Kɔlɔnikɔ Veerɛi 18 - Yálá laawoo hɛɓɛ (dc)Ɉosafatə da Israɛlə tɔɔmun Akabə di mįnɛ̨ həɠə ( Tɔɔɓɛlaa dɔlɔɔ 22.1-4 ) 1 Ɉosafatə ə hɛngɔw hɔlɔɓo kpɔ kɛnɛ̨ da mąąwiɛ. Ɉosafatə ə kanąn Akabə yəi a húlú mɛ̨nį. 2 Kwɛlan da wolo kulaa ɉu, Ɉosafatə ə li Akabə pɔ Samari. Akabə ə nwɛ̨ąlaa kɛ kpɔ kɛnɛ̨, da bɔ nuą; a taatɛlɛɛ pɛlɛɛɠaa da gbɛa-kpɛaa a gbulu kɛnɛ̨. Yili pulu, Akabə ə ɉuhvɛli Ɉosafatə ɓa, əgɛ, di li, di kɔ́ pɛlɛ Ramotə ɓa yii gaa Galaadə lɔi hu. 3 Israɛlə tɔɔmun Akabə yɛ Ɉuda tɔɔmun Ɉosafatə ɓa: «Ə́ kaa pai gwə li gu kɔ́ pɛlɛ Ramotə ɓa, Galaadə lɔi hu?» Ɉosafatə yɛ mą: «Gu kaa a nu tɔ̨nɔ̨, ə́ nwɔ nu huwui da nwɛ̨́i di kaa a nu tɔ̨nɔ̨. Ku kaa pai, gwə li.» Akabə nwɔ Yálá kwəi mɛ̨nį hukulɔ nuą di gɔ́ nɛ̨ɛ̨ mɛ̨nį ɓo 4 Ɉosafatə yɛ Israɛlə tɔɔmun ma: «Gbea tɔlɔɔ nii Yai-Laa mąąni kɛ!» 5 Israɛlə tɔɔmun ə nwɔ Yálá kwəi mɛ̨nį hukulɔ nuąi ɲąąkpɔn, di kɛ a nu nwun nąąn; yɛ diɛ: «Kwa pɛli lii mɔ̨ɔ̨ ku kɔ́ pɛlɛ Ramotə ɓa Galaadə, awala kɛ tii, ŋį́ lɛɛ ɓɛ?» Ya diɛ mą: «Tɔɔmun! 'Li, Yálá aa nąą tɛɛ ə́ pɔ!» 6 Kɛlaa, Ɉosafatə yɛ mɛlan ma: «Yálá kwəi mɛ̨nį hukulɔ mun dakpɛli hvo ɓɛ, hvo Yai-Laa mąąnin kɛ?» 7 Israɛlə tɔɔmun yɛ Ɉosafatə ɓa: «Nu takpɛli kaa kpɔ ɓɛ, yii gwa pɛli gu Yai-Laa mąąni kɛ bɔ pələ, kɛlaa nwɛ̨́i, nwɛli hvo mą́ą́. Mąąhɔlɔɓo, mɛ̨nįi a ɉəɠə Yálá la yɛ mo náá mɛ̨i, hvo ta kɛ li a nɛlɛɛ, ɲɔ̨nwɔ̨ɔ̨ lɔ ɓə a mo a yələ kəlee. Nui tii ɓaa a: Yimla lon Mise.» Ɉosafatə yɛ mą: «Tɔɔmun hvo kɛ gaa yili ɓoi ti!» 8 Israɛlə tɔɔmun ə nwɔ koló kɛmun dɔ̨nɔ̨ təli, yɛ mą: «'Li ɉa, ə́ Yimla lon Mise təli, ə pa!» 9 Israɛlə tɔɔmun da Ɉuda tɔɔmun, tɔɔhəɠə ə ɓo di kwaną, di nu hveelɛ, nu kəlee hiɛ tɔɔkpəlin ɉu, Samari taa ɉįi la. Yálá kwəi mɛ̨nį hukulɔ nuą diɛ kɔ́nwɔ̨, diɛ kɛ di kaa Yálá kwəi mɛ̨nį hukulɔi dɔɔɓɛlaa tii diɛ. 10 Kenaana lon Sidkiyahu, aa mįnɛ̨ tɔɔ nwuɔ̨ a kwɛli, yɛ diɛ: «Yai-Laa woo ka, yɛ diɛ: ‹Mįnɛ̨i ŋɛ̨i ɓə ə́ kaa pai Aramə ɓɔi la, yɛ́ gbəli ŋąąyii!