Samuɛlə dɔlɔɔ 7 - Yálá laawoo hɛɓɛ (dc)

¹ Kiriatə-Yearimə nuą di pa, di Yai-Laa nwɔ kəhii həɠə, də li la Avinadavə yəi bɛlɛ́n ɲee kpu kpu mɛ̨i, di non Eleazarə hee a haláá laa həli mun, yɛ ɲɛ̨i kɛ Yai-Laa nwɔ kəhii ɓa.

Israɛlə nuą yee ə tɛɛ Filisti nuą diɛ kɔ́ hu

² Ə həɠə ɲələi di gəhi hee la Kiriatə-Yearimə, ɉu ə kwɛa kpɔ a kwɛlan bow hveelɛ, Israɛlə nuą di di wɔ kiliŋąhiɛ tinɛ̨n Yai-Laa pɔ pələ.

³ Samuɛlə yɛ Israɛlə nuą diɛ: «Akɛ ka káá pai Yai-Laa pɔ a ka lii kəlee, ka ká yee kulɔ ɉaliɠaa tii hu, ka gulɔ ka lɔwai, da ɉaliɠaa ŋɛ̨i a Astarteɠaa; ka ká kilitɔɔ Yai-La ɓa, ka kóló kɛ mą yaa tɔ̨nɔ̨, gaa ka kulɔi Filisti nuą yəi.»

⁴ Israɛlə nuą di di yee kulɔ ɉaliɠaa ŋɛ̨i a Baalə da Astarteɠaa di hu, diɛ kóló kɛ Yai-Laa ɓa, diɛ di kiliŋąhiɛ ma.

⁵ Samuɛlə yɛ diɛ: «Israɛlə nuą, ka kəlee ka ká ŋąąkpɔn Mispa daai, ŋą́ ka mąąnɛ̨ɛ̨ maa hvə Yai-Laa ɓa.»

⁶ Di di ŋąąkpɔn Mispa daai, di ɲálaɠi laa da Yai-Laa ni di lɔwai, di hinnɔ a volói tii, di mo gɛɛnąą tii, diɛ kɛ diɛ: Kwaa nɛ̨ŋɛ̨n ɉəɠə Yai-Laa ɓa. Di Samuɛlə hee a Israɛlə ɲąąwooɓomun Mispa.

⁷ Filisti nuą di bələ mɛ̨n, diɛ kɛ, Israɛlə nuą daa di ŋąąkpɔn Mispa daai, Filisti tɔɔɓɛlaa di tɛ kɔ́ pɛlɛi Israɛlə ɓa. Israɛlə nuą di bələ mɛ̨n, diɛ ɲɔw Filisti nuą diɛ.

⁸ Israɛlə nuą diɛ Samuɛlə ɓa: «Hvo kɛ ə́ kaa heei mɛ̨nįi ŋɛ̨i hu tin, hvo tee ku pulu, ə́ woo tɛ Yai-Laa ɓa, yaai gaa a ku wɔɔ Yálá, ə gɛ, ə gu kulɔ Filisti nuą yəi.»

⁹ Samuɛlə ə ɓɛlaa lon ɉəɠə, naa ə ɓo nii ɲįnį ɓa, ə gələn a gbuwulu, a kwəli hvilɛn ŋąą Yai-Laa ɓa. Samuɛlə ə tomą Yai-Laa bɔ pələ a Israɛlə maa nɛ̨ɛ̨mąą hvə pələ, Yai-Laa ə nwoo mu hon.

¹⁰ Ɓɛlɔwai Samuɛlə ə kɛi gwɛli hvilɛn ɉaláái tii kulɔ la, Filisti nuą, di kɛi kɛa pa kɔ́ pɛlɛi Israɛlə nuą diɛ, kɛlaa, volói tii Yai-Laa ə nwɔ yələgbąnąąn ɓɛla Filisti nuą mɛ̨i a nwoo kɛnɛ̨, ə ɲɔw too di hu, gɔ́ ə kala diɛ, ə nɛ̨ɛ̨ Israɛlə ɓa.

¹¹ Israɛlə nuą di kulɔ Mispa, di hvilɛn Filisti nuą pulu, diɛ di paa, ə lɛɛ kpɔ ɉu di həli la Bɛtə-Karə kwɛlɛ.

¹² Samuɛlə ə kwɛni həɠə, ə vilɛn Mispa da daa ɲɛ̨i da kɛ ma: Ɲin, di ɲɛ̨n ma. Ə gɛɛnąąi tii laa hee a Ɛvɛn-Ezɛrə, yii mukulaa ɓaa: Mąąkɔ̨nwɔ̨ kwɛni, yɛ diɛ: «Yai-Laa a ku mąąkɔ̨nwɔ̨ a lɛɛ ɉu kwaa həli gɛɛnąąi ŋɛ̨i ɓa.»

¹³ Filisti nuą ŋɛ̨i ə paa, di hvo kɛa pənə di hvo lɔ Israɛlə lɔi hu, Yai-Laa yee ə kɛ Filisti nuą mɛ̨i Samuɛlə nwɔ yɛnɛ̨ɛ̨ kəlee yee mu.

¹⁴ Daaɠaai wɔlɔ Filisti nuą di gulɔ Israɛlə yəi, di pənə di lɛɛ Israɛlə yəi, ə həɠə Ɛkrɔn ə həli Gatə. Israɛlə ə Filisti nuą di wɔ lɔi ta kulɔ di yəi nwɔ̨nɔ̨. Liilaa ə kɛ Israɛlə da Amɔrə nua di lɔwai.

¹⁵ Samuɛlə ə Israɛlə ɲąąwooɓo nwɔ yɛnɛ̨ɛ̨ kəlee hu.

¹⁶ Kwɛlan dɛitɛi yee mu, ə kɛi lia tɛɛ daaɠaa hu, Betɛlə, Gilgalə, Mispa, yɛ Israɛlə mąą mɛ̨nįɠaa ɲɛ̨i kulɔ daaɠaai tii hu.

¹⁷ Yili pulu, ə kɛi pənə yɛ pa Rama, naa ɓə ɉeɛ ə kɛ laa, naa ɓə ə kɛi Israɛlə ɲąąwooɓo laa, ə haláá kulɔi pɛli laa Yai-Laa ɓa.