Kɔlɔnikɔ Veerɛi 3 - Yálá laawoo hɛɓɛ (dc)

Yai-Laa nwɔ pɛlɛ́i tɔɔ mɛ̨nį leelee

¹ Salomɔn ə ɲee pɛlɛ Yai-Laa nwɔ pɛlɛ́i tɔɔ mɛ̨nį goló ɓa Ɉerusalɛmə, Moriya yee nwuɔ̨, ɓɛi Yai-Laa ə gbɔwɔ lɛ laa nąn Davidə ɓa, ɓɛ kpɔ-kpɔɔ tii Davidə ə nąą pɛli Ɉebusə mun Ornan ŋą mɔ̨nun dan ɉii.

² Salomɔn ə ɲee pɛlɛ bɛlɛi tii tɔɔ koló ɓa, ŋą tɔɔlaa gwɛlan nąąn nɔwai, ɲąnįn veelɛnąą.

³ Yálá nwɔ pɛlɛ́i goloon ɉu ka, yɛ bələi Salomɔn ə mo la: Gwɛa yee kaa a tɔwɔ-tɔwɔ hɛn gɔɔ ŋąą, a yee laa mą pow mɛ̨ida, ɲąą kɛnɛ̨ a yee laa mą pow hveelɛ.

⁴ Bɛlɛ́ hvaɠan kɛ ɲɛ̨i tɔwɔ pələ gwɛa yee ə kɛ lɔ yɛ bələi bɛlɛ ɲąą kɛnɛ̨ pələ kaa la a yee laa mą pow hveelɛ, dɔɔɉu yɛ ɓo a yee laa mą pow hveelɛ. Ə hɛni hu waa hiɛ ɉu pələ.

⁵ Bɛlɛ mu kɛnɛ̨mun, ə siprə wulu ɓɛla pɛlɛ ɉu, ə hɛni hiɛ mą; ə gwalalaa da wulu powa mąąnįnįnŋąą kɛ mą.

⁶ Ə mąą yili a kuwɔ-kwɛni lɛlɛɛɠaa, ɉɛnii tii ə kɛ a Parwaimə hɛni.

⁷ Ə hɛni hiɛ bɛlɛ́n gəlee, ə mą kɛ, gbaan mą, gbon galan ɉu, bɛlɛ́ nwąną ɓa, ɛlɛɛ, gbonŋąą diɛ; ə mąąkpɛ malakaɠaa mąą nįnįn ɉəɠə bɛlɛ́ nwąnąɠaa ɓa.

⁸ Yili pulu, ə gɛɛnąą mąąhəɠɛɛ nwɔɔ pɛlɛ́i pɛli, goloon gwɛa pələ ə kɛ lɔ yɛ bɛlɛ ɲąą kɛnɛ̨ pələ, yɛ ɓo a yee laa mą pow hveelɛ, nwɔ ɲąą kɛnɛ̨ pələi ə kɛ a yee laa mą pow hveelɛ. Ə hɛni huwaa hiɛ mą, yai kɛ a kilə waa pow hveelɛ.

⁹ Gbanwo hɛnŋąą di kɛ a kilə mɛ̨ida, a hɛni, ə hɛni hiɛ gbaan mą.

¹⁰ Ə malaka hveelɛ mąą nįnįn bɛli a kwɛli, yii ə bu, ə dɔɔ gɛɛnąą mąąhəɠɛɛ ɓa bɛlɛ́n bələ, ə hɛni hiɛ mą.

¹¹ Malakaɠaa tii koon gwɛa a yeelaamą pow hveelɛ. Dɔlɔɔ koon dɔ̨nɔ̨ kwɛaa kɛ a yeelaamą lɔɔli, yɛ hee bɛlɛ́ nwąną ɓa; goon veelɛnąą kwɛaa a yeelaamą lɔɔli, yili yɛ hee malaka veelɛnąą goon dɔ̨nɔ̨ ɓa.

¹² Malaka veelɛnąą tii goon kwɛaa a yeelaamą lɔɔli, yɛ hee bɛlɛ́ nwąną yii tii ɓa, goon ɲii tii, kwɛaa a yeelaamą lɔɔli, yɛ hee malaka dɔlɔɔ nwɛi ɓa.

¹³ Malakaɠaa tii koon ɉeɛ giila, ə kɛ a yeelaamą pow hveelɛ, di kɛ tɔɔni di kɔ́wɔ mɛ̨i, di ɲɛ̨i hiɛ bɛlɛ́n bələ.

¹⁴ Ə ɉəɠə ɓɛla kɛ a gbɔluɔ mutɛɠiɛ, a mu kpɔluɔɔ gbələtətə, a gwəlɛɛ. Ə mąąkpɛ malakaɠaa mąą nįnįn gɛ ɉəɠə ɓɛla ɓa.

¹⁵ Ə bɛlɛ hɔlɔɔn veelɛ tɔɔ bɛlɛ́ laaləi, dɔɔ nwun ɲą ə ɓo a yee laa mą pow haaɓa kɔ́w lɔɔli, di tonna ɲąą kɛnɛ̨ a yee laa mą lɔɔli.

¹⁶ Ə wulu powa mąą nįnįn gɛ bɛlɛ́n, ə di laa bɛlɛ hɔlɔɔnŋąą tii tonna, ə wulu ɓaɠaa mąą nįnįn gɛ, ə di hee nwulu powaɠaa mąą nįnįn ɉu.

¹⁷ Ə bɛlɛ hɔlɔɔnŋąą tii tɔɔ bɛlɛ́ laaləi, dɔ̨nɔ̨ ə ɓo ɓa-mįi-yee hu, dɔ̨nɔ̨ ə ɓo kɛɓɛyee hu. Yii ŋɛ̨i kɛ mamįiyee hu pələ, naa ɓaa a: Yakin, yii ŋɛ̨i kɛ kɛɓɛyee hu pələ, naa ɓaa a: Boazə.