Kɔlɔnikɔ Veerɛi 9 - Yálá laawoo hɛɓɛ (dc)

Saba tɔɔ nɛ̨ɛ̨nu ə pa nwoo pilii Salomɔn ɓa

¹ Saba tɔɔ nɛ̨ɛ̨nui ə Salomɔn laa pələ mąn. Nɛ̨ɛ̨nui tii ə pa Ɉerusalɛmə, Salomɔn hukɔɔn mɛ̨nį ɓa, a hanwon ɉukpinɛ̨ɛ̨ɠaa, nu kpulu kɛnɛ̨ ə ɓo bɔ da ɲɔ̨nwɔ̨mɛ̨ɛ̨ɠaa. Di tiɛ̨ ə kɛ a hɛn gunnɛ̨ɛ̨ɠaa, hɛni kpɔ kɛnɛ̨ da Kuɔkwɛni lɛlɛɛɠaa. Ɉəliɛ Salomɔn ɓa, mɛ̨nįi kpɔ kɛ gwəi, ə gəlee ɓo mą.

² Salomɔn ə nwɔɔ kɛɛmąąlən nwoo kəlee pulu pənə; kɛɛmąąlən da hvo kɛ laa, diɛ kɛ diɛ, ɉukpini pələ tɔɔmun və li bulu pənəi.

³ Saba tɔɔ nɛ̨ɛ̨nui tii ə Salomɔn ŋą kili kɛ ɲəi kaa, da bələi dɔɔi la.

⁴ Kɔ̨nɔ̨n kɛ lííla, nwɔ tínuą yii pɛlɛ, ŋą koló kɛ nuą kɛ pələ, da di mąąyili pələ, nuąi kɛ nɔɔ mɛ̨nį nwun na da di mąąyili pələ, haláá hɛn da gəlee kələn, yai ə kɛi gulɔ Yai-Laa nwɔ pɛlɛ́i mu; mɛ̨nįɠaa tii kəlee ə gɛ, dɔɔ nɛ̨ɛ̨nui tii hvo pɛli hvaai.

⁵ Yɛ tɔɔmun ma: «Mɛ̨nii ŋį́ lɛɛ bɔ lɔi ŋį́ mɛ̨n, yɛ hvilɛn na ə́ wooɠaa diɛ, da ə́ nwɔɔ kili mɛ̨nį, gaa a kpɔ a tɛ̨ą.

⁶ Vá pɛli kɛ laai mɛ̨nįɠaa tii la, akɛ və́ pa li kɛ, ɲɛ̨́i hvo tɔɔ ɉu. Ɛlɛɛ yaan, ə́ wɔɔ kili kɛ ɲəi kɛnɛ̨ pələ, bələ tɔ̨nɔ̨ lɔ ɓə di ɉukulɔ mą́ą́! Ə́ kɛnɛ̨i ə́ tɛɛ ə́ laa tɛ pələ ɓa, yii ŋį́ mɛ̨n.

⁷ Nwun nąnɛ̨ɛ̨ nuą ɓaa ə́ wɔɔ nuąi, nwun nąnɛ̨ɛ̨ nuą ɓaa yɛ́ tínuąi, diɛi di kaa ə́ lííla a yələ kəlee, diɛ yɛ́ kili kɛ ɲəi woo mɛ̨n.

⁸ Lúwɔ́ ə kɛ Yai-Laa ɓa yɛ́ Yálái, yai hvaa mą, yɛ ə́ hee nwɔ tɔɔkpəlin mɛ̨i a tɔɔmun, yɛ́ tí Yai-Laa yɛ́ Yálái ɓa! Israɛlə wɛli kaa yɛ́ Yálái ɓa, ya ɓə gɛ, yɛ́ ə́ hee nwun na a tɔɔmun a yələ kəlee mɛ̨nį, yɛ́ tələnmolaa da tɛ̨ą kɛ»

⁹ Nɛ̨ɛ̨nui tii ə hɛni kpuwulu nwundɔ̨nɔ̨ ɲee hveelɛ tɛɛ tɔɔmun Salomɔn pɔ, da hɛn gunnɛ̨ɛ̨ɠaa kpɔ kɛnɛ̨, ə bɛlɛ kuwɔ-kwɛni lɛlɛɛɠaa. Hɛn gunnɛ̨ɛ̨ ta hvo ta pa li Salomɔn pɔ, ə həli yii Saba tɔɔ nɛ̨ɛ̨nui ə paa la bɔ.

