Kɔlɔnikɔ Veerɛi 30 - Yálá laawoo hɛɓɛ (dc)

Ezekiasə ə Ɉuda da Israɛlə təli pakə pu mɛ̨nį ɓa

¹ Ezekiasə ə Israɛlə nuą da Ɉuda nuą kəlee təli, əgɛ di pa Yai-Laa nwɔ pɛlɛ́i laaləi Ɉerusalɛmə daai di Israɛlə nwɔ Yálá Yai-Laa ŋą pakə hɛlii pu. Ə ɉɛɓɛ́ kɛ ə da tɛɛ Ɛfraimə nuą diɛ da Manase nuą diɛ.

² Tɔɔmun da nwɔ kalanɉonŋąą, bɛlɛɛ nɔi lonnii kəlee diɛ, di woo tɔɔi ə kɛ tɔ̨nɔ̨, əgɛ, di hɛli pu a ɲąnįn veelɛnąą.

³ Hvó gaai, di hvo pɛli bui a guu leelee, mąąhɔlɔɓo, ɉaláá laa həli nuą di hvo pɛli di mąąhəɠəi a di kpulu kɛnɛ̨ɛ̨, ɛlɛɛ, nɔi lonnii di hvo nii kɛ di ɲąąkpɔn ni Ɉerusalɛmə.

⁴ Mɛ̨nį hon bələi tii, ə nɛ̨ɛ̨ tɔɔmun da nuą kəlee diɛ.

⁵ Ɛlɛɛ, di gɛ tii a wɛlɛɛɠaa di dɔɔ Israɛlə lɔi kəlee hu, ə həɠə Beɛrə-Seva ə həli la Dan. Diɛ nuą di pa Ɉerusalɛmə Israɛlə nwɔ Yálá Yai-Laa nwɔ pakə hɛlii pu mɛ̨nį ɓa; hvó gaai nu tamąą di hvo ta bu li yɛ bələi bɛ̨ɛ̨i la.

⁶ Gilɛhəɠə nuą di li a ɉɛɓɛ́i tɔɔmun ə bɛ̨ɛ̨ da nwɔ kalanɉonŋąą, di hiɛ la Israɛlə lɔi hu da Ɉuda lɔi hu nąą kəlee, di gɛ yɛ bələi tɔɔmun ə di tí la, diɛ kɛ mą: «Israɛlə lonnii, 'ka pənə ka pa Abrahamə, Isaakə da Israɛlə nwɔ Yálá Yai-Laa pɔ, yaa kpɛli a pənə ə pa ka pɔ, kaa ŋɛ̨i a nu kpəli woloi aa kulɔ Asiri tɔɔɓɛlaa yee wolo.

⁷ 'Ka gɛ yɛ ka nąnni da ka kaayɔwɔɠaa di woo kala di nąnni di wɔɔ Yálái Yai-Laa ɓa, yaan ə di lɛɛ laa diɛ di hukala; yɛ bələi gbaɠala kaa la kaa.

⁸ «Ka hvo gɛ kan a kwɛli tee laa, yɛ ka nąnni. 'Ka ká yee haŋą Yai-Laa pɔ pələ, ka pa ŋą pɛlɛ mąąhəɠɛɛ mu, yaai aa mąąhəɠə a yələ kəlee mɛ̨nį. 'Ka tí ka wɔɔ Yálái Yai-Laa ɓa, əgɛ, ə nwɔ liiɲąnwąną ɲɛ̨i həɠə kaa.

⁹ Yaan, ka pulu pənə mɛ̨nį kaa pa Yai-Laa pɔ ɓə pai gɛi, ka kaayɔwɔɠaa da ka lonnii, ɲɛ̨imąąwɛli yɛ pɛli tooi la nuąi li a diɛ luwɔlaa hu diɛ, diɛ di lɛɛ laa, diɛ di pulu pənə diɛ pa ɓɛ nɔi. Hvó gaai ka wɔɔ Yálái Yai-Laa lii nɛ̨ɛ̨i gwəi, ɲɛ̨imąąwɛli yɛ ɓə ɲəi; nui a pa bɔ, hva ɲɛ̨i həɠəi ɲɛ̨i.»

¹⁰ Nwɛlɛɛɓo nuą di tɛɛ daaɠaa hu, Ɛfraimə lɔi hu da Manase lɔi hu, di həli kpɔ Zabulɔn. Kɛlaa, di kɛi yɛlɛ diɛ, diɛ di kaa yɛ ɓowonuą.

¹¹ Kɛlaa ə mą kɛ tii, Asɛrə nuą, Manase nuą da Zabulɔn nuą di mɛ̨nįi tii kaa a mɛ̨nį walawala, di pa Ɉerusalɛmə.

¹² Ɉuda lɔi hu ɓə Yálá ə tunwɔ̨n naa nuą lii ɓa, nu kəlee di hvaa mą, mɛ̨nįi tii tɔɔmun da nwɔ kalanɉonŋąą di mo, di ɉon, di bɔ mɛ̨nį kɛ yɛ bələi Yai-Laa hvaawoo ə kɛ la.

¹³ Nu kpɔn gɛnɛ̨ɛ̨ di pa Ɉerusalɛmə, nɛɠɛi di hva dɛ, ŋą hɛli pu mɛ̨nį ɓa, a ɲąnįn veelɛnąą; ɲąąkpɔn gɛnɛ̨ kpɔ-kpɔ li kɛ.

