Kɔlɔnikɔ Veerɛi 29 - Yálá laawoo hɛɓɛ (dc)

Ezekiasə nwɔ tɔɔlaa

¹ Ɓɛlɔwai Ezekiasə ə tɔɔlaa hɔlɔɓo la, gaa kwɛlan ə kɛ pow hveelɛ gɔw lɔɔli, ə dɔɔlaa kɛ kwɛlan bow hveelɛ gɔw mɛ̨inąąn ɲeemu, Ɉerusalɛmə daai. Nee ɓa kɛ a Ɉekaryahu lon Aviya.

² Ə túwɔ́ a ɉaŋąŋąą Yai-Laa ɲɛ̨i ɓa, kpɔlɔ yɛ galá Davidə.

³ Nwɛi, ŋą tɔɔlaa gwɛlan doloo, ŋą ɲąnįn doloo, Ə Yai-Laa nwɔ pɛlɛ́i laaɓo, ə gbonŋąą pɛli.

⁴ Ə ɉaláá kulɔ nuą da leviteɠaa təli, ə di ɲąąkpɔn voló ɓɛlain gwəli hu pələ.

⁵ Yɛ diɛ: «'Ka ká wəli tɔɔ nwóó ɓa, Levi lonnii! Yii hu, 'ka ká mąąhəɠə, 'ká Yai-Laa, ká nąnni di wɔ Yálái ŋą pɛlɛ́i mąąhəɠə. 'Ka mąąluɠu hɛn gəlee kulɔ gɛɛnąą mąąhəɠɛɛ ɓa.

⁶ Hvo gaai gu nąnni di di hɔn gɛ a ɲɔ̨nwɔ̨ɔ̨ Yai-Laa gu wɔ Yálái ɲɛ̨i ɓa; di nɛɛ laa; di di ɲɛ̨i həɠə Yai-Laa nwɔ pɛlɛ́i ɓa; di di pulu tinɛ̨n mą.

⁷ Di ɲimɛ̨n mu pɛlɛ ni kəlee laa kpulu, di nabonŋąą luɠuun, di hvo kɛli kɛa lansan haláá kulɔ Yálá ɓa, ə mą kɛ haláá yii da gəlee kələn, di hvo kɛli da kulɔ ɉɛli pɛlɛ mu, Israɛlə nuą mąą mɛ̨nį ɓa.

⁸ Yili ə Yai-Laa líiholi Ɉuda da Ɉerusalɛmə di pɔ; Ə nąą kɛ a kwəi pilimąą kɛɛnąą, a lɔi mąąwɛlia, diɛ mɛ̨nį kɔ́ɔn mą, diɛ yɛlɛ mą, yɛ bələi ká kaa gaai la a ká ɲɛ̨i kɔ́w.

⁹ Gu nąnni ka daa haa a kwɛli hɛn naa pɔɔ; yili mąą mɛ̨nį ɓa, gu lon ɉinąą, gu lon nɛ̨ąą da gu nɛ̨ąni ka luwɔlaa hu.

¹⁰ Gáá bɔ, gua Yai-Laa, Israɛlə nwɔ Yálái ni, gu mįnɛ̨ həɠə yiihu, Ə líiholi kpəiɛi tii həɠə gu pulu.

¹¹ Nónnii, 'ká hvo ká nwun gulɔ goló mu, mąąhɔlɔɓo, káá ɓə Yai-Laa Ə ká həɠə ɉu ká ɓo tɔɔnin nií la, káá mąą mɛ̨nį ɲɛ̨i kulɔ, ká ɓo a nwɔ tínuą, káá lansan laa hələ mą.»

¹² Levi lonnii di di muhəɠə: Kehatə lonnii lɔwai; Amasai lon Mahatə, Azariahu lon Yoɛlə; Merari lonni lɔwai: Avdi lon Kisə, Yehalelɛlə lon Azariahu; Gɛrsɔn lonnii lɔwai: Ɉima lon Yoa, Yoa lon Edɛn.

¹³ Elisafan lonnii lɔwai: Simri da Yeiɛlə; Asafə lonnii lɔwai: Ɉekariahu da Mataniahu;

¹⁴ Heman lonnii lɔwai: Yehiɛlə da Simei; Yedutun lonnii lɔwai Semaya da Uziɛlə.

¹⁵ Di di nąn nonnii ɲąą kpɔn, di di kpɔwɔ mąąhəɠə, ɛlɛɛ di pa, yɛ bələi tɔɔmun ə mo la, yɛ bələi Yai-Laa ə mo la, di Yai-Laa ŋą pɛlɛ́i mąąhəɠə.

