Kɔlɔnikɔ Veerɛi 25 - Yálá laawoo hɛɓɛ (dc)

Amasiasə nwɔ tɔɔlaa

¹ Amasiasə kaa kwɛlan ə kɛ a kwɛlan bow hveelɛ kɔ́w lɔɔli, ɓɛlɔwai ə dɔɔlaa həɠə la. Ə tɔɔlaa kɛ a kwɛlan bow hveelɛ kɔ́w mɛ̨inąąn Ɉerusalɛmə daai. Nee laa ɓaa kɛ a Yehoadan Ɉerusalɛmə mun ni kɛ.

² Ə túwɔ́ a nɛlɛɛ Yai-Laa ɲɛ̨i ɓa, kɛlaa, gili kəlee hvo kɛ lɔ li dúwɔ́ pələ hu.

³ Yii kɛa Amasiasə ə dɔɔlaa hon gbɔ kpąą, nuą ŋɛ̨i kɛ bɔ, diɛi tii nąn baa, ə di paa.

⁴ Kɛlaa, hvo yiliɠaa lonnii paa, yɛ bələi bɛ̨ɛ̨i la dɔ́n ɉɛɓɛ́ hu, yii gaa a Moisə nwɔ hɛɓɛ́i; Yai-Laa kpįnįi ɓə mo, yɛ kɛ: «Mąą hvo nɛ̨ɛ̨li, di hvo lon gaamun baa nonnii kɛ nɛ̨ŋɛ̨n naa pɔɔ hu. Di hva lɛapɛlɛɛ paa di nąnni kɛ nɛ̨ŋɛ̨n naa pɔɔ hu. Kɛlaa, nu a haa gbɔwɔ kɛ nɛ̨ŋɛ̨n naa pɔɔ hu.»

⁵ Amasiasə ə Ɉuda nuą ɲąąkpɔn, ə ɲąąwooɓo kɛ nuą hee yɛ bələi gwəliɠaa kaa la, da bɛlɛ́ɠaa, Ɉuda lɔi hu, da Bɛnɉamɛn lɔi hu. Ə daɠaa hee nu waa nwundɔ̨nɔ̨ nwun na, daɠaa nu nwun damąą nwun na. Nuąi di kaa kwɛlan ə kɛ pow hveelɛ da bulu, ə di lonon. Di kɛ a kɔ́ mɛ̨i kpakoloɠaa nu waa nwun ɉaaɓa, diɛ pɛli kpalá pilii, di yɛlɛɛ hə́mə́ kɔ́nwɔ̨i.

⁶ Yili pulu, ə kɔ́kuláa walawala nu waa nwundɔ̨nɔ̨ hon Israɛlə lɔi hu a wali kwələ nwundɔ̨nɔ̨.

⁷ Kɛlaa, Yálá ŋą nu ta ə pa ə mo mą, yɛ mą: «Tɔɔmun! Mąą hvo nɛ̨ɛ̨li Israɛlə kɔ́kuláa tɔ̨nɔ̨ kpɛli hvo kɛ ə́ pɔ; mąąhɔlɔɓo, Yai-Laa hvo Israɛlə pɔ, a Ɛfraimə lonnii tii kəlee!

⁸ Gbala ə tɔɔ, da a lɛɛ ə́ pɔi, ə mą kɛ ə́ walaai kɔ́ kɔ́i, Yálá a kwɛni kulɔ ə́ kɔ́wɔ mu ə́ yowo lííla. Hvo gaai, Yálá ɓə a kɔ́ nɛ̨ɛ̨ nu ɓa, yaa lɔ ɓə a kwɛni kulɔ nu kɔ́wɔ mu, kɔ́ yɛ kala mą.»

⁹ Amasiasə yɛ Yálá nwɔ nui tii ɓa: «Akɛtii, nwali kwələ nwundɔ̨nɔ̨i ŋɛ̨i ŋį́ dɛɛ Israɛlə kɔlaɠai ɓai, ŋį́ yili kɛ ləi?» Yálá nwɔ nui yɛ mą: «Hɛn gaa Yai-Laa yəi yɛ dɛɛ ə́ pɔ, gɛnɛ̨ dɛɛ yili ɓa.»

