Kɔlɔnikɔ Veerɛi 24 - Yálá laawoo hɛɓɛ (dc)

Ɉoasə nwɔ tɔɔlaa

¹ Ɉoasə kaa kwɛlan ə kɛ a kwɛlan mɛ̨ihveelɛ, yɛ dɔɔlaa hɔlɔɓo. Ə tɔɔlaa kɛ kwɛlan bɔw nąąn ɲee mu Ɉerusalɛmə daai. Nee laa ɓaa kɛ a Sivia, yɛ kulɔ Beɛrə-Seva.

² Ɉoasə ə túwɔ́ a ɉaŋąą Yai-Laa ɲɛ̨i ɓa, ɉaláá laa həli mun Yehoyada ŋą yɛnɛ̨ɛ̨ kəlee yee mu.

³ Yehoyada ə nɛ̨ɛ̨nu hveelɛ həɠə ə dɛɛ Ɉoasə pɔ a nɛ̨ą. Ɉoasə ə lon ɉinąą tamąą da lon nɛ̨ąą tamąą kaa diɛ.

Ɉoasə ə Yálá ŋą pɛlɛ́i pɛli

⁴ Yili pulu, Yai-Laa ŋą pɛlɛ́i pu mɛ̨nį nįnɛ̨ kɔ́lɔi, mąą kiliŋąhiɛ ə too Ɉoasə ɓa;

⁵ Ə nɛɛmą ə ɉaláá laa həli nuą kpɛa-kpɛaa da Levi lonnii di ɲąąkpɔn, yɛ diɛ: «'Ka li Ɉuda taaɠaa hu, ka wali həɠə Israɛlə lonŋąą kəlee yəi, 'ka paa la, əgɛ, kaa Yai-Laa ŋą pɛlɛ́i pɛli la kwɛlan dɛitɛi kəlee yee mu. 'Ka ká mąąhulɔ golói tii hu.» Kɛlaa Levi lonnii di mɛ̨nįɠaa tii too di kɔ́wɔ pɔ.

⁶ Tɔɔmun ə nɛɛmą ə ɉaláá laa hɛlimun gɛnɛ̨ Yehoyada təli, yɛ mą: «Lə mɛ̨nį ɓa yaai, hvó mo li Levi lonnii diɛ a ə́ nwąnąi, di hvo, nįįhɔ̨nwɔ̨i Yálá ŋą tímun Moisə ə vaaɓo, di hvo ɉon Ɉuda nuą yəi da Ɉerusalɛmə nuą, ɛlɛɛ, da Israɛlə lonnii kəlee yəi, Yai-Laa ŋą mįnɛ̨ pɛlɛ lon mąą mɛ̨nį ɓa?

⁷ Hvó gaai, nɛ̨ŋɛ̨n nowo Atali da nonnii, daa Yálá ŋą pɛlɛ́i lɛɛ laa aa kala, ɛlɛɛ mun, daa Yai-Laa yəi bɛlɛ́n ɉɛnɲąŋą mąąhəɠɛɛɠaa həɠə, diɛ Baalə haliɠaa mąą mɛ̨nį kɛ ɉu.»

⁸ Tɔɔmun ə mo, di kəhi ta pɛli, di ɉee Yai-Laa nwɔ pɛlɛ́i laaləi ɲɛ̨nɛ̨ɛ̨ pələ;

⁹ ɛlɛɛ, di nolo ɓo Ɉuda lɔi hu nąą kəlee, da Ɉerusalɛmə daa, diɛ kɛ mą: Nįįhɔ̨nwɔ̨i ŋɛ̨i Yálá ŋą tímun Moisə ə naa Israɛlə nwuɔ̨ nɔi pun ɉu, 'ka paa la Yai-Laa pɔ.

¹⁰ Nɔi ɲąąwooɓo nuą, ə pɛlɛ la nɔi lonnii diɛ, di kwəinɛ̨ɛ̨i kɛ, di pa a wali, di bu gəhii tii hu, ə lɛɛ ɉu naa ə hvɛɛ.

