Kɔlɔnikɔ Veerɛi 20 - Yálá laawoo hɛɓɛ (dc)

Ɉosafatə nwɔ Yálá hvɛli woo

¹ Yili pulu, Moabə nuą, Amɔn lonnii, ə pɛlɛ la Maɔn nuą, di pa kɔ́ pɛlɛi Ɉosafatə ɓa.

² Di pa di nwəlɛɛ ɓo Ɉosafatə ɓa, diɛ mą: «Nu kpulu kɛnɛ̨ɛ̨ kaa pai kɔ́ pɛlɛi yɛ́, diɛ həɠə gboloyá pulu pələ, ya ɓaa Edɔmə lɔi pulu pələ. Diɛ ka tii daa həli kɛa Hasasɔn-Tamarə; ya ɓaa a Ein-Gɛdi.»

³ Ɉosafatə ə ɲɔw, ə tinɛ̨n yɛ li Yai-Laa mąąnin gɛi; ə hin nolo ɓo Ɉuda lɔi hu nąą kəlee, di hin nɔ.

⁴ Ɉuda nuą di di ɲąąkpɔn, əgɛ, di Yai-Laa hvɛli. Nuą di həɠə kpɔ Ɉuda taaɠaa kəlee hu, əgɛ, di pa, di Yai-Laa hvɛli.

⁵ Ɉosafatə ə kɛ tɔɔni, Ɉerusalɛmə nuą da Ɉuda nuą daa mąątinɛ̨n. Di ɲąąkpɔn tii too Yai-Laa yəi bɛlɛ́ laaləi gwəli hɛ̨ąi nįnɛ̨ ɓa.

⁶ Ɉosafatə ə Yálá hvɛli ŋɛ̨i, yɛ mą: «Yai-Laa ku nąnni di wɔɔ Yálá! Kɛlɛi, Yɛ́ ɓə a Yálá yələkɔlɔn mɛ̨i yələkɔlɔn ɉu-e! Ɛlɛɛ, Yɛ́ tɔɔ lɔiɠaa kəlee ɲąąwooɓo-e! Huwalawala da heeɓolaa di kaa Ə́ yəi, hɛn da lɔpee hva pɛli tɔɔi Ə́ la.

⁷ Kɛlɛi ku wɔɔ Yálá ɓaa a Yɛ́! Nuąi kɛ heeni nɔi ŋɛ̨i hu, Yɛ́ ɓə di kpɛ, Ə́ wɔɔ nu huwui Israɛlə tɔwɔ, Ə́ nɔi kulɔ di yəi, Ə́ dɛɛ, Ə́ ɓɛlanmun Abrahamə lonnii pɔ, a di wɔɔ a yələ kəlee mɛ̨nį-e!

⁸ Di hee ɉu, di hɛli pɛlɛ́ tɔɔ laa ə Laa ɓa, a Ə́ wɔɔ; diɛ kɛ:

⁹ ‹Akɛ mɛ̨nį nwąnąą ta aa kɛi pa həlii kuɔ, ə kɛ a kɔ́, ə kɛ a hutɔɔ mɛ̨nį, ə kɛ a lɔi wolo ɲɔ̨n, ə kɛ a pulu; akɛ kwa tɔɔ bɛlɛ́i ŋɛ̨i lííla, Ə́ ɲɛ̨i ɓa; hvo gaai, Ə́ laa kaa bɛlɛ́i ŋɛ̨i mu; kwa tómą Ə́ pɔ pələ ku wɔɔ mɔ̨nɔ̨i tii hu, Yá Ə́ wəli tɔɔ kuɔ, Ə́ ku ɓalo.›

¹⁰ Yii hu, Amɔn nuą, Moabə nuą, da Seirə yee hu nuą kaa lə kɛa, diɛ kɔ́ pɛlɛ kuɔ. Ɓɛlɔwai Israɛlə nuą di kulɔ la Eziptə lɔi hu, hvó kɛ hvaa li mą, Israɛlə hvo tɛɛ di wɔɔ lɔi hu, hvo di hu kala.

¹¹ Mąą nuąi ka ŋɛ̨i pai, mɛ̨inɛ̨ɛ̨i ku gɛ diɛ, ku hvɛla kulɔ a kɔ́, gɛɛnąą ŋɛ̨i ə dɛɛ ku pɔ, a ku wɔɔ, diɛ di gulɔ ku yəi!

¹² Ku wɔɔ Yálá, hvó mɔ̨ɔ̨ pai Ə́ wɔɔ kitii pui di mɛ̨i? Hvo gaai, hvaŋą hvo ku yəi, ku hvo tɔɔ la nu kpulu kɛnɛ̨i tii pai dɔwɔ. Kɛlaa, ku ɲɛ̨i kaa lɔ Yɛ́.»

¹³ Ɉuda nuą kəlee di kɛ tɔɔni Yai-Laa lííla, diɛ da di yəi bɛlɛ́n nuą, di nɛ̨ąni da di lonnii.

