Kɔlɔnikɔ Veerɛi 28 - Yálá laawoo hɛɓɛ (dc)

Akazə nwɔ tɔɔlaa

¹ Akazə kaa kwɛlan ə kɛ a kwɛlan bow hveelɛ, yɛ dɔɔlaa hɔlɔɓo. Ə tɔɔlaa kɛ a kwɛlan bow kɔ́w mɛ̨ida Ɉerusalɛmə daai. Hvo túwɔ́ a nɛlɛɛ yɛ bələi nąn Davidə ə túwɔ́ la a nɛlɛɛ Yai-Laa ɲɛ̨i ɓa.

² Kɛlaa, ə hvilɛn Israɛlə tɔɔɓɛlaa hiɛ pələ hu, ə Baalə haliɠaa mąą nįnįn bɛli.

³ Yaa kpįnįi yɛ lansan haláá kulɔ Bɛn-Hinɔmə ɓoloon ɉu, yɛ nonnii kələn, vilɛn ŋąą la tii, gɛɛ kalaa túwɔ́i tii pulu, a yaai nu huwu ŋɛ̨i Yai-Laa ə nɔi kulɔ di yəi, yɛ dɛɛ Israɛlə pɔ, di kɛi gɛ.

⁴ Ə kɛi haláá kulɔ, yɛ lansan kələn ɉali kɔ́iɠaa ɓa, ɲeeɠaa tonna, da nwɛlaɠaa hu.

⁵ Nwɔ Yálái Yai-Laa ə dɛɛ Aramə tɔɔmun bɔ kɔ́ hu, yili ə kɔluwɔ tamąą hon di li a dɛ Damasə daai. Yálá ə pənə nwɔ̨nɔ̨ ə nɔ Israɛlə tɔɔmun ɲee mu, kɔ́ ə kala mą kpɔ a ɲąąnwąnąą.

⁶ Remaliahu lon Peka ə nu waa nwundɔ̨nɔ̨ nu waa pow hveelɛ paa Ɉuda nuą lɔwai a hvoló tɔ̨nɔ̨, gəlee di ɓo a kuláa walawala. Mąąhɔlɔɓo, aa kɛ kulɔ nąnni di wɔ Yálái Yai-Laa woo mu.

⁷ Ɛfraimə kɔ́kuláa kpəɠiɛ Ɉikri, ə tɔɔmun non Maaseyahu paa, ə Azrikamə paa, yaai kɛ a dɔɔ pɛlɛ́ ɲąąwooɓomun, da Ɛlkana nui ŋɛ̨i kɛ dɔɔmun bɔɔŋą.

⁸ Israɛlə nuą di nu waa nwun veelɛ a luwɔ di kaayɔwɔɠaa pɔɔli. Di nɛ̨ąą, hilɛlɛa da nɛ̨ɛ̨lɛa hon, di bɛlɛ hɛnŋąą tamąą diɛ, diɛ li la Samari.

⁹ Yai-Laa kwəi mɛ̨nį hukulɔ mun da ə kɛ Samari, diɛ kɛ mą: Odɛdə. Israɛlə kɔlaɠa kɛɛ bulu pənəi, yɛ pai Samari, Odɛdə ə kulɔ yɛ li di laakwiɛn ɉii, yɛ diɛ: «Ka nąnni di wɔ Yálái Yai-Laa lii aa holi Ɉuda pɔ, ya ɓə gɛ yɛ di lɔ ka yee ŋą, kaan, kaa gɛɛ kalaa huwiɛ, aa həli yələ kɔ́lɔn ma.

¹⁰ Yii hui ŋɛ̨i, ka káá kɛi diɛ, ka Ɉuda nuą da Ɉerusalɛmə nuą ŋɛ̨i kɛ a ka wɔɔ luwɔ hinąą da ka wɔɔ kólo kɛ nuą! Kaa kpɔ ŋɛ̨i, a kaa kpįnįi kpɔ ŋɛ̨i, ka hvo mɔ̨ɔ̨ a hɔnmąą nuą ka wɔɔ Yálái Yai-Laa ɲɛ̨i a?

¹¹ 'Ka nwóó ŋɛ̨i mɛ̨n, yiihu, gɔluwɔɠaa ŋɛ̨i ka di hon, ka kaayɔwɔɠaa pɔɔlii, ka ká yee ɓo diɛ; ka wala gɛ tii, Yai-Laa nwɔɔ liiɲąnwąnąi a ɓɛla ka mɛ̨i.»

¹² Ɛfraimə lɔi ɲąąwooɓo nuą lɔwai, nu tamąą di di muhəɠə, diɛ ɓaa a: Yehohanan lon Azariahu, Mesilemotə lon Bɛrɛkiahu, Salumə lon Yehizkiyahu da Hadlai lon Amasa; di haŋą nuą tii həɠə gɔ́ mɛ̨i diɛ,

¹³ diɛ diɛ: «'Ka hvo pa ɓɛ a gɔluwɔɠaa tii, ka gɛ tii, gu hvo pa kɛ a hɔnmąą nuą Yai-Laa ɲɛ̨i ɓa. Ka káá bɔ, ka ká hɔn da ka kɛ nɛ̨ŋɛ̨n da kɛ mą? Ya pa, gu wɔɔ nɛ̨ŋɛ̨n gɛnɛ̨i, ɛlɛɛ Yálá liiholiɛ Israɛlə pɔ!»

