Kɔlɔnikɔ Veerɛi 33 - Yálá laawoo hɛɓɛ (dc)

Manase nwɔ tɔɔlaa

¹ Manase kaa kwɛlan ə kɛ pow kɔ́w hveelɛ, yɛ dɔɔlaa hɔlɔɓo, ə tɔɔlaa kɛ a kwɛlan bow lɔɔli kɔ́w lɔɔli Ɉerusalɛmə.

² Ə túwɔ́ a ɲɔ̨nwɔ̨ɔ̨ Yai-Laa ɲɛ̨i ɓa. Nuą tii Yai-Laa ə di wɔɔ lɔiɠaa kulɔ di yəi, yɛ Israɛlə hee laa, ə hvilɛn di yii pələ ɲɔ̨nwɔ̨ɔ̨ɠaa pulu.

³ Ɉali kɔ́iɠaa tii nąn Ezekiasə ə di wolo, ə tinɛ̨n ə di tɔɔ, ə Baalə kɔ́iɠaa pɛli, ə wuluɠaa tɔɔ, diɛ gɔ́. Yɛ kwɛli hvilɛn pɛmɛ̨lɛ̨n-gɔwɠaa diɛ, yɛ di mąąwiɛ.

⁴ Ə hali kɔ́iɠaa pɛli Yai-Laa nwɔ pɛlɛ́i mu, ya pa, Yai-Laa ə kɛ bɛlɛi tii mąą mɛ̨nį ɓa: «Náá kaa pai kɛi Ɉerusalɛmə daai a yələ kəlee mɛ̨nį.»

⁵ Manase ə yələ kɔ́lɔn ɉu pɛmɛ̨lɛ̨n-gɔwɠaa kɔ́i pɛli Yai-Laa nwɔ pɛlɛ́i gwəli hɛ̨ąi hveelɛi ɓa.

⁶ Yaa kpįnįi tii, ə nonnii kulɔ a haláá, ə di kələn Bɛn-Hinɔmə ɓoloon ɉu. Yaa kpįnįi, ə tɔlikpɛ, ə ɲɛ̨ąkpɛ, ə ɲąmuątaa tɔlikpɛ. Ə Yai-Laa nwąną lɔ a mɛ̨nį ɲɔ̨nŋąą tii ə kɛi gɛ ɲɛ̨i mui.

⁷ Ə hali mąą nįnįn haɠa yaa kpįnįi, ə dɔɔ Yai-Laa nwɔ pɛlɛ́i mu. Ya ka yaan, Yálá ə mo Davidə da non Salomɔn ɓa, yɛ diɛ: «Bɛlɛi ŋɛ̨i, da Ɉerusalɛmə taa ŋɛ̨i, ya ɓə ŋą́ą́ di ɉəɠə ɉu a nííɓa, Israɛlə lɔiɠaa lɔwai, ŋį́ náá hee mą a yələ kəlee mɛ̨nį.

⁸ Ɛlɛɛ, nɔi ŋɛ̨i ŋį́ dɛɛ Israɛlə nuą di nąnni pɔ, vá kɛa di kɔ́wɔ kulɔ ɉu, di hvo li kwɛa la; akɛ, ɲɛ̨nɛ̨ɛ̨ kɛ pələ kpaaləi ŋɛ̨i ŋį́ dɛɛ Moisə pɔ, da ɉon, di hiɛ la, yai gaa a dɔ́n gəlee, da bɔ liɛwooɠaa.»

⁹ Manase ə Ɉuda nuą da Ɉerusalɛmə nuą nwun ɉu lan, di túwɔ́ a ɲɔ̨nwɔ̨ɔ̨, di yee ə tɛɛ nuąi wɔlɔ Yai-Laa ə di paa, yɛ di həɠə Israɛlə nuą tɔwɔ di nwɛi ɓa.

¹⁰ Yai-Laa ə mɛ̨i ɓo Manase ɓa da nwɔ nuąi, yiliɠaa di hvo di wəli tɔɔ nwoo ɓa.

¹¹ Yai-Laa ə Asiri tɔɔmun nwɔ kɔlaɠa nwun nąmįną tɔɔ, di pa a kɔ́, di bɛlɛ diɛ. Di Manase hon kwɛli kpɛlɛmąąɠaa, di ɲili a ɓala kwɛli yɛli, di li la Babilonə.

