Kɔlɔnikɔ Veerɛi 32 - Yálá laawoo hɛɓɛ (dc)

Senakeribə ə pa a kɔ́ Ɉuda lɔi hu

¹ Yii kɛa Ezekiasə ə nwɔ kwəi kwələ laa lɛ tii mɛ̨nįɠaa tii kɛɛ pulu, Asiri tɔɔmun Senakeribə ə pa Ɉuda lɔi hu, ə nwɔ kɔlaɠai pɛlɛ Ɉuda gɔtaaɠaa diɛ, diɛi ə kɛ bɔ ə di hon.

² Senakeribə kaai Ezekiasə ə mo, yɛ pa kɔ́ pɛlɛi Ɉerusalɛmə ɓa,

³ Ezekiasə da nwɔ kalanɉonŋąąi, bɛlɛɛ nwɔ kɔ́ ɲɛ̨itɔwɔ nuą diɛ, di di nwun dɔɔ, ɲa nwun gulɔiɠaa tii kɛ ɉį́i nwąną pulu pələ, nuą diɛ ɲa haɠa laa, di pɔlɔ pu ɉu.

⁴ Nu kpulu kɛnɛ̨ɛ̨ ə pa, di pɔlɔ pu ɲa nwun gulɔiɠaa ɓa, da ɲa lon tii kɛ li nɔnwɛi pələ. Di kɛi kɛ diɛ: «Mąą hvo nɛ̨ɛ̨li, Asiri tɔɔɓɛlaa da pa pai, di hvo ya hɔlɔɓo kɛnɛ̨.»

⁵ Ezekiasə ə tɔɔ kpɔ a nwąnąi, ɉį́i mɛ̨i tii kɛ buɔ, ə nąą tɔɔ, ə gɔ́ pɛlɛ́ɠaa tɔɔ, ə da tɔɔ ɉį́i pulu pənə. Ə Milo pɛli Davidə taa. Ə kpala tamąą pɛli da hə́mə́ tamąą.

⁶ Ə kɔ́kuláaɠaa hee nuą nwun na. Ə nuą kəlee ɲąąkpɔn gwəli hɛ̨ąi ɉį́i la, ə pə́lə́ ɓo diɛ a di lii hon bələ, yɛ diɛ:

⁷ «'Ka a ka huwalawalaa, ka ká liikpələ! 'Ka hvo ɲɔw, 'ka mąą hvo kpɛlin Asiri tɔɔmun ɲɛ̨i tɔwɔ da bɔ nu kpului tii bɔi, hvó gaai, nui gwa diɛni gu tɔɔ, huwalawala kɛnɛ̨ kaa ɲəi.

⁸ Asiri tɔɔmun nwɛi, nu kanŋaa ɓə ɲəi, kɛlaa gu wɛi, gu wɔɔ Yálái Yai-Laa kaa gu pɔ. Yaa ɓə a kpɔnmąą tɛɛ gu pɔ, yɛ gu wɔɔ kɔ́i kɔ́.» Ɉuda tɔɔmun Ezekiasə woo tii ə nɔi lonnii liilaa ə di hvaŋąlɔ.

Senakeribə ə wəlɛɛ ɓo diɛ pa moi Ɉerusalɛmə nuą diɛ

⁹ Yili kulaa ɉu, Asiri tɔɔmun Senakeribə da nwɔ kɔlaɠai kəlee di pa, di kɔlaɠa pɛlɛ Lakisə taa ɓa. Ə nuą tɔɔ Ɉuda tɔɔmun Ezekiasə pɔ Ɉerusalɛmə, da Ɉuda nuą kəlee diɛ, yɛ diɛ:

¹⁰ «Senakeribə woo ka, yɛ: Lə ɓə ka kilitɔɔi mą, ka heɛ la Ɉerusalɛmə daa mąątɛ hį́i hu?

¹¹ Ka ɓowo hvo tii Ezekiasə kaa moi, əgɛ ka haa a pulu, da kpələ wɛlii! Ya ka tii gaa kɛi la kaa: ‹Gu wɔɔ Yálái Yai-Laa kaa pai gu kulɔ ɲəi kɛi Asiri tɔɔmun ɲəi!›

¹² Kɛlɛi, Ezekiasə ɓə tii yə! A yaai nuą hvaaiɠaa kala, ə ɉali kɔ́ɠaa taɠa, yɛ kɛ Ɉuda da Ɉerusalɛmə nuą diɛ: 'Ka kwɛli hvilɛn nɔ Yálá ɓa yaa tɔ̨nɔ̨, ka lansan kələn Yálá kɔ́i tanɔ̨n tii ɓa-e?

