Kɔlɔnikɔ Veerɛi 35 - Yálá laawoo hɛɓɛ (dc)

Ɉosiasə ə pakə hɛli pu

¹ Ɉosiasə ə Yai-Laa nwɔ pakə hɛlii pu Ɉerusalɛmə, di pakə haláá kulɔ a ɲąnįn dɔlɔɔ nwɔ hvóló pow gɔw nąąn ɲələ.

² Ə ɉaláá laa həli nuą hee di kɛ koló nwun na, ə di hvaŋąlɔ Yai-Laa nwɔ pɛlɛ́i mąą mɛ̨nį hu.

³ Yɛ lévi lonnii tii kɛ a Israɛlə nuą kəlee mąąkwɛli nuą, yiiɠaai kɛ a di mąąhəɠɛɛ Yai-Laa mąą mɛ̨nį ɓa, yɛ diɛ: «Ə li kɛ, ka li a mįnɛ̨ kəhi mąąhəɠɛɛ, bɛlɛ́i ŋɛ̨i Israɛlə tɔɔmun Davidə lon Salomɔn ə dɔɔ mui, hvo li kɛ a tiɛ̨ kaa ɉəɠə ka kalan ŋą. Yii hu kɛa, 'ka tí ka wɔɔ Yálái Yai-Laa ɓa da ŋą nu huwui Israɛlə lonnii.

⁴ 'Ka ká heekpəlin na kɛ, ka ɉəɠə a bɛlɛ́ɠaa laa, da ka kɛ kolóɠaa, yɛ bələi Israɛlə tɔɔmun Davidə da non Salomɔn di bɛ̨ɛ̨ la.

⁵ 'Ka lɔ gee kaa pɛlɛ mu, ka tɔɔ a lévi nwɔ bɛlɛ́ɠaa laa, ə mą kɛ, ka nąn nonnii di hvo a ɉaláá laa həli nuą ta, ka tɔɔ yɛ bələi lévi lonnii heekpəlin na kaa la a bɛlɛ́ɠaa laa.

⁶ 'Ka pakə haláá kulɔ, 'ka ká mąąhəɠə kani, ka kpɔnmąą tɛɛ ka nąn nonnii pɔ, əgɛ, nwoo ŋɛ̨i Yai-Laa ə dɛɛ Moisə pɔ, diɛ pɛli bɔ mɛ̨nį kɛi.»

⁷ Ɉosiasə ə taatɛlɛɛ tɛɛ nuą pɔ. Pakə haláái kpɔ di gulɔ, nuąi kɛ laa diɛ, ə həli ɓɛlaa lonnii awala kɛ tii, ɓooli lonnii waa pow haaɓa, nįnɛ̨ hilɛ waa haaɓa; ə ɉəɠə dɔɔ kwəlii taatɛlɛɛɠaa lɔwai.

⁸ Nwɔ kalanɉonŋąąi di da tɛɛ kpɔ kɛnɛ̨ nɔi lonnii pɔ, da ɉaláá laa həli nuą kpɛa-kpɛaɠaa ə mą kɛ, lévi lonnii. Hilkiya, Ɉekaryahu da Yehiɛlə diɛ ɓo a Yálá nwɔ pɛlɛ́i ɲąąwooɓo nuą, di ɓɛlaa lonnii nwun mɛ̨ida da nįnɛ̨ hilɛ nwun ɉaaɓa tɛɛ ɉaláá laa həli nuą kpɛa-kpɛa pɔ, pakə haláá mąą mɛ̨nį ɓa.

⁹ Konaniahu da nąn nonnii Semayahu da Netanɛlə, Hasaviahu, Yeiɛlə da Yozavadə lévi lonnii ɲąąwooɓo nuą, di ɓɛlaa lonnii waa lɔɔli da nįnɛ̨ hilɛ nwun nɔɔli tɛɛ lévi lonnii pɔ a pakə haláá.

