Kɔlɔnikɔ Veerɛi 6 - Yálá laawoo hɛɓɛ (dc)

¹ Nąąlɔwai Salomɔn yɛ diɛ: «Yai-Laa kaa bɔ Ə hee kpįnįi.

² Ɲą́ą́n, ŋą́ą́ pɛlɛ́ tɔɔ yɛ́, a tɔɔ pɛlɛ kpɔ-kpɔ, a pɛlɛ́i yá pɛli kɛi mu a yələ kəlee.»

Salomɔn ə mɛ̨nį ɓo nuą diɛ a ɉɛli pɛlɛ laa ɓo yələ

³ Israɛlə nu kpɔn gəlee ə kɛ tɔɔni, tɔɔmun ə tinɛ̨n, ə lúwɔ́ too nu kpulu kəlee ɓa.

⁴ Yɛ diɛ: «Mąąwiɛ ə Yai-Laa ɓa, Israɛlə nwɔ Yálá! Yaa kpįnįi ə pə́lə́ ɓo ną́n Davidə ɓa a naaləi, ɛlɛɛ, mɛ̨nįi ə mo, ə gɛ ɲee hu. Mɛ̨nįi ə mo ya ka, yɛ diɛ:

⁵ ‹Ə həɠə ɲələi ŋį́ nwɔ́ nu huwui kulɔ la Eziptə lɔi hu mą, ə həli la yiihu ɓa, və́ taa ta həɠə ɉu Israɛlə lɔi ta lɔpee hu, gɛ́ pɛlɛ́ tɔɔ laa, náá yɛ pɛli kɛi laa; ɛlɛɛ, və́ nu ta həɠə, yɛ pɛli kɛi nwɔ́ nu huwui a Israɛlə nwun na.

⁶ Kɛlaa, Ɉerusalɛmə ɓə ŋį́ ɉəɠə ɉu, náá yɛ kɛ laa, ɛlɛɛ, Davidə ɓə ŋį́ ɉu, a nwɔ́ nu huwui Israɛlə ɲąąwooɓomun.›

⁷ Ną́n Davidə ə kɛ kpɔ bɔ ə pɛlɛ́ tɔɔ Yai-Laa Israɛlə ŋą Yálái ɓa.

⁸ Kɛlaa, Yai-Laa ə kɛ ną́n Davidə ɓa: ‹Pɛlɛ tɔɔ mɛ̨nį náá ɓa wɛli ə kə yɛ́, mɛ̨nį lɛlɛɛ li;

⁹ Kɛlaa, yɛ́ kpįnįle hvo pai bɛlɛi tii tɔɔi, ə́ lon mə, ə́ kwəi lon mə, ya ɓə pai bɛlɛi tii tɔɔi náá ɓa.›

¹⁰ Mɛ̨nįi tii Yai-Laa ə mo, aa bɔ mɛ̨nį kɛ. Ɲą́ą́ ɓə ną́n Davidə mąąhvalin, ŋą́ą́ hee Israɛlə tɔɔkpəlin mɛ̨i, yɛ bələi Yai-Laa ə mo la. Ŋą́ą́ bɛlɛ́i ŋɛ̨i tɔɔ Yai-Laa laa ɓa, Israɛlə nwɔ Yálá.

¹¹ Ɛlɛɛ, ŋį́ gəhi laa laa, yai Yai-Laa nwɔ mįnɛ̨i da Israɛlə di ɉəɠə gaa ɉu.»

Salomɔn ŋą Yálá hvɛli woo kɛnɛ̨i

¹² Salomɔn ə kɛ tɔɔni Yai-Laa nwɔ haláá kulɔi lííla, Israɛlə nu kpɔn gəlee ɲɛ̨itɔwɔ; ə ɲee haɠan.

¹³ Hvo gaai, Salomɔn aa kɛ hɛn da tɔɔ gwəli hɛ̨ąi a kwɛli kpɔlu, gwɛaa a yee laa mą lɔɔli, goloon ɉu ə ɓo a yee laa mą lɔɔli, muhəɠɛɛ a yee laa mą haaɓa, ə tɛ ɉɛn tii mɛ̨i, ə pu nwungəla; Israɛlə nu kpɔn gəlee ɲɛ̨i ɓa. Ə ɲee haɠa ɲələi pələ,

¹⁴ yɛ diɛ: «Yai-Laa Israɛlə nwɔ Yálá! Yálá ta hvo laa diɛ pɛli gɔwɔn ɉii Yɛ́, yələi pələ mąn, ə mą kɛ, lɔi ɓa pələ; yɛ pɛli lɛɛi mįnɛ̨ woo pulu, a wɛlikɛmąąlaai ɲɛ̨n dee hvo mą, ə́ wɔɔ tínuą diɛ, diɛi da hiɛ ə́ ɲɛ̨i mu, di kwəi tɔ̨nɔ̨ mɛ̨i.

