinŋaa pu kpɔlɔɠaa hu, diɛ li la Ɉehu pɔ Izreɛlə daai.

⁸ Nu ta ə pa yɛ Ɉehu ɓa: «Daa pa a tɔɔmun Akabə lonnii nwun ganinŋaa», Ɉehu yɛ mą: «Ka li ka mɛlaɓo hveelɛ ɉį́i la, ə lɛɛ laa, ə lɛɛ la ɉu yələ ə ɓo.»

⁹ Yələwala ɓo, Ɉehu ə kulɔ ə tɔɔ, ə mo nuą kəlee diɛ, yɛ diɛ: «Ka tələnmoɔi tai! Ka gɔlɔn kaa diɛ, ɲą́ą́ ɓə lɔ nwɔ́ mɛ̨nį nąmu kilii, ŋą́ baa, kɛlɛi? Kɛlaa, nuąi di nwun ganin gaa ŋɛ̨i, gbɛɛ nuą ɓə di paa?

¹⁰ Mąąnɛ̨ɛ̨ ka kili ə pu ɉu, kaa diɛ, Yai-Laa wooi ə mo yɛ hvilɛn Akabə nwɔ pɛ́lɛ́i ɓa, dɔ̨nɔ̨ kpɛli hva lɛɛ tooni kpɛli-kpɛli. Mɛ̨nįi Yai-Laa ə mo nwɔ tímun Eli laaləi, aa gəlee pɔ mɛ̨nį kɛ.»

¹¹ Nuąi kpɔ kɛ a Akabə yəi bɛlɛ́n nuą, da nwɔ nu laa pələi nuą, Ɉehu ə gəlee paa Izreɛlə kpɔ kpai, hvo dɔ̨nɔ̨ kpɛli lɛɛ, ə mą kɛ nwɔ haláá laa həli nuą kpɛa kpɛaa.

Ɉehu ə Akaziasə nwɔ nuą paa

¹² Ɉehu ə muhəɠə, yɛ li Samari pələ, gɛɛ bələ pɔ, ə həli Bɛtə-Ekɛdə mɛlaa mɛ̨i kaa nuą pɔɔli,

¹³ ɓɛlɔwai Ɉehu da Ɉuda tɔɔmun Akaziasə gaayɔwɔɠaa di kwiɛn na, yɛ diɛ: «Gbɛɛ nuą ɓa a kaa?» Diɛ mą: «Akaziasə gaayɔwɔɠaa ɓaa kuɔ, ku kaa lii ku woo pilii tɔɔmun nonnii diɛ, da nɛ̨ą Ɉezabɛlə lonnii.»

¹⁴ Ɉehu yɛ bɔ nuą diɛ: «'Ka di hon a di hvulú.» Di di hon a di hvulú, di di paa, Bɛtə-Ekɛdə ɲálɔwa kwɛlɛ. Nuąi tii di kɛ a nu pow nąąn kɔ́w hveelɛ, dɔ̨nɔ̨ kpɛli hvo kulɔ ɉu.

¹⁵ Ɉəɠɛɛ laa, da Rekavə lon Yonadavə di kwiɛn. Ɉehu ə nwoo pili mą, ɛlɛɛ, yɛ mą: «Ə́ kwəi kwɛlɛɛi mą́ą́, yɛ bələi gwə́i kwɛlɛɛi la yɛ́i?» Yonadavə yɛ mą: «Ee!» Ɉehu yɛ mą: «Akɛ gaa tii, gu gu kee túwɔ́ ɓo.» Da Yonadavə di di yee lɔ di kee yəi, Ɉehu ə Yonadavə tɛ ə ɉee gwɛlɛ nwotolo hu.

¹⁶ Ɉehu yɛ mą: «Pa gwə li, bələi Yai-Laa mąą lii kaa la kwə́i, ə́ bələ kaa.» Di ɉiɛ kulɔ Ɉehu nwɔ wotoloi hu.

¹⁷ Di həliɛ Samari, Akabə yəi bɛlɛ́n nuąi kɛ yɛnɛ̨ɛ̨, diɛ ɓo nąą daai, Ɉehu ə gəlee paa. Ə gəlee nwun napili kpɔ tɛ̨ɛ̨ tɛ̨ɛ̨, yɛ bələi Yai-Laa ə mo la Eli laaləi.

Ɉehu ə Baalə mąąwiɛ mɛ̨nį kpɛɛ

¹⁸ Ɉehu ə nɔi lonnii kəlee ɲąąkpɔn, yɛ diɛ: «Akabə ə Baalə mąą mɛ̨nį hon a viikpɛɛ, ɲą́ą́ Ɉehu, gáá pai mąą mɛ̨nį kɛi a ɲɛ̨i kɛnɛ̨.

¹⁹ A kɛ tii, ka Baalə laayəlikɛnuąi kəlee təli, di di ŋąąkpɔn gwɛ́lɛ; nuąi kpɔ da mąą mɛ̨nį kɛ, nwɔ haláá laa həli nuą kəlee, nu ta lɔpee hvo lɛɛ pulu. Mąąhɔlɔɓo, gáá bɔ, ŋą́ haláá kɛnɛ̨ kulɔ Baalə ɓa. Nui lɔpee a lɛɛ pulu, da baa.» Kɛlaa, gbąnąlaa ka tii Ɉehu ə kɛi naa, ə gɛ, ə Baalə nwɔ tínuą paa.

²⁰ Ɉehu ə mo, di Baalə mąąwiɛ ŋąąkpɔn gɛnɛ̨ too, yili ɓə gɛ, di nuą tamąą təli.

