Tɔɔɓɛlaa veelɛ 1 - Yálá laawoo hɛɓɛ (dc)Yálá ə Akabə nwɔ túwɔ́ pələ ɲɔ̨n gwələ kulɔ 1 Tɔɔmun Akabə haa pulu, Moabə lɔi hu nuą di di muhəɠə Israɛlə lɔi pɔ. 2 Yələ ta, tɔɔmun Akaziasə ə kɛ ɲəi dɔɔ pɛlɛ́ ɲimąn mu ɲələi, Samari, ə kulɔ vaŋą pili ə too, ə mąą nwąną kpɔ kɛnɛ̨. Tɔɔmun ə nɛɛ mą ə nuą tɔɔ, diɛ li Baalə-Zebubə mąąni gɛi. Baalə-Zebubə tii ɓə kɛ a Ɛkrɔn nuą di wɔ hali. 3 Nąąlɔwai, Yai-Laa nwɔ malaka ə mo Tisbe mun Eli ɓa, yɛ mą: «'Hvilɛn bələ pɔ ə li, ə kaa lii kwiɛn ɉii a Samari tɔɔmun nwɔ wɛlɛɛ ɓo nuą, kɛ diɛ: ‹Akɛti, Yálá hvo Israɛlə nuą yəi? Yaai ka káá lii Baalə-Zebubə mąąnin gɛi, yai a Ɛkrɔn nwɔ halii?› 4 Yili pulu, yɛ nwɔ̨nɔ̨ diɛ: Mɛ̨nii Yai-Laa kaa moi Israɛlə tɔɔmun ma, ya ka: ‹Gbin tii tɔɔmun laai ŋąi, hvo kɛa pai həɠəi laa, ɉaai lɔ li.›» Eli ə li, bələi di tí la, ə gɛ tii. 5 Nuą ŋɛ̨i tɔɔmun ə di tɔɔ, di pənə di pa, tɔɔmun ə di mąąnin gɛ, yɛ diɛ: «Lə mɛ̨nį ɓa ka pənə kaa pa?» 6 Di diɛ mą: «Ku kwiɛn a nu ta bələi, yɛ kuɔ ka pənə ka li, ka mo tɔɔmun ma, kaa mą: ‹Yai-Laa yɛ diɛ: Akɛti, Yálá hvo Israɛlə nuą yəi? Yai ka káá lii Baalə-Zebubə mąąnin gɛi, yai a Ɛkrɔn nwɔ hali? Yili mąą mɛ̨nį ɓa, gbin tii ə́ kaa ŋą laani hvó pai həɠəi laa, nąą ɓə ə́ kaa haai laa.›» 7 Tɔɔmun yɛ diɛ: «Nui tii ka diɛni ka kwiɛn, yɛ nwooɠaa ŋɛ̨i ɓo kaa, gɛ pələ ə kɛ ləi?» 8 Diɛ mą: «Ɉəɠəi kɛ gwąną, ə kɛ a huwɔ ləɠa həɠə, ɉąą yilɛɛ a huwɔ kɔ́lɔ.» Di mo lɔ tii, tɔɔmun yɛ diɛ: «Tisbe mun Eli ka tii!» Akaziasə ə kɛ bɔ ə Eli hon 9 Tɔɔmun ə kɔlaɠa nwun nąmu ta tɔɔ da kɔ́kuláá pow lɔɔli, ə gɛ, di Eli hon. Eli ə kɛ heeni yee tona, gɔ́kulááɠaa tii di tɛ laa bɔ. Gɔ́laɠa nwun nąmu yɛ Eli ɓa: «Yálá kwəi mɛ̨nį hukulɔ mun! 'Tɛɛ gu yɛɛ, tɔɔmun mə mo.» 10 Kɛlaa, Eli yɛ gɔ́laɠa nwun nąmu tii ɓa: «Akɛ Yálá kwəi mɛ̨nį hukulɔ mun mąą a ɲą́ą́, gɛ́ nwɔ̨n ə kulɔ yələi ə ə́ kələn. Ka ə́ pɔ nuą!» Ɲąąɓa, nwɔ̨n ə kulɔ yələi ə gɔlaɠa nwun nąmu tii da nwɔ kɔ́kulááɠaai kələn. 11 Tɔɔmun ə pənə ə kɔlaɠa nwun nąmu tɔ̨nɔ̨ tɔɔ da kɔ́kuláá pow lɔɔlii. Gɔlaɠa nwun yɛ Eli ɓa: «Ə́ mąą hulɔ ɉa-ɉa, ə́ tɛɛ gu yɛɛ; tɔɔmun mə mo.» 12 Kɛlaa Eli yɛ diɛ: «Akɛ Yálá kwəi mɛ̨nį hukulɔ mun mąą a ɲą́ą́, gɛ́ nwɔ̨n ə kulɔ yələi ə ə́ kələn ka ə́ pɔ nuą!» Ɲąąɓa Yálá ə nwɔ̨n dɛɛ ə di kələn. 13 Tɔɔmun ə pənə nwɔ̨nɔ̨ ə kɔlaɠa nwun nąmu tɔ̨nɔ̨ tɔɔ a ɉaaɓa nąą, da kɔ́kuláá pow lɔɔli. Gɔ́laɠa nwun nąmu tii, ə tɛ ɲee nwuɔ̨, ə pu gbəlin na Eli lííla, ə nɛ̨ɛ̨mąą hvə mą, yɛ mą: «Yálá kwəi mɛ̨nį hukulɔ mun! Gɛ́ ə́ ɲɛ̨́i mąąwɛli kaa, kwa bɔ́ nuą, ə́ ku lɛɛ yɛnɛ̨ɛ̨! 14 Gíli kaa ɉu, nwɔ̨n ə kulɔ yələi, aa gɔ́laɠa nwun nąmįną hveelɛi kələn, da di pɔ nuą. Kɛlaa, nɛ̨ɛ̨mąą ɓə gáá vəi yɛ́, gɛ́ ə́ nɛ́ɛ́ yɛnɛ̨ɛ̨!» 15 Yálá nwɔ malaka yɛ Eli ɓa nąąlɔwai: «'Ə́ muhəɠə ka nui tii ka li, hvó ɲɔw.» Eli ə muhəɠə da gɔ́laɠa nwun nąmui tii di ɲee yɛɛ, di li tɔɔmun bɔ. 16 Eli yɛ tɔɔmun mą: «Yai-Laa woo ka, yɛ diɛ: Gɛ mɛ̨nį ə́ nuą tɔɔ diɛ li Ɛkrɔn nuą di wɔ hali Baalə-Zebubə mąąnin gɛi, yɛ Yálá a wala kɛ Israɛlə nuą yəi, yili ɓa, gbin tii ə́ laai ŋą, hvó pai həɠəi laa, nąą ɓə ə́ kaa haai laa.» 17 Akaziasə ə haa yɛ bələi Yai-Laa ə mo la Eli laaləi. Lon və kɛ Akaziasə ɓa; nəɠə Yoramə ɓə mąąhvalin Ɉosafatə Ɉuda tɔɔmun lon Yoramə nwɔ tɔɔla gwɛlan veelɛ lɔwai. 18 Akaziasə kɛ mɛ̨nįɠaa, yii kpɔ ə gɛ, hvo mɔ̨ɔ̨ pɛ̨ɛ̨ li Israɛlə tɔɔɓɛlaa mąą mɛ̨nį hɛɓɛ́ hu? |