¹⁵ Mɛ̨nįi ə́ naakwɛlanmo ə́ nwɔ tímun ną́n Davidə ɓa, yáá bɔ mɛ̨nį kɛ. Mɛ̨nįi ə́ mo ə́ laaləi, yáá bɔ mɛ̨nį kɛ a ə́ yee, yɛ bələi ku kaa gaai la háákələi.

¹⁶ Akɛ tii kani, Yai-Laa Israɛlə nwɔ Yálá! Nwooi ə́ mo ə́ wɔɔ tímun ną́n Davidə ɓa, yɛ kɛ mą: ‹Ə́ huwu hvo pai kpɛɛi nííla Israɛlə nwɔ tɔɔkpəlin mɛ̨i, akɛ ə́ lonnii daa kɛi di hiɛ pələ ɲɛ̨lɛkɛ, diɛ túwɔ́ a nwɔ́ɔ́ tɔ́n nwooi, yɛ bələi ə́ hiɛ la ɲɛ̨́i ɓa.›

¹⁷ Yii hu kɛa, Yai-Laa Israɛlə nwɔ Yálá! Mɛ̨nįi tii ə́ mo yɛ́ tímun Davidə ɓa, ə lɛɛ kani mą.

¹⁸ Yálá a pɛli mɔ̨ɔ̨ heei nuą lɔwai ɓɛ yɛnɛ̨ɛ̨ kpɔ a neelee? Yələ kɔ́lɔn yaa kpįnįle, da yələ kɔ́lɔn mɛ̨i pələ, di hva pɛli Ə́ mu! Gu hvo mun kɛ bɛlɛi ɲɛ̨i ŋį́ dɔɔ yɛ́i!

¹⁹ Yai-Laa nwɔ́ Yálá! Ə́ wəli tɔɔ kani, yɛ́ tímun nwɔ hvɛli woo da nwɔ nɛ̨ɛ̨mąą hvə woo ɓa, yaai gaa naa həii yɛ́!

²⁰ Ə́ ɲɛ̨i kɛ bɛlɛ́i ŋɛ̨i ɓa a hvóló da kpįnį, a ɓɛ ŋɛ̨i Ə́ kɛ diɛ Ə́ kaa Ə́ laa heei laa. Ə́ hvɛlii ŋɛ̨i yɛ́ tímun gaa moi gɛɛnąą ŋɛ̨i ɓa, Ə́ wəli tɔɔ mą!

²¹ Ə́ mąąnɛ̨ɛ̨ wooɠaai yɛ́ tímun da yɛ́ nu huwui Israɛlə di kaa moi yɛ́, gɛɛnąą ŋɛ̨i ɓa, nɛ̨ɛ̨ Yɛ́! Ə́ wəli tɔɔ mą! Ɓɛi tii Ə́ kaa laa yələ kɔ́lɔn ɉu, Ə́ wəli tɔɔ laa diɛ, Ə́ ku mąąhvaalɛɛ.

²² «Nu ta a ɉɔn gɛ a mɛlanmun da, ɛlɛɛ, yili a nɛ̨ŋɛ̨n naa, yɛ gwɛla la Ə́ nwɔɔ haláá kulɔi lííla, bɛlɛ́i ŋɛ̨i lííla,

²³ 'Lɛɛ yələ kɔ́lɔn ɉu, ə́ ə́ wəli tɔɔ, ə́ ə́ kɛ mɛ̨nį kɛ ɉu, ə́ di lɔwai woo ɓo, nui ɉɔn gɛ, ə́ ɉutɔɔ a nwɔ nɛ̨ŋɛ̨n yɛɛ yá mo a nwun; ɛlɛɛ, ə́ tələnmomun ŋą tələnmolaa too pɔ̨nɔ̨ ŋą, ə́ ɉon, yɛ bələi dələnmoɔ la.