²¹ Ɉehu ə noloɓo Israɛlə lɔi hu nąą kəlee, nuąi da kwɛli hvilɛn Baalə ɓa, gəlee di pa; dɔ̨nɔ̨ kpɛli hvo lɛɛ pulu. Nuą tii kəlee di lɔ Baalə yəi bɛlɛ́n, di nąą laahvɛɛ kpɔ kɔ́n-kɔn.

²² Nui kɛ ɉəɠəɠaa nwun na, Ɉehu ə mo mą, ə ɉəɠəɠaa ŋąąkwɛlɛ Baalə nwɔ tínuą diɛ.

²³ Ɉehu da Rekavə lon Yonadavə di pa Baalə hee pɛlɛ́ mu; yɛ Baalə mąąwiɛ nuą diɛ: «Ka ka ɲɛ̨i laa ka lɔwai, akɛ Yai-Laa nwɔ tímun da hvo ɓɛ ka lɔwai, akɛ Baalə mąąwiɛ nuą təlee lɔ ɓə ɓɛi!»

²⁴ Ɉehu da Yonadavə di lɔ kɛa ɉalááɠaa kulɔ mɛ̨nį ɓa, da haláái da gelee kələn, əgɛ, di Baalə mąąwiɛ. Ɉehu aa kɛ kuláá pow mɛ̨ihaaɓa tɔɔ ɲɛnɛ̨ɛ̨, yɛ kɛ diɛ: «Nuą ŋɛ̨i gáá di tɛɛi ka pɔ, ka ta a dɔ̨nɔ̨ kpɛli lɛɛ laa a pu, mąą nu nwun a lɛɛ ɉu a nui tii pu bɔɔi.»

²⁵ Ɓɛlɔwai Ɉehu ə kpɛɛ la a Baalə mąąwiɛ haláá kulaa, ə mo gilɛ həɠə nuą da ɓíitiɛ̨ɠaa diɛ: «Ka lɔ́! Ka di paa! Da lɔpee hvo kulɔ.» Di nuą tii kɛ a kɔ́ kɔ́ ɓɔwa kɔ̨nɔ̨n, di di powa kulɔ diɛ bili. Yili pulu, gilɛ həɠə nuą da míitiɛɠaa di pənə di pa taai ɓɛi Baalə nwɔ pɛlɛ́i ə kɛ laa.

²⁶ Di ɉaláá kwɛniɠaa kulɔ Baalə nwɔ pɛ́lɛ́i mu, di di kələn.

²⁷ Di kpɛɛ lɔ a yili, di Baalə nwɔ pɛ́lɛ́i wolo, di nąą kɛ a nuą lɔwɔikɛi, ə mą kɛ yiihu, gaa ni laa.

Ɉehu Israɛlə tɔɔmun

²⁸ Bələ ɓə Ɉehu ə Baalə mɛ̨nį kpɛɛ la Israɛlə lɔi hu.

²⁹ Kɛlaa, Nevatə lon Ɉeroboamə, nɛ̨ŋɛ̨n ŋɛ̨i ə Israɛlə yee lɔ ɉu, Ɉehu hvo həɠə yiliɠaa pulu; ya ɓaa: Nįŋɛ̨ lonŋaai di bɛli a hɛni Betɛlə da Dan, hvo di kala li.

³⁰ Yai-Laa yɛ Ɉehu ɓa: «Yáá túwɔ́ a nɛlɛɛ, mɛ̨nįi ɉaŋąą ɲɛ̨́i ɓa, yáá gɛ, yáá Akabə nwɔ pɛ́lɛ́i kɛ kpɔlɔɔ yɛ bələi ŋą́ mo la. Yili mąą mɛ̨nį ɓa, ə́ kwəi lonnii, ə həɠə yiihu ɓa, ə həli la mąnįn bulu mąnįn nąąn nąą ɓa, diɛ ɓə pai kɛi heei Israɛlə dɔɔkpəlin ɉu.»

³¹ Kɛlaa, Ɉehu hvo tɔɔ a nwąnąąi hvo hiɛ a Yai-Laa Israɛlə nwɔ Yálá nwɔ tɔ́n nwooɠaai kpaalə. Nɛ̨ŋɛ̨nŋaai Ɉeroboamə ə Israɛlə yee lɔ ɉu, hvo həɠə di pulu.

³² Nąąlɔwai tii hu, Yai-Laa ə Israɛlə lɔi ta tee mą. Hazaɛlə ə di hon a kɔ́ Israɛlə lɔi ɲɛ̨n gəlee hu.

³³ Ə həɠə Ɉurdɛn ɓa voló həɠəi pələ, Galaadə lɔi kəlee, Gadə nuą da Rubɛn nwɔ nuą, ə mą kɛ Manase nwɔ nuą di wɔ lɔi, ə həli nwɔ̨nɔ̨ Aroɛrə, yai Arnɔn ɓoloon nwəli la, Galaadə lɔi, da Basan lɔi.

³⁴ Ɉehu kɛ mɛ̨nį gbəliɠaa, mɛ̨nįɠaa kpɔ ə gɛ, nwɔ kuláálaaɠaa kəlee, kɛlɛi di pɛ̨ɛ̨i Israɛlə tɔɔɓɛlaa di kɛ mɛ̨nį hɛɓɛ́ hu-ee?

³⁵ Ɉehu ə laa nąnni kwɛlɛ, di bowa loo Samari. Non Yoakazə ə hee a dɔɔmun a nąn mąąhvalin.

³⁶ Gwɛlan Ɉehu ə gɛ dɔɔlaa hu Samari, ə kɛ a kwɛlan bow hveelɛ kɔ́w mɛ̨ihaaɓa.