¹⁴ Ɉali kɔ́iɠaai kpɔ kɛ Ɉerusalɛmə daai, di gəlee pu, da lansan kələn ɉiiɠaa, di di pili Sedrɔn ɓoloon ɉu.

Ɉɛli pu yələ

¹⁵ Di pakə haláá kulɔ a ɲąnįn veelɛnąą nwɔ hvóló pow gɔw nąąnnąą. Mɛlɛi daa gbɛɛ ɉaláá laa həli nuą da lévi lonnii diɛ, di di mąąhəɠə; ɉaláá hɛnŋąąi da gəlee kələn di li la Yai-Laa yəi bɛlɛ́n.

¹⁶ Di tɔɔi kɛ di tɔɔi, yɛ bələi mąą tɔ́n naa la, yɛ bələi gaa la Yálá nwɔ tímun Moisə nwɔ tɔ́n ɉɛɓɛ́i hu. Lévi lonnii di kɛi ɲąmą tɛɛ ɉaláá laa həli nuą pɔ, yiliɠaai diɛ bu.

¹⁷ Yaan, nu tamąą di kɛ laa gbɔn ɉu, di hvo di mąąhəɠə li, yili ɓə gɛ, lévi lonnii ɓə kɛi pakə daatɛlɛɛɠaa nwun dee, a nuą tii di mąą hvo kɛ həɠə li diɛ pɛli goló mąąhəɠɛɛ kɛi Yai-Laa ɓa, di mąąhvalin.

¹⁸ Mąąhɔlɔɓo, nu tamąą, gəlee mą kɛ ləi Ɛfraimə nuą, Manase nuą, Isakarə nuą da Zabulɔn nuą, di hvo di kpɔɔ mąąhəɠə li, di hvo pakə kɔ̨nɔ̨n mį́i, yɛ bələi bɛ̨ɛ̨i la. Kɛlaa, Ezekiasə ə di mąąnɛ̨ɛ̨mąą hvə, yɛ kɛ diɛ:

¹⁹ Nuąi tɔɔ a di nwąnąi di Yálá liiɓa kwɛli, a di nąnni di wɔɔ Yálái Yai-Laa, ə mą kɛ di mąą hvo həɠə li, di pɛli lɛɠɛi ɉɛn mąąhəɠɛɛɠaa diɛ: «Yai-Laa, yai nwɔ mɛ̨nį lɛlɛɛ, ə di mąąhvaalɛɛ!»

²⁰ Yai-Laa ɲee hee Ezekiasə woo mu, hvo mɔ̨nɔ̨ laa nɔi lonnii diɛ.

²¹ Israɛlə nuąi kɛ Ɉerusalɛmə, nɛɠɛi di hva dɛ, mąą hɛli pu, hvóló mɛ̨ihveelɛ yee mu a kwəinɛ̨ɛ̨ kɛnɛ̨. Lévi lonnii da ɉaláá laa həli nuą di kɛi Yai-Laa mąątɛ̨nɛ̨ a yələ kəlee, a hvɛli woo tɔɔɠaa, diɛ Yai-Laa mąąwiɛ la.

²² Ezekiasə wooɠaa ə lévi lonnii lii hon, ə kiliŋąhiɛ lɛlɛɛ too diɛ yɛ hvilɛn na Yai-Laa ɓa. Ɛlɛɛ ɉɛli guu ta pɛlɛ mą a hvóló mɛ̨ihveelɛ, diɛ liilaa haláá kulɔ, diɛ di nąnni di wɔɔ Yálái Yai-Laa hɛɠɛɛɓo.

²³ Yili pulu, nuą kəlee woo tɔɔi ə kɛ tɔ̨nɔ̨, di voló ta pɛlɛ mą, di ɉɛli pu nwɔ̨nɔ̨ a hvóló mɛ̨ihveelɛ kwəinɛ̨ɛ̨ hu.

²⁴ Hvó gaai, tɔɔmun Ezekiasə ə nįnɛ̨ hilɛ waa tɔ̨nɔ̨ da taatɛlɛɛ pɛlɛɛɠaa waa mɛ̨ihveelɛ həɠə ɉu a nu kpulu nwɔɔ; ɛlɛɛ, galanɉonŋąą di nįnɛ̨ hilɛ waa tɔ̨nɔ̨ da taatɛlɛɛ pɛlɛɛ waa pow həɠə ɉu a nu kpulu nwɔɔ. Ɉaláá laa həli nuą di di mąąhəɠə kpɔ a di kpulu kɛnɛ̨.

²⁵ Nu kəlee kwəinɛ̨ɛ̨i kɛ, Ɉuda nuą, ɉaláá laa həli nuą da Levi lonnii, ə mą kɛ, nu kpɔn həɠə Israɛlə lɔiɠaa hu da Ɉuda lɔiɠaa.

²⁶ Gwəinɛ̨ɛ̨ tii hu kɛnɛ̨i kɛ Ɉerusalɛmə nuą diɛ. Hvó gaai, ə həɠə kpɔ Israɛlə tɔɔmun lon Salomɔn ŋą yələi ɓa, ə pa ə həli la ɲələi tii ɓa, mɛ̨nį huwui tii ta hvo ta kɛ li Ɉerusalɛmə daai.

²⁷ Yili pulu, ɉaláá laa həli nuą da Levi lonnii di di muhəɠə, di lúwɔ́ too nɔi lonnii diɛ, di woo mąn, di wɔɔ hvɛliɓo ə həli yələ kɔ́lɔn mą, Yálá nwɔ mąąhəɠə laa hee pɛlɛ́.