¹⁶ Ɉaláá kulɔ nuą di lɔ Yai-Laa ŋą pɛlɛ́i mu pələ, diɛ mąąhəɠə, ɉɛnŋąąi kpɔ di gaa laa tɔ́n ə ɓo diɛ, di gəlee kulɔ laa, di di pu gwəli hɛ̨ąi, yili pulu lévi lonnii di di yɛɠɛ, də li di di pili ɲɛ̨nɛ̨ɛ̨ pələ, Sedrɔn ɓoloon ɉu.

¹⁷ Di nɛɛ mą di gɛɛnąą mąąhəɠɛɛ koloi tii kpala tɔɔ ɲąnįn dɔlɔɔ nwɔ hvóló dɔlɔɔ, voló mɛ̨ihaaɓa yələ, di həli Yai-Laa nwɔ ɲįmąn mui ɓa. Di Yai-Laa nwɔ pɛlɛ́i mąąhəɠə hvóló mɛ̨ihaaɓa yee mu. Di di yee laa kulɔ a ɲąnįn dɔlɔɔ nwɔ hvóló pow kɔ́w mɛ̨ida yələ.

¹⁸ Levi lonnii di həɠə, di li tɔɔmun Ezekiasə pɔɔli, diɛ mą: «Kwaa Yai-Laa nwɔ pɛlɛ́i kəlee mąąhəɠə, kwaa ɉaláá hɛn gəlee kələn ɉii mąąhəɠə da bɔ hɛnŋąą kəlee, da nɛɠɛ laa taɓali da bɔ hɛnŋąą kəlee,

¹⁹ ə pɛlɛ la, ɉɛnŋąą ŋɛ̨i Akazə ə mąąluwu a nwɔ tɔɔlaa kɔ́hɔɓoɔ yələi diɛ. Kwaa di mąąhəɠə, kwaa di hee. Diɛ ka Yai-Laa kɔ́i liila.»

²⁰ Bulu ɓa yələ laa ɓoɔ yələ wala pɔ, tɔɔmun Ezekiasə ə daa kalanɉonŋąą ɲąąkpɔn Yai-Laa nwɔ pɛlɛ́i laaləi.

²¹ Di pa a nįŋɛ̨ hilɛ mɛ̨ihveelɛ, ɓɛlaa hilɛ mɛ̨ihveelɛ, ɓɛlaa lon mɛ̨ihveelɛ, ɓooli hilɛ mɛ̨ihveelɛ; di gɛ a nɛ̨ŋɛ̨n mąąhvaalɛɛ haláá dɔɔ pɛlɛ́ mąą mɛ̨nį ɓa, gɛɛnąą mąąhəɠɛɛ da Ɉuda lɔi mąą mɛ̨nį ɓa. Yili pulu, tɔɔmun yɛ ɉaláá laa həli nuąi a Aarɔn lonnii diɛ, di ɉalááɠaa tii kulɔ Yai-Laa kɔ́ haláá kulɔi.

²² Di nįŋɛ̨ɠaa paa, ɉaláá laa həli nuą di ɲąmą həɠə, di bu Yálá kɔ́i. Di mɛlaaɠaa paa, di ɲąmą pu Yálá kɔ́i, di mɛlaa lonnii kpɛlimąn baa di ɲąmą pu Yálá kɔ́i.

²³ Yili pulu, di pa a mooliɠaa, a nɛ̨ŋɛ̨nŋąą mąąhvaalɛɛ haláá hɛn, tɔɔmun da nu kpɔn nií la, di di yee haŋą di mɛ̨i.

²⁴ Ɉaláá laa həli nuą di di paa, di ɲąmą taɠa Yálá kɔ́i a nɛ̨ŋɛ̨n mąąhvaalɛɛ hɛn. Diɛ nɛ̨ɛ̨mąą hvə Israɛlə lonnii mąą mɛ̨nį ɓa. Mąąhɔlɔɓo, Israɛlə lonnii kəlee mąą mɛ̨nį ɓa ɓə tɔɔmun ə mo la, diɛ ɉaláá hɛn daa gəlee kələn da nɛ̨ŋɛ̨n mąąhvaalɛɛ haláá kulɔ la.

²⁵ Tɔɔmun ə Levi lonnii hee Yai-Laa nwɔ pɛlɛ́i mu a hvɛli woo: talanənŋąą, gwɛnįnŋąą, da bɛlɛgwəi gwɛnįnŋąą; yɛ bələi Davidə ə mo la da Gadə, da tɔɔmun ŋą kwɛlɛɛn gɛɛ kaamun, ɛlɛɛ, Yálá kwəi mɛ̨nį hukulɔ mun Natan. Mąąhɔlɔɓo, Yai-Laa ɓə gwəi mɛ̨nį tí a mɛ̨nįi tii diɛ mo.