¹³ Mɛ̨nįi ɲą́ą́ kwa ną́nni kwaa gɛ, lɔi mɛ̨i nuą, ka hvo gɔlɔn? Akɛtii, nɔiɠaa tii di wɔɔ haliɠaai di mɔ̨ɔ̨ di kulɔ ɲə́i?

¹⁴ Nɔiɠaa tii nɛlɛ kpɔɔ ɓə nwɔ haliɠaa di di kulɔ ɲə́i, yaai ka wɔɔ Yálái kaa pai ka kulɔi ɲə́i?

¹⁵ Ə həli kani kaa! Ezekiasə hvo kɛ gaa ka lɔi mu, hvo ka ɓowo lɔ tii! 'Ka hvo laa na, mąąhɔlɔɓo, lɔi ta hvo laa, tɔɔlaa ta hvo laa, yii nwɔ haliɠaa da pɛli di di kulɔ ɲə́ə́ ŋą gwa ną́nni; gu hvo mun kɛ ka wɔɔ haliɠaai, di hva pɛli mą ka kulɔi ɲə́ə́ ŋą!»

¹⁶ Asiri tɔɔmun Senakeribə, ŋą wəlɛɛ ɓo nuąi di pɛlɛ diɛ di laa pu Ezekiasə hu da nwɔ Yálái Yai-Laa.

¹⁷ Yili pulu, Senakeribə ə hɛɓɛ́ɠaa pɛ̨ɛ̨, yɛ naa pu Israɛlə nwɔ Yálá Yai-Laa hu, yɛ bilinmo, yɛ kɛ mą: «Bələi lɔ yɛnɛ̨ɛ̨ lɔiɠaa di wɔɔ haliɠaai di hvo pɛli di wɔɔ nuąi kulɔi la ɲə́ə́ ŋą, bələ lɔ ɓə Ezekiasə nwɔ Yálá hvo pai pɛlii nwɔɔ nuąi kulɔi la ɲə́ə́ ŋą.»

¹⁸ Nuąi Senakeribə ə di tɔɔ, di kɛi tómą a di woo kɛnɛ̨ɛ̨, a Ɉuda woo, Ɉerusalɛmə nuą diɛ, ɉį́i nwąną mɛ̨i, diɛ di mąą ɲɔw, əgɛ, di mąą ə kpɛlin, di pɛli daa hon ɉii.

¹⁹ Di kɛi Ɉerusalɛmə nwɔ Yálái mąą mɛ̨nį ɓo yɛ bələi di kɛi yɛnɛ̨ɛ̨ nɔiɠaa di wɔɔ haliɠaai di bɛli a di yee, mąą mɛ̨nį ɓo la.

Yálá ə Ɉerusalɛmə ɓalo

²⁰ Tɔɔmun Ezekiasə da Yálá kwəi mɛ̨nį hukulɔ mun Amɔsə lon Esai, di Yálá hvɛli mɛ̨nįi tii hu, di tómą diɛ di woo tɛ yələ kɔ́lɔn mą.

²¹ Yai-Laa ə malaka ta tɔɔ, ə Asiri tɔɔmun wɔ kɔlaɠai hu kɔ́kuláaɠaa kəlee, gɔkuláa ɲɛ̨itɔwɔ nuą kəlee da galanɉonŋąą paa. Asiri tɔɔmun ə bulu pənə ə li bɔ lɔi, ɲɛ̨i paa a nwumɛ̨. Ɓɛlɔwai ə lɔ la ɲəi bɛlɛ́n, gwəi lonnii di baa a kɔ-kɔ ɓɔwa.

²² Bələ ɓə Yai-Laa ə Ezekiasə da Ɉerusalɛmə nuą ɓalo la, yɛ di kulɔ di Asiri tɔɔmun Senakeribə yəi, da di yowoɠaa kəlee. Yili pulu, ə liilaa yɛnɛ̨ɛ̨ tɛɛ di pɔ bələ kəlee.

