Kɔlɔnikɔ Veerɛi 13 - Yálá laawoo hɛɓɛ (dc)

Abiya nwɔ tɔɔlaa

¹ Ɉeroboamə nwɔ tɔɔlaa gwɛlan bow kɔ́w mɛ̨ihaaɓanąą ɓə Abiya ə kɛ la Ɉuda tɔɔmun.

² Ə tɔɔlaa kɛ Ɉerusalɛmə a kwɛlan ɉaaɓa. Nee laa ɓaa kɛ a Mikayahu Givea mun Uriɛlə lon. Kɔ ə kɛ Abiya da Ɉeroboamə di lɔwai.

³ Abiya ə li gɔ́ ɓa a kɔ́kúlaa walawala nu waa nwun nąąn; Ɉeroboamə yaan ə pa a kɔ́kúlaa kpəɠiɛɛɠaa nu waa nwun mɛ̨ihaaɓa, di tɔɔ gɔ́ ŋą.

⁴ Abiya ə tɛ ə tɔɔ Semaraimə yee nwuɔ̨, yii ga Ɛfraimə yee ta; yɛ diɛ Ɉeroboamə ɓa: «Ɉeroboamə ka Israɛlə nuą kəlee ka ká wəli tɔɔ mą́ą́;

⁵ Ka kili hvo mɔ̨ɔ̨ ɉu kaa kɛ, Yai-Laa Israɛlə nwɔ Yálá ə dɔɔlaa tɛɛ Davidə pɔ Israɛlə lonnii kəlee mɛ̨i a yələ kəlee mɛ̨nį, yaa da gwəi lonnii; yili kaa a mįnɛ̨ yii kala hvo mą?

⁶ Kɛlaa, Nevatə lon Ɉeroboamə yai kɛ a Davidə lon Salomɔn nwɔ tímun, ya ɓə aa haɠa aa tɔɔ, yɛ ə gwɛlitee nwɔ mɛ̨nį nąmu ɓa.

⁷ Ya ɓə, toonwunma nuą da nu kpoloonŋąą, di di ɲąąkpɔn gwɛlɛ, di tɔɔ Salomɔn lon Roboamə la. Roboamə ə kɛ a hulɔnon, nii hvo kɛ kpələ li, hvo pɛli tɔɔi di tɔwɔ.

⁸ Yii hui ŋɛ̨i kɛa, ka káá kɛi ka tɔɔ Yai-Laa ŋą tɔɔlaai la, yaai gaa Davidə lonnii yəi! Ka kpulu hu kɛnɛ̨i, nįŋɛ̨ lonnii Ɉeroboamə ə di pɛli a hɛni, di kaa ka yə a ka wɔɔ yáláɠaa;

⁹ Kɛlɛi kaa ɓə Yai-Laa nwɔ haláá laa həli nuąi a Aarɔn lonnii da lévi lonnii di kpɛ-e! Kaa ka kpɔɔ ɓa haláá laa həli nuą həɠə, a ka liiɓa, yɛ bələi lɔi takpɛliɠaa kaa la-e? Nui lɔpee kɛi pa yɛ ɉaláá laa həli mun naa tii hu hvɛli, a nwɔ taalɛlɛɛi hu nįŋɛ̨ lon dɔ̨nɔ̨, da ɓɛlaa hilɛ mɛ̨ihveelɛ, di kɛi gɛ a ɉaliɠaa tii di hvo a Yálá, di wɔɔ haláá laa həli mun.

¹⁰ Ku wɛi, Yai-Laa ɓə a ku wɔɔ Yálá, ɛlɛɛ, ku hvo həɠə li bulu. Ɉaláá laa həlinuąi da kɛ tíi Yai-Laa ɓa diɛ ɓaa a Aarɔn lonnii da lévi lonnii, di kaa di kɛ koló ɓa.

