Kɔlɔnikɔ Veerɛi 12 - Yálá laawoo hɛɓɛ (dc)

Sisakə Eziptə tɔɔmun ə kɔ́ pɛlɛ Ɉuda lɔi ɓa

¹ Yii kɛa Roboamə nwɔ tɔɔlaai ə hee kpɔ tin-tin, ɉu ə walawala, ə Yai-Laa nwɔ tɔ́n nwooi lɛɛ laa, Israɛlə nuą kəlee di hvilɛn bulu.

² Roboamə ŋą tɔɔlaa gwɛlan nɔɔlinąą, Eziptə tɔɔmun Sisakə ə pa ə kɔ́ pɛlɛ Ɉerusalɛmə ɓa. Mąąhɔlɔɓo, daa kɛ nɛ̨ŋɛ̨n ɉəɠə Yai-Laa ɓa.

³ Eziptə tɔɔmun ə pa a kɔ́ kɔ́ wotolo waa tɔ̨nɔ̨ pulu nwun veelɛ, hoo mɛ̨inuą waa pow mɛ̨ida, da nu kpulu kɛnɛ̨ɛ̨ lonon və kɛ mą; da diɛni di həɠə Eziptə, Libi, Suki da Nubi.

⁴ Di Ɉuda kɔ́ taaɠaa hon, di pa di həli Ɉerusalɛmə.

⁵ Yálá kwəi mɛ̨nį hukulɔ mun Semaya ə pa ə həli Roboamə ɓa, da Ɉuda ɲɛ̨itɔwɔnuą di ɲąąkpɔnŋąąi kɛ Ɉerusalɛmə, ɓɛlɔwai Sisakə ə kɛi paa la; yɛ diɛ: «Yai-Laa woo ka, yɛ: ‹Kaa ŋɛ̨i kaa nɛ́ɛ́ laa, ɲą́ą́ gbɛli mąn, gáá ka lɛɛi Sisakə yee kɔ́nmą.›»

⁶ Israɛlə ɲɛ̨itɔwɔnuą da tɔɔmun ni, di pɛlɛ, diɛ diɛ: «Yai-Laa tələnmoɔi.»

⁷ Gaai Yai-Laa ə mo, yɛ kɛ daa di kpɔɔ maą yɛɛ, Yai-Laa ə mo Semaya ɓa, yɛ mą: «Daa pɛlɛ gɔ́wɔ́ mu. Və́ pai di lɛɛi laa diɛ di hukala. Kɛlaa, ɉu hvo kɛa li, gɛ́ di ɓalo, nwɔ́ liiholi hvo pai ɓɛlai Ɉerusalɛmə mɛ̨i Sisakə yee hu.

⁸ Kɛlaa di kaa pai kɛi a ɲee mu nuą, yili pɔ pələ, di kaa pai nɔwai laa kaai nu ə tí mą́ą́ da nu ə tí lɔi takpɛliɠaa hu tɔɔɓɛlaa diɛ.»

⁹ Eziptə tɔɔmun Sisakə ə pa ə kɔ́ pɛlɛ Ɉerusalɛmə ɓa, ə Yai-Laa yəi bɛlɛ́n ɉɛngɔwɠaa həɠə da tɔɔmun ɲəi bɛlɛ́n ɉɛngɔwɠaa. Ə gəlee həɠə kpɔ tɛ̨ɛ̨tɛ̨ɛ̨, ə mą kɛ, gɔ́ kɔ́ gbalaɠaai kɛ laa a hɛni, yaaɠaai Salomɔn ə bɛli.

¹⁰ Tɔɔmun Roboamə ə dakpɛliɠaa pɛli, a kwɛli kpɔlu, a di mąąhvalin; ə dɛɛ gilɛhəɠə nuą nwun nąmįną diɛ, diɛi kɛi di ɲɛ̨i kɛ tɔɔmun ɲəi bɛlɛ́ laaləi ɓa.

¹¹ Tɔɔmun ni pələ tɛitɛi Yai-Laa yəi bɛlɛ́n, gilɛhəɠə nuą di kɛi di həɠə, yili pulu, diɛ pənə diɛ pa a diɛ gilɛhəɠə nuą yəi bɛlɛ́n.

¹² Pɛlɛi tɔɔmun ə mo Yai-Laa kɔ́wɔ mu, ya ɓə gɛ, Yai-Laa nwɔ liiholii ə kpɛla bələi, hvo kɛɛ kala yɛ bələi ə kɛi pa gɛi la kpɔ tɛ̨ɛ̨tɛ̨ɛ̨; gu mą kɛ moi tii, mɛ̨nį lɛlɛɛɠaa kaa Ɉuda lɔi hu.

Roboamə ŋą tɔɔlaa laa kulɔ pələ

¹³ Roboamə nwɔ tɔɔlaai hu ə walawala Ɉerusalɛmə. Ə tɔɔlaa kɛ; gaa kwɛlan ə kɛ pow nąąn gɔw tanɔ̨n ɓɛlɔwai ə dɔɔlaa hɔlɔɓo la. Ə tɔɔlaa kɛ a kwɛlan bow gɔw mɛ̨ihveelɛ yee mu Ɉerusalɛmə daai. Daa tii ɓə Yai-Laa ə ɉəɠə ɉu Israɛlə taaɠaa kəlee lɔwai, ə naa hee mą. Roboamə nee laa ɓaa kɛ a Naama, nɛ̨ɛ̨nui tii ə kɛ a Amɔn nɛ̨ɛ̨nu.

¹⁴ Roboamə ə túwɔ́ a ɲɔ̨nwɔ̨ɔ̨; hvo gaai, hvo kɛ nii lɔ li Yai-Laa kwɛliɛɛ hu.

¹⁵ Roboamə kɛ mɛ̨nįɠaa, ə həɠə dɔlɔɔɠaa diɛ ə həli la gbəlamąąɠaa diɛ, bɛ̨ɛ̨ kaa Yálá kwəi mɛ̨nį hukulɔ mun Semaya nwɔ hɛɓɛ́i hu da gwɛlɛɛn gɛɛ kaamun Ido nwɔ hɛɓɛ́i hu. Roboamə da Ɉeroboamə di lɔwai kɔ́ ə kɛ lɔ mą a yələ kəlee.

¹⁶ Roboamə ə laa nąnni kwɛlɛ, di loo Davidə taa. Non Abiya ə hee a tɔɔmun a nąn mąąhvalin.