Kɔlɔnikɔ Veerɛi 27 - Yálá laawoo hɛɓɛ (dc)Yotamə nwɔ tɔɔlaa ( Tɔɔɓɛlaa veelɛ 15.32-38 ) 1 Yotamə kaa kwɛlan ə kɛ pow hveelɛ kɔ́w lɔɔli, yɛ dɔɔlaa hɔlɔɓo. Ə tɔɔlaa kɛ Ɉerusalɛmə a kwɛlan bow kɔ́w mɛ̨ida. Nee laa ɓaa kɛ a Yerusa, Sadɔkə lon nɛ̨ɛ̨nu. 2 Yotamə ə túwɔ́ a nɛlɛɛ Yai-Laa ɲɛ̨i ɓa, yɛ bələi nąn Oziasə ə gɛ la. Kɛlaa, hvo lɔ Yai-Laa nwɔ pɛlɛ́i mu. Ə mą kɛ tii, nɔi lonnii di hvo di túwɔ́ pələ mąąhvalin. 3 Yotamə ɓə Yai-Laa nwɔ pɛlɛ́i yanwuɔ̨ pələ gbon bɛli. Ə pɛlɛ tamąą tɔɔ Ofɛlə ɉįi mɛ̨i. 4 Ə taa tamąą tɔɔ Ɉuda ɲee lɔiɠaa hu, ə kɔ́ pɛlɛ gbɛa-kpɛaa da bɛlɛɛ-pɛlɛɛɠaa tɔɔ nwɛlaɠaa hu. 5 Yotamə ɓə kɔ́ pɛlɛ Amɔn lonnii di wɔɔ tɔɔmun ɓa, ɲee ə tɛɛ mą. Mąą kwɛlan tii, di wali kwələ nwundɔ̨nɔ̨, mɔ̨nun gɔw kpili waa pow, da kpai kɔw kpili waa pow, ya ɓə bɔ. Di gɛ lɔ tii gwɛlan veelɛnąą da gwɛlan ɉaaɓanąą. 6 Yotamə hvaŋą ə kɛnɛ̨ tii, mąąhɔlɔɓo, ə ɉiɛ ɲɛ̨lɛkɛ nwɔ Yálái Yai-Laa ɲɛ̨i ɓa. 7 Yotamə kɛ mɛ̨nį takpɛliɠaa, gɔɠaai kpɔ ə gɔ́, daa kóloɠaai ə gɛ, gəlee pɛ̨ɛ̨i Israɛlə tɔɔɓɛlaa da Ɉuda tɔɔɓɛlaa di wɔɔ hɛɓɛ́i hu. 8 Gaa kwɛlan ə kɛ pow hveelɛ kɔ́w lɔɔli yɛ dɔɔlaa hɔlɔɓo; ə tɔɔlaa kɛ a kwɛlan bow kɔ́w mɛ̨ida Ɉerusalɛmə daai 9 Yotamə ə laa nąnni kwɛlɛ, di noo Davidə taa. Non Akazə ə hee a nąn mąąhvalin. |