¹⁰ Gɔkuláaɠaa ŋɛ̨i Amasiasə ə di həɠə Ɛfraimə, ə ɲee kulɔ di hu, nu kəlee ə li pɔɔli. Kɛlaa, nuą tii di di pulu pənə diɛ li di pɔɔliɠaa ɓa, di lii kələn ŋąą di kwəi Ɉuda nu pɔ.

¹¹ Amasiasə vaŋą ə lɔ, nii ə kpələ; ə nwɔ kɔlaɠai həɠə diɛ li kɔ́ tooi gbolo lɔi hu. Lii ə mo, ə nu waa pow paa Seirə lonnii lɔwai.

¹² Ɉuda nuą di nu waa pow hon a vúlu, di tɛ a diɛ gwɛni yee tonna, diɛ di pili ɲee kɔ́wɔ la, diɛ di huyali-yali.

¹³ Israɛlə kɔ́kuláaɠaa ŋɛ̨i Amasiasə ə lənə diɛ, di pa di too Ɉuda taa taɠaa mɛ̨i a kɔ́, ə həɠə Samari, ə pa ə həli la Bɛtə-Horɔn. Di nu waa haaɓa paa, di hɛn damąą həɠə a kɔ́ pulu hɛn nwalawalaɠaa.

Israɛlə tɔɔmun Ɉoasə ə kɔ́ pɛlɛ Amasiasə ɓa

¹⁴ Ɓɛlɔwai gɔ́ ə nɛ̨ɛ̨ la Amasiasə Edɔmə nuą mɛ̨i, ɲali bulu yɛ kɛa pa, ə pa a Seirə lonnii di wɔɔ haliɠaa tii kɛ laa di yəi daɠaa; Amasiasə ə ɉaliɠaa tii kɛ kɛa yɛ nwɔɔ yáláɠaa, yɛ kwɛli hvilɛn diɛ, yɛ lansan kələn diɛ.

¹⁵ Yai-Laa lii ə holi Amasiasə pɔ, ə nɛɛmą ə gwəi mɛ̨nį hukulɔ mun dɔ̨nɔ̨ tɔɔ bɔɔli, yɛ mą: «Lə mɛ̨nį ɓa ə́ li pɛlɛi, yɛ́ kwɛli hvilɛn nɔi ŋɛ̨i hu haliɠaa diɛ, a diɛi tii di hvo pɛli li di kulɔi ə́ yee ŋą?»

¹⁶ Ə lɛɛ lɔ hvaai, Amasiasə ə bələ tee mɛ̨i ɲəi, yɛ mą: «Gbɛɛ ɓə ə hee a tɔɔmun niɛwoo kɛmun? 'Kpəla mą! Awala kɛ tii, ə́ kaa bɔ di ə́ kɛlɛ?» Yálá kwəi mɛ̨nį hukulɔ mun ə naa pilɛ; kɛlaa, yɛ mą: «Ŋą́ą́ gbaɠala kaa, gɛ́ diɛ, Yálá kaa bɔ ə ə́ paa. Hvó gaai, dúwɔ́ taaləi tii yáá mo, ɛlɛɛ, hvo gɛ li hvó ə́ wəli tɔɔ nwɔ́ɔ́ liɛwoo ɓa.»

¹⁷ Ɉuda tɔɔmun Amasiasə nwun dɔɔ takpɛli kɛ, ə nuą tɔɔ, diɛ li kɛi Israɛlə tɔɔmun Yoakazə lon Ɉehu nwɔ lon Ɉoasə ɓa: «'Pa gu gɔ!»

