Kɔlɔnikɔ Veerɛi 34 - Yálá laawoo hɛɓɛ (dc)

Ɉosiasə nwɔ tɔɔlaa

¹ Ɉosiasə kaa kwɛlan ə kɛ a kwɛlan mɛ̨ihaaɓa, yɛ kɛ a tɔɔmun, ə tɔɔlaa kɛ a kwɛlan bow haaɓa kɔ́w tanɔ̨n Ɉerusalɛmə daai

² Ə túwɔ́ a ɉaŋąą Yai-Laa ɲɛ̨i ɓa, ə hvilɛn nąn Davidə kpaalə hu, hvo kpɔ mąąlaa tɔ̨nɔ̨ kpɛli.

³ Nwɔ tɔɔlaai gwɛlan mɛ̨ihaaɓa lɔwai, ə ɓo nii a hulɔnon, ə gɔɠɔ tɔɔ yɛ nąn Davidə nwɔ Yálái liiɓa kwɛli. Nwɔ kwɛlan bow kɔ́w hveelɛ lɔwai, ə ɲəə pɛlɛ Ɉuda da Ɉerusalɛmə mąąhəɠə kolo ɓa, yɛ ɉali kɔ́iɠaa, da nwuluɠaai di kɛi gɔ́, ɉaliɠaa mąąnįnįnŋąąi di bɛli a wulu, wala kɛ tii, di bu, ə gəlee kulɔ nɔi.

⁴ Di Baalə kɔ́iɠaa taɠa ɲɛ̨i ɓa, lansan kələn ɉiiɠaai kɛ nąą mɛ̨iɠaa, di gəlee wolo; nwuluɠaai di kɛi gɔ́, ɉaliɠaai di bɛli awala kɛ tii di bu, ə gəlee huwolo-wolo ə vunwɔ̨-hunwɔ̨. Ə vunwɔ̨ taɠa-taɠa nuąi kɛi haláá laa həli diɛ di kámą mɛ̨i.

⁵ Ə ɉaláá laa həli nuą tii kɔ́wɠaa kələn ɉali kɔ́iɠaa tii ɓa. Bələ ɓə ə Ɉuda da Ɉerusalɛmə mąąhəɠə la.

⁶ Yili pulu, ə tɛɛ Manase, Ɛfraimə, Simeɔn, ə mą kɛ, Nɛftali taaɠaa hu, da gwɛlɛ lɔiɠaa,

⁷ ə ɉali kɔ́iɠaa wolo, nwuluɠaa di kɛi gɔ́, ə mą kɛ, ɉaliɠaa ə di hu tee-tee, lansan kələn ɉiiɠaa kɛ Israɛlə lɔi hu, ə gəlee wolo. Ə bulu pənə ə pa Ɉerusalɛmə.

Ɉaláá laa həli mun gɛnɛ̨ ə dɔ́n ɉɛɓɛ́ kaa

⁸ Ɉosiasə nwɔ tɔɔlaa gwɛlan bow kɔ́w mɛ̨ihaaɓa yələ, kpɛɛi ə mo a nɔi da Yálá nwɔ pɛlɛ́i mąąhəɠɛɛ, Ɉosiasə ə Asaliahu lon Safan, Maaseyahu yai a daa ɲąąwooɓomun, da ɉɛɓɛ́ kɛmun Yoahazə lon Yoa, ə di tɔɔ, əgɛ, di nwɔ Yálái Yai-Laa nwɔ pɛlɛ́i mu pɛli.

⁹ Nuą tii di li ɉaláá laa həli mun gɛnɛ̨ Hilkiyahu pɔ. Nwalii lévi lonnii a bɛlɛ́ laaləi mɛ̨ikaa nuą, di ɉon Manase nuą, Ɛfraimə nuą, Israɛlə nuą kəlee, Ɉuda nuą da Bɛnɉamɛn nuą kəlee, ə mą kɛ, Ɉerusalɛmə nuą kəlee yəi, di paa la a Yálá nwɔ pɛlɛ́i nwɔɔ, di dɛɛ Hilkiyahu pɔ.

¹⁰ Di dɛɛ goló kɛ nuą pɔ, diɛi kɛ Yai-Laa nwɔ pɛlɛ́i nwun na. Nuą tii ɓə kɛi koló kɛ Yai-Laa nwɔ pɛlɛ́i mu. Di nwalii tii lɔ bɛlɛ pɛli mɛ̨nį hu, da bu mɛ̨nį nįnɛ̨ kɔ́lɔi.

¹¹ Nuą tii di nwali tɛɛ wulu haɠa nuą pɔ da pɛlɛ́ tɔɔ nuą pɔ, əgɛ, di kwɛni haɠaa ya da pɛlɛ mɛ̨i kɛ wulu, gɛɛnąąɠaai Ɉuda tɔɔɓɛlaa di nɛɛ laa yɛ kala, di nąąɠaa pɛli la.