¹² Yii kɛa Manase ə kɛ mɔ̨nɔ̨ hu, ə nɛɛ mą, ə nwɔ Yálái Yai-Laa təli, ə gbɔwɔ mąąyɛɛ kpɔ kɛnɛ̨ nąnni di wɔɔ Yálái lííla;

¹³ ə wɔlɔ mą. Yai-Laa ə niilaa bɔ, ə nwəli tɔɔ nwɔ nɛ̨ɛ̨mąą woo ɓa, ə pənə ə pa a Manase Ɉerusalɛmə daa, əgɛ, ə nwɔɔ tɔɔlaai kɛ. Manase ə gɔlɔn yɛ kɛ, Yai-Laa ɓə gaa a Yálá.

¹⁴ Mɛ̨nįɠaa tii tɛɛ pulu, Manase ə daa mąą kpɛ tɔɔ Davidə taa pulu, Gihɔn voló tooi pələ moloon na, yɛ li la ɉɔ̨nwɔ̨lee pɛlɛ laaləi pələ yɛ tinɛ̨n na Ofɛlə ɓa. Ə dɔɔ kpɔ a mɛ̨i kwɛa. Ə kɔlaɠa nwun nąmįną hee Ɉuda lɔi gɔ́ taaɠaa hu.

¹⁵ Ɉali mąąnįnįnŋąą tii kɛ Yai-Laa yəi bɛlɛ́n, ə gəlee kulɔ laa, ə bili daa pulu, ɓɛɠaai ə bɛli a ɉali kɔ́iɠaa, ɲee tii Yai-Laa nwɔ pɛlɛ́i kaa nwuɔ̨, da Ɉerusalɛmə taa, ə nąąɠaa taɠa.

¹⁶ Manase ə tinɛ̨n ə Yai-Laa kɔ́i bɛli, ə liilaa halááɠaa kulɔ da mąąwiɛ haláá. Ə mo Ɉuda nuą diɛ, di tí Israɛlə nwɔ Yálá Yai-Laa ɓa.

¹⁷ Ə mą kɛ tii, nɔi lonnii di kɛ lɔ nii haláá kulɔ ɉali kɔ́iɠaa tii ɓa, kɛlaa di kɛi gulɔ Manase nwɔ Yálái Yai-Laa ɓa.

¹⁸ Manase kɛ mɛ̨nįɠaa gbəli, nwɔ Yálá hvɛli woo, da nwooɠaai Israɛlə nwɔ Yálá Yai-Laa nwɔ nuą di kɛ mo mą, gəlee pɛ̨ɛ̨ kaa Israɛlə tɔɔɓɛlaa kɛ mɛ̨nį hɛɓɛ́ hu.

¹⁹ Manase nwɔ Yálá hvɛli woo, da bələi Yálá ə nwoo mu hon na, nwɔ túwɔ́ pələ ɲɔ̨nŋąą, nwoo kalai ə mo Yálá ɓa, ɓɛɠaai ə hali kɔ́iɠaa pɛli laa, yɛ wuluɠaa tɔɔ diɛ gɔ́, ɉali mąąnįnįnŋąą ə bɛli, gɛɛ hvo ɉɔn gɔlɔn Yálá ɲɛ̨i ɓa; mɛ̨nįɠaa tii kəlee pɛ̨ɛ̨ kaa Hozai nwɔ hɛɓɛ́i hu.

²⁰ Manase ə laa nąnni kwɛlɛ, di noo ɲəi bɛlɛ́n. Non Amɔn ə hee a dɔɔmun a nąn mąąhvalin.

Amɔn nwɔ tɔɔlaa

²¹ Amɔn kaa kwɛlan ə kɛ pow hveelɛ kɔ́w hveelɛ, ɓɛlɔwai ə kɛ la a tɔɔmun. Ə tɔɔlaa kɛ a kwɛlan veelɛ Ɉerusalɛmə daai.

²² Ə túwɔ́ a ɲɔ̨nwɔ̨ɔ̨ Yai-Laa ɲɛ̨i ɓa, lɔ yɛ bələi nąn Manase ə gɛ la. Ɉali mąąnįnįnŋąą tii nąn Manase ə bɛli, ə kɛi haláá kulɔ diɛ, yɛ kwɛli hvilɛn diɛ.

²³ Kɛlaa, hvo gbɔwɔ mąą yɛɛ Yai-Laa ɲɛ̨i mu, yɛ bələi nąn Manase ə gɛ la. Kɛlaa yaamun a Amɔn, ə nɛ̨ŋɛ̨n ɉəɠə ə tɛɛ la nąn nwɛi ɓa.

²⁴ Ɲee pɔ nuą di lɔgilii kɛ mą, di baa ɲəi bɛlɛ́n.

²⁵ Nuą tii nɔgilii kɛ tɔɔmun Amɔn ɓa, nɔi lonnii di gəlee paa; di nɛɛ mą di Amɔn lon Ɉosiasə hee a tɔɔmun a nąn mąąhvalin.