Kɔlɔnikɔ Veerɛi 1 - Yálá laawoo hɛɓɛ (dc)

Salomɔn Israɛlə tɔɔmun gɛ mɛ̨nįɠaa

¹ Davidə lon Salomɔn ə hee kpɔ tin-tin nwɔ tɔɔlaai hu, nwɔ Yálái a Yai-Laa ə tɔɔ bulu, ə naa tɛ kpɔ ləɠə-ləɠə.

Salomɔn ə kili hvɛli Yálá ɓa

² Salomɔn ə Israɛlə nuą kəlee təli: Ɲɛ̨itɔwɔ nuą waa tɛitɛi nwun na, yiiɠaa kɛ nu nwun dɛitɛi nwun na, giti tee nuą, da nuąi kpɔ ɲąąwooɓo laa ə kɛ diɛ Israɛlə lɔi hu, diɛi ɓaa a pɛlɛ́ nąmįną.

³ Salomɔn da nu kpɔn tii kəlee di li ɉaláá kulɔi ŋɛ̨i kɛ Gabaɔn, mąąhɔlɔɓo, nąą ɓə Yálá nwɔ kee kaa kələi ŋɛ̨i Yai-Laa nwɔ tímun Moisə ə bɛli nɔi pun ɉu, ə kɛ laa.

⁴ Yii ɓaa a Yálá nwɔ mįnɛ̨ kəhii nwɛi, Davidə aa ta kɛ ɉəɠə Kiriatə-Yearimə, ə li ə ɉee, ɓɛi ə nąą pɛli gəhii tii laa ɓa; hvo gaai, ə kələ tɔɔ Ɉerusalɛmə gəhii tii laa ɓa.

⁵ Kɛlaa, ɉaláá kulɔi ŋɛ̨i Hurə lon Uri nwɔ lon Besalɛlə ə bɛli a mala kwɛli, ə kɛ laa Yai-Laa nwɔ pɛlɛ́i laaləi; nąą ɓə Salomɔn da nu kpului tii kəlee di kɛi gwɛli.

⁶ Salomɔn ə li ɉaláá kulɔi, Yai-Laa lííla, kee kaa kələ kwɛlɛ, ə taatɛlɛɛ waa tɔ̨nɔ̨ kulɔ laa a haláái da gəlee kələn.

⁷ Mąą kpįnįi tii hu, Yálá ə gbɔwɔ lɛ Salomɔn ɓa, yɛ mą: «Ɉɛn ə́ kaa bɔ, vɛli mą́ą́, ŋį́ dɛɛ ə́ pɔ.»

⁸ Salomɔn yɛ Yálá ɓa: «Ną́mu! Ə́ kulɔ ə́ woo ɓa, ə́ ną́n Davidə hon a wɛlikɛmąąlaa kɛnɛ̨ɛ̨, Yɛ́ lɔ ɓə nwɔ̨nɔ̨ ɉéé a tɔɔmun a ną́n mąąhvalin;

⁹ Yii hui ŋɛ̨i Yai-Laa, mɛ̨nįi ta ə́ mo ną́n Davidə ɓa, bɔ mɛ̨nį kɛ kɛa. Hvó gaai, Yɛ́ ɓə yáá ɉéé a tɔɔmun nɔi kɛnɛ̨i ŋɛ̨i mɛ̨i, ɉu nuą tamąą yɛ muluun.

¹⁰ Gɛ́, ə́ mɛ̨nį hukpɛ kili tɛɛ bɔ́ da ɲąąkaa kili, gɛ́ pɛli ɉíɛ pələ ɲɛlɛkɛi nɔi lonnii ɲɛ̨i ɓa. Gbala ə tɔɔ, nu ta lɔpee hva pɛli ə́ nwɔ nu huwu kɛnɛ̨i ŋɛ̨i ɲąąwooɓoi.»

¹¹ Ya ɓə Yálá yɛ Salomɔn ɓa: «Yii mɛ̨nįi tii lɔ ɓə nwɛli kaa yɛ́i, yii hvó kɛ hɛn gɔw hvɛli lii, hvó lɔi hvɛli lii, ə mą kpɛli kɛ yii kwɛa da mąąwiɛ, hvó yowoɠaa haa mɛ̨nį ɓo li; kɛlaa, mɛ̨nį hukpɛ kili da ɲąąkaa kili ɓə ə́ vɛli, yɛ́ di dɛɛ ə́ pɔ, yɛ́ pɛli ŋį́ nu huwui ŋɛ̨i ŋį́ ə́ hee mɛ̨i a tɔɔmun ɲąąwooɓoi;

¹² Mɛ̨nį hukpɛ kili da ɲąąkaa kili, gáá dɛɛi ə́ pɔ, ŋį́ bɛlɛ hɛngɔw, lɔi da mąąwiɛ ɓa. Gáá dɛɛi ə́ pɔ, ə tɛɛ la tɔɔɓɛlaai daa tɛɛ kɛ ə́ tɔwɔ, ɲɔ̨nwɔ̨mąn hvo ta kɛ li da yəi, ə mą kɛ yiiɠaai pai lɛɛi ə́ pulu.»

¹³ Yálá kɔ́i ŋɛ̨i kɛ Gabaɔn, Salomɔn ə həɠə nąą gee kaa kələ lííla, ə pa Ɉerusalɛmə, ə heeɓo laa kɛ Israɛlə mɛ̨i.

Salomɔn ŋą heeɓo laa da ɲəi hɛngɔw

¹⁴ Salomɔn ə kɔ́ wotoloɠaa da hoo gilɛ həɠənuą ɲąąkpɔn. Nwotoloɠaa di kɛ a waa tɔ̨nɔ̨ pulu nwun nąąn, ɉoo gilɛ həɠənuą di ɓo a nu waa pow gɔw hveelɛ. Ə di hee gɔ́ taaɠaa hu, ə daɠaa lɛɛ gwɛlɛ Ɉerusalɛmə.

¹⁵ Tɔɔmun ə gɛ pələ kwɛli mą, wali da hɛni di kɛ lɔ Ɉerusalɛmə yɛ kwɛni wɛan; ɛlɛɛ, kpitili wulu ə kɛnɛ̨ laa yɛ ɓɔɔla nɛ̨ŋɛ̨ lɔi hu.

¹⁶ Salomɔn nwɔ hooɠaai di kɛi həɠə Eziptə da Kowa lɔi hu; tɔɔmun nwɔ yɔw kɛ nuą? Di kɛi li diɛ ɲa Kowa.

¹⁷ Da kɛi pənə kɛ diɛ pa, di kɛi wotolo tɔ̨nɔ̨ ya Eziptə lɔi hu a wali kwələ mɛ̨ida, ɛlɛɛ, diɛ hoo tɔ̨nɔ̨ ya a wali kwələ nwundɔ̨nɔ̨ yee lɔɔli. Bələ ɓə ə kɛi gɛ la da Hɛtə tɔɔɓɛlaa kəlee, ɛlɛɛ da Aramə tɔɔɓɛlaa, ə kɛi tɛɛ di pɔ pələ yɛ ɉɛnŋąą tii lɔ nwɔɔ lɔi hu.

Ɉɛli pɛlɛ́ tɔɔ mɛ̨nį

¹⁸ Salomɔn ə mo, yɛ di pɛlɛ́ tɔɔ Yai-Laa ɓa, ɛlɛɛ, di tɔɔmun naa pɛlɛ́ tɔɔ a nwɛi.