Kɔlɔnikɔ Veerɛi 7 - Yálá laawoo hɛɓɛ (dc)

Ɉalááɠaai di kɛli gulɔ Yai-Laa ɓa

¹ Kpɛɛi Salomɔn ə mo a Yálá hvɛliɛ, nwɔ̨n ə həɠə yələi pələ, ə yɛɛ, ə ɉaláá hɛn yii da gələ kələn, da ɉaláá hɛn dakpɛliɠaa kəlee kələn. Ɛlɛɛ Yai-Laa Mąąɲįnɛ̨n ə Bɛlɛ laa hvɛɛ.

² Ɉaláá laahəlinuą di hvo pɛli lɔi Yai-Laa Hee Pɛlɛ mu, mąąhɔlɔɓo Yai-Laa Mąąɲįnɛ̨n aa kɛ Yai-Laa hee Pɛlɛ laa hvɛɛ.

³ Israɛlə lonnii kəlee di nwɔ̨n gaa yɛ yɛɛ, Yai-Laa Mąąɲįnɛ̨n ə ɓo mɛ̨i; di di nwun vilɛn nɔi ɓa, di pɛlɛ di lii ɓa; diɛ Yai-Laa Laa tɛ. Mąąhɔlɔɓo ŋą mɛ̨nį lɛlɛɛi, ŋą wɛlikɛmąąlaa ɲɛ̨n və mą.

⁴ Tɔɔmun da nɔi lonnii kəlee di haláá kulɔ Yai-Laa ɓa.

⁵ Tɔɔmun Salomɔn ə nįŋɛ̨ waa pow hveelɛ kɔ́w hveelɛ haláá kulɔ, da taatɛlɛɛ pɛlɛɛ pɛlɛɛ waa nwun dɔ̨nɔ̨ waa pow hveelɛ. Bələ ɓə tɔɔmun da nɔi lonnii kəle di Yálá ŋą pɛlɛ́i mąąhəɠə hɛli pu la.

⁶ Ɉaláá laa həli nuą di kɛ tɔɔni di tɔɔi. Yai-Laa ŋą hvɛliɠaai di kɛ léviɠaa yəi, a vɛliɠaai tii Davidə ə di pɛlii Yai-Laa mąąwiɛ mɛ̨nį ɓai. Mąąhɔlɔɓo nwɔ wɛlikɛmąąlaa ɲɛ̨n və mą. Ɓɛlɔwai kɛ Davidə a kɛli mo la léviteɠaa diɛ diɛ Yálá mąątɛ̨nɛ̨i, ɉaláá laa həli nuą di kɛ tɔɔnįn di kwɛlɛ diɛ dulú hvɛɛ, ɛlɛɛ Israɛlə nuą kəlee di kɛ tɔɔnin.

⁷ Salomɔn ə lúwɔ́ too gwəli hɛ̨ąi ɓa. Yai-Laa ŋą pɛlɛ́i lííla. Hvo gaai nąą ɓə ɉaláá hɛn ɲii da gəlee kələn, nąą ɓə da gulɔ laa, da Niiɓa haláá hɛn nwulaaɠaa, gbala ə tɔɔ, haláá hɛn ɲii da gəlee kələn, da gɔ́ taatɛlɛɛɠaa, da daatɛlɛɛ wulaaɠaa di hva pɛli gwɛli kpɔlu haláá kulɔi yai Salomɔn ə dɔɔ mɛ̨i.

⁸ Salomɔn ə ɉɛlii tii pu hvóló mɛ̨ihveelɛ yee mu, da Israɛlə nuą kəlee. Ə kɛ a ɲąąkpɔn gɛnɛ̨, diɛ həɠə Lebo-Hamatə, ə həli kpɔ la Eziptə yái ɓa.

⁹ Di voló mɛ̨ihaaɓa yələ kɛ a hvįitɔɔ hvoló, hvó gaai, di ɉaláá kulɔi nįnɛ̨ kulɔ a hvoló mɛ̨ihveelɛ, di ɉɛli pu a hvoló mɛ̨ihveelɛ yee mu.

¹⁰ Ɲąnin mɛ̨ihveelɛnąą nwɔ pow hveelɛ kɔ́w haaɓa yələ, ə ɓo ɲee pɔ nuą diɛ, nu kəlee diɛ li di yəi bɛlɛ́ɠaa laaləi a kwəinɛ̨ɛ̨, di liinɛ̨ɛ̨i kɛ mɛ̨inɛ̨ɛ̨ Yai-Laa ə Davidə ɓa, da non Salomɔn, ə pɛlɛ la nwɔ nu huwui Israɛlə kəlee ɓa.

Yálá ə gbɔwɔ lɛ nwɔ̨nɔ̨ Salomɔn ɓa

¹¹ Salomɔn ə ɲee laa kulɔ Yai-Laa nwɔ pɛlɛ́i da dɔɔmun nwɔ pɛlɛ́i ɓa, koloi lɔpee ə kɛ bɔ ə gɛ, ə gɛ Yai-Laa nwɔ pɛlɛ́i ɓa da gbɔwɔ nwɔɔ pɛlɛ́i ɓa, ə yiliɠaa kəlee kɛ, ə ɲee laa kulɔ.