²³ Nu tamąą di kɛi pa Ɉerusalɛmə daai a Yai-Laa kɔ́ hɛnŋąą, da mɛ̨inɛ̨ɛ̨ɠaa a Ɉuda tɔɔmun Ezekiasə nwɔɔ. Ə həɠə mɛ̨nįi tii ɓa, yɛnɛ̨ɛ̨ lɔiɠaa kəlee di kɛi mɛlɛ kɛ mą.

Ezekiasə nwɔ tɔɔlaa laa kulɔ pələ

²⁴ Mąą lɔwai tii hu, ɲɔ̨n ə pɛlɛ Ezekiasə ɓa, yɛ kɛ ə baa. Ezekiasə ə Yai-Laa hvɛli, Yai-Laa ə nwoo pulu pənə a kpalo mɛ̨nį.

²⁵ Kɛlaa Ezekiasə hvo Yálá nwɔ mɛ̨inɛ̨ɛ̨ tii hukɔlɔn mą, ɛlɛɛ, nwɔɔ hu mɛ̨nį kɛnɛ̨ laa mąą mɛ̨nį, əgɛ, di liiholi hee Ɉuda da Ɉerusalɛmə ɓa.

²⁶ Kɛlaa, ə mą kɛ tii, bələi mąn ɉu mɛ̨nį kɛnɛ̨ laa tii ə kɛ la Ezekiasə ɓa, yaa da Ɉerusalɛmə nuą di di hɔn gɔlɔn, di di kpɔɔ mąą yɛɛ, Yai-Laa nwɔ liiholii hvo ɓɛla di mɛ̨i a Ezekiasə nwɔ tɔɔlaa yələi.

²⁷ Ezekiasə ə hɛn gɔw kɛnɛ̨ hɔlɔɓo, da mąąwiɛ. Ə wali, hɛni, kúɔ-kwɛni lɛlɛɛɠaa, mąątí wulɔ, kɔ-kɔ gbala da hɛn mąą mɛ̨nį nwąnąąɠaa huwui lɔpee gəlee hɔlɔɓo, ə bu gee mɛ̨i.

²⁸ Ə kɔ̨nɔ̨n gələɠaa tɔɔ, ə lɔɔ puiɠaa pɛli da wulɔ; ə taatɛlɛɛ huwui lɔpee gəlee kwənąn dɔɔ da di laa mį́i.

²⁹ Ə taaɠaa tɔɔ a gbɔwɔ nwɔɔ, ə taatɛlɛɛ kpɛa-kpɛaa da bɛlɛɛ-pɛlɛɛɠaa hɔlɔɓo kpɔ a ɉu kɛnɛ̨ɛ̨, mąąhɔlɔɓo Yálá ə gɔ́ a hɛn gɔw kɛnɛ̨ɛ̨.

³⁰ Ezekiasə tii ɓə Gihɔn yaɠaa nwun gulɔi laa kpulun ɲánwuɔ̨ pələ, ə ɲa laa ɉɛɠɛɛ pələ, voló tooi pələ Davidə taa tənən ma. Mɛ̨nįɠaa kpɔ Ezekiasə ə ɲee too ɉu, ɉu ə nɛ̨ɛ̨ mą.

³¹ Yili ɓə gɛ, ɓɛlɔwai di Babilonə kalanɉonŋąą tɔɔ la diɛ pa di woo pilii mą, ɛlɛɛ, gbalo mɛ̨nįi kɛ nɔi, di mąąni kɛ kɛ ɉu, Yálá ə Ezekiasə lɛɛ laa, əgɛ, ə ɉukɔɔn yɛ pɛli gwəi mɛ̨nį kəlee kɔ́lɔn ɉii.

³² Ezekiasə kɛ mɛ̨nįɠaa, da Yálá mąwiɛ kolói ə gɛ, gəlee pɛ̨ɛ̨i Yálá kwəi mɛ̨nį hukulɔ mun Amɔsə lon Esai nwɔ hɛɓɛ́i hu, bɛ̨ɛ̨ ə ɓo Israɛlə da Ɉuda tɔɔɓɛlaa di wɔɔ hɛɓɛ́i hu.

³³ Ezekiasə ə laa nąnni kɛlɛ, bələi tii a tɛ Davidə lonnii kámą la pələ, di noo gwɛlɛ. Haai Ezekiasə ə mo, Ɉuda nuą da Ɉerusalɛmə nuą di mąąwiɛ. Non Manase ə hee a dɔɔmun, a nąn mąąhvalin.