¹¹ Da kɛ haláá hɛn gələn ɉii Yai-Laa lííla yələ wala kəlee da yələ wulii kəlee, diɛ lansan mąą kun nɛ̨ɛ̨ kələn. Ɛlɛɛ, diɛ lɛɠɛ mɔnŋąą laa daɓali mąąhəɠɛɛ mɛ̨i, diɛ nwɔ̨n dɔɔ yələ wulii pɔ tɛitɛi kəlee ɓa nwɔ̨n dɔɔ hɛn tii a hɛni mɛ̨i. Hvo gaai, ku wɛi, ku yee kaa Yai-Laa ku wɔɔ Yálái nwɔ tɔ́nŋąąi diɛ; ka wɛi, kaa nɛɛ laa.

¹² Ya ka kani, Yálá kaa ku pɔ, yɛ ɓo a ku nwun nąmu, nwɔ haláá laa həlinuąi kaa ku pɔ, di kaa pai nwɔ tulúɠaa hvɛɛi, ku wolo a kaa. Israɛlə lonnii! 'Ka hvo kɔ́ pɛlɛ Yai-Laa ka nąnni di wɔɔ Yálá ɓa, ka yee hvo pai lɔi.»

¹³ Nąąlɔwai, Ɉeroboamə ə kɔ́kúlaa taɠaa tɛɛ di pulu pələ, di di loo, Ɉuda nuą di lɛɛ kɛa gɔ́ laɠa lɔwai.

¹⁴ Ɉuda nuą diɛ di kaa tinɛ̨n ɉii, kɔ́ aa hee diɛ pulu pələ da dɔwɔ pələ. Di nɛɛ mą di tómą Yai-Laa pɔ pələ, ɉaláá laa həli nuą diɛ duluɠaa hvɛɛ.

¹⁵ Ɉuda nuą di tómą kpɔ a kɔ́ mɛ̨i woo, ɓɛlɔwai di kɛi tómą la, Yálá ə yɔwu too Ɉeroboamə da Israɛlə nuą hu Abiya da Ɉuda nuą tɔwɔ.

¹⁶ Israɛlə nuą di pu a gilɛ Ɉuda nuą tɔwɔ, Yálá ə Israɛlə lɔ di yee ŋą.

¹⁷ Abiya da nwɔ nuąi di yee ə tɛɛ diɛ kpɔ tɛ̨ɛ̨tɛ̨ɛ̨, di nu waa nwun nɔɔli paa Israɛlə nuą lɔwai.

¹⁸ Israɛlə nuą di nwumɛ̨ a ɲələi tii, Ɉuda nuą di yee tɛɛmąą kɛ, di ɲɛ̨i ə pɔ̨nɔ̨. Mąąhɔlɔɓo, di di kilitɔɔ Yai-Laa ɓa, yai a di nąnni di wɔɔ Yálá.

¹⁹ Abiya ə hvilɛn Ɉeroboamə pulu, Betɛlə da ɲee mu taaɠaa hon, diɛ ɓaa a: Yesana da gwɛlɛ taaɠaa, Ɛfrɔn da ɲee mu taaɠaa.

²⁰ Ə lɛɛ la ɉu Abiya nwɔ tɔɔlaai ə kpɛɛ, Ɉeroboamə yee hvo kpɛli lɔ mɛ̨nį ta ɓa. Yai-Laa ə Ɉeroboamə kɛlɛ ə haa.

²¹ Abiya yaamun, vaɠa ta lɔ ɓə kɛi pɛlɛ mą. Abiya ə nɛ̨ą həɠə pow kɔ́w nąąn, ə lon ɉinąą pow hveelɛ kaa da lon nɛ̨ąą pow kɔ́w mɛ̨ida.

²² Abiya kɛ mɛ̨nįɠaa, ɉiɛ pələɠaa da gɛ kolóɠaa, gəlee pɛ̨ɛ̨i Yálá kwəi mɛ̨nį hukulɔ mun Ido nwɔ hɛɓɛ́i hu.

²³ Abiya ə laa nąnni kwɛlɛ, di noo Davidə taa. Non Asa ə hee a tɔɔmun a nąn mąąhvalin. Ə həɠə ɲələ ɓa nɔi ə liilaa hɔlɔɓo Asa yee mu a kwɛlan bow.