¹⁰ Bələi di goló hon na a nɛlɛɛ, bələ ka: Ɉaláá laa həli nuą kpɛa-kpɛaa di kɛ tɔɔni di tɔɔi, lévi lonnii di yee ə ɓo di kɛ koló ɓa, yɛ bələi tɔɔmun ə di tí la.

¹¹ Di pakə haláá hɛnŋąą paa, ɉaláá laa həli nuą kpɛa-kpɛaa di ɲąmą həɠə di bu, lévi lonnii diɛ tee.

¹² Ɓɛlɔwai di kɛi ɲąąkwɛlɛ la, diɛ nɔi lonnii di wɛi tɛɛ di pɔ, yɛ bələi bɛlɛ́ɠaa hee pələ kaa la, yii mąąnɛ̨ɛ̨i kɛ di kulɔ Yai-Laa ɓa a haláá hɛn da gəlee kələn, di kɛ gulɔ ɉu, diɛ naa a dee, yɛ bələi bɛ̨ɛ̨i la Moisə nwɔ hɛɓɛ́i hu. Di gɛ lɔ tii a nįnɛ̨ hilɛɠaa.

¹³ Di pakə ɓɛlaa lon mɔ̨n, yɛ bələi mąąnɛ̨ɛ̨ ə kɛ la. Yii ɓaa gɔ̨nɔ̨n ɲiiɠaa tii, di ɲili kwɛli-ləɠíɠaa hu, awala kɛ tii ləɠikpɛliɠaa hu. Di da həɠə a gilɛ, di li la nɔi lonnii pɔ.

¹⁴ Yili pulu, yiiɠaai kɛ mąąnɛ̨ɛ̨ ə lɛɛ ɉaláá laa həli nuą kpɛa-kpɛaa yəi da lévi lonnii, di yiliɠaai yili. Mąąhɔlɔɓo, Aarɔn lonnii kɛ a ɉaláá laa həli nuą, di yee ə kɛ ɉaláá hɛn da gəlee kələn gulɔ mɛ̨nį ɓa, da ɉuwɔ wulɔɠaa kələn mɛ̨nį ə lɛɛ ɉu kpįnį ə pɛlɛ. Yili mąą mɛ̨nį ɓa, lévi lonnii di kɔ̨nɔ̨n bɛli a diɛ kpįnįi di wɔɔ da ɉaláá laa həli nuą kpɛa-kpɛaai a Aarɔn lonnii di wɔɔ.

¹⁵ Asafə lonnii a nwələ too nuą, di lɛɛ tɔɔni di tɔɔ, yɛ bələi Davidə, Asafə, Heman da tɔɔmun nwɔ nwun dɔɔ humun Yedutun di mo la. Bɛlɛ́ laaləi mɛ̨ikaa nuą di lɛɛ tɔɔni di tɔɔi bɛlɛ́ laaləiɠaa ɓa. Nui lɔpee ta hvo həɠə gɛ tíi ɓa, hvo gaai lévi lonnii takpɛliɠaa di kɛi di kɔ̨nɔ̨n bɛli a di wɔɔ.

¹⁶ Di Yai-Laa nwɔ tíɓoɠaai kəlee ɲɛ̨i kulɔ a ɲələi tii, di pakə hɛli pu, di ɉaláá hɛn da gəlee kələn kulɔ Yai-Laa kɔ́i, yɛ bələi tɔɔmun Ɉosiasə ə mo la.

¹⁷ Israɛlə lonnii kɛ laa, bələ ɓə di pakə pu la, a guu tii, da nɛɠɛi dɛ hɛn və ɉu nwɔ hɛli, di bu a hvóló mɛ̨ihveelɛ.

¹⁸ Di hvo ta pakə hɛli pu li tii Israɛlə lɔi hu, ə həɠə kpɔ Yálá kwəi mɛ̨nį hukulɔ mun Samuɛlə nwɔ yələi ɓa, ə həli la ɲələi tii ɓa, Israɛlə tɔɔmun da, hvo ta pakə hɛli pu li tii, yɛ bələi Ɉosiasə, ɉaláá laa həli nuą, lévi lonnii, Ɉuda nuą da Israɛlə nuąi kɛ laa da Ɉerusalɛmə nuą di bu la.

