Kɔlɔnikɔ Veerɛi 23 - Yálá laawoo hɛɓɛ (dc)

Di Ɉoasə hee a tɔɔmun

¹ Gwɛlan mɛ̨ihveelɛnąą Yehoyada ə niikpələ, ə guláa nwun nąmįną həɠə, diɛ ɓaa a: Yerohamə lon Azariahu, Yehohanan lon Yismaɛlə, Ovɛdə lon Azariahu, Adayahu lon Maaseyahu, da Ɉikri lon Elisafatə. Da diɛni di mįnɛ̨ həɠə.

² Di hvilɛn Ɉuda lɔi hu nąą kəlee, di tɛɛ Ɉuda taaɠaa kəlee hu, di Levi lonnii kəlee təli, da Israɛlə pɛlɛ́ nąmįną. Yili pulu, di pənə di pa Ɉerusalɛmə daai.

³ Nu kpului tii pa, di kəlee di ɲąąkpɔnŋąąi kɛ Yálá yəi bɛlɛ́n, di mįnɛ̨ həɠə tɔɔmun mąą mɛ̨nį hu. Yili pulu, Yehoyada yɛ diɛ: «Tɔɔmun non ga! Yaa ŋɛ̨i ɓə mąąnɛ̨ɛ̨i ə hee a dɔɔmun, yɛ bələi Yai-Laa ə mo la Davidə mąą mɛ̨nį ɓa.

⁴ Yii ka káá pai gɛi, ya ka: Kaai ɓaa ɉaláá laa həli nuą da Levi lonnii, kaai pai ka wɔɔ kóloi kpalatɔɔi a vįitɔɔ yələ, ka ká ɓɛla ɓo ɉu haaɓa, ka pələ tɔ̨nɔ̨ ɓə pai tɔɔi bɛlɛ́ laaləiɠaa ɓa.

⁵ Bələ tɔ̨nɔ̨ ə kɛ tɔɔmun ɲəi bɛlɛ́n. Ka pələ tɔ̨nɔ̨ ə ɓo bɛlɛ hvilɛn ɉii, bɛlɛ́ laaləi pələ; akɛtii, nɔi lonnii kəlee da kɛ Yai-Laa nwɔ pɛlɛ́i gwəli hɛ̨ąi.

⁶ Nui lɔpee ta hvo lɔ Yai-Laa nwɔ pɛlɛ́i mu, ə kulɔ lɔ ɉaláá laa həli nuą da Levi lonnii di kaa gólo ɓa. Di wɛi da pɛli mą lɔi, hvo gaai, di laakwɛlanmoɔi yili ɓa. Nɔi lonnii kəlee da kɛ a Yai-Laa mąąkpɛ kuláaɠaa.

⁷ Lévi lonnii yiiɠaa tii, di wɔɔ kwɛlihɛn a kɛ di yee ŋą, daa tɔɔmun mąąkpəlaan da doo geei, ɓɛi lɔpee tɔɔmun aa kɛi li laa, di ɓo bɔ. Nui lɔpee a lɔ Yálá yəi bɛlɛ́n da baa.»

⁸ Lévi lonnii da Ɉuda nuą di gɛ yɛ bələi ɉaláá laa həli mun Yehoyada ə mo la diɛ. Nu kəlee ə nwɔɔ nuą həɠə. Yiiɠaai kɛi gólo kpalatɔɔ a vįitɔɔ yələ, da yiiɠaai kɛi li vįitɔɔ ɓa, Yehoyada hvo ɲee kulɔ nuąi kɛ gólo ɓa di hu.

⁹ Yehoyada ə Davidə nwɔ kpalaɠaa, da nu mąąkpɛ kpanąn ɉuwui lɔpee gəlee, diɛi kɛ Yálá nwɔ pɛlɛ́i mu ɉəɠə, ə dɛɛ guláa nwun nąmįną pɔ.

¹⁰ Ə nɔi lonnii tɔɔi lɛ diɛ, nu kəlee nwɔ kpalai ə ɓo ɲəi. Ə həɠə bɛlɛ mamį́iyee hu pələ yɛ li la gɛɓɛyee hu pələ, ɉaláá kulɔi da bɛlɛ kwɛlɛ pələ, daa tɔɔmun mąątínɛ̨n na tii.

