Kɔlɔnikɔ Veerɛi 19 - Yálá laawoo hɛɓɛ (dc)

Ɉosafatə ə kiti tee nuą hee Ɉuda lɔi hu

¹ Ɉuda tɔɔmun Ɉosafatə ə bulu pənə ə li bɔɔli Ɉerusalɛmə kpɔ nɛ̨ŋɛ̨kpɛlɛɛ.

² Gwɛlɛɛn gɛɛ kaamun Ɉehu a Hanani lon, ə kulɔ yɛ li Ɉosafatə laakwiɛn ɉii, ə li yɛ mą: «Akɛtii nu ɲɔ̨nwɔ̨ɔ̨ɠaa ɓə yá kpɔnmąą tɛɛ di pɔ, ɛlɛɛ, Yai-Laa ɲowoɠaa ɓə yá di wɛlila kɛ? Yili mąą mɛ̨nį ɓa, Yai-Laa nwɔ liiholii kaa pai ɓɛlai ə́ mɛ̨i.

³ Kɛlaa, ə mą kɛ tii, mɛ̨nį lɛlɛɛɠaa kaa ə́ túwɔ́ pələ hu; hvo gaai, nwuluɠaai nuą di dɔɔ diɛ gɔ́, yáá gəlee kələn nɔi, ɛlɛɛ, yáá tɔɔ a ə́ nwąnąi, yɛ́ Yálá woo hon.»

⁴ Ɉosafatə ə kɛ heeni Ɉerusalɛmə. Ə pənə nwɔ̨nɔ̨, ə hiɛ nɔi nąą kəlee, ə həɠə Beɛrə-Seva, ə li Ɛfraimə ɲeeɠaa hu, ə nɔi lonnii ɲɛ̨i tínɛ̨n ə ɉee Yai-Laa di nąnni di wɔɔ Yálái ɓa

⁵ Ə kiti tee nuą hee nɔi, Ɉuda kɔ́ taaɠaa kəlee tɛitɛi hu.

⁶ Yɛ giti tee nuą diɛ: «'Ka ká kiliŋąhiɛ a nɛlɛɛ ka wɔɔ kolói ɓa, ka hvo pai kiti teei a nu kanŋaa di wɔɔ kiti tee pələ, kɛlaa, 'ka dee a Yai-Laa nwɛi tee pələ, yaai pai kɛi ka pɔ golói tii hu.

⁷ Yili ɓa tii, ka ɲɔw kani Yai-Laa ɓa! 'Ka mɛ̨nįi tii lɛɛ ka kwəi, 'ka gɛ! Hvo gaai, hvulu, ɲɛ̨ikɔlɔn, nɔgwəi, hvo Yai-Laa gu wɔɔ Yálái nwɛi hu.»

⁸ Ɉosafatə ə lévi lonnii taɠaa, da ɉaláá laa həli nuą, ə mą kɛ, Israɛlə pɛlɛ́ nąmįną taɠaa hee a kiti tee nuą Ɉerusalɛmə, əgɛ, diɛ daa nuą lɔwai mɛ̨nįɠaa hutɔɔ, yɛ bələi Yai-Laa kaa la bɔ.

⁹ Bələi kɛ mąąnɛ̨ɛ̨ di gɛ la, ə mo diɛ, yɛ diɛ: «Bələ ɓə mąąnɛ̨ɛ̨ ka túwɔ́ la Yai-Laa nwɔ ɲɛ̨i ɲɔw mąą laa hu, a kwəi kwələlaa, da tələnmolaa.

¹⁰ Ka kaayɔwɔɠaa di kaa daaɠaa hu, da pa a mɛ̨nį ɓo ta ka lííla, ə kɛ a nu kan mɛ̨nį, awala kɛ tii, yii hvilɛn na tɔ́n mɛ̨nį ɓa, da bɔ túwɔ́ ɓo mɛ̨nį, ə kɛ a mɛ̨nį loonŋąą, awala kɛ tii, huwula mɛ̨nį; 'Ka mɛ̨nįi tii hupono a diɛ, əgɛ, di hvo pa kɛ a hɔnmąą nuą Yai-Laa ɓa, ŋą liiɲąnwąną hvo pa ɓɛla ka mɛ̨i ka ká kaayɔwɔɠaa. 'Ka túwɔ́ tii a nɛlɛɛ, əgɛ, ka hvo pa kɛ a hɔnmąą nuą.

¹¹ Ɉaláá laa həli mun gɛnɛ̨ Amariahu ɓə ka kəlee ka nwun na, Yai-Laa mąą mɛ̨nį kəlee hu, ɛlɛɛ, Ɉuda ŋą pɛlɛ́i nwun nąmu Yismaɛlə lon Ɉevadiahu ya ɓə gaa, mɛ̨nįi kpɔ hvilɛn na tɔɔmun mąą mɛ̨nį ɓa nwun na. Levi lonnii ɓə ka yəi a ɉɛɓɛ́kɛnuą. 'Ka tɔɔ a nwąnąi, 'ka goló kɛ! Nui a gɛ a nɛlɛɛ, Yai-Laa ə kɛ mąą nu pɔ!»