›» 11 Yálá kwəi mɛ̨nį hukulɔ nuą tii woo tɔɔi ə kɛ lɔ tii tɔ̨nɔ̨, diɛ kɛ mą: «'Li ə́ pɛlɛ Ramotə ɓa Galaadə, gɔ́ kaa lii nɛ̨ɛ̨i yɛ́! Yai-Laa kaa lii nąą tɛɛi tɔɔmun bɔ!» Yálá kwəi mɛ̨nį hukulɔ mun Mise ə gɔ́ kala mɛ̨nį ɓo 12 Nui ŋɛ̨i di dɔɔ Mise təlii, ə li yɛ Mise ɓa: «Yálá kwəi mɛ̨nį hukulɔ nuą tii di woo tɔɔi kaa tɔ̨nɔ̨, diɛ gɔ́ kaa lii nɛ̨ɛ̨i tɔɔmun ma. Akɛtii, mąąnɛ̨ɛ̨, yá li ə́ hvaa lɔ yɛ diɛ; yá li, 'nɛlɛɛ ɓo yaa kpɛli!» 13 Mise yɛ mą: «Yii kpɔ Yai-Laa kaa laa, mɛ̨nįi kpɔ nwɔ́ɔ́ Yálá kaa lii bui ná, ya lɔ ɓə ŋį́ mo!» 14 Di pa, di həli tɔɔmun ma, yili yɛ Mise ɓa: «Mise! Akɛtii, kwa pɛli mɔ̨ɔ̨ lii ku kɔ́ pɛlɛ Ramotə ɓa Galaadə, awala kɛ tii, ŋį́ náá kulɔ ɉu?» Mise yɛ mą: «Ka li-o! Gɔ kaa kpɔ lii nɛ̨ɛ̨i kaa!» 15 Tɔɔmun Akabə yɛ mą: «Ə́ kaa bɔ ŋį́ kɛ yɛ́ tɛ̨ąą ɓo mą́ą́, Yai-Laa laa hu gee mɛ̨i yɛli?» 16 Nąąlɔwai Mise yɛ mą: «Ŋą́ Israɛlə nuą kəlee kaa, di taɠa-taɠaa ɲeeɠaa ɓa, yɛ ɓɛlaaɠaai di mɛ̨imun və mą. Ya ɓə Yai-Laa ə mo yɛ mą: Akɛtii, nuą ŋɛ̨i di nąmįną hvo diɛ! Nu kəlee 'ə pənə, 'ə li bɔɔli liilaa hu!» 17 Israɛlə tɔɔmun yɛ Ɉosafatə ɓa: «Kɛlɛi ŋį́ kɛ mo yɛ́-e; və́ kɛ yɛ́: Mɛ̨nįi a ɉəɠə Yálá la yɛ mo náá mɛ̨i hvo ta kɛli a nɛlɛɛ, hvo kɛli lɔ ɲɔ̨nwɔ̨ɔ̨!» 18 Mise yɛ mą: «Ə həli kan kaa, ka ká wəli tɔɔ ka Yai-Laa woo mąn. Ŋą́ Yai-Laa kaa ə ɓo heeni ŋą tɔɔkpəlin mɛ̨i yələ kɔ́lɔn ɉu, nwɔ kɔlaɠaɠaa kəlee di ɓo tɔɔni ɲee kəlee hu; 19 Yai-Laa yɛ diɛ: ‹Gbɛɛ ɓə lii ə Israɛlə tɔɔmun Akabə ɲąąkolon, əgɛ, ə li ə kɔ́ pɛlɛ Ramotə ɓa Galaadə, nwun ə lɛɛ ɉu?› Nu yii a nwɛi ɓo lɔ a dee, yii yaan ə nwɛi ɓo a dee. 20 Nąąlɔwai, malaka ta ə pa, ə tɔɔ Yai-Laa lííla, yɛ mą: ‹Ɲą́ą́ ɓə lii ɲąąkolon ɉii.› Yai-Laa yɛ mą: ‹Ə́ kaa lii gɛ pələ kɛi ləi?› 21 Malaka tii yɛ mą: ‹Gáá lii ŋį́ lɛɛ pu nwɔ Yálá kwəi mɛ̨nį hukulɔ nuą di la.› Yai-Laa yɛ mą: ‹'Li ə́ ɲąąkolon. Yá pɛli hɔlɔmun yili ɓa.› 22 Akɛ Yai-Laa aa lɛɛ kili lɔ ə́ wɔ Yálá kwəi mɛ̨nį hukulɔ nuą ŋɛ̨i hui, Yaa kpįnįi ka tii mɛ̨nį nwąnąą ɓoi yɛ́.» 