Kɔlɔnikɔ Veerɛi 2 - Yálá laawoo hɛɓɛ (dc)

¹ Salomɔn ə nu waa pow mɛ̨ihveelɛ həɠə tiɛ̨ həɠə koló hu, ə nu waa pow mɛ̨ihaaɓa a kwɛni haɠa nuą yee hu, ɛlɛɛ, nu waa haaɓa pulu nwun mɛ̨ida, diɛ di ɲɛ̨i kɛ goló kɛ nuą diɛ.

² Salomɔn ə tiɓo kə mun Tirə tɔɔmun Hiramə pɔ, yɛ mą: «Ka ną́n Davidə ka yee ə kɛ gee hu, yɛ́ kpitili wulu tɛɛ mą, yɛ ɲii pɛlɛ́ tɔɔ la;

³ ya ka, gáá bɔ ŋį́ pɛlɛ́ tɔɔ Yai-Laa nwɔ́ Yálái ɓa, ə kɛ a pɛlɛ mąąhəɠɛɛ, diɛ hɛn gunnɛ̨ɛ̨ɠaa kələn ɉii laa nií la, haláá hɛnŋąą di ɓo lɔ laani nií la a yələ kəlee da haláá hɛn da gəlee kələn yələwala da yələwulii, a túwɔ́ yələɠaa, ɲąnįn dɔɔ nįnɛ̨ɠaa da Yai-Laa ku wɔɔ Yálái nwɔ hɛli yələɠaa; yili kaa pai kɛi tii a yələ kəlee mɛ̨nį Israɛlə lɔi hu.

⁴ Bɛlɛi gáá bɔ ŋį́ dɔɔ, a kɛ a pɛlɛ kɛnɛ̨; gbala ə tɔɔ, ku wɔɔ Yálái kɛnɛ̨i yálá kəlee ɓa.

⁵ Gbɛɛ kpɔ ɓə hvąŋą a pɛli kɛi ɲəi, yɛ pɛli Pɛlɛ́ tɔɔi mą, a yai tii yələ kɔ́lɔn da yələ kɔ́lɔn mɛ̨i pələ di hva pɛli mui? Ɛlɛɛ, lə kpɔ ɓə níí kpələ gɛ́ pɛli Pɛlɛ́ tɔɔi mą, a wala kɛ kɛ́ diɛ pɛli halááɠaa kələn ɉi Nííla?

⁶ A kɛ tii kani, yɛlɛkɛmun dɛɛ mą́ą́ yiihu, nwəlɛɛ hɛni kóló kɛi, da wali, da kwɛli kpɔlu, da kwɛli kpəlee, yɛ pɛli həɠə ɲɛ̨i pɛ̨ɛ̨, a gbɔluɔ, a gbɔluɔ gbələ tə tə, a vilii ɓoɔ, əlɛɛ nwəlɛɛ hɛnŋąą mąą nįnįn ɉaɠai a wulu, di kaa pai kóló kɛi gee pɔ, ɲɛlɛkɛnuą yiiɠaai ŋɛ̨i ɓɛ bɔ́i, Ɉuda lɔi hu da Ɉerusalɛmə; ną́n Davidə ɓə yiliɠaai mąąkwɛli.

⁷ Kpitili wului Liban tɛɛ lɔ nwɔ̨nɔ̨ bɔ́, da siprə wulu, da santalə wulu; gbaɠala kaa mą́ą́ gɛ́, yɛ́ kóló kɛ nuąį wəlɛɛi Liban wuluɠaa pɔn ɉii. Yili pulu ŋį́ kóló kɛ nuą da ə́ wɛiɠaai di kaa pai kɛi kóló kɛi geepɔ.

⁸ Di kaa pai wúlú pɔn ɉi mą́ą́ kpɔ kɛnɛ̨, mąąhɔlɔɓo bɛlɛi gɛ́ ŋį́ dɔɔ gaa pai kɛi kpɔ a pɛlɛ kɛnɛ̨, nɛlɛɛ nuą ɲɛ̨i mu.