²⁴ «Yɛ́ nu huwui Israɛlə ɲowo ta yee a tɛɛmą kɔ́ hu, mąąhɔlɔɓo aa nɛ̨ŋɛ̨n ɉəɠə yɛ́, mąą nu a ɉɔn mąąhvalin, yɛ Ə́ laa tɛ, yɛ Ə́ hvɛli, yɛ nɛ̨ɛ̨mąą hvə yɛ́ Ə́ wɔ́ɔ́ pɛlɛ́i ŋɛ̨i mu,

²⁵ Yɛ́n, lɛɛ yələ kɔ́lɔn ɉu, Ə́i wəli tɔɔ nwoo ɓa, Ə́ yɛ́ nu huwui Israɛlə nwɔ nɛ̨ŋɛ̨n mąąhvaalɛɛ, ɛlɛɛ, Ə́ pənə Ə́ paa la nɔi ŋɛ̨i hu, yai Ə́ dɛɛ da nąnni di pɔ.

²⁶ «Yələ kɔ́lɔn naa a kpulu, tulɔ a wala kɛ pui, mąąhɔlɔɓo, nɔi lonnii daa nɛ̨ŋɛ̨n ɉəɠə Yɛ́, da di ɲɛ̨i tinɛ̨n gɛɛnąą ŋɛ̨i pɔ pələ, diɛ Ə́ hvɛli, diɛ Ə́ laa tɛ, diɛ di yee kulɔ di wɔɔ nɛ̨ŋɛ̨n hu, mąąhɔlɔɓo, Yáá mɔ̨nɔ̨ laa di mɛ̨i,

²⁷ Yɛ́n, lɛɛ yələ kɔ́lɔn ɉu, ə́ ə́ wəli tɔɔ yɛ́ tínuąi da yɛ́ nu huwui Israɛlə di wɔɔ nɛ̨ŋɛ̨n mąąhvaalɛɛ. Bələ ɓə yá kpaalə lɛlɛɛ lɛ la diɛ, diɛ hiɛ ɉu; yá gɛ tii, ə́ túlɔ́ tɛɛ yɛ́ lɔi pɔ; a nɔi ŋɛ̨i ə́ dɛɛ yɛ́ nuhuwui pɔ a ə́ kwɛlin.

²⁸ Pulu a pa tooi nɔi, ɲɔ̨n a pu nu kanŋaa mɛ̨i, díiɠaa da ɉihɛnŋąą da pa di yee lɛɛi, peeləɠaa, ponįnŋąą awala kɛ tii, ɉaiɠaa, awala kɛ tii, di yowoɠaa da di wɔɔ taaɠaa mąątinɛ̨n a kɔ́; ə kɛ a mɛ̨nį ɲąąnwąnąą huwui lɔpee, ə kɛ a ɲɔ̨n ɉuwu lɔpee,

²⁹ Akɛ Israɛlə Ə́ wɔɔ nu huwui, awala kɛ tii, nui lɔpee gəlee ta, gili a pu nwɔ ɲɔ̨n mɛ̨nį hu, awala kɛ tii nwɔɔ mɔ̨nɔ̨ hu, vɛliɓo nwun nɔpee da naa həli Yɛ́, nɛ̨ɛ̨mąą hvə woo nwun nɔpee da naa həli Yɛ́, di ɲɛ̨i hiɛ bɛlɛ́i ŋɛ̨i pɔ pələ,

³⁰ Yɛ́n, lɛɛ yələ kɔ́lɔn ɉu, ɓɛi Ə́ kaa laa, Ə́i wəli tɔɔ, Ə́ nu kəlee mąąhvaalɛɛ, Ə́ di hon yɛ bələi nu kəlee túwɔ́ pələ kaa la. Mąąhɔlɔɓo Ə́ nu kəlee kwəi kili kɔ́lɔn, Yɛ́ tɔ̨nɔ̨ gbən, Yɛ́ lɔ ɓə nu kan gɔlɔn da di gwəi kili.

³¹ Əgɛ, diɛ ɲɔ̨w Yɛ́, diɛ hiɛ a Ə́ yeekpiɛ tənən di yii hvóló kəlee hu, nɔi ŋɛ̨i Ə́ dɛɛ di nąnni pɔ, diɛ lamu ɉu.

³² «Ə mą kɛ a nwɛ̨ąi hvo a Ə́ wɔɔ nu huwui Israɛlə mun da, a həɠə lɔi takpɛli hu kwɛaa la, Ə́ laa kɛnɛ̨i mąą mɛ̨nį ɓa, da Ə́ yee walawala laa mąą mɛ̨i ɓa yii aa bələ mɛ̨n, a pa bɛlɛ́i ŋɛ̨i mu, yɛ Ə́ hvɛli;

³³ Yɛ́n, lɛɛ yələ kɔ́lɔn ɉu, ɓɛi Ə́ kaa laa, Ə́i wəli tɔɔ nwoo ɓa, mɛ̨nįi gaa ɉuhvɛlii Yɛ́, gɛ mą. Əgɛ, yɛnɛ̨ɛ̨ lɔiɠaa kəlee, di Ə́ laa kɔ́lɔn, diɛ ɲɔ̨w Yɛ́, yɛ bələi Ə́ wɔɔ nu huwu Israɛlə a ɲɔ̨w la Yɛ́, ɛlɛɛ, di kili ə pu diɛ kɛ, bɛlɛ́i ŋɛ̨i ŋį́ dɔɔ, mu ɓə da Ə́ təli laa a Ə́ laa.

