Kɔlɔnikɔ Veerɛi 17 - Yálá laawoo hɛɓɛ (dc)

Ɉosafatə nwɔ tɔɔlaa

¹ Asa lon Ɉosafatə ɓə dɔɔlaa ə lɛɛ ɲəi. Ɉosafatə ə hee kpɔ tin-tin Israɛlə mɛ̨i.

² Ə kɔ́ ɓuwuɠaa pɛlɛ Ɉuda kɔ́ taaɠaa hu. Ə lɔi ɲąąwooɓo nuą hee Ɉuda lɔi hu, da Ɛfraimə taaɠaa hu, diɛi kpɔ tii nąn Asa ə di hon a kɔ́.

³ Yai-Laa ə kɛ Ɉosafatə pɔ, gbala ə tɔɔ, ə hvilɛn galá Davidə kpaalə mɛ̨i; hvo kɛ hvilɛn ni li Baalə haliɠaa pulu.

⁴ Kɛlaa yaamun, ə tɔɔ a nwąnąi, ə nąnni di wɔɔ Yálá Yai-Laa liiɓa kwɛli, ə hvilɛn ŋą tɔ́nŋąąi pulu, hvo túwɔ́ yɛ bələi Israɛlə nuą di túwɔ́ la.

⁵ Yai-Laa ə nɔi hvaŋą ta pɛlɛ mą ɲee ŋą. Ɉuda nuą di kɛi pa Ɉosafatə pɔ a mɛ̨inɛ̨ɛ̨ hɛnŋąą; yili ɓə gɛ, ə kɛ la a hɛngɔw nąmu kɛnɛ̨, ɛlɛɛ, mąą ə wiɛ.

⁶ Ɉosafatə lii kəlee lɔɔi kɛ Yai-Laa nwɔ pələi hiɛ mɛ̨nį hu; yili ɓə gɛ, ɉali kɔ́iɠaai kpɔ kɛ Ɉuda lɔi hu, da nwuluɠaa kpɔ di kɛi gɔ́, ə gəlee mąą mɛ̨nį kpɛɛ nɔi.

⁷ Nwɔ tɔɔlaa gwɛlan ɉaaɓa yələ, ə kalanɉonŋąą tɔɔ Ɉuda taaɠaa hu, diɛ nuą mąąkwɛli; diɛ ɓaa a: Bɛn-Hailə, Ovadia, Ɉekaria, Netanɛlə da Mikayahu.

⁸ Levi lonnii taɠaa di kɛ di pɔ, diɛ ɓaa kɛ a: Semayahu, Netaniahu, Ɉevadiahu, Asahɛlə, Semiramotə, Yehonatan, Adoniyahu, Toviyahu da Tov-Adoniyahu, diɛ ɓə kɛ a Levi lonnii. Ɛlɛɛ, ɉaláá laa həli nuą: Elisama da Yehoramə.

⁹ Yai-Laa ŋą tɔ́n ɉɛɓɛ́i ɓə kɛ di yəi, di tɛɛ la Ɉuda lɔi hu taaɠaa kəlee hu, diɛ nuą mąąkwɛli mą.

Ɉosafatə nwɔ huwalawala

¹⁰ Dɔɔ lɔiɠaa kpɔ tii kɛ Ɉuda lɔi kwɛlɛ nąą kəlee, Yai-Laa nwɔ ɲɔw ə too di hu; da lɔpee hvo kɔ́ pɛlɛ Ɉosafatə ɓa.

¹¹ Di kɛi həɠə a hamą pilɛɠaa Filisti lɔi hu, diɛ paa la Ɉosafatə pɔ, a wali, da nįįhɔ̨nwɔ̨. Ə mą kɛ Arabə lɔi hu nuą di kɛi pa bɔ a taatɛlɛɛɠaa: Ɓɛlaa hilɛ waa mɛ̨ihveelɛ pulu nwun mɛ̨ihveelɛ da Ɓooli hilɛ waa mɛ̨ihveelɛ pulu nwun mɛ̨ihveelɛ.

¹² Ɉosafatə yee kɔ́nwɔ̨n ɉu lɔ ɓə kɛi ɓɛlɛ a yələ kəlee. Ə kɔ́ taaɠaa tɔɔ, da kɔ-kɔ kwɛli hɛnŋąą pui Ɉuda lɔi hu.

¹³ Kɔ̨nɔ̨n gɛnɛ̨i kɛ Ɉuda taaɠaa hu, ɛlɛɛ, kɔ́kuláa kpəɠiɛɛɠaa di bɔ Ɉerusalɛmə.

¹⁴ Gɔkuláaɠaa tii kpulu hee kpəlin na kɛɛi kɛ a bɛlɛ́ɠaa laa, a ɉuwuɠaa laa; Ɉuda nu huwu nwɛi, gɔkuláa nwun nąmįnąi kɛ ɉu, diɛ ka: Adna, ə kɛ: kuláa walawalaɠaa nu waa nwun ɉaaɓa nwun na.

¹⁵ Yehohanan, ə kɛ: nu waa nwun veelɛ nu waa pow mɛ̨ihaaɓa nwun na.

¹⁶ Ɉikri lon Amasia, yaai lɔ gbɔwɔ ɓa Yai-Laa yee mu, ə kɛ: kuláa walawalaɠaa nu waa nwun veelɛ nwun na.

¹⁷ Bɛnɉamɛn nu huwu nwɛi, kuláa walawala tɔ̨nɔ̨, ya ɓaa a Ɛliada, ə kɛ kilɛn bili nuą nu waa nwun veelɛ nwun na, kɔ-kɔ gbala ə ɓo di yəi.

¹⁸ Yehozavadə, ə kɛ nu waa nwundɔ̨nɔ̨ nu waa pow mɛ̨ihaaɓa nwun na, di hąą yiliɛ kɔ́ kɔ́ mɛ̨nį ɓa.

¹⁹ Nuąi kɛ tɔɔmun yee mu, diɛ ka tii, nuą tii tɔɔmun ə di hee gɔ́ taaɠaa hu, di laa kulaa ɉu.