Kɔlɔnikɔ Veerɛi 4 - Yálá laawoo hɛɓɛ (dc)

¹ Ə Yálá kɔ́i pɛli a ɓala-kwɛli, gwɛaa a yee laa mą pow hveelɛ, ɲąą kɛnɛ̨ a yee laa mą pow hveelɛ, mɛ̨i kwɛa a yee laa mą pow.

² Ə hɛn ɲąŋą ta pɛli diɛ kɛ mą gboloyá. Ɉɛɲąŋąi tii, ə kɛ kɛlɛɠɛlɛ, ə həɠə nwəli la yii ɓa ə too la yii tii ɓa, ə kɛ a yeelaamą pow, mɛ̨i kwɛaa a yeelaamą lɔɔli; yɛli kwɛa a yeelaamą pow haaɓa ɓə kɛi pɛli mąątinɛ̨n ɉii ə doo kee hu.

³ Nįŋɛ̨ mąą nįnįnŋąą ɓə ɉɛɲąŋąi tii ə kɛ heeni di pulu ə tinɛ̨n na mą. Nįŋɛ̨ mąą nįnįnŋąą tii tɔɔi kɛ a ɲɛli hveelɛ, di kanąŋąą gboloyá ɓa.

⁴ Gboloyái tii ə kɛ heeni nįŋɛ̨ pow kɔ́w hveelɛ mąą nįnįn mɛ̨i. Ɉaaɓa ɲɛ̨i hiɛ kɛ ɲanwuɔ̨ pələ, ɉaaɓa ɲɛ̨i hiɛ voló tooi pələ, ɉaaɓa ɲɛ̨i hiɛ ɉɛɠɛɛ pələ, ɉaaɓa ɲɛ̨i hiɛ voló həɠəi pələ,. Gboloyá ə kɛ heeni di pulu, ɛlɛɛ, di kponwo lɔɔ gboloyá mu pələ.

⁵ Nwəlila hu wiɛ pələ ə kɛ nu yee ɓaa ɲą tɔ̨nɔ̨, nwəli yali pələ yɛ ɓo yɛ yagbudɛn vələ. Da pɛli kɛ di tuku waa mɛ̨ida bu ɉɛɲąŋąi tii hu a ya.

⁶ Ə lɔwa pow tee, lɔɔli ɓa-mįi-yee hu pələ, lɔɔli kɛɓɛyee hu pələ, a ɉɛnŋąą waai, nąą ɓə di kɛi ɉaláá kulɔ hɛnŋąą mąą waa laa; ɉaláá laa həli nuą diɛ di mąąwaa gboloyá hu.

⁷ Ə nabon ɉee hɛnŋąą pɛli pow a hɛni, yɛ bələi mąąnɛ̨ɛ̨ ə kɛ la, ə di hee ɉɛli pɛlɛ mu, ə nɔɔli hee ɓa-mįi-yee hu pələ, ə nɔɔli hee kɛɓɛyee hu pələ.

⁸ Ə taɓali pow pɛli, ə di hvilɛn ɉɛli pɛlɛ mu, ə nɔɔli hvilɛn ɓa-mįi-yee hu pələ, ə nɔɔli hvilɛn kɛɓɛyee hu pələ. Ə kpələ-hɛnɲąŋą nwun dɔ̨nɔ̨ pɛli a hɛni.

⁹ Ə ɉaláá laa həli nuą yəi gwəlii kulɔ, ə kwəli hɛ̨ąi kɛnɛ̨ pɛli, da gwəli laa kpulu kponŋąą. Ə kwɛli kpɔlu hiɛ gbonŋąąi tii ɓa.

¹⁰ Gboloyá nwɛi, ə ɉee ɓa-mįi-yee hu pələ, ə ɉɛŋɛ̨nɛ̨ma tɔɔ koloɓo vóló ɓɛlai pələ.

¹¹ Hiramə ə gəgənŋąą pɛli, gwoagwoaɠaa da ɲá haɠaa gəgənŋaa. Golói mąąnɛ̨ɛ̨ ə gɛ tɔɔmun Salomɔn ɓa Yálá yəi bɛlɛ́n, ə ɲee laa kulɔ mą.

¹² Pɛlɛ hɔlɔɔn veelɛ, nwuɔ̨ pɛlɛ hveelɛ yɛ ɓo di nwuɔ̨, ə wulu ɓaɠaa mąąnįnįn gɛ, ə di hee nwulu powaɠaa mąąnįnįn ɉu a kɛɛli, ə ɉee bɛlɛ nwuɔ̨ɠaa ɓa bɛlɛ hɔlɔɔn nwuɔ̨.

¹³ Grenadə ɓa ɲɛli hveelɛ hveelɛ kpɛlaanŋąą bɛlɛ nwuɔ̨ɠaai tii ɓa, nwun veelɛ hɛlɛnŋąą yii ɓa, nwun veelɛ hɛlɛnŋąą yii ɓa.

¹⁴ Ə wotolo pɛlɛɛ kɛ, ə yá pu hɛnɲąŋą hee ɉu.

¹⁵ Ə hɛnɲąŋą kɛnɛ̨ ta pɛli, ə ɉee nįŋɛ̨ pow kɔ́w hveelɛ mąąnįnįn mɛ̨i, ə bu lɔ tii tanɔ̨n a kwɛli kpɔlu, ə naa hee a gboloyá.

¹⁶ Ɉɛnɲąŋąɠaa, gwoagwoaɠaa, ɉɛnŋąą hɛlɛnɉi, da ɉɛnŋąą pɛlɛɛ pɛlɛɛɠaa kəlee, Hiramə-Abi ə ɉɛnŋąą tii kəlee kɛ a kwɛli kpɔlu tɔɔmun Salomɔn ɓa, a Yai-Laa nwɔ pɛlɛ́i nwɔɔ.

¹⁷ Ɉurdɛn lɔi hu Sukotə da Seredata di lɔwai ɓə tɔɔmun ə ɉɛnŋąąi tii kəlee pɛli laa.

¹⁸ Salomɔn ə ɉɛnŋąąi tii kəlee pɛli kpɔ a damąą, gwɛli kpɔlui lɔ ɉu, di hva pɛli nwiɛ yee kɔ́ɔn ɉi.

¹⁹ Salomɔn ə Yálá yəi bɛlɛ́n ɉɛnŋąą kəlee kɛ: Ə Yálá kɔ́i bɛli a hɛni, nɛɠɛ kpįnįn naa taɓaliɠaa,

²⁰ nabon ɉee hɛnŋąą da nabonŋąą, diɛ lən bɛlɛ mąąhəɠɛɛ laaləi, yɛ bələi mąąnɛ̨ɛ̨ ə kɛ la; ə bɛli a hɛni huwaa.

²¹ Nwulu powa mąąnįnįnŋąą, nabonŋąą, gbɛ̨ąɠaa, ə gəlee pɛli a hɛni huwaa kpɔ hva hva.

²² Mɔwaɠaa, gəgən gbɛa-kpɛaɠaa, ɲá haɠa gəgənŋąą, lansan kələn ɉɛnɲąŋąɠaa, ə gəlee kɛ a hɛni huwaa kpɔ hva hva. Bɛlɛ́ laaləi, bɛlɛ́n bələ kponŋąą di laa yɛ ɓo gɛɛnąą mąąhəɠɛɛ pɔ pələ, da gbonŋąąi di laa ə kɛi ɓo bɛlɛ kɛnɛ̨ pɔ pələ, gəlee ə kɛ a hɛni.