¹² Nąąlɔwai Yai-Laa ə gbɔwɔ lɛ mą, kwíihɛ̨ą, yɛ Salomɔn ɓa: «Ŋą́ą́ yɛ́ hvɛli woo mąn, ɛlɛɛ, ŋą́ą́ hvaa mą, ŋą́ą́ gɛɛnąą ŋɛ̨i həɠə ɉu, ŋą́ą́ gɛ a nwɔ́ɔ́ haláá kulɔ pɛlɛ.

¹³ Akɛ ŋį́ yələ kɔ́lɔn naa kpulu, tulɔ awala kɛ pui, ŋį́ peeləɠaa tí diɛ nɔi hɛnŋąą hukala, ŋį́ nɔi wolo ɲɔ̨n bili nwɔ́ lɔi lonnii lɔwai,

¹⁴ ɛlɛɛ akɛ, ŋį́ nu huwui diɛi da náá hvɛli di mɛ̨i, da di kpɔɔ mąąyɛɛ, da vɛ́li, diɛ ɲɛ̨́ilaa gwɛli, da həɠə di túwɔ́ pələ ɲɔ̨nŋąą pulu, ŋį́ lɛɛ yələ kɔ́lɔn ɉu, ŋį́ wə́li tɔɔ di woo ɓa, ŋį́ di kɛ nɛ̨ŋɛ̨n mąąhvaalɛɛ, ŋį́ nɔi kɔ́lɔi pɔ̨nɔ̨.

¹⁵ Yii hu kɛa, ɲɛ̨́nąą ɓoɔi, wə́li tɔɔ vɛli ɓoi a gɛ gɛɛnąą ŋɛ̨i mą.

¹⁶ Yii hu, ŋą́ą́ bɛlɛ́i ŋɛ̨i həɠə ɉu, ŋą́ą́ gɛ a nííɓa pɛlɛ; ŋą́ą́ mąąhəɠə, əgɛ, ə kɛ mą a yələ kəlee. Ɲɛ̨́i da gíli di kaa pai kɛi mą a yələ kəlee.

¹⁷ Yii ɓaa ə́ wɛi, yá ɲɛ̨́i ɓa yɛ bələi ə́ nąn Davidə ə hiɛ la, mɛ̨nįi lɔpee ŋį́ ə́ tí la yɛ́ gəlee kɛ, yɛ́ hiɛ a nwɔ́ tɔ́n nwooɠaa da bɔ liɛwooɠaa da bɔ yiiɓo pələ;

¹⁸ ŋį́ ə wɔɔ tɔɔkpəlin laa hɔn mo, yɛ bələi ŋį́ naakwɛlanmo la ə́ nąn Davidə ɓa, gɛ́ kɛ mą: ‹Ə́ kwəi lonnii di hvo pai kpɛɛi Israɛlə dɔɔkpəlin ɉu, a yələ kəlee mɛ̨nį.›

¹⁹ Kɛlaa, ka ká pulu tɔɔ mą́ą́, kaa nwɔ́ tɔ́n nwooɠaa da bɔ liɛwooɠaa lɛɛ, yai ŋį́ naa ka ɲɛ̨i, kaa hvilɛn haliɠaa pulu, kaa kwɛli hvilɛn diɛ;

²⁰ ka gɛ tii, nɔi ŋɛ̨i ŋį́ dɛɛ ka pɔ, ŋį́ ka kulɔ ɉu, ɛlɛɛ, bɛlɛ́i ŋɛ̨i ŋį́ mąąhəɠə ŋį́ náá hee mą, ŋį́ bili, ŋį́ gulɔ ɲɛ̨́i mu, ŋį́ gɛ a hį́į lɔi kəlee ŋą yɛlɛ kulɔ ɉu hɛn, diɛ yɛlɛ mą.

²¹ Bɛlɛ mąąwia kɛnɛ̨i ŋɛ̨i, nui lɔpee pai kɛi tɛɛi gwɛlɛ, gwəi a pili mą, yɛ kɛ diɛ: ‹Lə ɓə kɛ yai, Yai-Laa ə mɛ̨nįi ŋɛ̨i laa nɔi ŋɛ̨i ɓa da bɛlɛ́i ŋɛ̨i?›

²² Nuą kaa pai kɛi diɛ: ‹Mąąhɔlɔɓo, daa di pulu tɔɔ Yai-Laa ɓa, yaai gaa a di nąnni di wɔɔ Yálá. A Ɲálái di kulɔ Eziptə lɔi hu, daa nɛɛ laa diɛ hvilɛn haliɠaa pulu, diɛ kwɛli hvilɛn diɛ, diɛ tí diɛ. Mɛ̨nįi ə mɛ̨nį nwąnąą ŋɛ̨i laa la diɛ, yaa li.›»