¹⁰ Yili a həɠə laa, Hiramə nwɔ tínuą da Salomɔn nwɛiɠaa tii pa a Ofirə hɛni, di pa lɔ nwɔ̨nɔ̨ a wulu lɛlɛɛɠaa da kuwɔkwɛniɠaa.

¹¹ Tɔɔmun ə nwului tii laa Yai-Laa yəi bɛlɛ́n da tɔɔmun ɲəi bɛlɛ́n, ə gwɛnįnŋąą da bɛlɛgwəiɠaa pɛli a da a nwələ too nuą di wɔɔ, di hvo ta nii kɛ da kaa li Ɉuda lɔi hu.

¹² Ɉɛn kpɔ Saba tɔɔ nɛ̨ɛ̨nui ə kɛ bɔ, ə vɛli, tɔɔmun Salomɔn ə gəlee tɛɛ bɔ; hva mą kɔ́ɔn yii ə paa la tɔɔmun bɔ mą. Yili pulu, ə bulu pənə yɛ li bɔ taai, yaa da ɲee pɔ nuą.

Tɔɔmun ɲəi hɛn gɔwɠaa

¹³ Ɉɛnii Salomɔn ə kɛi ɉɔlɔɓo kwɛlan dɔ̨nɔ̨ yee mu, ə kɛ a hɛni kilə waa pow hveelɛ,

¹⁴ yii ɉiɛ kulɔ nuą da ɲɔ̨w ɓɛlaa di kɛi paa la, naa hvo kɛli ɉu. Arabə tɔɔɓɛlaa kəlee da nɔi ɲɛ̨itɔɔ nuą di kɛi pa Salomɔn pɔ a hɛni da wali.

¹⁵ Tɔɔmun Salomɔn ə kɔ-kɔ gbala kpɛa-kpɛaa nwun veelɛ pɛli a hɛni, hɛni kilə mɛ̨ida ɓə di kɛi dɛitɛi yɔ̨w la.

¹⁶ Ə pənə ə gbala pɛlɛɛ-pɛlɛɛ nwun ɉaaɓa pɛli a hɛni, hɛni kilə haaɓa ɓə di dɛitɛi yɔ̨w la. Tɔɔmun ə di laa Liban wəla pɛlɛ mu.

¹⁷ Tɔɔmun ə tɔɔkpəlin gɛnɛ̨ pɛli, ə hɛni hu waa hva-hva hiɛ mą.

¹⁸ Nu kɔ́wɔ kpəŋəi mɛ̨ida ɓə kɛ a nu həli dɔɔkpəlin tii ɓa, nu kɔ́wɔ tɔɔi ə kɛ mą a hɛni, gbəlin ɲee ə kɛ mą ɓɛ pələ da ɓɛ pələ, yalá mąą nįnį́n veelɛ ə kɛ tɔɔni ɲeeɠaa kwɛlɛ.

¹⁹ Ɛlɛɛ, yalá pow gɔw hveelɛ di kɛ tɔɔni bələ hveelɛi kəlee, ɓɛ pələ mɛ̨ida, ɓɛ pələ mɛ̨ida. Di hvo ta gulɔmąą ta kɛli tɔɔlaa tai lɔpee hu.

