Kɔlɔnikɔ Veerɛi 26 - Yálá laawoo hɛɓɛ (dc)

Oziasə nwɔ tɔɔlaa

¹ Ɉuda lɔi hu nuą kəlee di Oziasə həɠə, di ɉee di nwun na a tɔɔmun, a nąn Amasiasə mąąhvalin. Gaa kwɛlan ə kɛ a kwɛlan bow gɔw mɛ̨ida.

² Ɓɛlɔwai tɔɔmun ə laa la nąnni kwɛlɛ, Oziasə tii ɓə pənə ə Eilatə taa nwun mąąɓo, ə dɔɔ, ə gɛ a Ɉuda nwɔɔ.

³ Oziasə kaa kwɛlan ə kɛ a kwɛlan bow kɔ́w mɛ̨ida, ɓɛlɔwai ə hee la a tɔɔmun. Ə tɔɔlaa kɛ Ɉerusalɛmə daai a kwɛlan bow lɔɔli kɔ́w hveelɛ. Nee ə kɛ a Ɉerusalɛmə mun diɛ kɛ mą: Yekolya.

⁴ Oziasə ə túwɔ́ a ɉaŋąą Yai-Laa ɲɛ̨i ɓa, yɛ bələi nąn Amasiasə ə gɛ la.

Oziasə ə gɔɠɔ tɔɔ a nɛlɛɛ, ə naa kulɔ a ɲɔ̨nwɔ̨ɔ̨

⁵ Oziasə ə kɛi Yálá liiɓa kwɛli a yələ kəlee Ɉekariahu nwɔ yɛnɛ̨ɛ̨ kəlee yee mu, Ɉekariahu ɓə kɛi niɛwoo kɛ a Yálá nwɔ ɲɔwumąą laa. Yaan, yii kpɔ ə kɛi kulɔ nwoo ɓa da Yai-Laa di lɔwai, Yálá ə kɛi gɔ́ a nwun na nɛ̨ɛ̨.

⁶ Oziasə ə kɔ́ pɛlɛ Filisti nuą diɛ, ə Gatə ŋɛ̨i kɛ Yavne da Asdɔdə, mąą kpɛ hįį wolo. Yili pulu, ə taaɠaa tɔɔ Asdɔdə lɔi hu Filisti nuą pɔ lɔi.

⁷ Yálá ə tɔɔ bulu ɓɛlɔwai da Filisti nuą, Arabə nuą kɛ Gurə-Baalə da Meun nuą di kɛ la kɔ́ ŋą.

⁸ Meun nuą di kɛi nįįhɔ̨nwɔ̨ kulɔ Oziasə ɓa. Oziasə laa ə tɛ, ə həli la Eziptə lɔi ɲɛ̨n ma; mąąhɔlɔɓo, vaŋą ə kɛnɛ̨ kpɔ a neelee.

⁹ Oziasə ə Ɉerusalɛmə taa mąąkpɛ pɛlɛ́ɠaa tɔɔ ɉįi mɛ̨i, ɉįi kpoloon kee kaai gbon gɛɛ nąą, ə da kɛ ɲa-ɓoloon bɔ gbon gɛɛ nąą, ə da kɛ Redan mɛ̨i, ə di huwalawala.

¹⁰ Yili pulu, ə kɔ́-pɛlɛɠaa tɔɔ nɔi pun ɉu, ə yálɔwa tamąą tee, mąąhɔlɔɓo, taatɛlɛɛ kpulu tamąą di kɛ ɲəi; tíikɛnuą di kɛ ɲəi nɛ̨ŋɛ̨ lɔi hu da ɉɛɠɛɛ pələ. Viɲə yɛɛ laa nuą di kɛ ɲəi ɲeeɠaa ɓa da Karmɛlə yee ɓa. Mąąhɔlɔɓo, tíi kɛɛ wɛli ə kɛ mą.

¹¹ Oziasə nwɔ kɔlaɠai ə kɛi li kɔ́ mɛ̨i, nwalaa nwɔ̨nɔ̨ kɔ́ kɔ́i. Di ɲąąkwɛlɛɛ kɛ ɉu a kpuluɠaa, yɛ bələi di mɛ̨imun Yeiɛlə da ɉɛɓɛ́ kɛmun Maaseyahu di di laa pɛ̨ɛ̨ la di hon ɉii lɔwai. Di kɛ Hananiahu yee mu, tɔɔmun nwɔ kuláai ta li.

¹² Gɔkuláa walawalaɠaa tii di kɛ kuláa walawala nu waa hveelɛ pulu nwun mɛ̨ida yee mu.

¹³ Nu waa nwun ɉaaɓa kɔ́w mɛ̨ihveelɛ pulu nwun nɔɔli, kpɔ a kuláa walawalaɠaa di pɛliɛ kɔ́ kɔ́i, di liikpəlɛɛ, di hvaŋąlɔɔ, diɛ ɓə kɛi tɔɔmun mąąkɔ̨nwɔ̨ ɲowoɠaa yəi.

