Kɔlɔnikɔ Veerɛi 10 - Yálá laawoo hɛɓɛ (dc)

Ɉuda tɔɔɓɛlaa kɛ mɛ̨nįɠaa Ɲąąkpɔn di gɛ Sisɛmə

¹ Roboamə ə li Sisɛmə, mąąhɔlɔɓo, nąą ɓə Israɛlə nuą kəlee di di ɲąąkpɔn naa, əgɛ, di yaa tii ɉee a tɔɔmun.

² Kɛlaa, bələ mąn Nevatə lon Ɉeroboamə ə mo, ə həɠə Eziptə lɔi hu ə pa, mąąhɔlɔɓo nąą ə kɛ laa; ə wɔlɔ pu tɔɔmun Salomɔn ɓa ə li laa.

³ Di nwəlɛɛ tɔɔ, da Israɛlə nuą kəlee di pa. Di kəlee di mo ŋɛ̨i Roboamə ɓa, diɛ mą:

⁴ «Ə́ nąn, ə tiɛ̨ wiaa laa ku nwuɔ̨, yiihu, ə́ nąn ŋą luwɔlaa tii ta kulɔ mą, da díɲɛ̨ wiaa tii ə naa ku nwuɔ̨i, ə́ da kulɔ mą. Yá gɛ tii ku hɛ̨ą yiliɛi, ku tí yɛ́.»

⁵ Roboamə yɛ nuą diɛ: «'Ka li, hvóló haaɓa a tɛɛ, ka pa.» Nuą di tɛɛ diɛ li.

⁶ Tɔɔmun Roboamə ə li, galanɉonŋąąi ŋɛ̨i kɛ nąn Salomɔn kwɛlɛ diɛ tí mą vulú kɔ́wɔ ŋą, ə nwun dɔɔ a diɛ; yɛ diɛ: «Ə həli káá! Kaa ŋį́ nuą ŋɛ̨i woo pulu pənə ləi?»

⁷ Galanɉonŋąą tii diɛ mą: «Akɛ yá nuą ŋɛ̨i hon a nɛlɛɛ, akɛ yá di kwəinɛ̨ɛ̨, ɛlɛɛ, akɛ yá woo nɛ̨ɛ̨ ɓo diɛ, di kaa pai tíi yɛ́ a yələ kəlee.»

⁸ Kɛlaa, galanɉonŋąą di wɔɔ liɛwoo tii di gɛ Roboamə ɓa, ə nwun gulɔ mu, ə li ə nwun dɔɔ a ɉilɛlɛaa tii da diɛni di kɛnɛ̨ di kee pɔ, ɛlɛɛ, di ɓo ɲee mu.

⁹ Yɛ diɛ: «Ə həli káá, ka káá kɛi lə, yɛ hvilɛn na mɛ̨nįi ŋɛ̨i nuą di ɉu hvɛli mą́ą́ ɉu; a yaai diɛ: Díɲɛ̨i ną́n ə nąą di nwuɔ̨, ŋį́ da kulɔ mą.»

¹⁰ Ɉilɛleaai tii da diɛni di di muhəɠə di kee pɔ, diɛ mą: «Bələi ə́ kaa pa hvaai la di pɔ, bələ ka, yá kɛ diɛ: ‹Ə́ nąn ə ku wɔɔ tiɛ̨i wiɛ, kɛlaa yɛ́, da kulɔ mą ku yəi!› Bələi ə́ kaa pai hvaai la bələ ka: ‹Ɲéékpiɛ nogolomun gɛnɛ̨i dɛɛ ną́n nəŋəi ɓa!

¹¹ Ə həɠə yiihu ɓa, yii ną́n ə tiɛ̨ laa ka nwuɔ̨i, ɲą́ą́n, gáá pai ka wɔɔ tiɛ̨i ta pɛlɛi mą. Ną́n ə kɛi ka hutɔɔ a galagba, ɲą́ą́ nwɛ̨́i, gáá pai gɛi a kwɛli hvaɠa ɲąąlən dɔɔ mą.›»

¹² Ɉeroboamə da nɔi lonnii kəlee di pa Roboamə pɔ, a voló ɉaaɓa yələ, yɛ bələi tɔɔmun ə mo la diɛ, yɛ kɛ diɛ: «'Ka li ka pa, hvóló haaɓa tɛɛ pulu.»

¹³ Roboamə ə galanɉonŋąą di wɔɔ liɛwoo pili, ə nuą woo pulu pənə a nwala-walaa.

¹⁴ Tɔɔmun ə hvaa di pɔ, yɛ bələi ɉilɛlɛaa di niɛwoo kɛ la, diɛ kɛ mą: «Ną́n ə ka tiɛ̨ wiɛ, ɲą́ą́n gáá nwiɛ yee ta pɛlɛi mą. Ną́n ə ka hutɔɔ a galagba, ɲą́ą́n gáá pai gɛi a galagbai ɲąąlən dɔɔ mą a kwɛli.»

¹⁵ Ka gaa tɔɔmun hvo nwəli tɔɔ nuą woo ɓa, Yálá ɓə hvaa tii mą, əgɛ, mɛ̨nįi tii Yai-Laa ə bu Silo mun Ahiya la, yɛ mo Nevatə lon Ɉeroboamə ɓa, bɔ mɛ̨nį kɛ mɛ̨nį ɓə.

Dɔɔlaa ə mɛla ɓo ɉu hveelɛ

¹⁶ Gɛi tɔɔmun və mo hvo nwəli tɔɔ galanɉonŋąą woo ɓa, Israɛlə nuą kəlee di mo tɔɔmun ma, diɛ mąi: «Lə mɛ̨nį ɓə kwa Davidə ni ku lɔwai? Kwa Ɉɛse lon ni ku hvo kpɔnni mɛ̨nį ta ɓa! Israɛlə nuą, 'nu kəlee ə li bɔɔli! Yii hu, yɛ́ pɛlɛ́i mąą mɛ̨nį ɲɛ̨i kulɔ, Davidə!» Gɛɛ tii, Israɛlə nuą kəlee di li di pɔ taai, nu kəlee ə lɔ ɲəi bɛlɛ́n.

¹⁷ Kɛlaa, Roboamə ə lɛɛ lɔ a tɔɔmun Israɛlə lonnii tii kɛ Ɉuda taaɠaa hu di mɛ̨i.

¹⁸ Tɔɔmun Roboamə ə goló nwun nąmu Adoramə tɔɔ Israɛlə, kɛlaa, Israɛlə lonnii di ɉɔɔ a kwɛni, ə haa. Tɔɔmun Roboamə ə pɛli kpɔlɔɔ tɛi nwɔ wotoloi hu, yɛ pu, yɛ li Ɉerusalɛmə.

¹⁹ Israɛlə ə nwun gulɔ Davidə nwɔ pɛlɛ́i mu, ə mą kɛ háákələi.