Kɔlɔnikɔ Veerɛi 16 - Yálá laawoo hɛɓɛ (dc)

Israɛlə tɔɔmun Baesa

¹ Asa nwɔ tɔɔlaa gwɛlan bow haaɓa gɔw mɛ̨ida lɔwai ɓə, Baesa Israɛlə tɔɔmun ə tɛ la a kɔ́, ə bɛlɛ Ɉuda lɔi ɓa. Ə hįį tɔɔ Rama taa ɓa, əgɛ, di pələ too Ɉuda tɔɔmun Asa tɔwɔ.

² Asa ə wali da hɛni həɠə Yai-Laa ŋą hɛngɔw kpɔlɔi hu, ɲəi bɛlɛ́n, da tɔɔmun ɲəi ɉɛngɔw kpɔlɔ hu, dɔɔ pɛlɛ́ mu; ə dɛɛ Aramə tɔɔmun Bɛn-Hadadə ɓa Damasə, yɛ mą:

³ «Kɔ mįnɛ̨ kaa gwa yɛ́ gu lɔwai, ə kɛ ə́ nąn da ną́n di lɔwai. Gáá wali da hɛni di tɛɛi yɛ́; gɔ́ mįnɛ̨i ŋɛ̨i gaa ka Israɛlə tɔɔmun Baesa ka lɔwai, 'li, ka daɠa; əgɛ, hvo pa pa hvo kɔ́ pɛlɛ mą́ą́.»

⁴ Bɛn-Hadadə ə hvaa Asa woo ɓa, ə nɛɛ mą ə nwɔ kɔ́kuláa nwun nąmįną tɔɔ, di kɔ́ pɛlɛ Israɛlə taaɠaa diɛ. Di Iyɔn, Dan da Avɛlə-Maimə hon, di bɛlɛ ɓɛi kpɔ, kɔ-kɔ kwɛli hɛnŋąą kaa laa Nɛftali taaɠaa hu.

⁵ Yii lɔ Baesa ə mɛ̨nįi tii bələ mąn, ɉįi ŋɛ̨i ə kɛi dɔɔ Rama taa ɓa, ə kpɛla mą, ə ɲee kulɔ goló hu.

⁶ Tɔɔmun Asa ə Ɉuda nuą kəlee ɲɛ̨i tinɛ̨n bɔ pələ. Ɉįį ŋɛ̨i di kɛi pa dɔɔi Rama ɓa, di gwɛniɠaa da nwuluɠaa həɠə; Asa ə ɉɛnŋąą tii həɠə ə hįį tɔɔ la Gɛva da Mispa ɓa.

Asa ə Hanani too gaho ŋą

⁷ Nąąlɔwai, gwɛlɛɛn gɛɛkaamun ŋɛ̨i kɛ a Hanani, ə pa yɛ Ɉuda tɔɔmun Asa ɓa: «Yii kpɔ ə́ ə́ kilitɔɔ Aramə tɔɔmun ma, hvó kɛ ə́ kilitɔɔ li Yai-Laa ə́ wɔɔ Yálái ɓai, Aramə kɔlaɠai kulaa li ə́ yee mun.

⁸ Kɛlɛi Nubi nuą da Libi nuą, gɔlaɠai kɛ di yəi ɉu kɛnɛ̨i kɛ-e! Kɔ-kɔ wotolo kpulu, da hoo mɛ̨i nuą kpulu kɛnɛ̨ɛ̨-e! Kɛlaa, yii kpɔ ə́ ə́ kilitɔɔ Yai-Laa ɓa, ə di lɔ ə́ yee ŋą.

⁹ Mąąhɔlɔɓo, Yai-Laa a ɲɛ̨i laa lɔi mɛ̨i nąą kəlee, nuąi di kilitɔɔ mą di kwəi tɔ̨nɔ̨ mɛ̨i, yɛ tɔɔ di pulu. Mɛ̨nį yii ŋɛ̨i hu nwɛi, yáá túwɔ́ yɛ ɓowomun. Yili mąą mɛ̨nį ɓa, ə həɠə yiihu ɓa, di kaa pai kɛi kɔ́ pɛlɛi yɛ́.»

¹⁰ Asa lii ə holi gwɛlɛɛn gɛɛkaamun tii pɔ, ə ɉon, ə doo gaho ŋą. Mąąhɔlɔɓo, nii ə holi bɔ mɛ̨nįi tii hu. Nąąlɔwai, Asa ə hee nɔi lonnii bələ tɔ̨nɔ̨ mɛ̨i yɛ di mɔ̨nɔ̨ ɓo.

Asa nwɔ tɔɔlaa laa kulɔi

¹¹ Asa kɛ mɛ̨nį dɔlɔɔɠaa da gbəlamąąɠaa di pɛ̨ɛ̨ ɓə Ɉuda da Israɛlə tɔɔɓɛlaa di wɔɔ hɛɓɛ́i hu.

¹² Asa ə ɲɔ̨n ɉəɠə, nwɔ tɔɔlaa gwɛlan bow haaɓa gɔw mɛ̨inąąn nɔwai. Ɲɔ̨n nwalawala ə yili gɔɠɔɠaa diɛ. Gɛɛ ɲɔ̨n ɉu, hvo gilitɔɔ Yai-Laa ɓa, ə gilitɔɔ halikɛnuą diɛ.

¹³ Asa ə laa nąnni kwɛlɛ, a nwɔ tɔɔlaa gwɛlan bow nąąn gɔw tanɔ̨n nɔwai.

¹⁴ Di now gámąi tii ə dee Davidə taa ɉu. Di naa gbinŋą, hɛn gunnɛ̨ɛ̨ɠaa di ɓo laa, da nu mąątí hɛn damąą əgɛ, di bowa laahɔnmo la. Di nwɔ̨n gɛnɛ̨ tɔɔ mąą mɛ̨nį ɓa.