Kɔlɔnikɔ Veerɛi 22 - Yálá laawoo hɛɓɛ (dc)

Akaziasə nwɔ tɔɔlaa

¹ Ɉerusalɛmə daai nuą di Yoramə lon gbəlamąą Akaziasə həɠə di ɉee a tɔɔmun, a nąn mąąhvalin. Hvo gaai, Arabə nu kpului tii pa pɛlɛi gɔɓuwu ɓa, di nonnii dɔlɔɔɠaa tii kəlee paa.

² Akaziasə kaa kwɛlan ə kɛ pow nąąn kɔ́w hveelɛ, yɛ dɔɔlaa hɔlɔɓo; ə dɔɔlaa kɛ a kwɛlan dɔ̨nɔ̨ Ɉerusalɛmə daai. Nee laa ɓaa kɛ a: Atali, ə kɛ a Omri lon nɛ̨ɛ̨nu.

³ Akaziasə yaa kpɛlimąn, ə hvilɛn Akabə nwɔ pɛlɛ́i mu nuą kpaalə hu, hvo gaai, nee ɓə kɛi niɛwooɓo a túwɔ́ pələ ɲɔ̨n gɛɛ.

⁴ Mɛ̨nįi ɲɔ̨nwɔ̨ɔ̨ Yai-Laa ɲɛ̨i ɓa, ə gɛ; yɛ bələi kpɔlɔɔ Akabə nwɔ pɛlɛ́i mu nuą di gɛ la. Mąąhɔlɔɓo, bɛlɛi tii mu nuą ɓə kɛ a niɛwoo kɛ nuą nąn ɉaa pulu, yili ɓə nwun na pili.

⁵ Di wɔɔ liɛwoo ɓə gɛ, da Israɛlə tɔɔmun Yoramə Akabə lon, diɛ li kɔ́ pɛlɛi la Aramə tɔɔmun Hazaɛlə ɓa Ramotə Galaadə lɔi hu. Kɛlaa, Aramə nuą di Yoramə nwąną.

⁶ Yoramə ə pənə ə li Izreɛlə, nwąnąi ŋɛ̨i di mo Rama, bala hali kɛ mɛ̨nį ɓa, ɓɛlɔwai di pɛlɛ la Aramə tɔɔmun Hazaɛlə ɓa. Ɉuda tɔɔmun Akaziasə Yoramə lon, ə li Izreɛlə Akabə lon Yoramə pɔ, yaa tii di nwąną.

⁷ Akaziasə nwun na pili mɛ̨nį ə həɠə Yálá pɔ, a lii tii ə mo nwoo pilii Yoramə ɓa. Pai ə mo, da Yoramə di kulɔ diɛ li Nimsi lon Ɉehu laakwiɛn ɉii, a yaa tii Yai-Laa ə dɔɔ wulɔ hiɛ mą, əgɛ, ə Akabə nwɔ pɛlɛ́i pu.

⁸ Mɛ̨nįi Yálá ə Ɉehu tí la, ə gɛ Akabə nwɔ pɛlɛ́i ɓa. Lii ə mo, ə Ɉuda lɔi ɲɛ̨itɔwɔnuą kaa da Akaziasə gaayɔwɔɠaa lonnii, di ɓo tɔɔmun ɲee mu, ə di paa.

⁹ Ɉehu ə mo di li di Akaziasə kulɔ now pələi, hvo gaai, aa li kɛ aa now Samari daai. Di ɉon, di paa la Ɉehu pɔ, di baa. Bələi mąn ə kɛ la tii, di bowa loo. Mąąhɔlɔɓo, di kɛi kɛ diɛ: «Yaa kpɛli gaa a Ɉosafatə lon da, yaai tii hvilɛn Yai-Laa pulu a gwəi kwəlɛɛ.» Nui lɔpee ta hvo kɛ Akaziasə yəi bɛlɛ́n, yɛ pɛli kɛi a tɔɔmun.

Atali ə dɔɔlaa həɠə

¹⁰ Gaai Akaziasə nee Atali ə mo, yɛ kɛ, non Akaziasə aa haa; ə gili tee gwəi, yɛ kɛ ə dɔɔkwəlii lonŋąą kəlee paa Ɉuda yəi bɛlɛ́n.

¹¹ Kɛlaa, tɔɔmun non nɛ̨ɛ̨nu Yehosavatə ə Akaziasə lon Ɉoasə həɠə, tɔɔmun nonnii tii di kɛi pa di paai, di lɔwai, ə now, yaa da ɲąąkɔn nɛ̨ɛ̨nu, ə di lɔ nuą yii-pɛlɛ mu Yálá ŋą pɛlɛ́i mu. Tɔɔmun Yoramə lon nɛ̨ɛ̨nu Yehosavatə, a yaa ŋɛ̨i a ɉaláá laa həli mun gɛnɛ̨ɛ̨ Yehoyada nɛ̨ą, Akaziasə mąąhala; bələ ɓə ə Ɉoasə loo la Atali ɓa, hvo kɛa baa.

¹² Ɉoasə ə lɛɛ now pələi Yálá yəi bɛlɛ́n, kwɛlan mɛ̨ida yee mu, Atali yɛ nɔi ɲąąwooɓo.