³⁴ «Ə́ wɔɔ nuąi daa kɛi pa lii kɔ́ pɛlɛi di yowoɠaa diɛ, diɛ ɉon a bələi Yá nɛ diɛ, da di ɲɛ̨i tinɛ̨n di ɉee, daai ŋɛ̨i Ə́ ɉəɠə ɉu, da bɛlɛ́i ŋɛ̨i ŋį́ dɔɔ Ə́ laa ɓa, diɛ Ə́ hvɛli,

³⁵ Lɛɛ yələ kɔ́lɔn ɉu, Ə́i wəli tɔɔ di wɔɔ hvɛliɓo woo ɓa da di wɔɔ nɛ̨ɛ̨mąą hvə woo; Ə́ gɔ́ nɛ̨ɛ̨ diɛ.

³⁶ «Da nɛ̨ŋɛ̨n ɉəɠə Yɛ́, hvo gaai, nu hvo laa, yɛ kɛ hva nɛ̨ŋɛ̨n ɉəɠə; ɛlɛɛ, Yá Ə́ liiholi di pɔ, nuą di hon kɔ́ hu, da li a diɛ lɔi takpɛli hu kwɛaa la, awala kɛ tii kpuɔ la,

³⁷ nɔi tii di kaa ɉu a luwɔ, da di kiliŋąhiɛ laa, diɛ di hɔn mąąhvalin, di lɛɛ laa nɔi tii hu di nɛ̨ɛ̨mąąhvə Yɛ́, diɛ kɛ Yɛ́: ‹Kwaa ku hɔn gɛ a Yɛ́, kwaa nɛ̨ŋɛ̨n ɉəɠə Yɛ́›,

³⁸ da pənə da pa Ə́ pɔ a di kwəi kwəlɛɛ, a di lii kəlee, ɓɛi tii di li laa a diɛ nuwɔlaa hu, da Ə́ hvɛli di ɲɛ̨i tínɛ̨nŋąą di wɔ lɔi pɔ pələ, a nɔi ɲɛ̨i Ə́ dɛɛ di nąnni pɔ, daai Ə́ gɛ a Ə́ liiɓa taa bɔ pələ, da Bɛlɛ ɲɛ̨i ŋį́ dɔɔ Ə́ Laa ɓa bɔ Pələ;

³⁹ Lɛɛ yələ kɔ́lɔn ɉu, ɓɛi tii Ə́ kaa laa, Ə́ wəli tɔɔ di woo ɓa; Ə́ wəli tɔɔ di wɔ hvɛli wooi da di wɔ nɛ̨ɛ̨mąąhvə wooi ɓa; 'di nwąną kulɔ, ɛlɛɛ, yɛ́ nu huwui a nɛ̨ŋɛ̨n ɉəɠə Yɛ́, Ə́ di mąąhvaalɛɛ.

⁴⁰ A kɛ tii kan, Ną́mu Yálá, 'Ə́ ɲɛ̨i hee, 'Ə́ wəli tɔɔ vɛli wooi ɲɛ̨i tɔɔi gɛɛnąąi ɲɛ̨i ɓa mą!

⁴¹ 'Ə́ muhəɠə yiihu! Yai-Laa, 'pa Ə́ hvįitɔɔ pɛlɛ mu! Yɛ́ ka gəhii Ə́ hvąŋą kaa ɉui! Yai-Laa, Yɛ́ haláá laa həlinuąi mąąyili a di nwun mąąɓo həɠə! Ɛlɛɛ Yɛ́ Yee-too-lonnii 'di kwəinɛ̨ɛ̨ kulɔ nwun na nɛ̨ɛ̨ hu!

⁴² Ną́mu Yálá, 'hvo Ə́ ɲɛ̨i həɠə Ə́ liiɓa mun ɲɛ̨i Ə́ ɉəɠə ɉu, yai ɲɛ̨i Ə́ mąąwiɛi mą, 'Ə́ Kili hvilɛn vɛli wooɠaai kpɔ Yɛ́ tímun Davidə ə kɛli mo Yɛ́ mą.»