²⁰ Tɔɔmun Salomɔn kpələ gəgənŋąą kəlee di kɛ a hɛni, Liban wəla pɛlɛ mu hɛnɲąŋąɠaa kəlee di kɛ a hɛni hu waa hva-hva; di kpɛli kɛi wali kwɛli kaa a hɛn da a Salomɔn nwɔɔ yələ.

²¹ Gbalai tɔɔ, kələnŋąą di kɛ tɔɔmun ɲəi, di kɛi li Tarsisə da Hiramə nwɔ nuą, ɛlɛɛ, kwɛlan ɉaaɓa haaɓa, Tarsisə kələnŋąą di kɛi pa a hɛni, wali, hə́lə ɲin, kwala da nwɛ̨niɠaa.

²² Tɔɔmun Salomɔn ə kɛnɛ̨ ə tɛɛ yɛnɛ̨ɛ̨ tɔɔɓɛlaa kəlee diɛ hɛn gɔw mɛ̨nį hu, da kili kɛ ɲəi mɛ̨nį hu.

²³ Yɛnɛ̨ɛ̨ tɔɔɓɛlaa kəlee di kɛi tɔɔ a di nwąnąi, diɛ kɛ di Salomɔn kaa, ɛlɛɛ, gilii Yálá ə doo gwəi, di nwɔɔ kili kɛ ɲəi woo mɛ̨n.

²⁴ Nu kəlee di kɛi pa a ɉamą; daɠaa wali hɛnŋąą, hɛni hɛnŋąą, həɠəɠaa, kɔ-kɔ kwɛli hɛnŋąą, hɛn gunnɛ̨ɛ̨ɠaa, hooɠaa da tiɛ̨-həɠə hooɠaa; yili ə kɛi kɛ tii a kwɛlan gəlee.

²⁵ Hoo kələ waa nąąn ɓə kɛ Salomɔn yəi da wotoloɠaa, ɛlɛɛ, hoo gilɛ həɠə nuą waa pow gɔw hveelɛ, ə di hee gɔkúlaa taaɠaa hu, da Ɉerusalɛmə tɔɔmun gwɛlɛ.

²⁶ Ə hee tɔɔɓɛlaa kəlee mɛ̨i, ə həɠə ɲa kɛnɛ̨ɛ̨i ɓa, ə həli la Filisti nuą di wɔɔ lɔi ɓa da Eziptə nuą ɲɛ̨n mą.

²⁷ Tɔɔmun ə gɛ, wali ə kɛnɛ̨ Ɉerusalɛmə lɔ yɛ kwɛni, ɛlɛɛ, kpitili wulu ə kɛ lɔ laa yɛ ɓɔɔla nɛ̨ŋɛ̨ lɔi hu.

²⁸ Salomɔn ŋą hooɠaai di kɛi həɠə Eziptə lɔi hu, ɛlɛɛ, da lɔi kəlee hu.

Salomɔn haa mɛ̨nį

²⁹ Salomɔn kɛ mɛ̨nį takpɛliɠaa tii, ə həɠə dɔlɔɔ tɔlɔɔɠaa ɓa, ə həli la gbəlamąąɠaa ɓa, di pɛ̨ɛ̨i Yálá kwəi mɛ̨nį hukulɔ mun Natan ŋą hɛɓɛ́i hu, da pɛ̨ɛ̨ Yálá kwəi mɛ̨nį hukulɔ mun Ahiya ŋɛ̨i kɛ Silo nwɛi hu, da gwɛlɛɛn gɛɛ kaamun Yedo nwɔ hɛɓɛ́í hu, gwɛlɛɛn gɛɛ ŋɛ̨i ə gaa yɛ hvilɛn na Nevatə lon Ɉeroboamə ɓa.

³⁰ Salomɔn ə kwɛlan bow nąąn gɛ tɔɔlaa hu Ɉerusalɛmə Israɛlə lɔi mɛ̨i.

³¹ Salomɔn ə laa nąnni kwɛlɛ. Di now Davidə taa nąn bɔɔli. Non Roboamə ə hee nąn bɔɔŋą a tɔɔmun.