¹⁴ Gɔkuláaɠaa di di yee kulɔ gɔluwɔɠaa hu, da ɉɛnŋąą tii di ɉon gɔ́ hu, nɔi ɲąąwooɓo nuą da nɔi lonnii kəlee ɲɛ̨i ɓa.

¹⁵ Yili pulu, di nuą kulɔ a di laa, di gɔluwɔɠaa liilaa, ɉɛnŋąą tii di ɉon gɔ́ hu, di da həɠə ɉu, nuąi həɠə hvo kɛ diɛ, gɛ yiliɠaa diɛ, di həɠə tɛɛ di pɔ da kɔ́lɔɠaa, kɔ̨nɔ̨nŋąą, lɔɔ da mąątí wulɔɠaa diɛ. Yili pulu, yiiɠaai di kɔ́wɔ hvo kɛ di yəi, di di hee hoohvaalənŋąą mɛ̨i, di li a diɛ kpɔ Ɉeriko dow kpulu mu taa hu, di kaayɔwɔɠaa pɔ lɔi; yili pulu, di pənə di pa Samari.

¹⁶ Mąą kwɛlan tii hu, tɔɔmun Akazə ə nuą tɔɔ, diɛ li kpɔnmąą hu hvɛlii Asiri tɔɔɓɛlaa diɛ.

¹⁷ Edɔmə nuą daa nwɔ̨nɔ̨ kɛ pa, daa Ɉuda hon a kɔ́, daa kɔluwɔ tamąą hon nąą daa li la.

¹⁸ Filisti nuą daa kɛ too Ɉuda nuą mɛ̨i nɛ̨ŋɛ̨ lɔi hu, ɉɛɠɛɛ pələ, di Bɛtə-Sɛmɛsə, Ayalɔn, Gederotə, Soko da gwɛlɛ taaɠaa, Timna da gwɛlɛ taaɠaa, Gimzo da gwɛlɛ taaɠaa, di gəlee hon, di hee laa.

¹⁹ Yai-Laa ə Ɉuda lɔi ɲɛ̨i paa tii, Israɛlə tɔɔmun Akazə mąą mɛ̨nį ɓa; gbala ə tɔɔ, yaa ɓə Ɉuda ɲąątɔɔ a hvįikpɛɛ laa kulaa, ɛlɛɛ, mąąluwu túwɔ́ ɓoɔ, ɲee ɓo Yai-Laa mąą mɛ̨nį ɓa, yɛ doo.

²⁰ Asiri tɔɔmun Tilgatə-Pilnesɛrə ə pa ə pɛlɛ Akazə ɓa a kɔ́, yaamun hvo kɛ a mąąkpɔnmąą ɓomun.

²¹ Akazə ə Yai-Laa nwɔ pɛlɛ́i mu hɛnŋąą bələ tɔ̨nɔ̨ həɠə, bɛlɛɛ dɔɔ-pɛlɛ́ mun hɛnŋąą da galanɉonŋąą yəi bɛlɛ́n ɉɛnŋąą, ə dɛɛ Asiri tɔɔmun bɔ. Kɛlaa, yili hvo mɛ̨nįi lɔpee ta ɲɛ̨i kulɔ ɲəi.

²² Ɓɛlɔwai Asiri kɔlaɠai pɛlɛɛ la kɛ mą, tɔɔmun Akazə ə pɛlɛ nwɔ̨nɔ̨ yɛ nwɔ mąąluwu nɛ̨ŋɛ̨n da kɛ mą Yai-Laa ɲɛ̨i ɓa.

²³ Ya ka tii lii, yɛ haláá kulɔ Damasə haliɠaa diɛ, diɛi ŋɛ̨i di yee ə tɛɛ mą kɔ́ hu, yɛ kɛ diɛ: «Yii Aramə tɔɔɓɛlaa di haliɠaa da kpɔnmąą tɛɛ di pɔi, diɛ ɓə mąąnɛ̨ɛ̨ ŋį́ haláá kulɔ diɛ, ə gɛ, di kpɔnmąą tɛɛ bɔ́.» Yaan mɛ̨nįi tii ɓə kɛ ɲee lɛɛ ɉu mɛ̨nį da nɔi lonnii kəlee.

²⁴ Akazə ə Yálá nwɔ pɛlɛ́i mu hɛnŋąą ɲąąkpɔn, ə nwolo, ə Yai-Laa nwɔ pɛlɛ́i laakpulu, ə nɛɛ mą ə haláá kulɔiɠaa pɛli Ɉerusalɛmə bələ taŋąnŋąą kəlee la.

²⁵ Ə hali kɔ́iɠaa pɛli Ɉuda taaɠaa kəlee hu, diɛ lansan kələn naa haliɠaa diɛ. Bələ ɓə ə nąnni di wɔɔ Yálái Yai-Laa nwąnąlɔ la.

²⁶ Akazə kɛ mɛ̨nįɠaa, ə gɔɠɔ tɔɔ ə lɛɛ ɉu ə naa kulɔ, bɛ̨ɛ̨ kaa Ɉuda da Israɛlə tɔɔɓɛlaa di wɔɔ hɛɓɛ́i hu

²⁷ Akazə ə laa nąnni kwɛlɛ, di noo Ɉerusalɛmə daai, kɛlaa, di hvo now Israɛlə dɔɔɓɛlaa kámą la. Non Ezekiasə ə hee dɔɔlaa hu a nąn mąąhvalin.