Kɔlɔnikɔ Veerɛi 21 - Yálá laawoo hɛɓɛ (dc)

¹ Ɉosafatə ə laa nąnni kwɛlɛ, di loo nąnni kwɛlɛ Davidə taa. Non Yoramə ə hee a tɔɔmun, a nąn mąąhvalin.

Yoramə nwɔ tɔɔlaa

² Yoramə nąn Ɉosafatə lonnii di kɛ laa, diɛ ɓaa kɛ a: Azaria, Yehiɛlə, Ɉekariahu, Azariahu, Mikaɛlə da Sefatiahu. Nuą tii kəlee di kɛ Israɛlə tɔɔmun Ɉosafatə lonnii.

³ Di nąn ə di wɔɔ yɛnɛ̨ɛ̨ laa hɔn mo hɛn dɛɛ di pɔ, a hɛni, da hɛn mąąwiɛɛɠaa, ə bɛlɛ kɔ́ taaɠaa diɛ Ɉuda lɔi hu. Kɛlaa, ə dɔɔlaa tɛɛ Yoramə pɔ, mąąhɔlɔɓo, ya ɓə kɛ a nu pɔlɔ.

⁴ Yoramə ə hee nąn ŋą tɔɔlaa hu, ə hee kpɔ laa tin. Ə tínɛ̨n ə nąn nonnii paa, ə bɛlɛ Israɛlə ɲąąwooɓo nuą taɠaa diɛ.

⁵ Yoramə kaa kwɛlan ə kɛ pow haaɓa kɔ́w hveelɛ, ɓɛlɔwai ə tɛ la dɔɔlaa hu, ə tɔɔlaa kɛ a kwɛlan mɛ̨ihaaɓa Ɉerusalɛmə daai.

⁶ Mɛ̨nįi kɛ ɲɔ̨nwɔ̨ɔ̨ Yai-Laa ɲɛ̨i ɓa ə gɛ, ə hvilɛn Israɛlə tɔɔɓɛlaa kpaalə hu, yɛ bələi Akabə ŋą pɛlɛ́i mun nuą di gɛ la. Hvo gaai, Akabə lon nɛ̨ɛ̨nu ɓə kɛ ɲəi a nɛ̨ą.

⁷ Kɛlaa, Yai-Laa hvo kɛ bɔ, hvo Davidə nwɔ pɛlɛ́i pu, mįnɛ̨i da Davidə di ɉəɠə mąą mɛ̨nį ɓa, mįnɛ̨i tii kaa Davidə lonnii di wɔɔ; mąąhɔlɔɓo, Yálá ə mo yɛ, nwɔ̨n ŋɛ̨i aa ɉee laai, hvo pa luwun ɉii.

⁸ Yoramə nwɔ tɔɔlaa yələi, Edɔmə ə gwɛli tee Ɉuda tɔɔlaa ɓa, ə gbɔwɔ ɓa tɔɔmun ɉee.

⁹ Yoramə da nwɔ kɔ́kuláa nwun nąmįnąi, nwɔ kɔ́-wotoloɠaa kəlee, di di muhəɠə a kpįnį, di pɛlɛ Edɔmə nuą diɛ, di di kɛlɛ; daa kɛ di mąątínɛ̨n daa doo gee hu da nwɔ kɔ́kuláaɠaai, da nwɔ kɔ́-wotoloɠaai.

¹⁰ Bələi mąn ə kɛ la tii, Edɔmə kwɛli teɛi lɔ kɛ Ɉuda tɔɔlaa ɓa, gaa lɔ tii háá ɓaa a háá. Nąąlɔwai tii hu lɔ nwɔ̨nɔ̨, Livna ə gwɛli tee Yoramə ɓa. Mąąhɔlɔɓo, Yoramə aa kɛ gili kulɔ nąnni di wɔɔ Yálái, Yai-Laa hu.

¹¹ Yoramə kpįnįi tii, ə hali kɔ́iɠaa pɛli Ɉuda lɔi hu ɲeeɠaa nwuɔ̨, ə Ɉerusalɛmə nuą ɲąątɔɔ a túwɔ́ pələ ɲɔ̨n mą, ə Ɉuda nuą yee lɔ wɛli mɛ̨nį hu.

¹² Yələ ta, Yálá kwəi mɛ̨nį hukulɔ mun Eli, ə hɛɓɛ́ tɛɛ mą, yɛ mą: «Yai-Laa ə́ nąn Davidə nwɔ Yálái woo ka, yɛ diɛ: Yii kpɔ hvó gɛ li, hvó hiɛ a ə́ nąn Ɉosafatə kpaalə, hvó hiɛ li a Ɉuda tɔɔmun Asa hiɛ pələ;

¹³ Kɛlaa, ə́ hiɛ yɛ bələi Israɛlə tɔɔɓɛlaa di hiɛ la; yáá li yáá wɛli mɛ̨nį lɔ Ɉuda nuą da Ɉerusalɛmə nuą yee pɔ, yɛ bələi Akabə yəi bɛlɛ́n nuą di túwɔ́ la; ə laa yili mɛ̨i, yáá nwɔ̨nɔ̨, ə́ nąn nonnii kɛ di hviɛlaɓoɔ di tɛɛ yɛ́, yáá di paa, a ə́ nąn nwɔ pɛlɛ́i;

¹⁴ Mɛ̨nįi Yai-Laa kaa pai naai yɛ́, ya ka: Gaa pai hvaɠa pilii ə́ nwɔɔ nuąi hu, ə́ lonnii hu, ə́ nɛ̨ąni hu, da ə́ yəi hɛnŋąą kəlee hu.

¹⁵ Ɛlɛɛ, yɛ́n, ɲɔ̨n nwalawalaɠaa kaa pai pɛlɛi yɛ́. Ə́ koolon ɉu ɲɔ̨n nwɛi tii gaa pai ə́ kpoyɛli kulɔi. Ɲɔ̨n da lɔ ɓə pai kɛi pɛlɛi mą, a yələ kəlee.»

¹⁶ Yai-Laa ə Filisti nuą da Arabə nuąi tii Kusə lɔi hu, di wɔɔ yowolaa ɲąątɔɔ Yoramə ɓa.

¹⁷ Di pa di kɔ́ pɛlɛ Ɉuda lɔi ɓa, di lɔ nɔi, ɉɛnŋąą kpɔ kɛ tɔɔmun ɲəi bɛlɛ́n, di gəlee həɠə, ə mą kɛ, nɛ̨ąni da nonnii. Lon və kɛa lɛɛ ɲəi, ə kulɔ lɔ non nokolo laamun Yoakazə bulu.

¹⁸ Yili kəlee kɛɛ pulu, Yai-Laa ə ɲɔ̨n bɛlɛ mą, ɉali hvo kɛa pɛli kɛi.

¹⁹ Hvólóɠaa di tɛɛ, ɓɛlɔwai gwɛlan veelɛnąą laa ə kɛi pa kulɔi la, ɲɔ̨n tii ə Yoramə kpoyɛli kulɔ, ə haa mɔ̨nɔ̨ kɛnɛ̨ hu. Nɔi lonnii di hvo nwɔ̨n dɔɔ, yɛ bələi di gɛ la a nąnni.

²⁰ Yoramə kaa kwɛlan ə kɛ pow haaɓa kɔ́w hveelɛ, ɓɛlɔwai ə dɔɔlaa həɠə la. Ə tɔɔlaa kɛ Ɉerusalɛmə a kwɛlan mɛ̨ihaaɓa. Ə haa, di hvo nwɔlɔɓo. Di now Davidə taa, kɛlaa, di hvo now dɔɔɓɛlaa kámą hu.