Gɔ ə nɛ̨ɛ̨ Ɉuda nuą diɛ

¹⁴ Ɲąąkpɔn tii hu, Yai-Laa nwɔ Kilii ə pa Yahaziɛlə pɔ, yai kɛ a Ɉakaryahu lon, Benaya lon, Yéiɛlə lon, Matania lon, lévi nu huwu ta li kɛ, yɛ ɓo a Asafə yəi bɛlɛ́n mun.

¹⁵ Yɛ diɛ: «'Ka ká wəli tɔɔ kpɔ a nɛlɛɛ, kaa a Ɉuda nuą, kaa a Ɉerusalɛmə heeɓo nuą, ɛlɛɛ, yɛ́i ɓaa a tɔɔmun Ɉosafatə! Yai-Laa woo ka, yɛ diɛ: 'Ka hvo ɲɔw, 'ka mąą hvo kpɛlin nu kpulu kɛnɛ̨i tii ɲɛ̨i tɔwɔ; hvo gaai, ka mąą kɔ́ hvoli, Yálá mąą kɔ́ li.

¹⁶ Tínąą, ka li ka wolo diɛ, di kaa tɛi a nwulu powa yɛɛ pələ. Ka káá lii di kaai moloon donna, Yeruɛlə nɔi pun dənən ma.

¹⁷ Ka hvo lii kɔ́ kɔ́ mɛ̨nį ɓa, 'ka li lɔ, ka ká kpɔɔ lɛ, ka tɔɔ, ka ká ɲɛ̨i hee Yai-Laa ŋą yeetɛɛmąą kɔ́i kɔ́ pələ ɓa, ka mąą mɛ̨nį ɓa. Ɉuda nuą ka Ɉerusalɛmə nuą, 'ka hvo ɲɔw, ka mąą hvo kpɛlin! Tínąą, 'ka kulɔ ka li ka tɔɔ di tɔwɔ, Yai-Laa kaa ka pɔ.»

¹⁸ Ɉosafatə ə kwɛli hvilɛn, ə pɛlɛ nɔi ɓa. Ə kɛ lɔ tii, Ɉuda nuą da Ɉerusalɛmə nuą kəlee di pɛlɛ nɔi ɓa di kwɛli hvilɛn Yai-Laa ɓa.

¹⁹ Lévi lonnii kɛ a Kehatə yəi bɛlɛ́n nu kpulu, da Kore yəi bɛlɛ́n nu kpulu, di haŋą di tɔɔ, diɛ Yai-Laa Israɛlə nwɔ Yálá mąąwiɛ kpɔ a di woo kɛnɛ̨ɛ̨.

²⁰ Yələ wala pɔ, nuą di humo kpɔ, di di muhəɠə, diɛ li Tekoa nɔi pun ɉu pələ. Nuą lii lɔwai, Ɉosafatə ə haŋą ə tɔɔ, yɛ diɛ: «'Ka ká wəli tɔɔ Ɉuda nuą da Ɉerusalɛmə heeɓo nuą! 'Ka ká kilitɔɔ Yai-Laa ka wɔɔ Yálái ɓa, di yee hva lɔ kaa! 'Ka ká kilitɔɔ gwəi mɛ̨nį hukulɔ nuą woo ɓa, ka yee kaa lii lɔi!»

²¹ Ɉosafatə da nɔi lonnii di di nwun dɔɔ, əgɛ, di nuą tɔɔ kɔ́kuláaɠaa ɲɛ̨itɔwɔ, diɛ Yai-Laa laa tɛ, diɛ nwɔ kɛnɛ̨ laa mąąhəɠɛɛ mąątɛ̨nɛ̨ wələ tɔɔ, diɛ kɛ mą: «'Ka Yai-Laa laa tɛ, gbala ə tɔɔ, a kulɔ nwoo ɓa, ɲɛ̨n deei hvo mą!»

²² Ɓɛlɔwai di kɛi Yai-Laa laa tɛ wələ too la, Yai-Laa ə wulu-wulu too Amɔn nuą, Moabə nuą da Seirə ɲee hu nuą lɔwai, diɛi tii həɠə diɛ pa pɛlɛi Ɉuda ɓa. Diɛ kɛa di kee paa.

²³ Amɔn nuą da Moabə nuą, di tinɛ̨n di pɛlɛ Seirə ɲee hu nuą diɛ, diɛ di paa, diɛ di hukala. Yii kɛa di Seirə nuą paa di di kpɛɛ, di tínɛ̨n kɛa, diɛ di kee paa.

²⁴ Ɓɛlɔwai Ɉuda nuą di həli la ɲee nwuɔ̨, ɓɛi nu yá kɛ laa yɛ́ nɔi pun ɉu kaa, di tínɛ̨n di gɔ́laɠai tii mɛ̨i kaa, nu powa a pu, dɔ̨nɔ̨ kpɛli hvo kɛ ɉu a vúlu.