¹¹ Yii kɛa naalɛ yələ ə ɉəli mą, di gəhi həɠə di li la Levi lonnii pɔ, di li wali lonoi tɔɔmun nií la. Di gaa diɛ kɛ wali kaa ɉu kɛnɛ̨; tɔɔmun ŋą hɛɓɛ́ kɛmun, da ɉaláá laa həli mun gɛnɛ̨, di gəhi huɓo, di pənə di li di ɉee ɉeei. Di kɛi gɛ tii hvóló tɛitɛi kəlee yee mu. Di wali hɔlɔɓo kpɔ kɛnɛ̨.

¹² Tɔɔmun da Yehoyada di nwalii tii tɛɛ Yai-Laa nwɔ pɛlɛ́i goló nwun nąmu pɔ. Yili ə nɛɛmą ə kwɛni haɠa nuą, kwɛli koló kɛ nuą, kwɛli kpɔlu koló kɛ nuą, da koló kɛ nuą takpɛliɠaa hala la, əgɛ, di Yai-Laa nwɔ pɛlɛ́i goló kɛ, di Yai-Laa nwɔ pɛlɛ́i pu nįnɛ̨ kɔ́lɔi.

¹³ Goló kɛ nuą di di yee pɛlɛ goló ɓa, goló yɛ kɛ di yəi a nɛlɛɛ, yɛ tɛ tɔwɔ. Di Yálá nwɔ pɛlɛ́i pu nįnɛ̨ kɔ́lɔi.

¹⁴ Yii kɛa di di yee laa kulɔ, di pa a nwali kpəli tɔɔmun da Yehoyada di pɔ. Di nwali kpəlii tii lɔ Yai-Laa nwɔ pɛlɛ́i mu hɛnŋąą pɛli mɛ̨nį hu; di da kɛ a haláái da gəlee kələn nwɔ hɛnŋąą, da tíɓo takpɛli kɛ hɛnŋąą. Daɠaa di ɓo a hɛni da wali kwɛli. Di nɛɛmą, haláái da gəlee kələn, diɛ kɛa gulɔ Yai-Laa ɓa nwɔ pɛlɛ́i mu Yehoyada nwɔ yɛnɛ̨ɛ̨ kəlee yee mu.

Ɉoasə ə nwoo kala Yálá ɓa

¹⁵ Yehoyada ə pɔlɔ kpɔ a mɔlɔɔ; gaa kwɛlan ə kɛ a kwɛlan nwundɔ̨nɔ̨ kwɛlan bow haaɓa, nwun ə laa tumɔ̨ ɓa.

¹⁶ Di now Davidə taa dɔɔɓɛlaa kámą la. Mąąhɔlɔɓo, ə túwɔ́ a nɛlɛɛ Israɛlə nuą diɛ, ə túwɔ́ a nɛlɛɛ Yálá ɓa da Yálá ŋą pɛlɛ́i.

¹⁷ Yehoyada haa pulu, Ɉuda nu kpɛa-kpɛaa di pa di pɛlɛ tɔɔmun gɔɠɔ mu, ə nwəli tɔɔ di woo ɓa.

¹⁸ Di di kili kulɔ Yai-Laa di nąnni di wɔɔ Yálái ŋą pɛlɛ́i hu, diɛ kwɛli hvilɛn wulu kpiyɛnŋąą diɛ da haliɠaa. Di túwɔ́ pələi tii mąą mɛ̨nį ɓa, Yálá nwɔ liiɲąnwąnąi ə ɓɛla Ɉuda nuą mɛ̨i da Ɉerusalɛmə nuą.

¹⁹ Yálá ə nɛɛmą ə gwəi mɛ̨nį hukulɔ nuą tɔɔ di pɔɔli, əgɛ, di di liɛwoo kɛ, di pənə di paa a diɛ Yai-Laa pɔ; kɛlaa, nuą di hvo di wəli tɔɔ di woo ɓa.

