Samuɛlə dɔlɔɔ 8 - Yálá laawoo hɛɓɛ (dc)Israɛlə nuą diɛ di tɔɔmun ɉee di nwun na 1 Samuɛlə ə pɔlɔ, ə non ɉinąą hee a Israɛlə ɲąąwooɓo nuą. 2 Non ɉulɔnu dɔlɔɔ laa ɓaa kɛ Yoɛlə, veelɛnąą laa ɓa Aviya. Di kɛi nɔi ɲąąwooɓo, di heɛ ə ɓo Beɛrə-Seva. 3 Kɛlaa, non ɉinąąi tii, di hvo hvilɛn bɔɔ ŋą, hɛn nwɛlilaa ə di kili kala di kwəi, diɛ nɔgwəi mɛ̨inɛ̨ɛ̨ɠaa hon, diɛ tɛ̨ą mąą mɛ̨nį pili ɉu. 4 Israɛlə kalanɉonŋaa kəlee di di ɲąąkpɔn, di pa Samuɛlə pɔ Rama daai. 5 Diɛ mą: «Yɛ́ ka, yaa pɔlɔ, ə́ lon ɉinąą diɛn, di hvo hiɛ li ə́ pɔɔ ŋą. Mɛ̨nį a kɛ tii, tɔɔmun dɛɛ ku pɔ, yɛ ku ɲąąwooɓo, yɛ pələi gaa la lɔi takpɛliɠaa hu.» 6 Nwooi tii ə nwąną Samuɛlə ɓa, di kɛ mɛ̨nį ma tɔɔmun dɛɛ ku pɔ, yɛ ku ɲąąwooɓo. Ə lɛɛ Samuɛlə ə Yai-Laa hvɛli, 7 Yai-Laa yɛ Samuɛlə ɓa: «Ə́ wəli tɔɔ nɔi lonnii kəlee woo ɓa, yii lɔpee da mo yɛ́, gɛ. Yɛ́ hvəi di kaa ə́ pilii, di hvo kɛa bɔ və́ di ɲąąwooɓo. 8 Bələi lɔ di kɛi túwɔ́ la a ɲą́ą́, ə həɠə ɲələi ŋą́ di kulɔ la Eziptə lɔi hu, ə lɛɛ ɉu ə həli yiihu ɓa, diɛ nɛ́ɛ́ laa, diɛ tíɓo kɛ yálá takpɛliɠaa diɛ, bələ ka tii di kaa túwɔ́i la a ɲą́ą́. 9 Yii hu, ə́ wəli tɔɔ di woo ɓa, kɛlaa, di kilaa pɔ̨nɔ̨, dɔɔmu tii pai di ɲąąwooɓoi, bələi gaa pai di hon ɉii la, bələ lɛ diɛ.» 10 Samuɛlə ə pənə ə Yai-Laa wooɠaa kəlee ɓo nɔi lonnii kɛi tɔɔmun vɛli diɛ. Yɛ diɛ: 11 «Dɔɔmun pai ka ɲąąwooɓoi, bələi gaa pai ka hon ɉii la bələ ka: Gaa pai ka lon ɉinąą həɠəi, yɛ di tɔɔ nwɔ kɔ́ kɔ́ wotoloɠaa diɛ da nwɔ hooɠaa, diɛ gilɛ həɠə nwɔ wotolo ɲɛ̨i tɔwɔ. 12 Gaa pai di həɠəi yɛ di kɛ a nwɔ kɔ́kulááɠaa da kɔlaɠaɠaa ɲɛ̨i tɔwɔ nuą, di nwɔ kɛɛɠaa hin, diɛ nwɔ mɔ̨nun dee, diɛ nwɔ kɔ́ kɔ́ hɛnŋaa yɔw, da nwɔ hoo kpəlin bɛli nuą. 13 Gaa pai ka lonnii nɛ̨ąą həɠəi, ə́ di kɛ a mąątí wulɔ pɛli nɛ́aa, a nwɔ lɛɠɛ kɛ nɛ̨ąą, da nwɔ ləɠi yili nɛ̨ąą. 14 Gaa pai kɛi ka wɔ tííɠaa həɠəi, da ka wɔ viɲə yɛɛɠaa da ka wɔ olivə yɛɛɠaa nɛlɛɛɠaa həɠəi, yɛ di tɛɛ ɲee mu nuą pɔ. 15 Gaa pai kɛi ka wɔ mɔ̨nun da ka wɔ viɲə bow nąą nɛlɛɛɠaa həɠəi, yɛ di tɛɛ nwɔ gbɛtɛgbuwuluɠaa da nwɔ tínuą pɔ. 16 Gaa pai kɛi ka wɔ tínuą ɉinąą da nɛ̨ąą di həɠəi, ka wɔ laŋa hulúɠaai da ka wɔ hoohvaalənŋaa, yɛ di tɔɔ nwɔ kóló ɓa. 17 Gaa pai kɛi ka wɔ taatɛlɛɛɠaai bow naa həɠəi, yili pulu, ka káá pai kɛi a nwɔ luwɔɠaa. 18 Volói tii, ka káá pai kɛi wɔlɔi, dɔɔmun ŋɛ̨i ka ɉəɠə ɉu kaa kpįnįi ɲəi. Kɛlaa, Yai-Laa hva ka woo mu hon a mąą yələi tii.» 19 Kɛlaa, nuą di hvo gɛ di hvo di wəli tɔɔ Samuɛlə woo ɓa, diɛ mą: «Hvo pai kɛi tii, tɔɔmun mə ku kaa bɔ. 20 Ku kaa bɔ ku kɛ yɛ lɔi takpɛliɠaa, kuɔ tɔɔmun kaa pai kɛi ku ɲąąwooɓoi, yɛ tɔɔ ku nwun na, yɛ ku nwun mąąkɔ̨nwɔ̨ kɔ́ɠaa ɓa.» 21 Samuɛlə ə nwəli tɔɔ nuą woo kəlee ɓa, ə pənə ə naa həli Yai-Laa ɓa. 22 Yai-Laa yɛ Samuɛlə ɓa nąąlɔwai: «Ə́ wəli tɔɔ di woo ɓa, tɔɔmun dɛɛ di pɔ. Samuɛlə yɛ Israɛlə nuą diɛ; nu kəlee ə li kɛa bɔ taai.» |