Kɔlɔnikɔ Veerɛi 36 - Yálá laawoo hɛɓɛ (dc)

Ɉosiasə mąąhvalin nuą da Babilonə luwɔlaa

¹ Nɔi lonnii di Ɉosiasə lon Yoakazə həɠə di ɉee a tɔɔmun Ɉerusalɛmə, a nąn mąąhvalin.

² Yoakazə kaa kwɛlan ə kɛ a kwɛlan bow hveelɛ gɔw haaɓa, yɛ kɛ a tɔɔmun, ə tɔɔlaa kɛ a ɲąnįn ɉaaɓa Ɉerusalɛmə.

³ Eziptə tɔɔmun ə gulɔ dɔɔlaa hu Ɉerusalɛmə, ə nįįhɔ̨nwɔ̨ laa Ɉuda nuą nwuɔ̨ a wali kwələ kilə waa tɔ̨nɔ̨ da hɛni kilə pow haaɓa.

⁴ Yili pulu, Eziptə tɔɔmun ə Yoakazə nąn non Ɛliakimə hee a dɔɔmun Ɉuda lɔi da Ɉerusalɛmə daa mɛ̨i. Ə Ɛliakimə laa mąąhvalin a Yoyakimə. Yii ɓaa Yoakazə nwɛi, Neko ə li la Eziptə lɔi hu.

⁵ Yoyakimə kaa kwɛlan ə kɛ a kwɛlan bow hveelɛ gɔw lɔɔli yɛ dɔɔlaa hɔlɔɓo, ə tɔɔlaa kɛ a kwɛlan bow gow tanɔ̨n Ɉerusalɛmə daai. Yoyakimə ə túwɔ́ a ɲɔ̨nwɔ̨ɔ̨ nwɔ Yálái Yai-Laa ɲɛ̨i ɓa.

⁶ Babilonə tɔɔmun Nabukodonosorə ə pɛlɛ ma a kɔ́, ə ɉon, ə ɲili kpɔ a kwɛli kpɔlu yɔwɔn, ə li la Babilonə.

⁷ Nabukodonosorə ə Yai-Laa ŋą pɛlɛ́i mu hɛnŋąą tamąą həɠə, ə li la ə ɉee nwɔ tɔɔ pɛlɛ́i mu Babilonə.

⁸ Yoyakimə kɛ mɛ̨nįɠaa, gɛɛ kala túwɔ́ɠaai ə mo, mɛ̨nįi kulɔ ɉu ə həli mą, gəlee pɛ̨ɛ̨ kaa Israɛlə da Ɉuda tɔɔɓɛlaa di wɔɔ hɛɓɛ́i hu. Non Yoyakin ə hee a tɔɔmun a nąn mąąhvalin.

⁹ Yoyakin kaa kwɛlan ə kɛ a kwɛlan mɛ̨ihaaɓa yɛ dɔɔlaa hɔlɔɓo, ə tɔɔlaa kɛ a ɲąnįn ɉaaɓa hvóló pow Ɉerusalɛmə daai. Ə túwɔ́ a ɲɔ̨nwɔ̨ɔ̨ Yai-Laa ɲɛ̨i ɓa.

¹⁰ Gwɛlan gbɛɛi lɔwai, tɔɔmun Nabukodonosorə kuláaɠaa tɔɔ, di ɉon diɛ li la Babilonə, di bɛlɛ Yai-Laa nwɔ pɛlɛ́i mu hɛnŋąą nɛlɛɛɠaa ɓa; ə nąn non Sedesiasə hee a dɔɔmun Ɉuda da Ɉerusalɛmə mɛ̨i.

Sedesiasə nwɔ tɔɔlaa

¹¹ Sedesiasə kaa kwɛlan ə kɛ a kwɛlan bow hveelɛ kɔ́w tanɔ̨n ɓɛlɔwai ə kɛ la a tɔɔmun, ə tɔɔlaa kɛ a kwɛlan bow gɔw tanɔ̨n Ɉerusalɛmə.

¹² Ə túwɔ́ a ɲɔ̨nwɔ̨ɔ̨ nwɔ Yálái Yai-Laa ɲɛ̨i ɓa. Nwooɠaai Yai-Laa ə bu gwəi mɛ̨nį hukulɔ mun Ɉeremi la, yɛ mo mą, hvo kpɛli gɛ, hvo gbɔwɔ mąą yɛɛ Yálá ɲɛ̨i ɓa.

¹³ Yɛ nwɔ̨nɔ̨ gwɛlitee tɔɔmun Nabukodonosorə yəi, ɛlɛɛ yaan, aa kɛ gwɛla Yálá ɲɛ̨i ɓa, yili yəi. Sedesiasə ə nwun ɉuwalawala, ə kili walawala laa kulɔ, hvo kpɛli gɛ, hvo pənə hvo pa, Israɛlə nwɔ Yálá Yai-Laa pɔ.

