Kɔlɔnikɔ Veerɛi 31 - Yálá laawoo hɛɓɛ (dc)

Ezekiasə ə ɉɛli pɛlɛ mu koló mɛ̨nį ɲɛ̨i kulɔ

¹ Di kpɛɛ a mɛ̨nįɠaa tii kəlee kɛɛ, Israɛlə nuą kpɔ tii kɛ laa, dəli Ɉuda taaɠaa hu, diɛ ɉali mąąnįnįnŋąą wolo, diɛ nɔwɔ ɲɔ̨nŋąą hvala, diɛ ɉaláá kulɔiɠaa taɠa; di di kpɛɛ kpɔ tɛ̨ɛ̨tɛ̨ɛ̨ Ɉuda da Bɛnɉamɛn lɔi kəlee; ə mą kɛ, Ɛfraimə da Manase lɔiɠaa kəlee hu. Yili pulu, Israɛlə nuą kəlee di pənə di li di pɔ taaiɠaa.

² Ezekiasə ə ɉaláá laa həli nuą da lévi lonnii heekpəlin na kɛ, ə di hee a di kpulu, ə di kɛ kolóɠaa lɛ diɛ. Ɉaláá laa həli nuą da lévi lonnii di yee ə lɛɛ ɉaláá hɛn da gəlee kələn mąą mɛ̨nį ɓa, niilaa haláá, goló mɛ̨nį, Yálá hɛɠɛɛɓo mɛ̨nį da mąątɛ̨nɛ̨ mɛ̨nį ɓa Yai-Laa ŋą kwəlii laaləi.

³ Tɔɔmun ə kɛi gbɔ-kpɔɔ wali ta lɔ ɉaláá hɛn da gəlee kələn mąą mɛ̨nį hu ɲələwala pɔ da ɲələwulii nwɛi hu, ə mą kɛ, vįitɔɔ yələ nwɛi, ɲąnįn dɔɔ nįnɛ̨ da ɉɛli yələɠaa; yɛ bələi bɛ̨ɛ̨i la Yai-Laa ŋą tɔ́n ɉɛɓɛ́i hu.

⁴ Tɔɔmun ə mo Ɉerusalɛmə nuą diɛ, yɛ diɛ: Hɛn mąąnɛ̨ɛ̨ ka dɛɛ ɉaláá laa həli nuą da lévi lonnii pɔ, 'ka dɛɛ di pɔ, əgɛ, di di hvaŋąlɔ Yai-Laa ŋą tɔ́n mąą mɛ̨nį hu.

⁵ Mɛ̨nįɠaa tii noloɓoɔ pulu, Israɛlə lonnii di pa kpɔ a di hɔlɔɓo hɛnŋąą dɔlɔɔɠaa, kpɔ kɛnɛ̨; di pa a mɔ̨nun, a lɔɔ, a wulɔ, a kwɛ̨nwulɔ, da kɔ̨nɔ̨n ɉuwui lɔpee gəlee; di bɛlɛ di hɔɔɓo hɛnŋąą kəlee bow nąą ɓa kpɔ kɛnɛ̨.

⁶ Israɛlə da Ɉuda nuąi kɛ heeni Ɉuda daaɠaa hu, diɛ kpɛli di pa a di wɔɔ taatɛlɛɛ kpɛa-kpɛaa da bɛlɛɛɠaa bow nąą, da haláá hɛnŋąąi naakwɛlanmoɔ Yai-Laa di wɔ Yálái ɓa; di paa la di gbulu tɔɔ kpɔ tamąą.

⁷ Ɲąnin ɉaaɓanąą, di gɔɠɔ tɔɔ diɛ ɉee a gbulu, di kpɛɛ la a ɲąnįn mɛ̨ihveelɛnąą.

⁸ Yii kɛa Ezekiasə da nwɔ kalanɉonŋąą di pa di, ɉɛnŋąąi di paa la, di gaa, di Yai-Laa hɛɠɛɛɓo, di lúwɔ́ too Israɛlə nuą diɛ.

⁹ Ezekiasə ə ɉaláá laa həli nuą da lévi lonnii mąąni kɛ ɉɛnŋąą tii mąą mɛ̨nį ɓa.

¹⁰ Ya ɓə ɉaláá laa həli mun gɛnɛ̨ Azariahu, yai a Sadɔkə huwu hu mun da, ə nwoo ɲąą pənə, yɛ mą: «Yii kpɔ nuą di gbala tɔɔ diɛ pa, a hɛn mąąnɛ̨ɛ̨ di gulɔ di hɔlɔɓo hɛn ɉu a Yálá nwɔɔ, diɛ paa la Yai-Laa nwɔ pɛlɛ́i mui, kwa hɛn mį́i, kuɔ pilɛ ɉu, gbəli yɛ lɛɛ kpɔ kɛnɛ̨. Mąąhɔlɔɓo, Yai-Laa aa lúwɔ́ too nwɔ nuąi diɛ, gbəli ka buɔ gee mɛ̨i.»