²⁰ Nąąlɔwai, Yálá nwɔ Kilii ə too Yehoyada lon Zakaria hu, ə haŋan nɔi lonnii diɛ, yɛ diɛ: «'Ka ká wəli tɔɔ Yálá woo ɓa, yɛ diɛ: Lə mɛ̨nį ɓa, ka káá Yai-Laa ŋą tɔ́n nwooɠaai mąą kalai? Ka nwun na hvo pai nɛ̨ɛ̨i. Yii kaa ka kili kulɔ Yai-Laa hui, yaa kpɛli, aa gili kulɔ ka hu.»

²¹ Nɔi lonnii ɲąba lɔ Zakaria ɓa, tɔɔmun ə mo, di ɉɔɔ a kwɛni, di baa Yai-Laa ŋą pɛlɛ́i laaləi, gwəli hąąi.

²² Tɔɔmun Ɉoasə hvo kpɛli giliŋąhiɛ, hvo vilɛn Zakaria nąn Yehoyada nwɔ mɛ̨inɛ̨ɛ̨ ɓa, ə Yehoyada lon Zakaria paa. Ɓɛlɔwai Zakaria ə kɛi pa haai la, ə nwoo tɛ Yálá ɓa, yɛ mą: «Yai-Laa! Ɓɛ kaa, Ə́ ku lɔwai mɛ̨nį hutɔɔ!»

Ɉoasə nwɔ tɔɔlaa laa kulɔ pələ

²³ Gɛɛ gwɛlan və kpɛɛ, Aramə kɔlaɠai ə pa ə kɔ́ pɛlɛ Ɉoasə ɓa. Di yee ə pɛli Ɉuda lɔi ɓa da Ɉerusalɛmə taa; di galanɉonŋąą kəlee paa, ɉɛngɔwi di ɉon gɔ́ hu, di gəlee həɠə di li la di wɔɔ tɔɔmun bɔ Damasə daai.

²⁴ Ya pa, nuąi kɛ gɔlaɠai tii hu Aramə nuą yəi, di hvo kpɛli kɛ tamą li. Kɛlaa, Yai-Laa ə hvaa mą, nuą ŋɛ̨i kɛ a kɔlaɠa kɛnɛ̨ɛ̨, ə gɔ́ kala diɛ gɔlaɠa logoloi tii ɲɛ̨i tɔwɔ; hvó gaai, diɛ ɓə di kili kulɔ Yai-Laa di nąnni di wɔɔ Yálái hu. Bələ ɓə Aramə nuą di Ɉoasə hon na, a mɛlɛ kpɛɛ pələ mą.

²⁵ Aramə nuą kɛɛ lii, di Ɉoasə lɛɛ laani laa ɲɔ̨n ɉaɠa ɓa, gbɔluɔ na. Ɉoasə nwɔ tínuąi di ɲąbalɔ mą, ɉaláá laa həli mun Yehoyada lon Zakaria paa mɛ̨nį ɓa. Ɉoasə yaa kpɛli, di nɛɛ laani ɲəi gbin ŋą, di baa. Haai ə mo, di noo Davidə taa; kɛlaa, di hvo now dɔɔɓɛlaa kámą la.

²⁶ Nuąi nɔgilii tii kɛ, di laa ka: Amɔn mun Simeatə lon Ɉavadə, da Simritə Moabə nɛ̨ɛ̨nu lon Yehozavadə.

²⁷ Ɉoasə lonnii laa, gɛ tíi mąą mɛ̨nį nwąnąąɠaa, da Yálá nwɔ pɛlɛ́i pu mɛ̨nį nįnɛ̨ kɔ́lɔi, mɛ̨nįɠaa tii kəlee pɛ̨ɛ̨i dɔɔɓɛlaa di wɔɔ hɛɓɛ́i hu. Non Amasiasə ə hee dɔɔ kpəlin mɛ̨i a nąn mąąhvalin.