¹⁴ Kɔi lɔpee gəlee hu, Oziasə ə kɛi di mąąkɔ̨nwɔ̨ hɛnŋąą pɛli, yɛ dɛɛ di pɔ, a: Hə́mə́ɠaa, kpalaɠaa, ɓɔlɔɠaa, kwɛli ɓɛla həɠəɠaa, kilɛnŋąą, da yələvin gwɛniɠaa.

¹⁵ Oziasə ə kɔ-kɔ hɛnŋąą pɛli ə ɉee gɔ-pɛlɛ́ɠaa tii kwɛlɛ da ɉįi kpoloon gee kaaiɠaa ɓa Ɉerusalɛmə, diɛ pɛli tonwą pilii da kwɛni kpuwuluɠaa. Naa ə tɛ ə li kpɔ kwɛa la, mąąhɔlɔɓo, Yálá ə kpɔnmą, yili ɓə vaŋą kɛnɛ̨.

¹⁶ Vaŋą kɛnɛ̨ pələi tii, humɛ̨ni kɛnɛ̨ ə lɔ ɉu, ə lɛɛ la ɉu, ə gbɔwɔ nwun napili; hvo lɛɛ Yai-Laa nwɔ Yálái ɓa kwəi tɔ̨nɔ̨ laa hu. Ya ka tii lii, yɛ lɔ Yai-Laa nwɔ pɛlɛ́i mu, yɛ lansan kələn lansan kələn ɉi.

¹⁷ Ɉaláá laa həli mun gɛnɛ̨ Azariahu lɔ bulu pələ da Yai-Laa nwɔ haláá laa həli nuą liikpəlɛɛ nu pow mɛ̨ihaaɓa.

¹⁸ Di mo tɔɔmun Oziasə ɓa, diɛ mą: «Yɛ́ hvəi ə́ mąąnɛ̨ɛ̨ ə́ lansan kələn Yai-Laa ɓa, kɛlaa, ɉaláá laa həli nuą ŋɛ̨i a Aarɔn lonnii, diɛ ɓə. Diɛ ɓə di laakwɛlanmoɔ golói tii kɛɛ ɓa! 'Tɛɛ ə́ kulɔ! Mąąhɔlɔɓo, yáá pulu kulɔ mɛ̨nį kɛ! Ə́ ɲɛ̨i pɔ̨nɔ̨ mɛ̨nį hvaa a yii Yai-Laa mąą mɛ̨nį hu!»

¹⁹ Oziasə ə níiholi, lansan kələn ɉɛn ə ɓo nii ɲee ŋą. Ɓɛlɔwai tii nii ə kɛ la a ɉoliɛ ɉaláá laa həli nuą pɔ, hvólóɲɔ̨n ə kulɔ dɔwɔla, ɉaláá laa həli nuą ɲɛ̨i ɓa Yai-Laa nwɔ pɛlɛ́i mu, lansan kələn ɉi kwɛlɛ.

²⁰ Ɉaláá laa həli mun gɛnɛ̨ Azariahu da ɉaláá laa həli nuą yiiɠaa tii kəlee di ɲɛ̨i hiɛi kɛ mą; di gaa hvólóɲɔ̨n aa kulɔ dɔwɔla, di nɛɛmą di gulɔ, ɛlɛɛ, yaa kpįnįi tii ə mąąhulɔ ə kulɔ. Mąąhɔlɔɓo, Yai-Laa ka tii gɛlɛ.

Oziasə nwɔ tɔɔlaa laa kulɔi

²¹ Volóɲɔ̨n tii ə lɛɛ tɔɔmun Oziasə ɓa, ə lɛɛ la ɉu ɉaai lɔwai ə ɉəli la. Kɛi ə mo a hvólóɲɔ̨n gɛmun, ə kɛ pɛlɛ ta kpɛli mu a dee. Mąąhɔlɔɓo, hva pɛli kɛ lɛɠɛi Yai-Laa nwɔ pɛlɛ́i ɓa. Non Yotamə ŋɛ̨i kɛ a dɔɔ pɛlɛ́ nwun nąmu, ya ɓə kɛi nɔi ɲąąwooɓo.

²² Oziasə kɛ mɛ̨nį takpɛliɠaa, dɔlɔɔɠaa da gbəlamɛ̨iɠaa kəlee, Yálá kwəi mɛ̨nį hukulɔ mun Esai Amɔsə ɓə bɛ̨ɛ̨.

²³ Oziasə ə laa nąnni kwɛlɛ, di noo dɔɔɓɛlaa kámą la, kɛlaa hvo kɛ bɛlɛ́n nuą kámą la; hvo gaai, di kɛi kɛ diɛ: «Hvolóɲɔ̨n gɛmun ni!» Non Yotamə ə hee a tɔɔmun a nąn bɔɔyɔwɔi.