Tɛsalonikə dɔlɔɔ 1 - Yálá laawoo hɛɓɛ (dc)

Túwɔ́-woo

¹ Polə, Silvain, ɛlɛɛ Timote, kuɔ ɓə ɉɛɓɛ́i ŋɛ̨i tɛɛi Tesalonikə kalan gbɔn ɓa, diɛi di kaa gu Ną́n Yálá da gu Ną́mu Jesus Kristə hu. Mɛ̨inɛ̨ɛ̨ da liilaa ə kɛ ka pɔ.

Tesalonikə nuą di wɔ laa na laa, nwɛlɛɛ lɛlɛɛ ɓa

² Yələ kəlee, kwa Yálá mąmąɓo ká kəlee ká mąą mɛ̨nį ɓa, kpɛla bələi hvo mą, ɓɛlɔwai kwa kɛ Yálá hvɛlii la káá,

³ bələi ká wɔ laa na laa pɔ túwɔ́ pələ kaa la, ká wɔ wɛlikɛmąą laa, ɛlɛɛ, bələi ká wɔ kilitɔɔmąą laa walawalaai la, diɛi da həɠə gu Nąmu Jesus Kristə pɔ, Yálá ɲɛ̨i ɓa, yiliɠaa kili kaa ku ɲą;

⁴ ká kili ə pu kani tii a nɛlɛɛ, ną́n nonnii, káá, ká wɛli kaa Yálá ɓa, ya ɓə ká həɠə ɉu.

⁵ Gbala ə tɔɔ, nwɛlɛɛ lɛlɛɛi ku naa həlii, hvo kɛ pa li ká pɔ, a woo kpɛli-kpɛli, kɛlaa ə kɛ a huwalawalalaa, a Kili-Mąąhəɠɛɛ kɛ mɛ̨nį, naa kulaa kpɔ a neelee. Ɛlɛɛ, bələ kpɔ ɓə ə kɛ la, káá kpinįi ká kilaa ponoɔi tii ɉu, yili ə həli tii kuɔ ká pɔɔli, ká mąą mɛ̨nį ɓa.

⁶ Ɛlɛɛ, káán, ká ku pɔɔ kɔɔn, kuɔ kwa gu Nąmu ni; káá ká yee hee Yálá laa woo mu, mɔ̨nɔ̨ tamąą hu, a kwəinɛ̨ɛ̨i a həɠə Kili-Mąąhəɠɛɛ yəi.

⁷ Yili ɓa, káá kɛ kɛa a kɔ́ɔnmąą lɛlɛɛ, Masedoanə da Akaiə laa na nuą kəlee diɛ.

⁸ Ká pɔɔli ɓə gu Nąmu laa woo ə həɠə laa yɛ li Masedoanə da Akaiə, kɛlaa ka laa mɛ̨nį Yálá la, bələ aa taɠa-taɠa kɛɛnąą kəlee, ə mą kɛ kpɛli kɛ, ku hvo yili bələ ta ɓo li káá.

⁹ Mąąhɔlɔɓo, bələi ká ká yee hee la ku mu, ɛlɛɛ, bələi ká tínɛ̨n na Yálá pɔ pələ, káá ká pulu tɔɔ haliɠaa diɛ, káá tí la tɛ̨ą Yálá hulúmąą ɓa, nuą da kɛ yili bələ ɓoi,

¹⁰ ɛlɛɛ, Non ŋɛ̨i ə nwun haa yəi, ə tɛ la yələi, yai a Jesus, yai a gu kulɔ liiholui gaa pai ɲəi, káá mąą mąąkpɔn.