¹⁹ Ɉosiasə nwɔ tɔɔlaa gwɛlan bow lɔwai ɓə di pakə hɛlii tii pu la.

Ɉosiasə nwɔ tɔɔlaa laa kulɔi

²⁰ Mɛ̨nįɠaa tii kəlee tɛɛ pulu, yii kɛa Ɉosiasə ə kpɛɛ a Yálá nwɔ pɛlɛ́i pɛliɛ, Eziptə tɔɔmun Neko ə pa, ə kɔ́ pɛlɛ Karkemisə ɓa, Eufratə kwɛlɛ. Ɉosiasə ə həɠə yɛ li naakwiɛn ɉii.

²¹ Neko ə tiɓo kə mun Ɉosiasə pɔ, ə pa yɛ mą: «Ɉuda tɔɔmun! Lə mɛ̨nį ɓə gaa gwa yɛ́ gu lɔwai? Yɛ́ hvəi ŋį́ pa kɔ́ pɛlɛi yɛ́ háákələi, kɛlaa, ɲówo pɔlɔ-pɔlɔi ŋɛ̨i ɓə! Yálá yɛ ŋį́ gɔɠɔ mąąhulɔ; Ɲálái ŋɛ̨i aa tɔɔ búlú, hvó kɛ ə́ kaa tɔɔi na, hvo pa ə́ hukala.»

²² Kɛlaa Ɉosiasə nwɔ kiliŋąhiɛ mąąhvalin, mąąhɔlɔɓo, ə kɛi hvaa kwɛli Neko ɓa əgɛ da yaa di gɔ́. Nwoo ŋɛ̨i Neko ə kɛi mo, Yálá ɓə bu na, kɛlaa Ɉosiasə hvo gɛ hvo nwəli tɔɔ mą. Ɉosiasə ə həɠə yɛ pa kɔ́ pɛlɛi Neko ɓa Megido ɲɛa kɔ́wɔ hu.

²³ Gilɛn bili nuą di tɔɔmun Ɉosiasə ɓon, yɛ nwɔ tínuąi diɛ: «'Ka ɉéɠə ka li a ɲą́ą́, hvo gaai, daa mą́ą́nwąną kɛnɛ̨.»

²⁴ Ɉosiasə nwɔ tínuą di ɉəɠə, di gulɔ nwɔ kɔ-kɔ wotoloi hu, di naa nwɔ wotolo veelɛnąą hu, di li la Ɉerusalɛmə daai. Nąą ɓə ə haa laa, di bow loo nąnni kámą hu. Ɉuda nuą, Ɉerusalɛmə nuą di Ɉosiasə haa wɔlɔɓo.

²⁵ Ɉeremi ə wələ ta pɛli, ə doo Ɉosiasə mɛ̨i. Nwələ too hinąą da nwələ too nɛ̨ąą di Ɉosiasə laa too a wələ di wɔɔ wələ woo hu, háá ɓaa háá, yili ə lɔ Israɛlə nuą yii pələ hu. Di nwələɠaa tii too mąąwɛli wələɠaa lɔwai.

²⁶ Ɉosiasə kɛ mɛ̨nįɠaa, Yálá mąąwiɛ mɛ̨nįɠaai ə gɛ, túwɔ́i ə mo yɛ bələi Yai-Laa nwɔ tɔ́n ɉɛɓɛ́i ə mo la,

²⁷ gɛ mɛ̨nį dɔlɔɔɠaa da gbəla mɛ̨iɠaa gəlee pɛ̨ɛ̨ kaa Israɛlə tɔɔɓɛlaa da Ɉuda tɔɔɓɛlaa di wɔɔ hɛɓɛ́i hu.