¹² Nuą di goló kɛ a kwəi kwələ laa. Nuąi kɛ di ɲɛ̨itɔwɔ, diɛ ɓaa: lévi lonnii Yahatə, da Ovadiahu, Merari yəi bɛlɛ́n nuą; ɛlɛɛ, Ɉekaria da Mesulamə Kehatə yəi bɛlɛ́n nuą; diɛ ɓə kɛ goló nwun na. Lévi lonnii di wəlɛɛ hvɛli kɛ,

¹³ di kɛ diɛ̨ həɠə nuą da goló kɛ nuą nwun na. Nu kəlee da gɛ koló. Lévi lonnii lɔwai, nu taɠaa di kɛ a nɔi hɛɓɛ́ kɛ nuą, daɠaa di ɓo a dɔ́n ɉɛɓɛ́ mɛ̨ikaa nuą, awala kɛ tii, bɛlɛ́ laaləi mɛ̨ikaa nuą.

¹⁴ Nwalii ŋɛ̨i di paa la a Yai-Laa nwɔ pɛlɛ́i nwɔɔi, ɓɛlɔwai di kɛi di yee lɔ la ɉui, dɔ́n ɉɛɓɛ́i ŋɛ̨i Yai-Laa ə dɛɛ Moisə pɔ, ɉaláá laa həli mun gɛnɛ̨ Hilkiyahu ə gaa.

¹⁵ Hilkiyahu yɛ ɉɛɓɛ́ kɛmun Safan ɓa: «Ŋą́ą́ dɔ́n ɉɛɓɛ́i kaa Yai-Laa nwɔ pɛlɛ́i mu.» Hilkiyahu ə dɔ́n ɉɛɓɛ́ tɛɛ Safan pɔ.

¹⁶ Safan ə ɉɛɓɛ́ həɠə, ə dɛɛ tɔɔmun bɔ, ə bɛlɛ nwoo hukulɔ ɓa, yɛ mą: «Golóɠaai kpɔ ə́ ə́ nwɔɔ nuąi tí a gɛ mɛ̨nį, di yee kaa mą diɛ gɛ.

¹⁷ Nwali kəhii ŋɛ̨i kɛ Yai-Laa yəi bɛlɛ́n, ɉaláá laa həli nuą daa huɓo, daa dɛɛ goló ɲɛ̨itɔwɔ nuą pɔ da goló kɛ nuą.»

¹⁸ Yili pulu, ɉɛɓɛ́ kɛmun Safan yɛ tɔɔmun ma: «Ɉaláá laa hɛli mun Hilkiyahu ə hɛɓɛ́ ta tɛɛ bɔ́.» Safan ə ɉɛɓɛ́ hu woo ɓo tɔɔmun nií la.

¹⁹ Yii lɔ tɔɔmun ə dɔ́n ɉɛɓɛ́ hu woo mąn, ə nɛɛ mą ə mąą həɠə huɓɛla.

²⁰ Yili pulu, ə mo Hilkiyahu, Safan lon Ahikamə, Mika lon Avdɔn, ɉɛɓɛ́ kɛ mun Safan da tɔɔmun nwɔ tímun Asaya diɛ, yɛ diɛ:

²¹ «'Ka li ka Yai-Laa mąąni kɛ, ɲą́ą́ kwa Israɛlə nu kpəli, ə pɛlɛ la Ɉuda nuą mąą mɛ̨nį ɓa, yɛ hvilɛn na ɉɛɓɛ́i ŋɛ̨i di gaa ɉu wooɠaa mąą mɛ̨nį ɓa. Mąąhɔlɔɓo, Yai-Laa nwɔ liiholii hu kɛnɛ̨ɛ̨ ɓə, yaai yɛ ə pu ku mɛ̨i, hvo gaai, ku nąnni di hvo gɛ li di hvo Yai-Laa woo pɔ yii ɓo, yɛ bələi bɛ̨ɛ̨i la ɉɛɓɛ́i ŋɛ̨i hu.»

²² Hilkiyahu da nuąi tii tɔɔmun ə di laa ɓo, di li Yálá kwəi mɛ̨nį hukulɔ nɛ̨ɛ̨nu Hulda pɔ, yai kɛ Ɉerusalɛmə gwəli nįnɛ̨ hu. Nɛ̨ɛ̨nui tii ɉilɛ ɓaa kɛ a: Salumə, Tokatə lon, Hasra lon. Nuą tii di di woo hukulɔ nɛ̨ɛ̨nui tii ɓa.