²⁵ Ɉosafatə da nwɔ nuąi di pa di too di mɛ̨i, di di mąąkpoloon. Di taatɛlɛɛ kpulu tamąą kaa di pulu, da hɛngɔw, bɛlɛɛ, həɠəɠaa diɛ, da hɛn mąąwiɛɛɠaa, di ɉəɠə a di wɔɔ. Ɉɛnŋąą hukɛnɛ̨ pələ, di hvo pɛli lii a gəlee, hvo kɛli di hvóló haaɓa kɛ díɲąą hu. Mąąhɔlɔɓo damąąi kɛ.

²⁶ Voló nąąn ɲələ, di di ɲąąkpɔn núwɔ́ yɛɛ kɔ́ɔi. Mąąhɔlɔɓo, nąą ɓə di lúwɔ́ too laa Yai-Laa laa hu. Yili ɓə gɛ, diɛ gɛɛnąą tii laa hee a «Lúwɔ́ yɛɛ kɔ́ɔi», naa tii lɔ ɓə mą háá ɓaa a háá.

²⁷ Ɉuda nuą, Ɉerusalɛmə nuą Ɉosafatə ə ɓo di nwun na, di di pulu pənə, diɛ li Ɉerusalɛmə daai a kwəinɛ̨ɛ̨, mąąhɔlɔɓo, Yai-Laa ə kwəinɛ̨ɛ̨ tɛɛ di pɔ, di yowoɠaa mɛ̨i.

²⁸ Di lɔ Ɉerusalɛmə a hvɛli woo: diɛ gwɛnįn ɲɔw, diɛ bɛlɛgwəi yɔw, diɛ tulu hvɛɛ. Di lɛɛ kpɔ a hvɛli kɛi, di həli la Yai-Laa yəi bɛlɛ́ laaləi.

²⁹ Ɓɛlɔwai dɔɔɓɛlaa yiiɠaa tii di bələ mąn na, diɛ kɛ Yai-Laa aa Israɛlə ɲowoɠaa hukala; Yálá ŋą ɲɔw mąąlaa ə lɔ di hu.

³⁰ Ɉosafatə nwɔ tɔɔlaai hu ɲąą ə laɠi; nwɔ Yálái ə liilaa tɛɛ bɔ da gwɛlɛ lɔiɠaa kəlee di lɔwai.

Ɉosafatə nwɔ tɔɔlaa laa kulɔ pələ

³¹ Asa lon Ɉosafatə kaa kwɛlan ə kɛ a kwɛlan bow haaɓa gɔw lɔɔli, ɓɛlɔwai ə tɛ la dɔɔlaa hu. Ə tɔɔlaa kɛ Ɉuda lɔi mɛ̨i a kwɛlan bow hveelɛ gɔw lɔɔli, ɉeɛi kɛ Ɉerusalɛmə daai. Nee ɓa kɛ a Azuva Silhi lon nɛ̨ɛ̨nu.

³² Ɉosafatə ə hvilɛn gbɔlɔ nąn Asa ŋą túwɔ́ pələ lɛlɛi hu, hvo kpɛli mąą laa. Mɛ̨nįi kɛ nɛlɛɛ Yai-Laa ɲɛ̨i ɓa, ya ɓə ə kɛi gɛ.

³³ Kɛlaa, bələi mąn ə kɛ la tii, hali kɔ́iɠaa di hvo kpɛɛ nɔi, ɛlɛɛ, nɔi lonnii kili kəlee hvo lɛɛ a ganąnŋąą di nąnni di wɔɔ Yálái ɓa.

³⁴ Ɉosafatə kɛ mɛ̨nį gbəliɠaa, ə həɠə dɔlɔɔɠaa diɛ ə həli la gbəlamɛ̨iɠaa diɛ, diɛ ka di pɛ̨ɛ̨ Hanani lon Ɉehu nwɔ hɛɓɛ́i hu, ɉɛɓɛ́i tii kaa Ɉuda tɔɔɓɛlaa di wɔɔ hɛɓɛ́i lɔwai.

³⁵ Yili pulu, Ɉuda tɔɔmun Ɉosafatə da Israɛlə tɔɔmun Akaziasə di too di kee pɔ. Yili yaan dúwɔ́ pələ ɲɔ̨nwɔ̨ɔ̨i kɛ.

³⁶ Di too di kee pɔ, diɛ yáɲą kələnŋąą pɛli, diɛ li la Tarsisə. Di gələnŋąą tii pɛli Esiɔn-Gɛvɛrə.

³⁷ Maresa mun Dodawahu lon Eliezɛrə ə Yálá kwəi mɛ̨nį ɓo Ɉosafatə ɓa, yɛ mą: «Yii kɛa ka Akaziasə kaa too ka kee pɔ, Yai-Laa aa ə́ kɛ mɛ̨nįɠaa hukala.» Ə kɛ lɔ tii, gələnŋąą tii di taɠa di kee ɓa, di hvo kpɛli həli Tarsisə.