¹⁸ Israɛlə tɔɔmun Ɉoasə ə nwɛlɛɛ ɲali bulu ɓo Ɉuda tɔɔmun Amasiasə ɓa, yɛ mą: «Liban ɲąąlən gbɔlɔ ə wɛlɛɛ tɔɔ Liban kpitili pɔɔli, yɛ mą: ‹Ə́ lon nɛ̨ɛ̨nu tɛɛ nón ɉulɔnu pɔ a nɛ̨ą›, kɛlaa, lɔwɔ huwɔ ta ə tɛɛ, ə ɓɔlɔɔn ɲąąlən gbɔlɔi tii mɛ̨i.

¹⁹ Tɛ̨ą lii, ə́ kaa kɛi diɛ, ɲéé aa tɛɛ Edɔmə ɓa kɔ́ hu; ə́ kaa ə́ nwun dɛi, yɛ́ ə́ kpɔɔɲąą kɛnɛ̨. Kɛlaa, lɛɛ ə́ pɔɔli! Lə mɛ̨nį ɓa yaai, ə́ kaa ə́ laa tɛi kɔ́ nwąnąą mu, a ə́ nwun nɛɛ ɉu mɛ̨nį?»

²⁰ Kɛlaa Amasiasə hvo nwəli tɔɔ mą; Yálá ɓə yili kɛ. Yálá ə kɛ bɔ nwun ə lɛɛ gɔi tii hu, mąąhɔlɔɓo, ə kɛi kwɛli hvilɛn Edɔmə haliɠaa diɛ.

²¹ Israɛlə tɔɔmun Ɉoasə muhəɠə, ə li, da Ɉuda tɔɔmun Amasiasə di wolo di kee ɓa Bɛtə-Sɛmɛsə Ɉuda lɔi hu.

²² Israɛlə kɔlaɠai yee ə tɛɛ Ɉuda kɔlaɠai ɓa, di pu, nu kəlee yɛ li bɔ taai.

²³ Israɛlə tɔɔmun Ɉoasə ə Ɉuda tɔɔmun Amasiasə hon Bɛtə-Sɛmɛsə a kɔluwɔ, yaai kɛ a Yoakazə lon Ɉoasə lon; ə paa la Ɉerusalɛmə daai. Israɛlə tɔɔmun Ɉoasə ə Ɉerusalɛmə taa mąąkpɛ hįį wolo, a yee laa mą nwun nąąn, ə həɠə Ɛfraimə pələ nwun na, ə li la, ɉįi nwąną hveelɛ kee kaai.

²⁴ Ə ɉɛni kəlee, nwali kəlee, ɉɛnŋąąi kpɔ kɛ Yálá nwɔ pɛlɛ́i mu, Ovɛdə-Edomə ɲɛ̨i yɛ ɓo mą, da tɔɔmun ŋą hɛn gɔw pɛlɛ́i mu hɛnŋąą, ə pɛlɛ la dolaaɠaa diɛ, ə gəlee həɠə; yili pulu, ə tɛɛ diɛ li Samari pələ.

Amasiasə nwɔ tɔɔlaa laa kulɔ pələ

²⁵ Yoakazə lon Ɉoasə Israɛlə tɔɔmun ɉaa pulu, Amasiasə, Ɉoasə lon, Ɉuda tɔɔmun, ə lamu yɛnɛ̨ɛ̨ a kwɛlan bow lɔɔli.

²⁶ Amasiasə kɛ mɛ̨nįɠaa, ə həɠə dɔlɔɔ ɓa, ə həli la gbəlamąą ɓa, bɛ̨ɛ̨ kaa Ɉuda tɔɔɓɛlaa di wɔɔ hɛɓɛ́i hu.

²⁷ Amasiasə a kulɔ kɛ nąą ta, hvo kɛi hiɛ Yai-Laa nwɔ liɛwoo kpaalə mɛ̨i. Nuą di lɔgilii Ɉerusalɛmə daai, ə pu, ə li Lakisə. Di nuą tɔɔ bulu Lakisə, nąą ɓə di baa laa.

²⁸ Yili pulu, di bowa laa hooɠaa pulu, di paa la, di noo nąnni kwɛlɛ Ɉuda taa ta hu.