²³ Nɛ̨ɛ̨nui tii yɛ diɛ: «Israɛlə nwɔ Yálái Yai-Laa woo ka, yɛ diɛ; nuą ŋɛ̨i ka tɔɔ bɔ́ɔ́li, 'ka mo diɛ kaa diɛ:

²⁴ ‹Yai-Laa woo ka, yɛ: Gáá pai mɛ̨nį ɲąąnwąnąą laai gɛɛnąą ŋɛ̨i ɓa da ɉu nuą; ɉɛɓɛ́i tii di ɉu woo ɓo Ɉuda tɔɔmun ɲɛ̨i ɓa, mɛ̨nį ɲąąnwąnąą bɛ̨ɛ̨i ɉu, gáá gəlee pɔ mɛ̨nį kɛi;

²⁵ gbala ə tɔɔ, daa nɛ̨́ɛ̨́ laa, diɛ lansan kələn haliɠaa diɛ, diɛ hvaa tee mą́ą́ a di gɛ mɛ̨nįɠaa. Nwɔ́ɔ́ liiholi kaa pai pui gɛɛnąą ŋɛ̨i mɛ̨i, hva kpɛla mą.

²⁶ Yii ɓaa Ɉuda tɔɔmun ŋɛ̨i ka tɔɔ kaa pa Yai-Laa mąąnin gɛi, 'ka li, kaa mą, Israɛlə nwɔ Yálái Yai-Laa yɛ; mɛ̨nįi moɔ ɉɛɓɛ́i ŋɛ̨i hu ə́ mąn kɛlɛi!

²⁷ Yii kpɔ mɛ̨nįi ŋɛ̨i ə lɔ ə́ lii mu, ə́ ə́ kpɔɔ mąąyɛɛ Yálá lííla, ɛlɛɛ, nwooɠaai ɉɛɓɛ́i ŋɛ̨i ɉu, yɛ hvilɛn na gɛɛnąą ŋɛ̨i nuą diɛ, mąn ə́ mo, ə́ ə́ kpɔɔ mąąyɛɛ ɲą́ą́ nííla, ə́ ə́ mąąhəɠə huɓɛla, ə́ wɔlɔ nííla; yili ɓa, ɲą́ą́ gbɛli ŋą́ą́ ə́ woo mąn! Ɲą́ą́ Yai-Laa nwóó li.

²⁸ Gáá pai ə́ laŋąn ɉii ə́ nąnni diɛ, ə́ kaa pai laai di kwɛlɛ liilaa hu. Mɔ̨nɔ̨i gáá pai naai gɛɛnąą ŋɛ̨i ɓa da ɉu nuą, ə́ ɲɛ̨i hvo pai tɔɔi ɉu.›» Nuąi di di tɔɔ, di pənə di pa a bulu pənən tɔɔmun bɔ.

Ɉosiasə ə gɛ Yálá da nwɔ nuą di mįnɛ̨ hu nwun

²⁹ Tɔɔmun ə Ɉuda da Ɉerusalɛmə kalanɉonŋąą kəlee wɛlɛɛ tɔɔ, di ɲąąkpɔn mɛ̨nį ɓa.

³⁰ Yili pulu, yaa, da Ɉuda nuą, Ɉerusalɛmə nuą, ɉaláá laa həli nuą, lévi lonnii, ə pɛlɛ la nɔi lonni kəlee diɛ, nui lɔpee gəlee, di li Yai-Laa yəi pɛlɛ́n. Di nɛɛ mą, mįnɛ̨ hɛɓɛ́i ŋɛ̨i di kaa Yai-Laa yəi bɛlɛ́n, di ɉu woo ɓo a di woo kɛnɛ̨ɛ̨.

³¹ Tɔɔmun ə lɛɛ tɔɔni dɔɔi, ə nwoo kwɛlɛ Yai-Laa ɓa, yɛ gaa pai hvilɛn ɉii Yai-Laa pulu, ə ɲee kanąn nwɔ tíɓoɠaai da mąąpamą wooɠaa diɛ, da nwɔ tɔ́nŋąą diɛ, yɛ hvilɛn mįnɛ̨ hɛɓɛ́ hu wooɠaa pulu a nii kəlee, nwɔ yɛnɛ̨ɛ̨ kəlee yee mu.

³² Nuąi kpɔ Ɉerusalɛmə da Bɛnɉamɛn lɔi hu, tɔɔmun mo, nɔi lonnii kəlee di di kwɛla, diɛ di kaa pai hvilɛn ɉii Yálá nwɔ mįnɛ̨i pulu, yai a di nąnni di wɔɔ Yálá.

³³ Yili pulu, Ɉosiasə ə mąąluwu túwɔ́ɠaa tii kəlee kpɛɛ Israɛlə lɔi nąą kəlee. Nuąi kpɔ kɛ Israɛlə lɔi hu, ə kpala di la, diɛ tí di wɔɔ Yálái Yai-Laa ɓa. Ɉosiasə nwɔ yɛnɛ̨ɛ̨ kəlee yee mu, di hvo di pulu tɔɔ di nąnni di wɔɔ Yálái Yai-Laa.