Tɛsalonikə dɔlɔɔ 5 - Yálá laawoo hɛɓɛ (dc)

¹ Yii hvilɛn na ɲələ da nąąlɔwai ɓa, ną́n nonnii, ká wɛi, ə mą kɛ di hvo bɛ̨ɛ̨ li di hvo dɛɛ káá;

² káá kpinįi ká gbaɠala gɔlɔn kpɔ hələ-tətə káá, gu Nąmu ŋą hvólói, gaa pai ɉəlii lɔ yɛ nwuɔ̨mun a pa a kpinį.

³ Ɓɛlɔwai nu kəlee kaa pai kɛi la diɛ: «Liilaa, wəlipululaɠi», nąąlɔwai kpɔlɔ ɓə nwun napili a kulɔ la di tɛɠii, ə yɛɛ di mɛ̨i, yɛ bələi kwəinwąną a nɛ̨ɛ̨nu hon na; ɛlɛɛ, di nwun hva kulɔ ɉu.

⁴ Kɛlaa, ká wɛi ną́n nonnii, ká hvo kpinį hu, əgɛ, ɲələi tii hvo pa kulɔ ká tɛɠii yɛ nwuɔ̨mun.

⁵ Ká kəlee kpɔ, ká káá a kɛɛ pono lonnii, a yələɓɔɔ lonnii, gu hvo a kpinį nwɔɔ, gu hvo kpɛlimąn a tɛɛhilɛ-kpinį nwɔɔ.

⁶ Yili ɓa, ká gu hvo yíi yɛ nu takpɛliɠaa, kɛlaa, 'ká gu kɛ a gu ɲɛ̨i, gu kɛ gili-gili.

⁷ Nuąi yíi, kpinį hu ɓə da yíi laa, nuąi a lɔɔ-hon, kpinį ɓə lɔɔ a di hon ną;

⁸ kɛlaa, guɔi a yələɓɔɔ lonnii, 'ká gu kɛ gili-gili, 'ká gu gu kəɠə-mɛ̨i-həɠə too, yai a laa na laa, da wɛlikɛmąą laa, ɛlɛɛ, ɓalo mɛ̨nį ŋą kilitɔɔmąą laa ə kɛ a mɔlɔ.

⁹ Mąąhɔlɔɓo, Yálá hvo ŋą lííholi hee li gu tɔwɔ, kɛlaa gu ɓalo mɛ̨nį hɔlɔɓo gu Nąmu Jesus Kristə háálai;

¹⁰ ə haa gu mąą mɛ̨nį ɓa, əgɛ, gu kɛ yíi-o, gu kɛ a ɲɛ̨i-o, guɔ yɛnɛ̨ɛ̨ kɛ a ɲiliɛ mą.

¹¹ Yili mąą mɛ̨nį ɓa, 'ká kɛ ká keeni hvaŋąlɔi a yələ kəlee, káá ká keeni liikpələ, yɛ bələi ká kɛ gɛi la a bɔlɔ.

Niɛwoo kpəli da yələ wala too woo

¹² Ku kaa ɉuhvɛlii káá ną́n nonnii, kuɔ, nuąi ká lɔwai, diɛ ká mɛ̨ikaa gu Nąmu hu, diɛ tɔɔ a di nwąnąi diɛ ká tənən, 'ká mąąwiɛlaa kɛ diɛ,

¹³ 'ká di ɓɛlɛlɔ kpɔ kɛnɛ̨ di kɛ kóló mąą mɛ̨nį ɓa. 'Ká ɲɛnɛ̨ɛ̨ kɛ a liilaa ká diɛni ká kee lɔwai.

¹⁴ Ku kaa ɉuhvɛlii káá ną́n nonnii, kuɔ, nuąi di wɔ yɛnɛ̨ɛ̨ yagban na pilii, 'ká haŋą diɛ, nuą di hvaŋą hvo lɔ li, 'ká di hvaŋąlɔ, 'ká kpɔnmąą tɛɛ hvįikpɛɛ nuą pɔ, 'ká ká liilaa nu kəlee tɔwɔ.

¹⁵ Ka gɛ a nɛlɛɛ, nu ta hvo mɛ̨nį ɲɔ̨n gwələ kulɔ a mɛ̨nį ɲɔ̨n, kɛlaa, ka túwɔ́ a nɛlɛɛ ká kee lɔwai, ə mą kɛ, a nui lɔpee gəlee.

¹⁶ 'Ká kɛ lɔ a ká kwəinɛ̨ɛ̨ a yələ kəlee;

¹⁷ 'ká hvo kpɛla Yálá hvɛliɛ ɓa,

¹⁸ 'ká Yálá mąmąɓo mɛ̨nį lɔpee gəlee hu, hvó gaai, yili ɓə a Yálá liiɓa ká mąą mɛ̨nį ɓa Jesus Kristə hu.

¹⁹ 'Ká hvo Kili-Mąąhəɠɛɛ hvįkpɛɛ,

²⁰ 'ká hvo Yálá kwəi mɛ̨nį hukulɔ nuą woo hviiɓo;

²¹ 'ká gəlee hukpɛ a kili, yii nɛlɛɛ, 'ká ká yee kanąn mą;

²² 'ká ká mąą kwɛa mɛ̨nį ɲɔ̨n ɉuwui lɔpee gəlee ɓa.

²³ Liilaa Yálá yaa kpinįi, ə ká mąąhəɠə kpɔ tɛ̨ɛ̨tɛ̨ɛ̨, ɛlɛɛ, ká kili, ká nįį, ká kɔlɔ, ə lɛɛ kpɔ a nɛlɛɛ, mąąkulɔi hvo kɛ mą, ə lɛɛ ɉu gu Nąmu Jesus Kristə pa yələ ə ɉəli mą.

²⁴ Nui ká təlii, a kulɔ nwoo ɓa, yaa lɔ ɓə nwɔ̨nɔ̨ pai gɛ-mɛ̨nį kɛi ɉu.

²⁵ Ną́n nonnii, 'ká Yálá hvɛli kuɔ kpɛlimąn kuɔ.

²⁶ 'Ká gu nąn nonnii kəlee túwɔ́ɓo kpɔ kpąą a túwɔ́ mąąhəɠɛɛ.

²⁷ Gáá ɉuhvɛlii káá gu Ną́mu nwɛi hu, gɛ́: di ɉɛɓɛ́i ŋɛ̨i hu woo ɓo nąn nonnii kəlee diɛ.

²⁸ Gu Ną́mu Jesus Kristə nwɔ mɛ̨inɛ̨ɛ̨ ə kɛ ka kəlee kaa.