¹¹ Ezekiasə ə mo, di kɔ̨nɔ̨n gələɠaa tɔɔ Yai-Laa ŋą pɛlɛ́i laaləi. Yii kɛa di kpɛɛ la,

¹² di ɉɛn bow nąąɠaa, da Yálá kɔ́ hɛnŋąąi, di paa la, di naa kpɔ a nɛlɛɛ. Di Levi lon Konaniahu kɛ a mɛ̨i kaamun, di ɉee gwɛlɛmun gɛ a gaayɔwɔ Simei.

¹³ Yehiɛlə, Azaziahu, Nahatə, Asahɛlə, Yerimotə, Yozavadə, Eliɛlə, Yismakiahu, Mahatə da Benayahu, diɛ ɓə kɛi nąą mąąkpɛ, Konaniahu da gaayɔwɔ Simei ɓə di ti la, yɛ bələi tɔɔmun Ezekiasə da ɉaláá laa həli mun gɛnɛ̨ Azariahu yai ɲɛ̨i ə kɛ Yálá nwɔ pɛlɛ́i ɓa, di mo la.

¹⁴ Lévi huwu humun Yimna lon Kore, yai kɛ a voló ɓɛlai pələ bɛlɛ́ laaləi mɛ̨i kaamun, ya ɓə kɛ a Yálá kɔ́ hɛnŋąą mɛ̨i kaamun. Ya ɓə kɛi Yai-Laa nwɛi kulɔ ɉu, yɛ ɉɛn mąąhəɠɛɛ kpɔ kɛnɛ̨ nwɛi kulɔ ɉu.

¹⁵ Edɛn, Miniaminə, Yesua, Semayahu, Amariahu, da Sekaniahu, diɛi tii kɛ manin mɛlaa taaɠaa hu, di kɛ ɲee mu. Nuą tii ɓə kɛ mąąnɛ̨ɛ̨ di ɉɛnŋąą ɲąąkwɛlɛ a kwəi kwələ laa di kaayɔwɔɠaa diɛ, yɛ bələi di heekpəlin na kaa la, nu pɔlɔ tɔɔi ə ɓo mą da nokolo tɔɔi.

¹⁶ Nuąi kɛ di laa bɛ̨ɛ̨ a bɔlɔ, ə həɠə di lokolo lɔwai ɓa, a kwɛlan ɉaaɓa, ə mą kɛ nąą pulu, a diɛi kpɔ kɛi pa Yai-Laa yəi bɛlɛ́n, di kɛi hɛn da hɔlɔɓo a yələ kəlee, di kɛi koló hɔlɔɓo di wɔɔ kpului hu yɛ bələi di heekpəlin na ə kɛ la.

¹⁷ Di kɛi ɉaláá laa həli nuą laa pɛ̨ɛ̨ a di nąnni di wɔɔ pɛlɛ́i laa. Diɛ lévi lonnii laa bɛ̨ɛ̨ həɠə di kaa kwɛlan a kɛ pow hveelɛ da bulu, a di kpulu, da di heekpəlin na.

¹⁸ Di kɛi bɛlɛ́n nuą kəlee laa pɛ̨ɛ̨; nɛ̨ą, hilɛlɛa, da nɛ̨ɛ̨lɛa, di nu kpulu kəlee laa pɛ̨ɛ̨, akɛ da di mąąhəɠə a kpɔ a kwəi kwələ laa.

¹⁹ Yii ɓaa ɉaláá laa həli nuą a Aarɔn lonnii, diɛi di kaa di pɔ taai ɲɛa kɔ́ɠɔɠaa hu, di gɛ lɔ tii a diɛ. Di kɛi nuą laa ɓo, yiliɠaa diɛ ɉɛnŋąą ɲąąkwɛlɛ nuą diɛ ɉaláá laa həli nuą lɔwai da nuąi di laa pɛ̨ɛ̨ lévi lonnii lɔwai.

²⁰ Bələ ɓə Ezekiasə ə túwɔ́ la Ɉuda lɔi kəlee hu, mɛ̨nįi kɛ nɛlɛɛ, ɉaŋąą a kwəi kwələ laa nwɔ Yálái Yai-Laa ɲɛ̨i ɓa, ə yili kɛ.

²¹ Golóɠaai kpɔ ə ɲee too ɉu Yai-Laa ŋą pɛlɛ́i mąą mɛ̨nį ɓa, Yálá nwɔ tɔ́n da mąą pamą wooɠaa mąą mɛ̨nį ɓa; ə gəlee kɛ a Yálá ɲɛ̨i laa kwɛliɛ a nii kəlee, ɛlɛɛ, ɲee ə lɔ.