Kɔlɔnikɔ Veerɛi 5 - Yálá laawoo hɛɓɛ (dc)

¹ Yii kɛa Salomɔn ə ɲee laa kulɔ Yai-Laa nwɔ pɛlɛ́i goló ɓa, ɉɛnŋąą nąn Davidə ə naakwɛlanmo Yálá ɓa, ə pa a gəlee, diɛ ɓaa a: Wali, hɛni, da ɉɛnɲąŋąɠaa kəlee, ə ɉee Yálá nwɔ pɛlɛ́i mu, ɉɛn gɔw kɛɛnąą.

² Nąąlɔwai, Salomɔn ə Israɛlə kalanɉonŋąą ɲąąkpɔn Ɉerusalɛmə, da nɔi nwun nąmįną kəlee, da Israɛlə bɛlɛ nąmįną; əgɛ, di Yai-Laa nwɔ mįnɛ̨ kəhii həɠə Davidə taa, ya ɓaa a Siɔn, di li la Ɉerusalɛmə.

³ Israɛlə hinąą kəlee di di ɲąąkpɔn tɔɔmun gwɛlɛ, a ɉɛli yələ, yaai da bu a ɲąnįn mɛ̨ihveelɛnąą.

⁴ Yii kɛa Israɛlə kalanɉonŋąą kəlee di pa, Levi lonnii ɓə gəhii həɠə.

⁵ Di gəhi həɠə, bɛlɛɛ gee kaa kələ ɓa da ɉɛnŋąą kpɔ kɛ a mu hɛnŋąą mąąhəɠɛɛ, di li la. Ɉaláá laa həli nuą da Levi lonnii ɓə ɉəɠə.

⁶ Tɔɔmun Salomɔn da Israɛlə nuą di ɲąąkpɔnŋąąi kɛ mįnɛ̨ kəhi kwɛlɛ, di taatɛlɛɛ kpɛa-kpɛaa da bɛlɛɛɠaa kulɔ a haláá, gbulu hu kɛnɛ̨ɛ̨, nu ɲɛ̨i yɛ hvɛɠɛ mą, hva pɛli lonon ɉii.

⁷ Yili pulu, ɉaláá laa həli nuą di Yai-Laa nwɔ mįnɛ̨ kəhii lɔ di ɉee ɓɛi kɛ mąąnɛ̨ɛ̨ di ɉee laa, bɛlɛ mąąhəɠɛɛ mu gɛɛnąą mąąhəɠɛɛ ɓa, mąąkpɛ malakaɠaa koon mu.

⁸ Mąąkpɛ malakaɠaa tii koon ɲąą hvoloon ŋąąi kɛ, bɛlɛɛ mįnɛ̨ kəhi mɛ̨i da gbəŋə wulukpiyɛnŋąą.

⁹ Gbɔnŋąą tii kwɛa pələ, nu a pɛli kɛ lɛɛi gɛɛnąą mąąhəɠɛɛ ɓa yɛ nwun gaa bɛlɛ mąąhəɠɛɛ laaləi, kɛlaa, nu hvo kɛi lɛɛ ɲɛ̨nɛ̨ɛ̨ pələ yɛ di kaa, di lɔ nii laa ə mą kɛ háákələi.

¹⁰ Hɛn da hvo kɛ gəhi hu, hvo kɛli gwɛni ɓɛla hveelɛi ŋɛ̨i Moisə ə naa laa Horɛbə yee ɓa, ɓɛlɔwai Yai-Laa da Israɛlə di mįnɛ̨ həɠə la di kulaa Eziptə lɔi hu.

¹¹ Ɉaláá laa həli nuą kəlee di kulɔ gɛɛnąą mąąhəɠɛɛ ɓa; mąąhɔlɔɓo, nuąi kpɔ kɛ laa, gəlee di di mąąhəɠə, kɛlaa, di hvo ɉəɠə a ɲɛli.

¹² Levi huwu hu nuąi kɛ a nwələ too nuą, diɛ ɓo Asafə, Heman da Yedutun da di kaayɔwɔɠaa di yee mu, həɠə kwɛlɛɛ yɛ ɓo di kwaną, kpɛŋɛ̨nɛ̨n-gwɛli yɛ ɓo di yəi, da gololon-gwɛnįn, ɛlɛɛ, bɛlɛgwəi gwɛnįn; di tɔɔ Yálá kɔ́i mamįiyee hu. Di kwɛlɛ, haláá laa həli nuą nu nwundɔ̨nɔ̨ ɲee hveelɛ ə ɓo laa, diɛ túlú hvɛɛ.

¹³ Dúlú hvɛɛ nuą da nwələ too nuą di woo ə kɛi kulɔ, bɛlɛɛ gee ɓa a nɛlɛɛ, diɛ Yai-Laa mąątɛ̨nɛ̨, diɛ naa tɛ. Ɓɛlɔwai dúlú woo, gbɛŋɛ̨nɛ̨ngwɛli da vɛli kɛ hɛnŋąą yiiɠaa tii di woo ə kɛi kulɔ la, di kɛi Yai-Laa mąątɛ̨nɛ̨ diɛ kɛ diɛ: «Yai-Laa nwɔ mɛ̨nį lɛlɛɛi, ɲɛ̨n deei hvo mą!» Nąąlɔwai, Yai-Laa nwɔ pɛ́lɛi laa ə hvɛɛ a túlɔ kpįnįn.

¹⁴ Ɉalaa laa həli nuą di hvo kɛli pɛli di wɔɔ mąątii kɛi dúlɔ kpįnįn tii mąą mɛ̨nį ɓa, gbala ə tɔɔ, Yai-Laa mąąɲįnɛ̨n aa kɛ Yálá nwɔ pɛ́lɛ laa hvɛɛ.