23 Kenaana lon Sidkiyahu ə lɛɠɛ laa, ə Mise nwun nowa, yɛ mą: «Kpaalə ləi ɓə Yai-Laa nwɔ Kilii kulɔ la ɉu, yɛ pa mɛ̨nį ɓoi yɛ́?» 24 Mise yɛ mą: «Yɛ́ kpįnįi ə́ kaa pai gaai, ɲələi ə́ kaa pai kɛi kulɔi la, pɛlɛ yii mu, yɛ́ li ə́ looi dakpɛli mui, ɲələ ɓə yá gaa la.» 25 Nąąlɔwai, Israɛlə tɔɔmun yɛ diɛ: «'Ka Mise hon, 'ka dɛɛ daa nąmu Amɔn pɔ da tɔɔmun non Yoasə di di yee kɛ mą. 26 'Ka mo diɛ, di nui ŋɛ̨i too gaho ŋą, 'kaa gɔ̨nɔ̨n gɔwɔn kpɔlɔɔ tiikpə, a lɛɠɛ logolo da yá kpɛli-kpɛli, ə lɛɛ ɉu, ŋį́ pənə, ŋį́ pa nɛ̨ŋɛ̨kpɛlɛɛ.» 27 Mise yɛ mą: «Akɛ yá pənə yá pa nɛ̨ŋɛ̨kpɛlɛɛ, kɛ tii, Yai-Laa hvəi mɛ̨nįi ŋɛ̨i bu ná gɛ́ mo.» Yili pulu, yɛ diɛ: «Kaai ɓaa nɔi lonnii, 'ka nwoo tii mąn…!» Tɔɔmun Akabə ə lɛɛ gɔ́ hu ( Tɔɔɓɛlaa dɔlɔɔ 22.29-40 ) 28 Israɛlə tɔɔmun Akabə da Ɉuda tɔɔmun Ɉosafatə, di tɛ di kɔ́ pɛlɛ Ramotə ɓa Galaadə. 29 Israɛlə tɔɔmun yɛ Ɉosafatə ɓa: «Gáá ɉəɠə mąąhvalin ɉii, ŋį́ pili gɔ́ hu. Ə́ wɛi, yá həɠəi lɛɛ lɔ ə́ kwaną.» Israɛlə tɔɔmun ə ɉəɠə kulɔ gwaną, ə pili gɔ́ hu. 30 Ɛlɛɛ yaan, Aramə tɔɔmun ə mo nwɔ kɔ́-wotolo nąmįnąi diɛ, yɛ diɛ: «'Ka hvo pɛlɛ kuláa ta lɔpee ɓa, ə kɛ a yala kɛnɛ̨ nąmu, ə kɛ a yala logolo nąmu; kɛlaa Israɛlə tɔɔmun nɔ ɓə ka pɛlɛ mą.» 31 Ya ɓəi gɛ, ɓɛlɔwai kɔ́-wotolo nwun nąmįną di Ɉosafatə kaa la, di kɛi kɛ diɛ: Israɛlə tɔɔmun ga tii. Di nɛɛ mą, di mąątínɛ̨n, əgɛ, di ɉon. Kɛlaa, Ɉosafatə ə tómą, Yai-Laa ə kpɔnmąą tɛɛ bɔ, Yálá ə di ɲɛ̨i tínɛ̨n ə ɉəɠə mą. 32 Yii kɛa kɔ́-wotolo nwun nąmįną di gaa diɛ kɛ Israɛlə tɔɔmun və li, di həɠə bulu. 33 Kɛlaa, Aramə kuláa tɔ̨nɔ̨ ə kilɛn bili lɔ tii dɛɠii, ə Israɛlə tɔɔmun hon, gɔn da monwon di lɔwai. Nui ŋɛ̨i kɛi tɔɔmun ŋą kɔ-wotoloi hiɛ, yɛ yili ɓa: «'Ɉoo nwun dinɛ̨n, kulɔ a ɲą́ą́ ɓɛ ə́ li a ɲą́ą́ ɓuwu la, daa món!» 34 Ɲələi tii, gɔ́ kpɔlu pələ, Israɛlə tɔɔmun ə lɛɛ ŋą wotoloi hu Aramə nuą lííla, ə lɛɛ la ɉu, yələ wulii. Yili pulu, ə haa a voló tooi nɔwai. |