Kɔlɔnikɔ Veerɛi 11 - Yálá laawoo hɛɓɛ (dc)

Roboamə kɛ mɛ̨nįɠaa

¹ Yii lɔ Roboamə ə lɔ Ɉerusalɛmə daai, ə Ɉuda da Bɛnɉamɛn pɛlɛmun nuą kəlee ɲąąkpɔn; kɔ́kúlaa kpɔɔkpɔɠaa nu waa nwundɔ̨nɔ̨ waa pow mɛ̨ihaaɓa. Ə di həɠə diɛ li kɔ́ pɛlɛi Israɛlə nuą diɛ; əgɛ, di dɔɔlaa tɛɛ mɛ̨nį ɓa Roboamə pɔ.

² Kɛlaa, Yai-Laa ə mɛ̨nį mo gwəi mɛ̨nį hukulɔ mun Semaya ɓa, yɛ mą:

³ «'Li yɛ́ Salomɔn lon Roboamə Ɉuda tɔɔmun mai, da Israɛlə nuą kpɔ tii uda da Bɛnɉamɛn lɔi hu, yɛ́ diɛ:

⁴ Yai-Laa woo ka, yɛ diɛ: Mąą hvo nɛ̨ɛ̨li, ka hvo li, ka hvo kɔ́ pɛlɛ ka kaayɔwɔɠaa diɛ. Nu kəlee ə pənə ə li bɔɔli. Mąąhɔlɔɓo, Ɲą́ą́ ɓə mɛ̨nįi tii kɛ.» Di di wəli tɔɔ Yai-Laa woo ɓa, di hvo kɛa li, di hvo pɛlɛ Ɉeroboamə ɓa.

⁵ Roboamə ə hee Ɉerusalɛmə, ə kɔ́ taaɠaa tɔɔ Ɉuda lɔi hu.

⁶ Ə Bɛtleɛmə taa tɔɔ, ə Etamə taa tɔɔ, ə Tekoa taa tɔɔ,

⁷ ə Bɛtə-Surə taa tɔɔ, ə Soko taa tɔɔ, ə Adulamə taa tɔɔ,

⁸ ə Gatə taa tɔɔ, ə Maresa taa tɔɔ, ə Zifə taa tɔɔ,

⁹ ə Adoraimə taa tɔɔ, ə Lakisə taa tɔɔ, ə Azeka taa tɔɔ,

¹⁰ ə Sorea taa tɔɔ da Ayalɔn da Hebrɔn taa; daa walawalaɠaa li Ɉuda da Bɛnɉamɛn lɔi hu.

¹¹ Ə di wɔɔ hįį nwąnąɠaai mąą tɔɔ, ə di ɲąąwooɓo nuą hee laa, kɔ̨nɔ̨nŋąą, wulɔ da lɔɔ pui kɛ mą.

¹² Kpala da kɔ-kɔ hɛnŋąą di kɛ daa kəlee hu. Ə daaɠaa tii kɛ kpɔ a taa walawalaɠaa. Ə lɛɛ a tɔɔmun Ɉuda da Bɛnɉamɛn lɔi hu.

¹³ Ɉaláá laa həli nuą da Levi lonnii kɛ Israɛlə lɔi gɔlɔ kəlee di həɠə di wɔɔ lɔiɠaai hu, di pa Roboamə pɔ.

¹⁴ Levi lonnii di di wɔɔ taatɛlɛɛɠaa laa mį́i lɔwɔɠaai lɛɛ laa, da di yə hɛnŋąą kəlee di pa Ɉuda da Ɉerusalɛmə; mąąhɔlɔɓo Ɉeroboamə da nonnii di hvo hvaa mą, diɛ Yai-Laa nwɔ haláá kolói kɛ.

¹⁵ Kɛlaa, Ɉeroboamə ə haláá laa həli nuą hee a nwɔɔ, hali kɔ́iɠaa ɓa, diɛ ɓaa a ɓooli hilɛɠaa da nįŋɛ̨ lonnii di di pɛli.

¹⁶ Nuąi kpɔ kɛ Israɛlə lɔi kɔ́lɔ kəlee, Yai-Laa Israɛlə ŋą Yálá mąą mɛ̨nį ə ɓo di lii pɔ, di hvilɛn lévi lonnii tii pulu, di pa Ɉerusalɛmə, əgɛ, di haláá kulɔ Yai-Laa di nąnni di wɔɔ Yálái ɓa.

¹⁷ Nuą tii di Ɉuda lɔi ŋą tɔɔlaa hvaŋą ta pɛlɛ mą, di tɔɔ Salomɔn Roboamə pulu; kwɛlan ɉaaɓa yee mu. Mąąhɔlɔɓo, ə hiɛ Davidə da Salomɔn di wɔɔ kpaaləi mɛ̨i kwɛlan ɉaaɓa yee mu.

Roboamə yəi bɛlɛ́n nuą

¹⁸ Roboamə ə Yerimotə lon nɛ̨ɛ̨nu Mahalatə həɠə a nɛ̨ą. Yerimotə ə kɛ a Davidə da Avihailə di lon, Avihailə nąn maa a Eliavə, Eliavə nąn maa a Ɉɛse.

¹⁹ Ə lon gaa nɛ̨ɛ̨nui tii ɓa, nonŋąąi ə gaa mą, diɛ ka: Yeusə, Semaria da Ɉahamə.

²⁰ Yili pulu, Roboamə ə Absalɔn lon nɛ̨ɛ̨nu Maaka həɠə a nɛ̨ą. Ə Abiya, Atai, Ɉiza da Selomitə di kaa mą.

²¹ Roboamə ə Absalɔn lon nɛ̨ɛ̨nu Maaka wɛli la kɛ ə dɛɛ nwɔ pɛlɛ́ leenɛ̨ąɠaa da nɛ̨ąni takpɛliɠaa kəlee diɛ. Hvo gaai, nɛ̨ąni kpɔɔ di kɛ a nu pow kɔ́w mɛ̨ihaaɓa, nwɔ wɛlinɛ̨ąą di ɓo pow mɛ̨ida. Ə lon ɉinąą kaa a nu pow hveelɛ gɔw mɛ̨ihaaɓa, ə lon nɛ̨ąą kaa a nu pow mɛ̨ida.

²² Roboamə ə Maaka lon Abiya hee nąn nonnii nwun na. Mąąhɔlɔɓo, ə kɛ bɔ, ə dɔɔlaa lɛɛ ɲəi.

²³ Ə nonnii kəlee taɠa-taɠa Ɉuda da Bɛnɉamɛn lɔiɠaa kəlee hu; gɔ́ taaɠaa kəlee hu. Ə di laahɔnmo hɛnŋąą tɛɛ di pɔ kpɔ kɛnɛ̨, ə nɛ̨ąą tamąą hu hvɛli a di wɔɔ.