¹¹ Di nɛɛmą di tɔɔmun non Ɉoasə kulɔ, di dɔɔɓɔlɔ lɔ nwuɔ̨, di dɔɔhəɠəɠaa too gwaną, di ɉee a tɔɔmun. Yehoyada da nonnii di dɔɔwulɔ lɔ mą, di tómą kpɔ hɔ̨ɔ̨, diɛ mą: «Tɔɔmun ɲii ə kwɛa!»

¹² Ɓɛlɔwai Atali ə nu kpulu gilɛ həɠə tin mɛ̨n na, diɛ tɔɔmun mąątɛ̨nɛ̨, ə ɉaŋą nu kpulu pɔ pələ Yai-Laa nwɔ pɛlɛ́i laaləi.

¹³ Yɛ gaa ɲɛ̨i kɛi, tɔɔmun ga ŋɛ̨i tɔɔni gbəlin mɛ̨i bɛlɛ́ laaləi, nuą ɲɛ̨itɔwɔnuą da dúlu hvɛɛnuą di ɓo tɔɔmun gwɛlɛ, nɔi lonnii kəlee di ɓo kwəinɛ̨ɛ̨ hu, diɛ túlu hvɛɛ, hvɛli kɛ nuą diɛ hvɛli kɛ, diɛ lúwɔ́ too! Atali ə nɛɛmą ə mąąhəɠə huɓɛla, ə tómą, yɛ kɛ: «Lɔgilii ɓə! Lɔgilii ɓə!»

¹⁴ Ɉaláá laa həli mun gɛnɛ̨ɛ̨ Yehoyada ə mo guláa nwun nąmįną diɛ di pa, nu kəlee ŋą kwɛlihɛn ə ɓo ɲəi, yɛ diɛ: «'Ka hvo baa Yai-Laa yəi bɛlɛ́n, 'ka kulɔ la ɲɛ̨nɛ̨ɛ̨!»

¹⁵ Di Atali hon diɛ li la dɔɔ pɛlɛ́ laaləi pələ, yii lɔ di həli la ɉoo pɛlɛ laaləi, nąą ɓə di mąą mɛ̨nį ɲąąlɔ laa.

¹⁶ Yehoyada da nɔi lonnii kəlee, ə pɛlɛ la tɔɔmun ma, di mįnɛ̨ həɠə, diɛ di kaa kɛi a Yai-Laa ŋą nu huwu.

¹⁷ Nąąlɔwai, nɔi lonnii kəlee di həɠə di li Baalə nwɔ pɛlɛ́i nąą, di bu, di Baalə kɔ́i wolo, da ɉaliɠaa kpɔ tii kɛ laa. Di Baalə laa yəlikɛmun Matan hon di baa Baalə kɔ́i lííla.

¹⁸ Yehoyada ə Yai-Laa nwɔ pɛlɛ́i mɛ̨ikaa mɛ̨nį tɛɛ ɉaláá laa həli nuą kpɛa-kpɛaa da lévi lonnii pɔ. Davidə ə wɔlɔ di heekpəlin na kɛ a di kpulu Yai-Laa nwɔ pɛlɛ́i mɛ̨i, əgɛ, diɛ haláá kulɔ laa, di haláá hɛnŋąą kələn nąą Yai-Laa ɓa, a di kwəinɛ̨ɛ̨, diɛ wələ too, yɛ bələi bɛ̨ɛ̨i la Moisə ŋą tɔ́n ɉɛɓɛ́i hu.

¹⁹ Yehoyada ə Yai-Laa nwɔ pɛlɛ́i laaləi mɛ̨ikaa nuą hee bɛlɛ́ laaləi, əgɛ, hɛn mąąluwuɛɛ ta hvo tɛɛ hvo lɔ, a kpaalə huwui lɔpee.

²⁰ Yehoyada ə guláa nwun nąmįną həɠə, ə bɛlɛ galanɉonŋąą diɛ, da nuąi kpɔ ɲąąwooɓo laa kaa di yəi nɔi lonnii mɛ̨i, ə pɛlɛ la nɔi lonnii kəlee diɛ, di tɔɔmun ɉəɠə Yai-Laa yəi bɛlɛ́n diɛ li ɉeei dɔɔkpəlin ɉu. Di tɛɛ a bɛlɛ́ laaləi kɛnɛ̨ ɓa pələ di lɔ dɔɔ pɛlɛ́ mu.

²¹ Nɔi lonnii kəlee di kɛ kwəinɛ̨ɛ̨ hu, daa nii ə hee. Yii ɓaa a Atali nwɛi, di mąą mɛ̨i ɲąąlɔ a kɔ-kɔ ɓɔwa.