²⁶ Levi lonnii di tɔɔ, vɛli kɛ hɛnŋąą Davidə ə bɛli, ə ɓo di yəi; yili pulu, dúlúɠaa di ɓo ɉaláá həli nuą kpɛa-kpɛaa.

²⁷ Ezekiasə ə mo, di ɉaláá hɛn gələn Yálá kɔ́i. Di di yee pɛlɛ lɔ ɉaláá kulaa ɓa, diɛ Yai-Laa mąątɛ̨nɛ̨ wələ too, diɛ túlu hvɛɛ, diɛ muhee a Israɛlə tɔɔmun Davidə nwɔ hvɛli kɛ hɛnŋąąi.

²⁸ Nɔi lonnii kəlee di gwɛli hvilɛn, nwələ yɛ hvaa dúlu woo yɛ tɔɔ, di lɛɛ gɛi tii, ə lɛɛ ɉu ɉaláá kələn ŋąą ə kpɛɛ.

²⁹ Yii kɛa di kɛi pa di yee laa kulɔi, tɔɔmun da nuąi kɛ nąą di di mąą pɛlɛ, di gwɛli hvilɛn.

³⁰ Yili pulu, tɔɔmun da galanɉonŋąą di mo Levi lonnii diɛ, di Yai-Laa mąątɛ̨nɛ̨ a Davidə nwɔ wələɠaai Asafə nwɔ wələɠaa, da gɛɛ kaamun nwɔ wələɠaai. Di mąątɛ̨nɛ̨ kpɔ a di kwəinɛ̨ɛ̨, yili pulu, di pu di kpəlin na di gwɛli hvilɛn.

³¹ Ezekiasə ə bələ həɠə, yɛ nɔi lonnii diɛ: «Ə həli káá! Kaai kpɔ ka yee laa hvɛɛ a Yai-Laa kɔ́ hɛn, 'ka ká mąąlɛɠɛ ɓɛ, 'ka pa a haláá hɛn, a kɔ́ɓo hɛnŋąą Yai-Laa nwɔ pɛlɛ́i mu.» Nɔi lonnii di pa a haláá hɛnŋąą da naa gwəi mɛ̨inɛ̨ɛ̨, nuąi kpɔ di lii nɛ̨ɛ̨i kɛ di kwəi, di kɛi pa a haláá hɛnŋąą da gəlee kələn.

³² Ɉaláá hɛn da gəlee kələn, yii kpɔ nɔi lonnii di paa la, ə kɛ a nįnɛ̨ hilɛ pow mɛ̨ihveelɛ, ɓɛlaa hilɛ nwundɔ̨nɔ̨, ɓɛlaa lon nwun veelɛ, gəlee di kɛ haláá hɛn da gəlee kələn a Yai-Laa nwɔɔ.

³³ Ɉaláá hɛnŋąą yiiɠaa tii di kɛ a taatɛlɛɛ kpɛa-kpɛaa nwun mɛ̨ida, taatɛlɛɛ pɛlɛɛ waa haaɓa.

³⁴ Yɛ bələi ɉaláá laa həli nuą di hvo kɛ tamą li la, di hvo ɉaláái da gəlee kələn, di hvo gəlee kɔ́lɔɓo, di kaayɔwɔɠaa a Levi lonnii di kpɔnmąą tɛɛ di pɔ, ə lɛɛ la ɉu di goló laa kulɔ, ɉaláá laa həli nuą kpɛa-kpɛaa di di mąąhəɠə. Levi lonnii di di mąąhulɔ di mąąhəɠə mɛ̨nį hu ə tɛɛ la ɉaláá laa həli nuą kpɛa-kpɛaa diɛ.

³⁵ Ɛlɛɛ, ɉaláá hɛn da gəlee kələn damąąi kɛ, ɛlɛɛ, liilaa haláá huwɔ wulɔ kɛnɛ̨, ə mą kɛ, nɔɔi di kɛi bu ɉaláá hɛn da gəlee kələn mą. Bələ ɓə di pənə di Yai-Laa nwɔ pɛlɛ́i mu koló hee la gbanɲą.

³⁶ Mɛ̨nįi ŋɛ̨i Yai-Laa ə nɔi lonnii diɛ, yili ə Ezekiasə da nɔi lonnii di kwəinɛ̨ɛ̨. Mąąhɔlɔɓo, mɛ̨nįi tii ə kulɔ nu kəlee tɛɠii.