Kɔlɔnikɔ Veerɛi 14 - Yálá laawoo hɛɓɛ (dc)

Asa nwɔ tɔɔlaa gɔwɔ tɔɔ yələ

¹ Asa ə túwɔ́ a nɛlɛɛ, a ɉaŋąą Yai-Laa nwɔ Yálái ɲɛ̨i ɓa.

² Ɉali kɔ́iɠaa da ɉaláá kulɔiɠaai kɛ nɔi, Asa ə di kulɔ laa, ə nąąɠaa taɠa, ə ɉali mąąnínįɠaa wolo, nwuluɠaai di kɛi gɔ́, ə di pɔn.

³ Ə mo Ɉuda nuą diɛ, yɛ diɛ; 'ka hvilɛn Yai-Laa ka nąnni di wɔɔ Yálái pulu, ka nwɔ tɔ́n da mąąpamą wooɠaa hon.

⁴ Asa ə nɛɛ mą, ɉali kɔ́iɠaa da ɓɛɠaai di kɛi hɛn gunnɛ̨ɛ̨ kələn nąą, ə nąąɠaa taɠa Ɉuda taaɠaa kəlee hu. Ɉuda lɔi ə kɛ liilaa hu Asa ŋą tɔɔlaai yee mu.

⁵ Ə kɔ́ taaɠaa tɔɔ Ɉuda lɔi hu. Hvo gaai, nɔi ə kɛ liilaa hu, nui lɔpee ta hvo kɔ́ pɛlɛ mą nwɔ tɔɔlaa kwɛlanŋąą yee mu. Gbala ə tɔɔ, Yai-Laa ə hvaamą, nwəli pulu ə lɛɛ a naɠiɛɛ.

⁶ Asa yɛ Ɉuda nuą diɛ: «'Ka gu daaɠaa ŋɛ̨i tɔɔ, gu di mąątinɛ̨n a hįį, gu mɛ̨ikaa pɛlɛ́ɠaa tɔɔ mɛ̨i, gu kponŋąą too na, da di laa kpulu kwɛliɠaa. Nɔi kaa liilaa hu gu yəi. Mąąhɔlɔɓo, Yai-Laa gu wɔɔ Yálái kwɛlii ŋɛ̨i gu mo, guɔ lɛɛ mą a kwəi tɔ̨nɔ̨ laa, mąą mɛ̨nį ɓa, aa hvįitɔɔ tɛɛ gu pɔ bələ kəlee.» Di nɛɛ mą di daa tɔɔ kolóɠaa tii kɛ.

⁷ Asa ŋą kɔlaɠai hee kpəlin na ka: Ɉuda nuą, nu waa nwun ɉaaɓa; diɛ ɓə gɔ-kɔ gbala kpɛa-kpɛaa di kɛ di yəi da kpalaɠaa. Bɛnɉamɛn nuą, nu waa nwun veelɛ nu pow mɛ̨ihaaɓa; diɛ ɓə gɔ-kɔ gbala pɛlɛɛɠaa di kɛ di yəi, di yɛlɛɛ kilɛn bilii. Nu kpului tii kəlee di kɛ kɔ́kuláa wala-walaaɠaa.

⁸ Nubi mun Zera ə pa kɔ́ pɛlɛi diɛ. Ə pa a nu waa kpulu tamąą, bɛlɛɛ kɔ-kɔ wotolo nwun ɉaaɓa; ə pa ə həli kpɔ Maresa.

⁹ Asa ə kulɔ yɛ li naakwiɛn ɉii, di di tɔɔi kulɔ Sefata nɛ̨ŋɛ̨ hu, Maresa tənən ma.

¹⁰ Asa ə nɛɛ mą ə nwoo tɛ Yai-Laa nwɔ Yálá pɔ pələ, yɛ mą: «Yai-Laa! Nu ta hva pɛli lɔi nu walaa da nu hviɲąą di lɔwai, ə kulɔ Ə́ pulu. Yili ɓa, Yai-Laa ku wɔɔ Yálá, kpɔnmąą tɛɛ ku pɔ! Hvo gaai, Yɛ́ lɔ ɓə kilitɔɔi Yɛ́, ɛlɛɛ, Ə́ laa hu ɓə ku pa pɛlɛi la nu kpulu daną-danąi ŋɛ̨i ɓa. Yai-Laa! Yɛ́ lɔ ɓə Ə́ kaa a ku wɔɔ Yálá! 'Hvó hvaa mą, nu hvo kɛ gaa tɔɔi Ə́ la!»

¹¹ Yai-Laa ə Nubinuą kɛlɛ Asa da Ɉuda nuą di tɔwɔ, Nubinuą di pu.

¹² Asa da nwɔ nuąi di hvilɛn di pulu, di lɛɛ di kpɛi di li di həli Gerarə. Nubinuą paa pələi di di paa la, dɔ̨nɔ̨ kpɛli hvo dɔɔ mɛ̨i. Mąąhɔlɔɓo, di di huwolo Yai-Laa lííla da wɔ kɔlaɠai. Asa da nwɔ nuąi di li a ɉɛnŋąą tamąą tii di ɉon gɔ́ hu.

¹³ Daaɠaa tii kɛ Gerarə kwɛlɛ, di gəlee kɛlɛ, mąąhɔlɔɓo, Yai-Laa ə ɲɔw pili di hu, Asa da nwɔ nuąi di too daaɠaa tii kəlee mɛ̨i, gbala ə tɔɔ hɛn ə kɛ daaɠaa tii hu kɛnɛ̨.

¹⁴ Ə mą kɛ, daatɛlɛɛ kumunŋąąi di gəlee hon, di taatɛlɛɛ pɛlɛɛɠaa hon gbɔ kɛnɛ̨ da Ɲɔ̨nwɔ̨mɛ̨ɛ̨ɠaa. Yili pulu, di pənə di pa Ɉerusalɛmə.