Kɔlɔnikɔ Veerɛi 8 - Yálá laawoo hɛɓɛ (dc)

Salomɔn kɛ mɛ̨nį takpɛliɠaa

¹ Gwɛlan bow hveelɛi ŋɛ̨i Salomɔn ə gɛ yɛ Yai-Laa nwɔ pɛlɛ́i tɔɔ da gbɔwɔ kpįnįi nwɛi,

² daaɠaa tii Hiramə ə di tɛɛ bɔ, ə pənə ə di tɔɔ, ə Israɛlə lonnii hee laa.

³ Salomɔn ə pɛlɛ Hamat-Sova ɓa ə ɉon.

⁴ Salomɔn ə Tadmɔrə taa tɔɔ nɔi pun ɉu da gwɛlɛ taaɠaa, ə kɔ-kɔ kwɛli hɛnŋąą pu daaɠaa tii ə dɔɔ ɉu Hamatə.

⁵ Salomɔn ə Bɛtə-Horɔn ɲanwuɔ̨ da Bɛtə-Horɔn ɲakpalaa tɔɔ, yiiɠaai kɛ a kɔ́ taa mąątinɛ̨nŋąą a hįį kwɛli kpon doɔ na.

⁶ Ə Baalatə tɔɔ da yee mu taaɠaa kəlee ə gɛ a kɔ-kɔ kwɛli hɛnŋąą pui, da daaɠaa kpɔ tii nwotoloɠaa da ɉoo gilɛ həɠə nuą di kɛ laa; yili lɔ ɓə Salomɔn ə kɛ bɔ, ə pɛlɛ la Ɉerusalɛmə ɓa da Liban, da nɔiɠaa kpɔ tii kɛ ɲee mu.

⁷ Hɛtə nuą taɠaa di kɛ nɔi, Amɔrə nuą, Perizi nuą, Hivi nuą, da Ɉebusə nuą; diɛi tii di hvo kɛ a Israɛlə nuą ta.

⁸ Di lonnii tii lɛɛ nɔi, di pu, Israɛlə lonnii di hvo di paai, Salomɔn ə di hon a pɔlɛtɛɠaa ə mą kɛ yiihu.

⁹ Kɛlaa, Salomɔn hvo Israɛlə lon da pɛlɛ luwɔ koló ɓa, mąąhɔlɔɓo, diɛ ɓə kɛ a gɔkuláaɠaa, ɉoo gilɛ həɠə mɛ̨nįɠaa nwun na, nwotoloɠaa da ɉoo gilɛ həɠə nuą nwun nąmįną.

¹⁰ Tɔɔmun Salomɔn nwɔ nwun nąmįnąi, da nɔi nwun nąmįną diɛ ka: Nu nwun veelɛ ɲeelɔɔli ɓə kɛi nɔi lonnii ɲąąwooɓo.

¹¹ Salomɔn ə Faraɔn lon nɛ̨ɛ̨nu kulɔ Davidə taa, ə li ə nɔ bɛlɛi ə dɔɔ mą mu. Tɔɔmun Salomɔn ə kɛ gbɔwɔ ɓa: «Ə mą kpɛli kɛ nɛ̨́ą ɓə, mąą hvo nɛ̨ɛ̨li hvo kɛ Israɛlə tɔɔmun Davidə yəi bɛlɛ́n, mąąhɔlɔɓo, ɓɛi Yai-Laa ŋą mįnɛ̨ kəhii ə lɔ laa, kɛɛnąą mąąhəɠɛɛ li.»

¹² Ə həɠə kɛa ɲələ ɓa, Salomɔn ə kɛi Yai-Laa kɔ́ haláá kulɔ a haláái da gəlee kələn, ɓɛi ŋɛ̨i ə Yai-Laa ŋą haláá kulɔi bɛli laa bɛlɛ ɲɛ̨i tɔwɔ;

¹³ ə kɛi gulɔ yɛ bələi ɲələ tɛitɛi kəlee ŋą haláá kulɔ pələ ə kɛ la, a bələi Moisə ə mąą tɔ́n naa la. Vįitɔɔ yələɠaa nwɛi, ɲąnįn dɔɔ nįnɛ̨ɠaa, da ɉɛli yələɠaa; di kɛi gɛ gee mɛ̨i haaɓa kwɛlan dɛitɛi kəlee yee mu. Nɛɠɛi hvo tɛ li mąą hɛli, nɔwɔ mɛ̨ihveelɛ hɛli, da gələɠaa mąą hɛli.

¹⁴ Salomɔn ə ɉaláá kulɔ nuą heekpəlin na kɛ, di wɔɔ kolóɠaa hu, yɛ bələi nąn Davidə ə mąą tɔ́n naa la: Levi lonnii, nu kəlee nwɔ kuu ə kɛ mą, diɛ Yálá mąąwiɛ, diɛ di mąą kolóɠaa kɛ ɉaláá kulɔ nuą yee mu. Bɛlɛ́ laaləi nuą, nu kəlee da dɔɔi bɛlɛ́ laaləi tɛitɛi kəlee ɓa. Hvó gaai, bələ ɓə Davidə Yálá nwɔ nu ə mo la.

¹⁵ Mɛ̨nįɠaai tɔɔmun ə mo, yɛ hvilɛn na ɉaláá kulɔ nuą diɛ da Levi lonnii, mɛ̨nį kəlee hu, da ɉɛn gɔw hu, di hvo dɔ̨nɔ̨ kpɛli mąąlaa.

¹⁶ Bələ ɓə Salomɔn ə ɲee laa kulɔ la gɛ kolóɠaa kəlee ɓa, ə həɠə ɲələi di Yai-Laa ŋą pɛlɛ́i hvilɛn na, ə həli la naa kulɔ yələ ɓa, a ɲələi Yai-Laa ŋą pɛlɛ́i di kpɛɛ la a dɔɔ.

¹⁷ Nąąlɔwai, Salomɔn ə li Esiɔn-Gɛvɛrə da Eilatə pələ gboloyá kwɛlɛ Edɔmə lɔi hu.

¹⁸ Hiramə ə ya ŋą kələnŋąą tɛɛ ɲee mu nuą pɔ, diɛi kɛ ya kɔ́lɔn, di həli Ofirə da Salomɔn ŋą nuą; di pa a hɛni kilə waa pow kɔw haaɓa Salomɔn pɔ.