⁹ Nwulu pɔnnuą, a diɛi tii a ə́ wɔ kóló kɛ nuąį, di kɔ̨nɔ̨n ga a: Mɔ̨nun gɔ́w kilə waa pow hveelɛ, kpai kɔ́w kilə waa pow hveelɛ, lɔɔyaləɠi waa tɔ̨nɔ̨, wulɔ tuku waa pow hveelɛ.»

¹⁰ Tirə tɔɔmun Hiramə ə Salomɔn woo pulu pənə, yɛ mą: «Yai-Laa nwɔ nu huwui wɛli ɓə gaa mą, mɛ̨nįi gɛ, yɛ́ ə́ hee la a tɔɔmun, yaa li.

¹¹ Gáá Yai-Laa Israɛlə nwɔ Yálái hɛɠɛɛɓoi, yai yələ kɔ́lɔn da lɔ di pɛli, yai aa lon ɉulɔnu kilimąą tɛɛ tɔɔmun Davidə pɔ, giliŋąlaa, yɛ ɉiɛ pələ yɛlɛ kɛ, yɛ ɓo a mɛ̨nį kɔ́lɔnmun; yai gaa pɛlɛ tɔɔi Yai-Laa ɓa, yɛ tɔɔ pɛlɛ́ tɔɔ gbɔwɔ ɓa.

¹² Gáá kani yɛlɛmun da tɛɛ yɛ́ yiihu, a mɛ̨nį kɔ́lɔnmun, naa ɓaa a Hiramə-Abi.

¹³ Nee ə kulɔ Dan huwu hu, nąn ə ɓo a Tirə mun; ɲɛlɛɛi hɛni koló kɛi, da wali kwɛli, ə mą kɛ, kwɛli kpɔlu da kwɛli kpəlee, ɲɛlɛɛi wulu haɠa da kwɛni. Ɲɛlɛɛi nwɔ̨nɔ̨ ganą heei, ə kɛ a gbɔlu, gbɔluɔ mutɛɠiɛ, awala kɛ tii, dɛɠiɛ hɛ̨-hɛ̨. A pɛli hɛn mąą nįnį́n nɔpee gəlee kɛi a wulu, kolói yá kɛ mą gɛ, a gɛ; da ə́ wɔɔ yɛlɛkɛnuąi, ə pɛlɛ la ŋį́ nąmu ə́ nąn Davidə nwɔ yɛlɛkɛnuąi diɛ.

¹⁴ Nwɔ́ mɛ̨nį nąmu, yii ɓaa ə́ wɛi, mɔ̨nun kɔ́w da kpai kɔ́w, nwulɔ da nɔɔi ə́ di laakwɛlanmo, di tɛɛ kɛa ə́ wɔɔ tínuą diɛ.

¹⁵ Ku wɛi, ku kaa pai líi, nwului ə́ kaa bɔ, ku dee Liban yee nwuɔ̨, ku dɛɛ gboloyá ŋą pələ yɛ pa Ɉafa, ə́ wɛi ɓaa ə́ ɉəɠə ə́ tɛ la Ɉerusalɛmə.»

¹⁶ Nwɛ̨ąi kpɔ kɛ Israɛlə lɔi hu, Salomɔn ə di lonon, nąn Davidə nwɔ lonon moi ə gɛ yili pulu, di kɛ a nu waa nwundɔ̨nɔ̨ nu waa pow lɔɔli kɔ́w haaɓa pulu nwun mɛ̨ida.

¹⁷ Ə nu waa pow mɛ̨ihveelɛ kɛ a tiɛ̨ həɠə nuą, ə nu waa pow mɛ̨ihaaɓa kɛ a kwɛni kulɔ nuą ɲee hu, ə nu waa haaɓa pulu nwun mɛ̨ida tɔɔ, diɛ di ɲɛ̨i kɛ goló kɛ nuą diɛ.