¹⁴ Ə mą kɛ, ɉaláá laa həli nuą ɲɛ̨itɔwɔ nuą, nɔi ɲąąwooɓo nuą kəlee, di di wɔɔ woo kala laa huwiɛ, di túwɔ́ kpɔlɔɔ yɛ bələi, lɔiɠaa da kɛɛ kala túwɔ́ ɓo la; di bɛlɛ́i ŋɛ̨i Yai-Laa ə ɉəɠə ɉu a nwɔɔ Ɉerusalɛmə, di mąąluwu.

¹⁵ Di nąnni di wɔɔ Yálái Yai-Laa ə di liɛwoo ɓo, gwəi mɛ̨nį hukulɔ nuą laaləi gee mɛ̨i tamąą, mąąhɔlɔɓo, nwɔ nuąi ɲɛ̨imąąwɛli ə kɛ mą, da gbɔwɔ nwɔ pɛlɛ́i.

¹⁶ Kɛlaa, di kɛi yɛlɛ kulɔ Yálá nwɔ wəlɛɛ ɓo nuąi hu, di tɛɠɛɓoɔ di wooɠaa hu, diɛ di woohəɠə gwəi mɛ̨nį hukulɔ nuą diɛ; ə lɛɛ la ɉu, Yai-Laa nwɔ liiholii ə tɛ nwąną ɓa, ɲali bulu hvo kɛa kɛ mą.

¹⁷ Yai-Laa ə Kalde tɔɔɓɛlaa ŋąątɔɔ diɛ a kɔ́. Kalde nuą di di wɔɔ hilɛlɛaɠaa paa gɛɛnąą mąąhəɠɛɛ ɓa a kɔ-kɔ ɓɔwa; di hvo kpɛli ɉilɛlɛaa da nɛ̨ɛ̨lɛaa mąąwɛli kaa, ə mą kɛ, a ɉulɔgoloɠaa da nu mąąpɔlɔɔɠaa. Yálá ə di kəlee di lɔ Kalde nuą yee ŋą.

¹⁸ Yálá yəi bɛlɛ́n ɉɛnŋąą kəlee, gbɛa-kpɛaa mąn, bɛlɛɛɠaa mąn, Yai-Laa ŋą pɛlɛ́i mu hɛn gɔwɠaa, tɔɔmun ŋą pɛlɛ́i mu hɛn gɔwɠaa, ə mą kɛ, galanɉonŋąą di wɛi, di gəlee həɠə di li la Babilonə.

¹⁹ Kalde nuą di Yálá ŋą pɛlɛ́i kələn, di Ɉerusalɛmə mąąkpɛ hį́i bu, di nwɔ̨n nɔ dɔɔ pɛlɛ́ɠaa kəlee hu, ɉɛn mąąwiɛɠaa kpɔ kɛ laa, gəlee hu ə kala.

²⁰ Nu təli woloi kulɔ a mowa yee wolo, ə li a diɛ Babilonə, əgɛ, di kɛ a yaa da nonnii di wɔɔ luwɔɠaa. Di lɛɛ luwɔlaa hu, ə lɛɛ ɉu Pɛrsə nuą di wɔɔ tɔɔlaai ə pa.

²¹ Bələ ɓə, nwoo ŋɛ̨i Yai-Laa ə mo Ɉeremi laaləi, naa ə hon na; a yaai ə kɛ mą: «Ə lɛɛ ɉu nɔi ə vįitɔɔ a vįitɔɔ yələ, diɛ vįitɔɔ yələ pɔ mɛ̨nį kɛ di wɔɔ mąąwɛli hvólóɠaa kəlee yee mu, yaai gəlee pɛlɛɛ gee ɓa gaa a kwɛlan bow mɛ̨ihveelɛi.»

²² Ya ɓə, Pɛrsə tɔɔmun Sirusə ŋą tɔɔlaa gwɛlan dɔlɔɔ yee mu, əgɛ mɛ̨nįi ŋɛ̨i Yai-Laa ə mo Ɉeremi laaləi, naa ə hon, Yai-Laa ə Pɛrsə tɔɔmun Sirusə kiliŋą pɔ̨nɔ̨, əgɛ, di bɛ̨ɛ̨ a hɛɓɛ́, di nolo ɓo, ɓɛi kpɔ ŋą tɔɔlaa ə həli laa, diɛ mą:

²³ «Pɛrsə tɔɔmun Sirusə woo ka, yɛ: Yələ kɔ́lɔn ɉu Yálá Yai-Laa, aa yɛnɛ̨ɛ̨ ɓɛ tɔɔlaaɠaa kəlee tɛɛ bɔ́! Ya ɓə, Yaa kpįnįi tii, yɛ, ŋį́ pɛlɛ́ tɔɔ mą Ɉerusalɛmə yai gaa Ɉuda lɔi hu. Ká nɛlɛ ɓə gaa a Ɲálái tii ŋą nu huwu ta? Gɛ́, nwɔɔ Yálái Yai-Laa ə lɛɛ bɔ, mąą nui ə tɛɛ ə li Ɉerusalɛmə daai!»